المليحة والمهووس

الجزء الثاني

المليحة والمهووس
الجزء الثاني

كعدت راسي ثكيل والم بكل جسمي..
حاجتني امي بس اباوعلها..
شمس يم راسي تبجي وتحاجيني..
اني اباوع بعيوني بس..
كالو الشرطة يريد يحققون..
الدكتور كلب الدنيا ..
لان وضعج صعب..
وجسمج كله اثار..
مجاوبت شي ابد بس دموعي تنزل..
دخلت خالتي تقربت مني ضليت ارجف..
لزمتني رجفة وابجي..
حاجتني ماكدرت احجي..

ضليت كم يوم حد ماوضعي تحسن شوي..
رحمي تعبان لان الطفل متدمر بداخله..
وسوولي عملية بس وضعي حساس..
لحد اللحظة ماشفت منتصر..
كتبولي ع خروج وطلعت..
اجيت لبيتنا بس اني جسد بلا روح ..
اصفن بالوجوه ودموعي مستمرة..
ياترى ليش هيج صار؟؟
معقولة اني معاشرة وحش..
شلون حبيته شلون اختاريته..
رغم الكل ماحبذ ارتباطي بي...

جانو يحاولون يحاجوني رادوني انطق ماكو..
عرفت صوتي راح يعني حالة نفسية..
يكعدون يمي يحجون خالتي تزورني..
حماتي عبير تجي بس اشوفها اتخبل..
ضلو ميخلوها تشوفني..
لان احسها هي سبب كل الاني بي..
رجعت بذاكرتي لشهر العاشر ..
مرحلة اولى بالكلية...
كاشخة ولبسي عكس طبعي..
صح مؤدبة ومالي علاقة باحد ..
بس لبسي فري..
هواي احصل انتقادات..
بس جان عاجبني..

اني سمرا زهرية بشرتي..
وعيوني سود كلش..
تبين جنها مكحلة..
وحلكي منفوخ ع طبيعته..
وطولي عادي بس جسمي مرتب..
شكلي يجذب حسب قولهم..

جنت رايحة للكافتريا اني واطياف صديقتي..
دك فوني اختي شمس..
_الوو هلا شموسه ..
_هلا حوراء حنجيج اني وضيف تستقلينا؟
_يبوو ترى مااعزم احد من هسه..
_فكر احنا نعزمج بس انت وين؟
_بالكافتريا تعالي...
كاعدين اني واطياف ناكل لفات..
اجت شمس وياها ولد و بنية شكلها مو غريب من بعيد..
تقربت اكثر عرفتها عبير..
صديقتي بالمدرسة جانت بس بطلت وتزوجت..
لان تحب ولد ودرو بيها اهلها ..
وبسرعة خطبها وتزوجت..
وانقطعت اخبارها لان ماعندي فون اتواصل وياها..
تقربو وسلمو حضنتني عبير وبوستني ضلت تبجي..
يمكن بالخمس دقايق حضن وبوس مافكت عبير..
الا ان الولد وياها كال كافي خلصتي البنية..

ضحكت هي عافتني كالت..
عبير..اعرفج اخوية منتصر ..
سلمت عليه بس اني مدنكة..
كعدو وضلينا نسولف شوي..
كتلها شعجب هنا..
كالت بت خالي عدها مناقشة رسالة ماستر وعزمتنا..
وشفنا شمس بالصدفه وسالتها عليج وجابتني..
_لج مشتاقتلج هواي مشتاقه لكعداتنا..
_ايي بعد لزمتج وين تطيرين..
انطيني رقمج يلا لا انسى..
انطيتها رقمي وولاحظت نظرات اخوها عليه..
صح ماباوعله بس تبين..
شوي ترخصو وكامو..

شمس..لج هذا تذكري اخوها؟جان يوصلها بالمدرسة..
اشو نفس طولة ههههه...
_عابت شعلينا بي..
تدرين ناسيته ولا اتذكر شكله..
اي ناسيته بس هو خوش سوالج سكنر ..
_شلون؟؟؟
_صافن عليج ومن تحجين..
اطياف_انتبهتله اني هم..
نظراته ابد مو راحة..
ضلو يحشون بالولد وميلحكون..

مرت فترة واني وعبير نتراسل..
واخابرها وتخابرني دوم..
الى ان بيوم خابرتني كالت اريدج بموضوع..
كتلها كولي شنو؟
_حوراء اخوي منتصر يريد يخطب..
وكلش انعجب بيج وكال احسن من الغريبة..
بس بالاول يريد يتعرف عليج حتى تتفاهمون..
_ابد عبير ماكدر..
يريد يجي يخطبني من الباب ونتعرف بالخطوبة..
بس علاقة ماكدر مستحيل..
_لج عوبه مو احسن من ما تنخطبين وتعوفي لو متفاهمتو..
عاد هيج مو رسمي احسن..
_لا لا سدي السيرة عفية..
ضلت عبير تلح عليه كل يوم..
حجيت لاطياف كالت يولي يريدج يجي من الباب..
اصريت ع رايي اني هم ..

ورا كم يوم بالدوام دك عليه رقم..
اني ماجاوب ابد اخاف..
جان اكو خدمة يمكن اسمها باي باي..
اي رقم غريب اسويها اله..
كلت اذا رجع دك اسويها..
صدك دك مرتين واني بالمحاضرة..
اخر شي سويتها اله..
وراها دك ثاني!!!
استغربت وخفت..
اخاف احد من اهلي لو صاير شي..
دك فتحت خط بس ماحجيت..
_مرحبا ست حوراء اني منتصر..!
_نعم عيني تفضل؟؟
_الناس ترد السلام اول!
_وعليكم السلام تفضل صاير شي؟؟
لا بس اني بالكلية وحبيت امر عليج اسلم!
_ها اسفه عدي محاضرة من رخصتك باي..
سديته واطياف يمي..
تشجع بيه وتكلي زين سويتي..
ضلينا نحش بي الا ان سمعنا واحد يسلم..
منتصر..مرحبا ست حوراء شلونج؟
_اهلا وسهلا شلونك عبير شلونها..
_زينين بخير ..
حاب احاجيج بموضوع لوحدنا؟
_اسفة ماكدر نوكف سوا اخاف تعرف الحجي..
خزرني صارت عيني بعينه بس كتم غضبه..
_لا منطول عشر دقايق بس..
_اوكي تفضل..
مشينا ع جهة كال..
_ليش متقبلين نتعرف ابالج شخص؟؟
_لا ابد بس اني اخاف واستحي..
_انت انطيني فرصة ومتندمين ..
واحنا كبار وواعين نعرف نتصرف..
ماعرف ليش طاوعته كتله ماشي..
ترخص واني رجعت يم اطياف..
سالتني كتلها ماكو شي هيج..

ضل كم يوم يراسلني يعرف بنفسه..
هو مهندس يشتغل بشركة اجنبية ببغداد..
اكبر مني بسبع سنوات..
جان اسلوبه سلس بالنقاش ويعرف يحجي..
يعني مو فاهي لو ماعنده مفردات..
بس لاحظته يدقق ع كلشي..
جان يكلي انت رح احسن بيج النسل..
اطفالي يطلعون يشبهوج مملوحين وحلوين..
هو شكله مو حلو بس مرتب..
يعني فرق شاسع بينه وبين اهله..
كلش شكله مو حلو ..
بس تولعت بي وردته جان بعيني يخبل..
رغم هو قصير واسمر عادي لونه ..
بس عيونه صغيره كللش وخشمه قصير ..
يعني اطياف من ركزت بملامحة..
ضلت تكمز تكلي اني لو مكانج..
لو يصبو ذهب ماقبل بهيج واحد..
لج هذا يسد النفس..
بس اني انجريت اله وردته..
مرت فترة واحنا بس نتراسل ونتخابر منلتقي..
تقريبا ورا ست اشهر اعترفلي بحبه..
وضلينا نحجي رومانسيات..

جان يتصل بالبيت عليه هواي ..
بس مااجاوب بسرعة حسب الاجواء يمي..
جان جهازي ميسكت..
يعرف بيه مااجاوبه بكل وقت حاجيتله عن وضعي ..
بس يخابر هو ومتواصل..
بيوم اتصل بيه المغرب جنت اشر الملابس بالسطح..
محد يمي جاوبته ..
_هلوو حبيبي شلونك..
_لج هيج منج هيج من اهلج !!!اليوم اطيح حظج!!!!!!
شكو شصاير؟؟؟؟
شنو هالالفاظ شبييييك؟؟؟
_اسكتي كلبة هو العتب مو عليج ع اختي..
عرفتني ع هيج وحده..
_ترى هواي تجاوزت واختك شعليها بلة؟؟؟
تولي كتلتها كتله سحلتها سحل!!!!

للحكاية وجع
بقلم شقراء(قمر كانون)