حكاية سمر (عاده اعدمت حياتي)

Part 7

سمر.. دنكت.. ابجي.. هوه كام بسرعه مني.. وطلع وقفل الباب.. اني بقيت ابجي.. والطم خدي على حياتي الضيعتها.. بسبب عادات تافها..

رحت للسرير.. اتمددت.. وخليت اديه بين رجليه وبقيت ابجي ومقرفصه نفسي.. لحد ما نمت..

بكر.. شفتها نزلت راسها تبجي.. كمت بساع.. ما اريد اضعف بدموعها.. طلعت الغرفه و رحت لامي..

كتلها يمه.. فضي السالفه.. والناس التجي تباركلنه.. بينيلهم ماكو شي..

كالت اي هاهيه.. بس شلون لو سألو علعروس.. كتلها.. كوليلهم.. مريضه.. وما تكدر تكوم فد مره.. اي شي طلعيلج شغله.. ومشي السالفه..

كالت ماشي.. طلعت اخذت سيارتي ورحت للمكتب مالتي.. اجو ناس اتعاملت وياهم.. ورحنه على بيت رادو ايجار..

خلصت منهم.. ورجعت للبيت.. الساعه 5 العصر.. دخلت البيت هوسه.. خالتي ايمان موجوده وبنتها حوراء..

وخواتي كلها جايه.. حجت اختي اميره.. شعندك ضامها لسمر .. فوك سواد وجها.. تحاميلها..

كتلها.. خويه جايه خطار.. صيري خفيفة دم وعوفج من المشاكل.. احنه نحلها.. محد اله دخل بهلموضوع..

ولو سمعت احد جاب هلسيره.. احسابه وياي.. التفتت لامي.. صار معلوووم. كالت هاهيه كلنه اي.. بس فكنه..

عفتهم ودخلت للغرفه.. الغرفه بارده.. وهيه نايمه ولابسه من ملابسي.. ابتسمت.. واتقربت يمها..

شعرها.. مغطي وجها.. كعدت على رجليه.. بعدته على كيييييييف.. اتقربت يمها.. اتنفس انفاسها..

تشهك وهيه نايمه.. الضاهر باجيه هوايه.. اخذت نفس.. شيصير لو عروستي.. مو عروسة عادل..

جان هسه انتي بحظني اسعد عروس بالدنيا.. بس شنكول هيه قسمه.. وكلمن وحظه.. واني وياج حظ ما عدنه..

لا انه الحويتج.. ولا انتي اللي اختاريتي صح.. كمت من يمها.. طلعت لحاف من الكنتور.. وغطيتها..

ورحت كعدت علكمبيوتر.. اشتغل وابحث عليه.. طفت الكهرباء.. الشاحن مال الكممبيوتر كام يصوفر..

حسيت بيها تحركت بس اني ما التفتت الها.. وكأني ما انتبهت.. سمعتها اتأنّ من الالم..

توقفت من الحاسبه.. وصار كل تركيزي يمها.. بس ما درتلها.. لحد ما كعدت.. باوعتلها.. شفتها لازم خاصرتها.. وتون..

كتلها شبيج..

سمر.. الم جسمي موتني.. من كل مكان ديصل عليه..

بكر.. بدلي خل اوديج للدكتور..

سمر.. ها.. لا لا ميحتاج.. بس اريد مسكن الم..

بكر.. كمت للجراره.. طلعتلها براسيتمول وانطيتها.. وطلعت بطل مي من الثلاجه ومديته الها..