المشردة

الجزء 02

نون بدت مشوارها ...شايله سومه في ضهرها والدموع رسمن اشكال عجيبه في وشها ...

نون كانت مصرة اصرار عجيب! ..آمال لحقتها و كانو ماشات بسرعه ...والعربات ماشه جأيه فيهم ..مافي حد كلف نفسو يشوف البنات ديل مالهم....

الساعه 4 جأت ...نون تعبت وراسها لفه...

امال شالت سومه منها ...وقالت : انتي اقعدي ارتاحي انا حأواصل بي سومه ...

لما ترتاحي الحقينا ...

نون : ما حأرتاح إلا لما اشوف سومه مرتاحه...وقامت علي حيلها : يلا نواصل ...

مع آذأن الصبح وصلو المستشفي ...

نون : لو سمحتو عايزين دكتور !

بس مافي زووول اشتغل بيها ...

مسكينه ...هي مشرده! كيف ينتبهو لي وجودها حتي!

جرت غرفة الطوارئ والاصابات ....لو سمحتو اختي عيانه ...عليكم الله ساعدونا !

بس في ممرضه عاتيه كده طردتها :اتخارجي من هنا ! التقول نحن ناقصين مشردين ¡

اهلكم يجدعوكم تجو تضايقونا هنا¡

الكلمات دي كانت زي السم لي نون....

وقفت ليها غصه في حلقها لو شربت موية الدنيا كلها ما كانت حتنزل.

نون شافت دكتورة جرت عليها : عليك الله ي دكتورة تعالي شوفي اختي!عيانه شديد وانا خايفه عليها !

الدكتورة اشمئذت منها وقالت: شوفي ليك واحده من الممرضات انا مشغوله !

في شاب جأ لاحق الدكتورة وكان بناديها : ي رانيا لحظه بس..

هنا نون مسكت يد د.رانيا وقالت : بترجأك ي دكتورة تعالي شوفيها !

رانيا : ي بت بنادي ليك البوليس هداك قاعد بره..

الشاب : هي مالا البت دي!؟

نون : انت دكتور!؟

الشاب : خير ف شنو !؟

نون مسكتو من يدو و جرتو علي ناس آمال.

..آمال عاينت ليها والدموع ماليات عيونها ....

آمال : سومه ماتت ي نون ..

نون قلعت عيونها وجرت عليهم :لالالا سومه م حتموت!

انتي مجنونه ي آمال ...سومه ما حتموت .!

انا وعدتها انو هي حتدخل الروضه والمدرسه ...وكمان الجأمعه..

سومه يستحيل تموت..

وبدت تهز في سومه ...وتهز فيها بس مافي استجأبه!

الشاب خت اصبعو في رقبت سومه عشان يشوف النبض ...هزه راسو دلالة علي انو سومه خلاص...

الشاب : اسف بس شكلكم اتأخرتو ...الله يجعلها سلف!

نون ما شعرت بي نفسها الا وهي في الارض...

بعد شويه صحت ...كانت في المستشفي ..آمال كانت قاعده في الارض وخاته يدها في راسها ...

والدموع ماليات عيونها...

نون : اموله وين سومه!

جيبيها لي عليك الله!

آمال : سومه خلاص مشت...سومه خلاص ارتاحت من العذأب دأ!

سومه خلاص ارتاحت من البرد وضربت الشمس و الجوع.!

نون غمضت عيونها واتذكرت لما أماني صحبتها العمرها 16 سنه ولدت سومه وماتت بعد الولاده...اتذكرت الكلمات القالتهم اماني قبل م تموت ...: بتي امانه في رقبتك ي نون..ربيها وحافظي عليها ما يحصل ليها زي م حصل لي امها....

طبعآ امها عندها قصه....

وقصتها كيف حملت بي سومه ..والابو منو!؟

بعد شويه الدكتور جأ داخل : اها صحت !؟

آمال : ايوا ي د.خالد

نون فتحت عيونها وشافتو ...دأ كان الشاب النادتو يشوف سومه ...

خالد : معليش ...بعتذر عن الحصل معاكم ..

د.رانيا و الممرضه حيجو يعتذرو منك ...

نون : سؤال واحد ي دكتور ؛ هل اعتذأرهم حيرجع سومه !؟

هنا خالد نزل راسو ....

نون قامت ومعطت الدرب..

ارح نمشي ي آمال ..

آمال : اقيفي كملي الدرب.

نون : انا لو اشتغلته وشحدته ليل ونهار ما حأقدر ادفع حق الدرب دأ!

بعدين في مرض اكتر من مرض التشرد !

لا آمال لا خالد م قدرو يجأوبوها ....

نون : وبن جثمان اسماء!؟

خالد : في جهة خيريه اتكفلت بأجراءات الدفن .ولو عايزين فيكم تحضرو الدفن ..

آمال : لالا نون بالذأت ما لازم تحضر الدفن ..

نون : بالعكس ....

ديل اتوقعي منهم اي شي...البعيد شنة يخلوها ف التلاجه او حتي يعملو بيها تجأربهم ديك!

خالد ما رد ...لانو عارف انها موجوعه بسبب فقدها لاسماء ...عشان كده سكت....

بعد الدفن رجعو لي الكبري بتاعهم...

وكان عزو الكلب ف انتظأرهم ...تتوقعو عزو قصتو شنو !؟

وحيتصرف كيف معاهم !؟

يتبع....