طوق الياسمين
همس القوارير
البارت الأول
عندما تجمع ورود الياسمين وتصنع منها طوقا يكون غاية في الروعه ابيض كنقاء قلوبنا ومترابط يد بيد مثل ابطال قصتي مجموعة نساء ولكل منها حكايه فاجتمعن ليكونن طوق من الياسمين لكل منهن عطرها الخاص
اني ياسمين مواليد الثمانيات راح احجيلكم قصتي من اجيت عالدنيا ترتيبي بالعائله قبل الاخيره احنا ٣ بنات و٣ اولاد وامي ابويه اول ما تزوجت امي ابويه سكنو بيت جدي ويه عمامي اثنين متزوجين واحنا كان البيت ضجه من الجهال بحيث ماكو راحه امي كانت حيل فقيره ومغلوب عليها وبيبتي كانت هي الأمره والناهيه بالبيت احنا نسكن جنوب البصره منطقه شعبيه واجتماعيه وكلشي عدهم عيب وميصير كنت سمره وعيوني نرجسي وكبار وشعري سبل بس قصيره شويه ولا سمينه ولا ضعيفه وسط ابويه صغير اخوته عمامي اكبر منه متزوجين ويانا بالبيت فد يوم گعدنا ويه ابويه بدت امي تسولف وياه
امي
يا رجال لشوكت احنا محكورين بالغرفه هذه جهالنا كبرت واخاف عالبنات من ولد اخوانك ميصير هالشكل لازم تلگانا حل
وكتها كان عمري ٨ سنوات تقريبا بصف الثالث ابتدائي
ياسمين
اي بابا والله ملينا عفيه نريد ناخذ راحتنا ونشتري تلفزيون لوحدنا
ابويه
بس ادعولي اخلص الشغله الي بيدي واطلعكم بيت ونرتاح
ابويه كان يشتغل نداف يعني يندف فرش ومخاد وجودليات ماخذها الصنعه من جدي وكانت قبل العالم ماكو جاهز مثل هسه لا يستمتعون بمنادر القطن الابيض والمخاد ابويه كان يموت عالدراسه كان هدفه يوگف بوجه الكل في سبيل نكمل دراستنا لان هو نحرم من الدراسه بسبب ضروف العراق الي كانت ولا زالت ما مستقره اخواني وخواتي كلهم بالمدرسه وفعلا ورى فتره طلعنا بيت لوحدنا كان حيل كبير اخذه ابويه بعيد عن بيت جدي اخذناه بالولايه كان مرتب بيه خمس غرف نوم وصاله كبيره واستقبال وگراج وحديقه صغيره بس مزارعين بيها شي بس ترابه مكان عدنا شي ننقله للبيت بس غرفة امي وابويه وهمين بدون سرير لان بعناه لان مكانت الغرفه تكفينا المهم اجينا وگعدنا عالحصيره امي جابت من اهلها طباخ عين وحده وجداري قديمه ومواعين كلها اشكالها مختلفه يعني من كل بيت رگعه هههه مو مهم اهم شي نرتاح واشترى ابويه حصران للغرف وسوالنا فراش انام عليه اما ملابسنا ضلينا نعلگهم عالحيطان بسامير بدينا من الصفر اهم شي بيتنا كبير وحلو ومرتب كولشي يهون المهم گعدنا واستقرينا الحمدلله وانتقلنا بمدارس قريبه علينا اني وخواتي بغرفه لوحدنا وامي وابويه بغرفه واخواني بغرفه وغرفتين بقن فارغات والهول اشترالنا ابويه تلفزيون وحصيره وضلينا نگعد نشوف براحتنا شگد حلو الاستقرار والسكينه صدگ لو گالو البيت وطن بدينا شويه شوي نجهز بالبيت كلما يشتغل ابويه يجيبلنا الناقص بالبيت حيل تعب وصبر لحد ما كملنا بيتنا وصار تحفه كنت اعشق الحديقه اني الوحيده الي اروح اشتري بذور بمصرفي واجي ازرعهن بالحديقه كنت اشوف الزرع بالبدايه يطلع ناعم ويوم ثاني ما الگاه طلعت الطيور تجي وتاكله واني اموت قهر لحد ما سوالي بابا تور ابيض وخليته عليه ثبته بخشب وبديت ازرع بيه طماطه وخضره وباميا من اشوفهن يكبرن گدامي اطير من الفرح واتذكر ابويه اشترالنا حنه وياسه ورد الصباح واني عبالك عيد عندي يوميه نص وقتي اگضيه بالحديقه واخواني واهلي شجعوني وحبوا الي اني سويته المهم بدينا نكبر وبدت احلامنا تكبر وصارت مو مال حديقه وزرع صار طموح وتفكير بالمستقبل خلصت ابتدائيه وصرت متوسطه وجدي توفى الله يرحمه وبيبي لان مكانت مرتاحه عند جناينها الباقيات اجت سكنت يمنا بس جانت يوميه تداهر امي بسوالفها وميعجبها العجب كلشي عدها احساب وكتاب وما ترضى بسهوله بس كانت حيل تحبنا وتحب ابويه كان المفضل عدها عن باقي اخوانه
لحكايتي بقيه
