أنين ...كره ...انتقام...حب ...نهاية مجهوله (لعبة الشطرنج)

9

البارت التاسع(اتمنى ينال إعجابكم)
&&&&&&&&&&&&&&&&&&&
بين سواد الليل وظلمة السماء ونور القمر
- ااااه وش فيني يالله
غسل وجهه وطلع من الحمام(أكرمكم الله) وجلس على الكرسي وهو يمسح وجهه بالفوطه
سليمان وهو يمسك رأسه:وش صاير لي راسي أحسه بينفجر
رجع نفسه على وراء وريح رأسه على الكرسي وهو يضغط على جبينه:اااااااه
يحس ان الدنيا تدور فيه وحس انه بيرجع مره ثانيه وراح للحمام (أكرمكم الله) يرجع وهذي حالته من يوم جاء من البر من قبل أمس إلى الحين

&&&&&&&&&&&&&

في الصباح وفي المدرسه بالتحديد
ناديه:سلام
العنود باستغراب:وعليكم السلام
ناديه:أنتي العنود
العنود:ايه من أنتي
ناديه:انا وحده من زمان ودي أصير صديقتك بس كل مره أتردد أكلمك
العنود وهي تلف وجها:أقول توكلي على الله أحسن لك
ناديه وهي تجلس:وش دعوه انا كل اللي قلته ابغى نكون أصدقاء وبس
العنود:وآنا ما ابغى أصادقك
ناديه:ليه
العنود وهي تاشر على راسها:كيفي
ناديه:بس اللي اعرفه ان غدير تركتك
العنود:وأنتي وش عرفك بغدير بعدين أنتي وش دخلك
ناديه:انا عارفه ليه تركتك
العنود باهتمام:ليه
ناديه:لأنها تغار منك وحاسدتك
العنود:قولي غير هالكلام ويا ليت لو تقومين وتفارقين يكون أحسن
ناديه ببرائه:انا سمعتها
العنود:وش سمعتي
ناديه:سمعتها تقول للبنات انها شافت بيتكم والعز اللي انتم عايشينه وأنكم ما تستاهلونه وان المفروض هي وأهلها مكانكم
العنود:أنتي كذابه
ناديه:بالله عليك لو انا كذابه كيف عرفت انها زارتك من فتره قصيره
العنود وهي تفكر(معقوله غدير تغار مني ليه لا هي أصلا ما تغيرت إلا بعد ما زارتني ولا أول وش زينها قبل ما تزورنا وتشوف وشلون عايشه خصوصا انها على قد حالهم وآنا زعلانه عليها وهي حاسدتني و حاقده وتغار مني صديقه مثل هذي ما ينزعل عليها ابد ) وصحت على صوت ناديه
ناديه:لو انا مكانك كان ما أفكر فيها وبعدين هذا انا اعرض عليك صداقتي وآنا متأكده ان احنا راح نتفق مع بعض
العنود طالعتها بريبه
ناديه بابتسامه وهي تمد يدها:ها تقبليني صديقه لك
العنود تطالع يدها الممدوده ومدت يدها وصافحتها:ما اعتقد راح يضرني شي لو تعرفت عليك ويمكن فعلا نصير صديقات
ناديه وهي تبتسم بخبث:انا متأكده اننا راح نكون صديقات موت
العنود ابتسمت لها:اوكي خلينا نتعرف من جديد انا العنود
ناديه :تشرفنا وآنا ناديه وآنا في الفصل (د) وتراني جديده في المدرسه
العنود:اها وآنا أقول هذي أول مره اشوفك فيها
ناديه:والحين بما اننا متفقات وش رايك تسوين لي سياحه في المدرسه وتعلميني من المعلمات المفروض نجننهم
العنود:شكلنا بنتفق
ناديه وهي تطالعها نظره غامضه:أكثر مما تتصورين

&&&&&&&&&&&&&

قاعده في غرفتها وكل ما تذكرت اللي صار تحس برعب وخوف
رن جوالها وهي صرخت بخوف لأنها كانت سرحانه
مسكت جوالها وردت وتنفسها سريع من الخوف:الو
سالم حس بخوف من صوتها:وش فيك حبيبتي
غزلان وهي تضبط نفسها:ما فيني شي لا تخاف بس تذكرت اللي صار لي
سالم زفر براحه:الحمد لله حبيبتي ان كل شي عدا على خير
غزلان:والله كنت بموت من الخوف
سالم:بسم الله عليك جعل يومي قبل يومك
غزلان:لا تقول كذا حبيبي
سالم ابتسم وهو يغير السالفه:تدرين غلاي اننا بعد ثلاث أيام بنجي عندكم ونخطبك وبخليها ملكه مره وحده وبعدها تصيرين معي على طول
غزلان بحياء :ههه انت حاسبهم
سالم:بالساعة والدقيقة والثانية
غزلان :لها الدرجه
سالم وهو يتنهد: وأكثر ..بس
غزلان وهي عاقده حواجبها:بس ايش
سالم:انا طلبت من مرت أبوي انين هي اللي تجي و تخطبك لي
غزلان بتفاجأ:ايش ...ليه انت يعني ما تعرف أمي
سالم:عارف ولا تخافين انا بكلم خالتي
غزلان:اخاف إذا جات انين تصير مشاكل
سالم:لا تخافين انا بدبر كل شي
غزلان:مادام كذا على راحتك بس هي وافقت تجي
سالم:ايه هي طيبه أول ما قلت لها فرحت وباركت لي
غزلان:تدري أحيانا أحس ان احنا ظالمينها
سالم:معاك حق انا أول ما كنت متقبلها بس مع الوقت ما شفت منها شي وعرفت ان قلبها طيب
غزلان:أقول كأنك تجاوزت حدودك
سالم باستغراب:في ايش
غزلان بزعل:في مدحها
سالم:ههههههههههههههههه تغارين فديت اللي يغارون والله
غزلان:سالم خلاص عاد
سالم:طيب انا لازم اصكر عندي شغل توصين على شي حياتي
غزلان:سلامتك
سالم:يله انتبهي على نفسك حبيبتي
غزلان:ان شاء الله وأنت بعد
سالم:من عيوني يا عيوني مع السلامه
غزلان:في أمان الله
صكرت منه وتذكرت اللي صار لها قبل يومين أخر شي تذكرته يوم حطوا المنديل المخدر وأغمى عليها وبعدها صحت لقت نفسها في السياره وأهل الخير مجتمعين وزجاج السياره مكسر و شنطتها وبعض أغراض السياره مسروقه
ساعدوها أهل الخير ووقفوا جنبها لحد ما وصل أخوها ناصر وسالم و الشرطه وبين في الأخير انها سرقه و حمدوا ربهم انها جات على كذا
ما تنسى فرحت الكل لما عرفوا بسلامتها ولا تنسى نبرة الخوف في صوت سالم
غزلان:سالم يا حب الطفوله وحلم العمر هو أجمل شي بحياتي الله لا يحرمني منه الحنون اللي حنانه يغنيني عن الدنيا كلها ما أنسى شلون كان خايف علي يوم الحادث
ابتسمت بحب وقامت تغسل وجهها وتنزل عند أمها اللي دائما تحاتيها من يوم صار اللي صار

&&&&&&&&&&&&&&&&&&

نزل تحت حصل انين جالسه في الصاله سليمان وهو يطالع انين ومشى بدون حتى ما يسلم
انين وهي توقفه:يقولون تعبان بس اللي أشوفه انك مثل الجني ما فيك شي (تقلد كلامه يوم كانت في المستشفى)
سليمان التفت وهو مستغرب:شلون عرفتي إني تعبان وآنا أصلا ما قلت لأحد
انين طالعته بدون ما ترد
سليمان وهو يقرب:شلون عرفتي
انين بابتسامه:انا اعرف كل شي ما في شي في هالبيت يخفي علي حط هالشي في بالك
سليمان ابتسم بسخريه ومشى بدون ما يرد عليها
انين:هذي البدايه بس والنهايه راح تكون لك أليمه
لفت انتباهها رنة مسج على جوالها فتحت الرساله وعصبت من اللي مكتوب
(انسي الماضي وابدئي من جديد ترى الدنيا حلوه بس اطلعي من منظور عالم السواد اللي حابسه نفسك فيه ترى الدنيا أحلى مما تتصورين والإنسان علشان يعيش ما يلتفت إلى أعدائه المفروض يلتفت إلا أحبابه وينسى الماضي ويدفنه)
ما تعبت نفسها تتصل لأنها عارفه لو اتصلت أكيد راح تلاقيه مقفل فكتبت رساله
(انا حره بحياتي ومو انت اللي انتظر منه نصائح انا ما اخذ نصائحي من واحد جبان ما يقدر حتى انه يقول الكلام وجه لوجه انت لو فيك خير كان ما اتخبيت وراء رسايل جوال خايف من مواجهتي) أرسلتها وهي تبتسم لأنها حسه ان بعد هالرساله راح يبان صاحب الرسايل المجهول

&&&&&&&&&&&&&&

قعده على اللاب توب ومشغله أغنيه ومندمجة معاها
رن جوالها وشافت اسمه يولع على الشاشه
سمر:غريبه وش عنده متصل الحين لا وقت صباح ولا مساء أرد عليه ولا ما أرد إلا أرد وأشوف وش يبغى يمكن في شي مهم
جات بترد بس سكت الجوال
وبعد ثواني رجع رن مره ثانيه
سمر بتردد:الو
بشار:كنت متوقع ما تردين
سمر:في شي مهم
بشار:لا بس حبيت اتطمن عل صوتك
سمر:اعتقد انك اتفقت معاي على تصبح على خير وصباح الخير صح ولا لا؟
بشار:ايه ...بس
سمر حست في صوته شي:بس ايش
بشار سكت وبعد لحظات:الصراحه انا حسيت إني متضايق وما خطر ببالي إلا أنتي
سمر سكتت وبعد ثواني :انا لازم اسكر
بشار بسرعه:سمر لحظه ممكن أتكلم معاك شوي لا سمحتي
سمر:بس...
بشار يقاطعها:ما اطلب منك تردين بس تسمعيني لو سمحتي
سمر اللي ما تحب حد يترجاها كسر خاطرها نبرة الرجاء في صوته:تكلم ويا ليت بسرعه
بشار:أحس إني مخنوق وما ادري ليه...وتنهد بضيق
سمر اللي تضايقت علشانه ما تدري ليه ظلت ساكته وتسمعه
بشار يكمل:أحس كأني في هالعالم وحيد تدرين يا سمر انا وانين أمنا وأبونا توفوا وإحنا أطفال كنا صغار محتاجين لكل الحب والحنان بس الدنيا ما تعرف لا صغير ولا كبير ..وسكت
سمر تسمعه وهي زعلانه عليه
بشار يكمل بنبره صادقه:طول عمري ما عرفت غير انين أم وأخت وصديقه انين هي دنيتي كلها ما اقدر أزعلها سمر ابغى اطلب منك طلب
سمر: تفضل
بشار:انتبهي عليها
سمر:ليش تقول كذا
بشار:لما دخلت المستشفى صحيح السبب بسيط بس بغيت أموت انا مالي غيرها
سمر بسرعه:بسم الله عليك لا تقول كذا ..وبعد ما استوعبت لي قالته حطت يدها على فمها
بشار بابتسامه:تسلمين..وبعدها تنهد براحه ويكمل:انا أسف إذا أزعجتك وما كنت قد كلامي لما قلت إني ما راح اتصل عليك إلا في وقت الليل والصباح
سمر سكتت وهي تفكر
بشار:ما أطول عليك ما ابغى أزعجك أكثر من كذا
سمر قبل لا يصكر بشار:بشار
بشار:عيونه
سمر:إذا جاء وقت وحسيت عمرك متضايق لا تتردد تتصل
بشار بفرح:يعني ما تتضايقين
سمر:يله لازم اسكر
بشار:طيب مشكوره
سمر:مع السلامه
بشار:الله يسلمك
صكرت وهي تفكر في اللي سوته يا ترى هو صح ولا غلط بس هو كسر خاطرها حست انه منكسر وراء كل هالمظهر والفلوس والاسم المعروف مجرد طفل ضايع طفل يتيم وحيد تايه
&&&&
بشار
بعد ما صكر ابتسم هالمره ابتسامه صادقه هو ما يدري ليه اتصل فيها بس هو فعلا كان متضايق بس مو على انين إلا منها متضايق من أخته ومن أفكارها اللي يخاف في يوم تكون هي سبب دمارها
خليل مع انه أنكر كلامه بس في نفسه هو عارف ان كلامه في شي من الصدق في ان انين قاعده تتجاوز الحدود
وطرا في باله سمر البنت لطيبه البريئه اللي يحسها مو من هالزمن براءتها نادره ويحس ان مالها ذنب هي وسالم وسليمان والعنود بس راشد أبوهم ولما دمر عائلتنا ما قال احنا مالنا ذنب
بشار يفكر:ياربي أحيانا أحس ان انين معاها حق بكل اللي تسويه وأحيانا أحس ان كل شي نسويه غلط
قام يأخذ له شور يصفي ذهنه المشوش هو لازم يكون مركز وتفكيره صافي مثل ما تبغى أخته وإذا كان في شي واثق منه هو انه مستحيل يوقف في وجه أخته ولا يخون ثقتها فيه

&&&&&&&&&&&&&&&

في عالم الأعمال (في الشركه)
خليل وهو قاعد مع ابو سالم
ابو سالم:يعني شلون
خليل :انا قدمت على قرض من البنك وأنت بما انك شريكي لازم تسوي نفس الشي لازم نتعاون علشان المشروع ينجح نجاح باهر الكل يتكلم عنه
ابو سالم:بس السلف تلف ما سمعت بها المثل
خليل : انت تظن يا ابو سالم لو انا شاك لو 1% إني ممكن اخسر كان بغامر واخذ قرض كبير مثل هذا وأحط كل ما املك في هالمشروع
ابو سالم يفكر
خليل :ابو سالم لا تنسى ان المشروع ضخم وبيعوض لنا كل شي صرفناه أضعاف مضاعفه
ابو سالم: خلني أفكر وارد عليك
خليل : بس ياليت بسرعه ترد علي لان في شركه معروفه بها المجال وانا بكلمهم علشان يصدرون لنا المواد والأشياء اللي نحتاجها بأسرع وقت
ابو سالم: ان شاء الله
خليل وهو يقوم :يله انا استأذن
ابو سالم: مع السلامه
طلع خليل وأبو سالم يفكر بها الموضوع من ناحية الأرباح اللي راح يربحها من وراء هالمشروع

&&&&&&&&&&&&&&&

قلوب طاهره تجمعها المحبه
قلوب بيضاء تجمعها الصفاء
قلوب لا تعرف طريقا للظلام
(محبه أخويه نادره في هالزمن من قلوب صادقه)
سالم وهو قاعد مع هاني وناصر
سالم بجديه لناصر:ناصر
ناصر اللي كان يضحك مع هاني:سم
سالم:ناصر انا طالب القرب منكم وش قلت
ناصر بفرح:هذي والله الساعه المباركه والله
سالم:يعني ما شفتك تفاجات
ناصر:وليه اتفاجا انت على بالك إني أعمى تراني مفتح وأشوف كل شي
سالم:ههههههه شكلي مفضوح من زمان وانا ما عندي خبر
هاني وهو يقوم ويسلم عليه:على البركه
سالم:الله يبارك فيك
ناصر وهو يحضنه:ألف مبروك
سالم: الله يبارك فيك بس انتظروا لما نأخذ رأي خالتي والعروس
ناصر :انا واثق انهم بيوافقون
سالم:بس انا بغيت منك خدمه يا ابو ياسر
ناصر:ابشر بعزك قل وش تبغى
سالم:انا ابغى اليوم اللي نجي نخطب فيه نملك على طول يعني خطبه وملكه على طول
هاني:ههههههههه ما شاء الله ما عندك وقت
سالم:أقول انطم ها وش قل يا ابو ياسر
ناصر:والله انا ما عندي مانع أشوف الوالده والعروس وارد عليك
سالم:اوكي اتفقنا وترى انا أقولها من الحين ترى انت يا هاني والأهل معزومين
هاني:تسلم خلاص صار
سالم:بغيت أقول لك شي يا ناصر توصله لخالتي
ناصر:قل عسى ماشر
سالم:اللي بتخطب لي هي مرت أبوي
هاني وناصر يطالعون بعض
سالم:لا تستغربون هو صحيح في البداية تضايقت بس في الأخير الحياة تمشي ولازم تستمر ومع الوقت رضيت بالوضع علشان خاطر أبوي اللي عندي هو بالدنيا كلها
ناصر::كفو يا ابو راشد والله انك كبرت في عيني
سلم ابتسم:تسلم
هاني وهو حط يده على كتفه:الله يوفقك يا اخوي
سالم:تعيش
كملوا سوالف وشرب قهوه وضحك

&&&&&&&&&&&&&&
في بيت بشار
بشار:أقول خليل
خليل:قول
بشار:وش صار مع ابو سالم
خليل:اليوم نفذت الخطوه الاخيره
بشار:امممممممممم
خليل:لا تخاف قربت نهايته
بشار هز رأسه: زين
خليل:انت متردد
بشار: وش قصدك
خليل:في سالفة الانتقام ذي
بشار: أكيد لا
خليل:هجل وش فيك
بشار وهو يطالع جواله:ما فيني شي
خليل سكت لأنه ما يقدر يجبر بشار يقول له لأنهم تعودوا متى ما يبغى الواحد يتكلم راح يتكلم من نفسه بدون أي ضغوط

&&&&&&&&&&&&&

مرت ثلاث أيام بدون أحداث تذكر
ابو سالم:صار يتضايق من الصفقات اللي يخسرها وسمع كلام خليل واخذ قرض كبير مع ان سالم ما أيده في هالسالفه بس من يسمع الطمع عمى أذانيه وعيونه
سالم:يعد الثواني والفرحه مو سايعته للقاء غزولته وهو كلم خالته بموضوع قدوم انين ورفضت الخاله لكن مع إصرار سالم رضت ووافقت علشان خاطره هو بس ورضت هي وغزلان بسالفة الملكه والخطبه بنفس الوقت
بشار:يكلم سمر وصار يحس بشي بس مو عارف شنو ولا يبغى يعرف
سمر:مبسوطه لأنها تحس بالاهتمام صحيح هي عمرها ما نقصها اهتمام خصوصا ان سالم ما يقصر عنها بس اهتمام احد يحبك غير و مقضيتها هاليومين في السوق مع غزلان
سليمان:مشغول بألم الرأس اللي ما يتركه ويحاول يعرف شنو ولوعة الكبد اللي بدون سبب والدوخه اللي تجيه بعض الأحيان
العنود:من يوم تعرفت على ناديه صارت صديقتها حست انها تفهمها بكل معنى الكلمه وارتاحت لها وتعلقت فيها بشكل غريب مع انهم من 3 أيام بس تعرفوا على بعض
انين:هدت اللعب شوي لحد ما تخلص الملكه وبعدها يبدأ اللعب على صوله
غزلان:مشغوله بالتسوق مع سمر تستعد لأسعد يوم في حياتها

&&&&&&&&&&&&&&
ملاحظه(انا ما راح أوصف اللبس اللي لبسوه لاني فاشله تمام في الوصف فاترك المجال لخيالكم علشان انتم تلبسونهم مثل ما تبغون فاعذروني)
جاء يوم الملكه المنتظر
ابو سالم ينادي:انين يله حبيبتي ما خلصتي
انين وهي تطلع :خلاص خلصت
ابو سالم وهو يطالعها :وش هالزين كله لا كذا ما أخليك تروحين
انين:ليه
ابو سالم:اخاف يصكونك بعين ويصير فيك شي لازم تحصنين نفسك حبيبتي
انين بابتسامه:ان شاء الله
ابو سالم وهو يمسك يدها: تعالي
انين :وش فيك
ابو سالم :غمضي عيونك
انين :طيب
ويطلع من الدرج طقم
ابو سالم:فتحي عيونك
انين انبهرت فعلا بجمال الطقم:الله حلو كثير
ابو سالم:عجبك
انين:ايه مره حلو مشكور..بس ايش المناسبه
ابو سالم:أنتي ما تستاهلين هالطقم وبس أنتي تستاهلين كنوز الدنيا كله كافي انك راح روحين الملكه علشان سالم وأنتي عارفه ان الحاضرين ممكن يزعجونك لو ما كان بالكلام ممكن بنظراتهم
انين:سالم يستاهل كل خير
ابو سالم وهو يبوس راسها:وأبو سالم
انين:لا عاد هذا حبيبي
ابو سالم:هههه أقول لو قعدت اسمع لها الكلام الحلو عز الله ما رحت ابد...يله لا تتأخرين
انين:لا حبيبي انت روح وآنا بجي مع بشار
ابو سالم :خلاص صار....مع السلامه
انين:مع السلامه
طلع وأول ما طلع خذت الطقم وهي تبتسم بدهاء
انين:زين شفنا مو وراك شي يالشيبه على الأقل ما اقعد امثل ببلاش ههههه والله وطلع عدك ذوق
والله زين هالتعب في التمثيل والابتسامات ومقابلك اللي يقرف الكبد طلعت من وراك بفايده صدق مو من مقامي بس بعد أحسن من لا شي
لبست الطقم وخذت جوالها تتصل على بشار تشوف وينه فيه

&&&&&&&&&&&&&&

في بيت الدكتور
هاني :ها يبه ما غيرت رايك انت والوالده
ابو هاني:لا يا وليدي رح انت وآنا وأمك وأختك راح نظل بالبيت ويمكن نتعشى برا
هاني طالع ابوه وعرف ليش ابوه ما يبغى يروح
هاني وهو يأخذ مفتاح سيارته:على راحتكم يله مع السلامه
أم هاني وأبو هاني:في أمان الله
ربى وهي نازله من الدرج وتقعد مع أبوها وأمها:ليه ما رحنا مع ان الولد عزمنا
ابو هاني وام هاني طالعو بعض وما ردوا عليها
ربى:يمه يبه وش فيكم تناظرون بعض في شي
ابو هاني وهو يقوم :ما في شي ويله قوموا غيروا ولا ما تبغون نتعشى برا
ربى وهي توقف بسرعه:إلا أكيد نبغى
أم هاني:يله ...وقاموا يلبسون علشان يطلعون برا ويقضون أحلى الأوقات مع بعض

&&&&&&&&&&&&&&

في السياره المتوجهه للمكان المنشود
سالم يسوق وأبو سالم جنبه
العنود وسمر وراء
العنود بهمس:وش عندها البرنسيسه ما جات
سمر:راح تجي بس مع أخوها
العنود:يا ليتها ما تجي ابد ونفتك منها
سمر:استغفري ربك
العنود:عاد ان ما قلت غير ربي يأخذها بس ما قلنا شي
سمر تهز راسها أسف على أختها:أقول اسكتي لا أبوي يسمعنا بس
العنود سكتت وهي تتحلطم بينها وبين نفسها

&&&&&&&&&&

في السياره خلفهم سليمان
سليمان شاغل تفكيره:غربيه انا اليوم ما أحس بشي يعني لا وجع رأس لا بدوخه ولا غيره ياترى وش السبب
وطرأ على باله فجاه انين:هذي وش عرفها إني كنت تعبان مع إني متأكد إني ما قلت لأحد شي ياترى هل ممكن تكون ...وسكت وهو يستنتج
وبعدها:والله ما استبعد عنها شي الواطيه بس شلون وكل اللي بينا كلام يعني لا شربت من يدها شي والأكل نأكل كلنا جميع لا مو هي لأنه مستحيل انا اخذ منها شي طيب يمكن أكون مريض بمرض ولا شي ليه لا والله يمكن اووووووووف ما في غير لما تخلص الملكه أروح دكتور مع إني ما أحب الدكاتره ولا المستشفيات بس وش نسوي

&&&&&&&&&&&

قاعد يستنى جات وركبت
بشار:وش فيك تاخرتي
انين:أسفه
بشار :خلاص مو مشكله لازم نروح لخليل
انين عقدت حواجبها:خليل ليه هو بيجي
بشار:ليه نسيتي انه شريك زوجك وأبو سالم أصر عليه وآنا اتفقت وياه نمشى سوا هو بسيارته وآنا بسيارتي وأدليه الطريق
انين :وأنت تعرف العنوان
بشار:ايه ابو سالم عطاني ايه ولو تهنا بنتصل في زوجك
انين تضايقت وسكتت
بشار:ههههههههه الكلمه تضايقك
انين:أقول اسكت لوعت كبدي كل شوي زوجك و زوجك الله والزوج عاد
بشار:ههههههه
حرك السياره والتقى في خليل ومشوا سوا مثل ما كانوا متفقين

&&&&&&&&&&&&&&

دخلت العود :كلللللوووووووووووووش
سمر تضحك على أختها
سلموا على خالتهم أم ناصر اللي حضنتهم وغرقت عيونها بالدموع
سمر وهي شوي وتبكي:ليش يا خاله هالدموع
أم ناصر :ابد تذكرت أختي الله يرحمها ليتها بينا
سمر والعنود:الله يرحمها
الخاله أم ناصر: روحوا يا بنات فوق تلاقون غزلان في غرفتها
العنود وهي تصعد لدرج :سمور ما راح تجين
سمر :لا بقعد أساعد خالتي شوي بعدها بلحقك
العنود:اوكي ....وصعدت
أم ناصر:يا بنيتي ماله داعي شوفي الخدامه قاعده تسوي كل شي
سمر:معليه يا خاله قوم تساعدوا ما ذلوا وبعدين يا خالتي ترى هذي فرصه ذهبيه ترى مو كل يوم أجي واعرض مساعداتي
أم ناصر:هههه طيب تعالي معي
سمر :يله

&&&&&&&&&&&&&

في مجلس الرجال السوالف والضحك شغاله الكبار يسولفون في الشغل وأحوال السوق والشباب ضحك وسوالف
سالم لناصر:وين هاني
ناصر:جاء في الطريق
سالم:عسى ما يضيع بس
ناصر:لا تخاف ماراح يضيع
دق جوال ناصر:هلا - ايه – البيت البني – ههههه – خلاص انا بطلع عند الباب - يله مع السلامه
سالم:وش صاير
ناصر:ابد هذا هاني يقول كل البيوت هنا تتشابه وما عرف أي بيت هو بيتنا انا طالع له
سالم:طيب
ابو سالم: سالم
سالم قام لأبوه:سم يبه
ابو سالم :شوف بشار يقول هو في شارعنا بس ما عرف أي بيت اطلع له
سالم:تأمر أمر
وطلع ووقف جنب ناصر ينتظرون ودقايق إلا هاني جاي
ناصر:وش بلاك ضيعت
هاني:يا أخي بيوت هنا سوا كلها شكل واحد فضيعنا
سالم:ههههههه
وشوي وتوصل سيارة بشار ومعاها سيارة خليل ونزلوا
سالم وهو يتوجه لهم:ها عسى ما تعبتوا لحد ما وصلتوا
بشار:ابد بس لما وصلنا هنا ضعنا
خليل:ما ننلام البيوت تصميمها كلها واحد
سالم:أهم شي قدرتوا توصلون
هاني لناصر:من هذول
ناصر وهو يأشر على بشار:هذا أخوا مرت ابو سالم واسمه بشار
هاني:اها والثاني
ناصر:ظنتي انه شريك عمي ابو سالم أو يشتغل معه وصديق بشار
هاني ظل يطالع بشار بتركيز
سالم وهو يتوجه لأنين اللي نزلت :ترى انا وصيت سمر تستقبلك علشان ما تظلين لحالك
انين بابتسامه:مشكور وعلى البركه مره ثانيه
سالم وهو يطالع الأرض لأنه ما تعود يطالع احد وكاحترام لها :الله يبارك فيك
مشت انين علشان تدخل وسالم صار ينادي ناصر وهاني علشان يعرفهم على خليل وبشار مشى ناصر أما هاني فظل مكانه يطالعها ومو مصدق
انين قبل ما تدخل لفت انتباهها الواقف من بعيد يطالعها التفت له وطالعته وحست ان وجهه مألوف بس طنشت ودخلت
هاني:هي والله هي معقوله تكون هي زوجة عمي ابو سالم
صحى من سرحانه على صوت ناصر الي يناديه راح لهم وتعرف على بشار وخليل و من خلال تعامله مع المرضى النفسيين ونظرته الثاقبه و شطارته في مجاله شاف في عيون خليل وبشار نظرات ما عجبته
بعد ما سلموا على بعض دخلوا داخل عند الرجال
&&&&&&&&&&&&

دخلت انين وشافت سمر اللي جاتها ومشت وياها لحد ما وصلو عند الحريم وصارت تسلم
كانت تشوف في عيون الحريم نظرات منها الاستغراب والكره المفاجاه وغيرها من النظرات
هي كانت متوقعه هالشي بس تضايقت عمرها ما حبت تكون محل أنظار احد
ولما وصلت عند خالة سمر
سمر:خالتي أم ناصر أعرفك انين مرت أبوي
انين ابتسمت لها
أما الخاله أم ناصر طالعتها من فوق لتحت بنظرات ضيق بس سلمت عليها وهي غاصبه نفسها علشان خاطر سالم
انين:على البركه
أم ناصر بدون نفس:الله يبارك فيك
وبعدها انين جلست وسمر استاذنت تصعد فوق لغزلان
صعدت فوق وأول ما دخلت :كللللللووووش
وسلمت على غزلان على البركه يا حبيبتي
غزلان بحياء:يبارك فيك
سمر :الله وش هالزين والله شكل اخوي بيروح فيها عاد هو ميت الحين بيموت زود
غزلان:سمر وجع يا دبه خلاص
سمر والعنود:ههههههههه
أم ناصر دخلت بالدفتر وغزلان وقعت وهي مو سايعتها الفرحه وحاسه بتوتر
لما وقعت سلمت أم ناصر وهي تمسح دموعها بنتها الوحيد كبرت وصارت عروس
غزلان:يمه خلاص حبيبتي خلاص يالغاليه
أم ناصر:الله يوفقك يا بنيتي وين ما حطيتي وجهك يله يا بناتي يله علشان تنزلون
العنود نزلت مع خالتها أما سمر ظلت مع غزلان
العنود أول ما نزلت هي وخالتها وشافت انين تهمس لخالتها:هذي جات
الخاله :ايه
العنود:أوف والله لو إني منك يا خاله والله لأغسل شراعها واطردها واخلي اللي ما يشتري يتفرج
الخاله أم ناصر:والله لو إني ما وعدت اخوك سالم ولولا غلاته كان انا الحين منتفتها وسيعة الوجه
انين وهي جالسه ومتضايقه لأنها ما تعرف احد وهي من طبعها ما تحب الجمعات ولا المناسبات لمحت وحده تعرفها وتفاجات لما شافتها بهمس:حلا الله يأخذها هذي وش جابها هنا
لهنا أوقف والملكه ما بعد تخلص أحداثها
توقعاتكم
- حلا وش اللي جابها لملكة سالم ؟
- سمر ما مصيرها مع بشار بعد ما بدت تكلمه؟
- بشار هل اللي يغزوا قلبه الحب أم شي ثاني؟ وهل ممكن ينقلب ضد أخته علشان قلبه؟
- صاحب الرسايل المجهوله هل راح يطلع لأنين مثل ما هي متوقعه ؟ ومن يكون؟
سليمان هل رح يعرف ان سبب التعب اللي فيه هو انين و انتيا؟
&&&&&&&&&&&&&&
انين.....كره.......انتقام......حب..نهاية مجهوله (لعبة الشطرنج)
&&&&&&&&&&&&&&&&