ثمار العار بالحلال
للكاتبةnuha-d-h
مساء الانوار قرائي الاعزاء🥀🥀🥀🥀🥀🥀
((((((((((((((())))))))))))))))))))
رجعت لبيت اهلي كلش تعبانة وراسي يريد يطك من التوتر الي صار اليوم عمري ما راح انساه
دخلت
لگيت خالتي موجودة عدنا هي وبناتها
سلمت عليهم انتبهت على امي ضايجة ووجها ميتفسر
دورت بعيوني على حسن ابني
-يوم حسوني وين اشو ماكو مالة صوت ما اجاني
يستقبلني من الباب مثل كل يوم
ام سهى-حبيبتي سهاوي حسن اجة عليه عمة راجح اليوم واخذة يكول الوالدة رجعت من الخارج جانت مسوية عملية واليوم يالله كدرو ياخذوه
حسيت واحد خمط روحي وتركني هشة وخاوية
صرت مجرد جسد
كعدت على اقرب كرسي الي
انتبهت على واحد خلة بيدي كلاص مي(ماء)
رفعت راسي شفتها نور اختي
ام سهى-شربيلج شوية مي بللي ريكج
سهى بصوت فارغ واهن محسيت على دموعي من نزلت
-يوم ليش اخذوه اي موجان مرتاح بحضني
وصحتة صارت زينة من بعد ما جابوه الي جلد على عظم سودة علية يمة حسوني
اسألج بالله يمة من اخذة عمة خو ما گام يبجي علية
اسأل امي وگلبي يريد يطلع من صدري
الحياة شكد قاسية وابد مو منصفة
لا يكسر خاطرها طفل صغير ولا تحن على گلب ام ملجوم
ام سهى-لا بالعكس فرح من شاف سيارة وطلعة ركض گدام عمة طاير من الفرح
طبعاً اعرف كلش زين امي تريد تصبر علية
بس اني اعرف حسن ابني متعلق بية خصوصاً هسة باخر اشهر
حسيت بروحي لا حول ولا قوة
اصعب شي على الشخص من يكون مابيدة شي يقدمة
اعرف ابني حسن ديعاني عند اهل ابوه هو كلة بيد
نسوان عمامة اعرف بيهم ما يعاملونة بعطف
لان ابني من اجة من عندهم اخر مرة
من نزعتة ملابسة كان اثر ازرق على جسمة مثل الضرب
هو طفل سألتة بوقته گلي عمة توحاد (سهاد)
والله بيومها گمت اگمز من القهربس
شنو بيدي حجيت لأمي تگلي گعدي وسكتي
كلشي لتحجين لانوب يبطلون بعد ميخلونة يجي لعندج على الاقل يجي وتشوفي وتطمنين على اخباره
احسن من ماكو
.......
متت قهر تركتهم ورحت صعدت فوك لغرفتي
وگوة بدلت ملابسي نزعت الجبة الاسلامية وباوعت عليها وشمرتها بالگاع بزاوية الغرفة
-وانت هم راح يجي اليوم الي تتركني لوحدي وتروح
بعد منا ورايح ما اتعلق بأحد واعلق. عليه الامل
ونمت جفي على وجهي
وحضنت بجامت حسوني واشم ريحتة بيها
وصرت اشهك وابجي مثل الطفلة
يمة حسوني ابو جسم الترف شلون بيك منو يحميك من اثر ضربتهم صرخت صوت وكتمتة بالوسادة
يا ناس اريد ابني
بالبداية من اخذوه مني كنت مأمنة ان همة اهلة وراح يديرون بالهم عليه
لكن من اجاني وصرت الاحظ اثار الضرب على جسمه گمت اخاف عليه منهم
ربي برد گلبي بابني رجعة لحضني
ما اعرف هو اني الي محتاجتة لو هو المحتاجني
بس الظاهر اني الي محتاجة قربه
لان اني وحسن نشترك بنفس المعانات
احنا الاثنين منعرف شنو مصيرنا بالحياة
هو راح يظل من بيت لبيت واني راح اظل معلگة
لان احنا الثنين دنعاني
نتيجة ثمار العار الي ديلحكني الى يومي هذا
