صراحة مدعومة..طارق اللبيب

١٢

ادريس ارتبك واتفاجأ واتخلع وجا خلا المعرض فاتح .. لابس ليهو شبشب كل مرة يتملص منو ويلبسو راجع .و في النهاية جا شايل فردة وفردة لابسها .. من اللخمة .. جاي ماشي على البرنده .. وشروق قاعدة وليمياء طلعت ..
قال لي هنادي .. كدي اهدي ياهنادي شوية .. وفهميني بي رواقة الحاصل شنو؟
قالت ليهو موش انا قريت لك الرسالة بتاعة الباقر.. انو هو قال عندو واحدة رجعت ليهو عشان كدا خلاني .. اتخيل مشى قال لامو انا خليتها لانها ماكويسة .. دي انا يا ابوي .. سبحان الله .. انا ماح اخليهم ..
قال ليها كدي دقيقة .. قال كدا لمنو ؟
قالت ليهو اسمع من شروق ..
شروق قالت ليهو والله ياعمو الكلام ده منتشر في الحلة ليهو تلاتة اربعة يوم .. وانا لو ما جات ليميا ماكنت عايزة اقولو .. انا شاديه ضربت لي ونادتني عند ناس السرة وحصل حصل ..
قال ليها يعني الكلام طالع من ام الحسين كلمها ولدها؟ ..
طيب ما مشكلة .. من حقو يخلي البت المانافعة..
بس عرف كيف انو بتي انا ماكويسة ؟
قالت ليهو والله ماعارفة ياعم ادريس .. بس الكلام ده انا واجعني
قال ليها وهسي الحصل شنو يعني؟ وليميا مشت مالا؟ ..
حكو ليهو انها جات ترجع المياه الى مجاريها ..
قال ليهم طيب كيف هنادي ترجع ليهو وهي زي مابقول  كدا؟ الكلام ده فيهو ان
واحسن يا هنادي مانقوم بالحماقة ساي وبعدين نندم ..
وبعدين ياهنادي الزول لمن يزعل مابتصرف صاح .. انتي خليك هادية .. وخليني افكر برواقة في الموضوع .. بعدين نشوف ح نعمل شنو؟ بس انا عايز اسألك سؤال .. انتي موش واثقة في نفسك انتي شنو؟
قالت ليهو واثقة يابوي ..
قال ليها وانا واثق منك .. وامك واثقة منك..  واي زول بعرفك عارف ان انتي شنو؟ مالك ومال كلام الناس ؟ من تابع الناس مات هما يابتي ..
وهو لو راجل وعنده كلام اليقولو قدامك .. ماينشي يقولو للحريم ..
نحن الشمشرة بتاعة الحريم دي . ما بنقوم فيها .. ولا بشتغل بيها .. يخسي على الراجل البشيل القوالة مع الحريم ..
بس انا عايز اسألك سؤال .. ليميا الجات دي ذنبها شنو تطرديها ؟؟
انتي غلطانة في الموضوع ده .. دي ماقالت كلام ولانقلت كلام .. دي زولة جاتك محضر خير..
المفروض تتكلمي معاها براحة وبي منطق..  وتقولي لي ليها انا رافضة الموضوع ..
قالت ليهو صاح يا ابوي ..لكن انا زعلانة والله قلبي مولع نار .. قال ليها والله يابتي التهمة حارة .. لكن الزول المفروض يتريث وقت الزعل.. شفتي الغضب بعمي الزول كيف؟
وادريس عاين لي شروق لقاها مستغربة في البرود بتاعو ..
قال ليها انتي ياشروق مستغربة اني بارد كدا ..
والكلام ما أثر فيني ليه ؟ لاني واثق من بتي .. وعارف انو ربنا ح ينتقم من الناس البتكلمو فيها بالباطل ..
قالت ليهو والله صدقت ياعم ادريس..  ان شاء الله ربنا يدينا صبرك واخلاقك دي ..
ادريس قعد..  وقال استغفر الله العظيم من كل ذنب عظيم .. انتي عارفة ياهنادي .. البلد دي بقت عايشة على الاشاعات والكلام في اعراض الخلق..  نسأل الله السلامة .. وانتي طبعا متعلمة وعارفة انو امنا عائشة .. طلعو فيها اشاعة بالافك زي ما قالو عنك ..
انتي قولي الحمد لله..  انو ربنا ختاني في مكان عائشة .. ما ختاني في مكان ابن سلول ..
والله انتي ماعارفة الانتقام الرباني الممكن يحل بالناس ديل شنو..
ان الذين جاءوا بالافك عصبة منكم لاتحسبوه شرا لكم بل هو خير لكم .. والله يا هنادي لي خير ليك .. وانا ده كلام متأكد منه ..
الاشاعة ياهنادي بألفها الحاقد .. وبنقلها الخسيس .. وبصدقها الأحمق ..
وقعد يحكي ليهم في قصص وحكايات..  بتاعات اشاعات طلعت في ناس .. وشنو الحصل للناس العملو الاشاعات .. والعواقب الوخيمة ..
في اللحظة دي شادية خالة شروق اتصلت..  علي شروق في تلفونها .. قالت ليها انتي وين ياشروق ؟
قالت ليها انا مع ناس هنادي في البيت .. قالت ليها ماشفتي الليلة الحصل في القعدة عند ناس السرة؟
قالت ليها اها تاني في شنو؟ قالت ليها جات ام الحسين وحصل حصل .. والله العازة وام الحسين قربن يتماعطن .. والعازة طلعت كضابة .. ام الحسين ماقالت ليها اي كلام .. العازة الفت الكلام من راسها .. قالت ليها ده كلام شنو يا شادية ؟؟
قالت ليها والله زي ما اقول ليك .. العازة هجمت فوق ام الحسين الكلام بالكضب ..
شروق قالت ليها انتي هسي في بيتك؟ تعالي لينا عند ناس هنادي .. نحن راجنك .. عشان يسمعو الكلام ده من خشمك ..
طبعا هنادي وابوها قاعدين يسمعوا في الكلام..  بس عرفو انو الكلام بخص هنادي ..
هنادي قالت ليها في شنو يا شروق .. تاني قالو شنو الناس ديل؟ .. قالت ليها اصبري شادية جايانا .. قالت الكلام طلع كضب .. وام الحسين والباقر ماقالو الكلام ده .. قالت ليه معقول؟؟
يعني هسي انا هايجه في الفاضي ؟ كرعلي يا شروق طردت ليمياء بلاسبب ..
ابوها عاين ليها كدا .. وقال ليها شوفتي يا هنادي؟ .. انا هسي لو قمت بالزعل ..ومشيت للناس ديل في بيتهم .. ومسحت بيهم الارض .. كنت ندمت صح؟
بس الحمد لله انا ما الراجل البقوم في قوايل النسوان ..
ناهد  قالت ليهو انت الزيك منو يا صباح الخير ..
طبعا الجوطة دي كلها ومنى ام هنادي راقدة جوة مصدعة وتعبانة .وماسامعة اي حاجة .. ومامعروف لو سمعت الممكن يحصل شنو .
لكن رحمة بي هنادي .. ولانه ربنا واقف معاها .. امها لغاية الان ماعندها اي خبر ..
لحظة قبل ما تجي شادية .. نشوف ليمياء .. طبعا وصلت هناك البيت وماشايفة قدامها كويس .. لقت الباقر نايم في الصالون..  ابت تصحيهو ..
طبعا مالقت امها .. لسع ماجات من ناس السرة .. انتظرتها لمن جات  ..   وحكت ليها الحصل .. امها قالت ليها .. مخير الله الباقر والله وقع في مشكلة .. ربنا يجيب العواقب سليمة .. يعني يادوب عرفو القوالة هم؟ ..
قالت ليها ايوة من شروق . وطوالي طردوني قالت ليها  . بركة الطردوك .. اول انتي ماشة ليهم ليه؟ الباقر براهو مابشوف في الشارع ..
قالت ليها يا امي والله انا الناس ديل مابحبهم ولابحب امشي ليهم . بس الباقر ضغطني .. هو شال تلفوني وابا يديني ليهو .. قال لي الا تمشي ليهم حتن اديك تلفونك .. قالت ليها امشي قولي ليهو امي قالت ليك جيب  التلفون ..
اها لمن مشت بي غادي للباقر لقتو صحى . وماسك تلفونها يقلب فيهو .. قالت ليهو والله حصل حصل حصل ..
الباقر قال ليها اصلك انتي نحس..  واي حتة يرسلوك ليها .. مابتجيبي خبر خير .. قالت ليهو طيب اديني تلفوني ..
قال ليها ابيت ..
بس البت هاجت فيهو..  وقعدت تكورك عشان امها تسمعها .. قام عليها داير يضربها قامت جارية .. وفي جريتها ديك صادفها اخوها حسين الكبير .. جاي يادوب داخل .. قال ليها في شنو يا ليميا .. قالت ليهو الباقر شال تلفوني وابا يديني ليهو ..
حسين جاهو .. قال ليهو اديها تلفونها يا الباقر .. قال ليهو لالا مابديهو ليها لمن تعرف انت شلتو منها ليه؟
تعال اقعد اولا حصل حصل حصل .. ولقيناها مرسلة رسايل كيت كيت .. قال ليهو انت يا الباقر قريت الرسايل بي نفسك؟
قال ليهو نعم قريتها والله .. وكمال برضو قراها .. كلها لمن يلاقيك أساله .
حسين  قال ليهو .. دي تصرفات اختك ..وانت قاعد زي الخايب ؟؟ توف عليك وعلي وشك ..
بس يازول حسين عيونو انقلبن حمر .. وبقى يرجف .. وقام علي حيلو مشى لي ليمياء بي غادي. لقاها قاعد جنب امها ..خايفة دايرة تموت من الخوف .. لانها بتخاف من حسين شديد .. ومابتخاف من الباقر..
حسين قال ليها قومي تعالي .. قالت ليهو انا مالي؟ والله الباقر كذاب .. قال ليها بقول ليك قومي تعالي ..
ساقها وداها بي غادي .. قال ليها اقعدي هنا ..
وضرب تلفون لي كمال ..
قال ليهو يا كمال انا بسألك سؤال واحد بس جاوبني عليهو ..
هل انت قريت رسايل من ليميا اختي .. في تلفون ياسر مصطفى؟
ولا الباقر ده كذاب ؟ كمال قال ليهو صح .. الباقر ماكذاب ..
بس حسين قفل التلفون من كمال.. ومسك البت من شعرها وضرب بيها الحيطة .. ضربة شديدة .. البت من الحيطة جات واقعة ضربت في كراع السرير .. ووقعت في الارض مغمى عليها ..
امها جات جارية وابوها جا جاري..  ويرشو فيها بالموية والدم مارق من خشمها ونخريها .. ربك يستر ..
الى اللقاء ..