#مذكرات_مراهقة
للكاتبة ميار الشمري
الجزء السادس
صلاح،،،ظليت نص ساعة واكف بالطريق مااعرف شنو اسوي ولا اعرف شلون اتصرف جانت الصدمة قوية والي شفتة كدامي ميتصدك شغلت السيارة ورحت للمستشفى واني طول الطريق افكر وعقلي مشوش من وصلت المستشفى مكدرت انزل جان راسي راح ينفجر ومجنت اريد اشوف احد او احجي مع احد
داورت ورجعت ظليت افتر بالشوارع واحس نفسي مخنوك وممستوعب اتمنيت اكون غلطان وفاهم الموضوع غلط كلت مستحيل استمر على هالحال لازم اقطع الشك باليقين قررت اروح لبيت عمي واسمع من نور ياريت اكدر اجذب عيوني واصدكها شماحجت ودافعت عن نفسها
ماشفت حالي الا واني كدام باب بيتهم دكيت الباب وانتظرت يم سيارتي فتحتلي فطومة وبعدين استقبلتني خالتي امها ورحبت بية كتلها
خالتي خابرت على حمودي كلي نور مداومة اليوم مو هي ماخذة اجازة لو اني غلطان !!
ام نور،،،،ردت مرتبكة اي والله خطية قطعت اجازتها لان عدهم امتحانات دخلتني لديوانية وهي تسألني شلوني وشلون اهلي جنت كلمة اردلها وكلمة لا لان اصلا بالي مو يمها
صلاح،،،هااا يعني داومت وامتحنت؟؟
ام نور،،،اتفضل وليدي اكعد ...اي سودة علية امتحنت وقبل شوي اجتي تعبانة
صلاح،،،رفعت حاجبي مصدوم من كلام امها اباوع للساعة ب11 ونص ودكلي هسة اجتي ساعتين ونص يلا رجعت للبيت!!! عقلي بعد ميستوعب غمضت واتجيت براسي على القنفة
ام نور،،،خوما بيك شي يوم ؟
صلاح،،،،هزيت براسي لا بدون مااتكلم
همست هية وين هسة
ام نور،،، اجتي تعبانة من الدوام وطبت تسبح هسة اروح اشوفها وطلعت
صلاح ،،،،تعبانة من الدوام لو تعبانة من ......استغفر الله العظيم
باوعت للصالة شفت عمي كاعد على سجادتة وفاتح المصحف وديقرأ قرآن اباوعلة واجر حسرات رجال صايم مصلي وينحلف براسة بالمنطقة هيج يجازة اووف شحجي شأكول
نور،،،جنت غافية وامي كعدتني
نور كومي يوم هذا صلاح جاي مااعرف شنو بي وجهة تعبان وعيونة حمرة ومدري شلونة يسأل عنج
نور،،،هاي يمكن راجع من الدوام بس شو طالع من وكت والله يوم مخنوكة وماالي عين اشوفة
ام نور،،،خليت كلشي طبيعي وكتلة قبل شوي اجيتي من الدوام وامتحنتي
نزلي يوم عليه خلي نشوف شنو رايد خلي هاليوم يعدي على خير الله لا يوفقك ياسر ولا يوجهلك الخير
نور ،،،نزلت ورحت عليه سلمت وباوعلي بأستغراب
صلاح،،،شونج نور
نور،،،الحمدلله شلونك انت حبيبي وابتسمت
صلاح،،،مجنت اعرف انتي مداومة اليوم وظل بالي عليج وجنت اباوعلها واتمنى تحجي غير الحجي الي كالتة امها
نور،،،اي والله داومت وقبل شوي رجعت
صلاح ،،،انقبض كلبي واني اباوعلها تجذب عيني عينك مصدوم اباوعلها كل هالبراءة بوجهج وتطلعين هيج شكد جنت مخدوع بيج لعد همست نور قبل شوي رجعتي من المعهد ؟؟ ومع منو رجعتي ؟؟
نور ،،،اي قبل شوي وحمودي وداني وجابني تقربت منة جان شكلة تعبان شبيك صلاح
صلاح ،،،انهديت وكعدت همست تعبان اخ يانور شكد تعبان
نور،،،سلامتك يعمري احجيلي شنو الي متعبك بلكي اكدر اريحك
صلاح ،،،رفعت عيني بعينها ووكفت لا نور الي مثلج مستحيل تكدر تريح واحد مثلي
نور،،،شلون يعني مفتهمت
صلاح ،،،اني تعبان واريد اطلع
نور ،،،صلاح ...صلاح وين طالع !!!
صلاح ،،،طلعت وركبت سيارتي بكد مجنت احبها بكد ماستحقرتها وهي دتجذب علية مامصدك شكد جنت مخدوع بيها وشكد جنت غبي
رحت للبيت ومكدرت اشوف احد كتلهم تعبان واريد انام مااريد احد يكعدني او يجيني تمنيتة كابوس واكدر اكعد منة ظليت اتقلب مكدرت انام اخذت فاليوم وقفلت اجهزتي ونمت
نفسيتي تعبت وظليت يومين بدون تركيز لان عشت على المهدء والفاليوم مجنت اريد اصحى لان يكتلني التفكير ومااريد اتذكرها
امي خافت علية وجنت احس بيها تجي ليراسي وتشوفني وترجع من تشوفني نايم خفت عليها حسيت نفسي راح ادمن الحبوب كلت اني مو مراهق ودكتور واعرف مصلحتي والي دأسوي خطأ المفروض اكون اكثر قوة واتصرف صح هذا مو اخر المطاف وفعلا اني الف وحدة تتمناني وامي واهلي ميستاهلون مني هيج اجازي حبهم وتعبهم عليه ومركزي ومكانتي مو بسهولة وصلتلها فجأة سمعت الاذان وحسيت الدنيا هدوء وصوت الاذان دخل بنص كلبي وارتاحيت باوعت للساعة طلع الفجر واني جنت فاقد لدرجة مااعرف الليل من النهار نزلت اتوضى دأصلي سمعت امي دتدعيلي وتبجي ع سجادتها كعدت بسدها ونمت ع كتفها وحضنتها
يوم ليش تبجين
امي ،،صلاح شبيك يوم الله يخليك لتخوفني عليك شصاير وياك ليش هيج حالتك احجيلي اني امك جنتك ونارك
صلاح بستها من كتفها يوم لتخافين عليه اني الحمدلله مابية الا العافية
رفعت راسي بأيدها وباوعتلي اني امك واعرفك اكثر من اي انسان بدنيا ومتكدر دكلي انت بخير واني دأشوفك صار يومين مو ع طبيعتك وكل مااجيك نايم ودمعتك بعينك
صلاح قاطعتها وكتلها يوم قبل يومين شفت شاب جابو للمستشفى مقطعة اطرافة نتيجة انفجار ومتحملت الموقف بعدة بعمر الورود احنا ليش ديصير بينة هيج
امي ،،نومتني ع رجلها وايدها على راسي اوووف ياوليدي الله يعين امة واهلة ويصبر كلبهم وبعدين انت هاي المناظر المفروض تكون متعود عليها والحالات الي تشوفها مو شوي كل كل يوم
بست ايدها وكتلها معاج حق المفروض اكون اجرء واقسى من هيج واتحمل اوعدج بعد ماتشوفيني بهل حالة ردت اكوم سحبتني من ايدي صلاح يومة حددنا مع بيت عمك الاحد بعد باجر نعقدلكم تنهدت وكتلها ان شاء الله خير ادعيلي بس محتاج دعائج
رحت صليت ودعيت ربي يرشدني للصواب واكدر اتجاوز هالايام العصيبة الي دأمر بيها
وللقصة بقية ،،،،،
