ياسين : الواليد الله يهديك انا ماغانتزوجش
الحاج : كلت ليك غاتزوج بيها هيا غاتزوج بيها مايمكنش ليا نخوي بصاحبي وصاني عليها هادي 5 سنين مكنتش عارفك غاتبقى بلا زواج تاتكبر هيا الحمد لله عسى ان تكرهو شيئا وهو خير لكم فيها خير الا مت قبل غنتهنا عليها غتبقى دنب فرقبتي غاتزوج بيها يعني غاتزوج بيها بيتي رضايا تزوج بيها بيتي سخط دير لي بيتي
ياسين : ابابا الله اهديك راها صغيرة بزاف و راك عارفني ماباغيش نتزوج الواليد عافاك عفيني عندي واحد صاحبي باغي يتزوج باقي صغير هوا نزوجوها ليه ؟
الحاج : ياسيين هادي اخر هضرا عندي غاتزوج بالبنت الى مابغيتيش مانا باك مانتا ولدي.. اوا شنو ؟ نمشيو نخطبوها غدا ؟
ياسين : الله الواليد غدا مالك زربان
الحاج : اولدي تاحد ماضامن عمرو وديك البنت امانة فرقبتي جالوقت لي نزوجها ليك تاالا مت نموت مرتاح
ياسين : ماتكولش هاهكا الواليد الله اطول لينا فعمرك
الحاج : اميين اولدي يالله نكولو لخبار لماماك نفرحوها
تبع ياسين باباه وهوا ساخط عل الوضعية ماحاملش ديك العروسة لي غيتزوج بيها بز منو و هوا ليماحاملش گنس المرا من نهار لي خطيبتو فسخات الخطوبة بيه و بعد سيمانة دارت عرس و تزوجات خليجي عندو العيالات كلهم بحال بحال تابعين غي الفلوس وملي ياسين دار لاباس ولا من رجال الاعمال المهمين فالمغرب من بعد ما كان مهندس بسيط النفس لي فيه مارضاش بداكشي لي دارت خطيبتو لي تبعات سعودي على قبل الفلوس ف 5 سنين دار ياسين ثروة شركات كبار كان تايخدم الليل و نهار خدمتو و والديه هما حياتو متدين وتايخاف الله تايصلي ديما فالجامع و رضات واليديه عندو من الاولويااات ولكن الحاج و الحاجة زادو فيه ملي بغاو يزوجوه مراهقة
- - - -
فدار اخرى فحي راقي گالسا سلمى كاتبكي فبيتها
الام : مالك تاني ابنتي علاش كاتبكي ؟
سلمى : والو أ ماما غي توحشت بابا
الام : ياك ماخسر ليك هشام خاطرك ابنتي
سلمى : لا اماما عمي ماكاليا والو غي تفكرت بابا وبديت كنبكي
الام : عافا بنتي الا خسر ليك خاطرك اولا گاليك كلمة تجرحك غي گوليها ليا راكي فدار باباك ماتنزليش راسك راه واخا هشام راجلي نتي بنتي و عمري نفرط فيك و لي خسر ليك خاطرك مانرحموش
سلمى : لا اماما عمي هشام ضريف معايا ماتخافيش عليا
الام : غي گولي ليا شنو كاين انا عارفاه ما ساهلش غي گولي ليا اش دار ليك
سلمى : ولا اماما الله اهديك مادار ليا والو
الام : يالله ابنتي نخليك انمشي لخدمة ديها فقرايتك بغيتك تولي لولا فمدراستك شدي ليا الباك ب 17
سلمى : واخا ماما تهناي
