صراحة مدعومة..طارق اللبيب

١٣

ليميا واقعة في الارض ونازفة دم .. ابوها والباقر رفعوها فوق السرير ..وحسين خلاها وطلع ..لينه جات خاشة لقت اختها في الحالة دي فكتها صرخة .. زي صفارة الحكم بتاعة ضربة الجزاء .. الحلة كلها سمعت الصرخة .. خصوصا ناس عمر بيتهم عالي فوق تلة.. يعني الصوت بكون وصل ناس هنادي ..
يازول لمن صرخت كدا ابوها قمز عليها عايز يكفتها فوق خشمها ده .. ليميا لمن ختوها فوق السرير فتحت .. ومسكت راسها متالمة ..
لينه قالت لامها مالا ليميا يا امي؟ قالت ليها ضربها حسين ؟ قالت ليها في شنو؟
قالت ليها عليك الله يالينة امشي من قدامي النشوف اختك .. ودخلت الام شايلة ليها بشكير وموية. عشان تغسل ليها الدم .. ليميا ماسكة راسها وتبكي قالت ليهو يا ابوي .. راسي ح يتفجر..
قال ليها اهدي اهدي يا ليميا .عشان لو راسك ماخف نمشي المستوصف .. امها قالت ليهو لازم نعمل ليها صورة. الحصل شنو ما معروف .. قال ليها اصبري يا ام الحسين ..
غسلو ليها وشها وخشمها الاتورم .. وشفتها العليا من فوق اتجرحت بضغطة الاسنان .. وماقادرة تتكلم .. جابو الموية الباردة وبعملو ليها في مكمدات ..
وكل شوية هي ماشة احسن .. ماشاء الله البت روحها روح كلب .. غايتو الضربة الضربها ليها الزول اب رقبة ده .. انا قلت ماتقوم منها تاني لكن الحمد لله .. بس المشكلة وين؟ .. نسوان الحلة انكسرن في البيت لانهن سمعن الصرخة ..واول مايلاقن جنب الباب لاقن البت الاسمها لينة ..
واحدة من الحريم قالت ليها مالكن يا لينة؟ الحاصل شنو نحن قلنا في زول ضربتو كهربا ولا بيت وقع ..
قالت ليها دي اختي ليمياء ضربها حسين ..
لكن النسوان لمن دخلن جوة يشوفن البت ..سألن امها قالت ليهم وقعت من السرير .. الحريم كل واحدة بقت تعاين للتانية ..
والكلام اختلف ..البت بره قالت ضربها حسين.. والام قالت وقعت من السرير يصدقوا منو يابنات امي؟ .. ده كلام فوق عيون النسوان من غير صوت ..
المهم قالن كفارة ان شاء الله حسنة واجر.. والله اتخلعنا لكن الحمد لله .. ترا البت ماعندها عوجة.. ضربة بسيطة والورم ده هسي بنفش ..
الحريم ديل زي اربعة لمن هن مارقات في نسوان لاقنهن في الشارع
قالن ليهن ديل مالن يانسوان ؟؟
واحة قالت لهن ..دي واحدة في التومات اخوها ضربها لكن ناكرنو .. تكون مسوية شنو؟ الله اعلم ..
وديل دخلن وديل مرقن .. والمراسلين الاخباريين اشتغلو وبالتلفونات ..
قالو ليميا بت عمر اخوها حسين ضربها لامن غمرت .. وكلها نص ساعة .. والخبر انتشر في الحلة كانتشار النار في الهشيم ..
بعد البت ارتاحت شوية .. عمك عمر ضرب لحسين ناداهو .. قال ليهو..  انت ياحسين البت دي ضربتها في شنو؟
حكى ليهو الكلام .. قال ليهو تركب هسي تمشي تفتش ياسر ده من تحت الارض..  وتشوف الكلام ده صح ولا كضب ..
قال ليهو يا ابوي الزول ده انا لو لاقيتو..  بخفس بيهو الواطه..
قال ليهو امال داير تعاين ليهو زي الباقر الني ؟ لازم تطيرو تاني لو لاقاها في الشارع مايرفع عينو عليها ..
وانا ليميا قادر اتصرف معاها .. الكلام ده كلو كان في عصر يوم الاربعا .
والحصل شنو تاني مع الناس ديل الله اعلم..
اما هنادي بعد ما عرفت الكلام من شادية وشروق  .  اتأكدت انو
الباقر وامو بريئين من الكلام ..تاني ما اشتغلت بالموضوع ..
اهااا ياجماعة  ..تاني يوم الصباح من الكلام ده ..
شادية سمعت بانو ليميا اخوها ضربها..  وهسي راقدة في البيت .. بس لسع ماعرفت اخوها ضربها في شنو؟ وقالو الكلام داسنو .. وامها اي زول يجي بتقول ليهو وقعت براها ..
قامت شادية خالة هنادي ساقت معاها سمية .. سمية زوجة اسامة متذكرنها طبعا".. ساقتها وماشات يكفرن لي ام الحسين لبنتها ..
في الشارع بتونسن .. الكلام ده صباح الخميس ..
قالت ليها شفتي ياسمية سبحان الله .. العازة الكضابة تألف في الناس وتكضب ..
قالت ليها هوي ها .. انتي مافاهمة اي حاجة ..
امبارح بالليل .. اسامة قال لي هنادي طلعت بريئة .. ونحن مشينا اتأكدنا من كدا .. معاي اكمال والباقر ..
قلت ليهو برئتوها كيف .. قال لي فتشنا تلفون ياسر مصطفى .. لانو الباقر كان مصر قال البت عندها علاقة مع ياسر .. لقينا مافي رسايل ولاشي .. حتى الولد قال انا مابعرف لهنادي اي شي كعب .. والباقر لمن شاف تلفون ياسر واتاكد منه .. حتى قلبو اطمأن .. ده كلام راجلي من خشمو لاضاني ..
يعني ياشادية فعلا الباقر كان شاكي في هنادي ..
وكلم اصحابو كمال واسامة .. الكلام ياشادية العازة ماجايباهو من راسها .بس المراة نكرت سااااكت .. غايتو الناس ديل اعوذ بالله ..
شادية بعد ما ماشة وقفت .. وقبلت على سمية قالت ليها انتي متأكدة من الكلام ده؟ قالت ليها والله متأكدة تأكيد شديد ..
شادية خالة شروق .. راسها جاط وماعرفت تقول حاجة .. بس قالت ليها .. ترا الباقر وامو ربنا انتقم منهم في بتهم.. اليخمو ويصرو الحلة كلها شايلاهم في خشومها .. قالت ليها فغلا والله عشان اتهمو بت الناس المسكينة بلا سبب ..
شادية حكت لي سمية .. كل الحصل في بيت ناس هنادي .. وطردت البت .. وكلام شروق .. وكلام ادريس .. كلووو..
وقالت ليها طبعا ياسمية .لسه هنادي قايله الباقر وامه ابرياء .. لكن الخبر ح يصلا بس النجي راجعة  هههههه ..
غايتو جنس حالة !!!
بعد رجعن من ناس ام الحسين .. سمية لمتين تصل لي راجلا اسامة وتحكي ليهو تفاصيل الاخبار .. اليومين دي اسامة في اجازة وهي لاقية فرصتها ..
جاتو قالت ليهو حصل حصل حصل .. بالتفصيل الممل ..
بس رد  عليها بكلمة واحدة قال ليها ..سبحان الله شوف الثقة دي بالله ..
قالت ليهو ثقة شنو؟
قال ليها الراجل الفاهم ..لمن يكون واثق في بتو .. وعارف عزو كلام الناس مابهزو .. ناس هنادي ديل .. ناس ملايكة ..ما المفروض يسكنو في الحلة دي .. دي حلة ملعونة ..
قالت ليهو اووووب علي انا من هنادي الملايكة ..لفيت البلد كلها عشان تطلعها براءة .. وهسي تشكر فيها ؟؟ انت ياراجل مشكلتك شنو؟ ماتراعي لي شعوري انا زوجتك ..
قال ليها عليك الله ياسمية .. انا جيعان لمن راسي ده موجعني قومي سوي لي فطور..  بعد كملتي حوامتك ولقيط الاخبار  ..
بعد سوت ليهو الفطور قعد يفطر قريب الساعة 12 معاهو ولده الصغير جاي من المدرسة .. بس جات قعدت وهو يفطر ويهظر مع الولد .. قالت ليهو يا اسامة .. والله انا ماحارقني شمار قدر شمار ميادة بت العازة .. والله الا امشي اسأل منها شروق ..
اسامة قال ليها اسمعي .. شيلي الاكل ده من قدامي..  انا خليتو الفطور .. قالت ليهو انا آسفة .. عليك الله تكمل اكلك .. والله تاني خشمي مابفتحو ..
قال ليها معليش بطني طمت من الاكل..  ولبس نعلاته وطلع ..
قالت ليهو ماشي وين؟ .. قال ليها ماشي ناس خالتي .. في حاجه؟
قالت ليهو ايوااا ماشي لي كمال .. عشان تمشو بثبتو براءة ميادة ؟..
الزول عاين ليها كدا ..وقرب يبكي من المغسة والاحباط ..
طلع طوالي .. مشى لاقى كمال وقعدو يتونسو ..  قال ليهو والله المراة دي احمتني الفطور .. ياخي بس شغالة نقة وشمارات .. ما مخلية زول في حاله .. قال ليهو اها تاني في شنو؟
قال ليهو والله ياكمال انا مامالي راسي غير هنادي وابوها .. اتخيل لمن سمعو انو الباقر وامو متكلمين في سمعة البت..  ردة فعلهم كانت شنو؟
قال ليهو اها شنو؟ قال ليهو سكتو .. ولا اي شي .. ولا مشو سألو ولاعملو مشكلة ولا يحزنون ..
كمال قال ليهو يا اسامة اقول ليك كلام ؟؟ انا والله ماكان عندي رغبة في زواج .. لكن والله هسي جاتني رغبة شديدة اتزوج  هنادي دي..
زالله اليومين دي بس .. معشعة هنادي في خيالي .. ما قادر اصرفها من جواي كلو كلو ..
والله دي مراة سترة يا اسامة .. ما دام الله صرف منها الباقر ده ..حقو اقوم اتحرك .. انت رايك شنو بقبلو بي الناس ديل ؟
اسامة قال ليهو . قال ليهو طيب انت راجي شنو .. راجي المولد؟ كيف مايقبلو بيك مالك؟
بس انت هنادي علاقتك معاها كيف ؟ قال ليهو والله بس سلام ومرحب كيفك هنادي.؟..  مرحب كمال .. وبيني وبينها كل الاحترام والتقدير..
لكن طبعا زي ماعارف .. احتمال عشان مشكلة ابوي .. مايقبلو بي .. عارفين مشكلة ابوهو شنو؟
الى اللقاء ..