မာနဆမ္​း​ေသာ ခ်စ္​ခရီးလမ္​း (မာနဆမ်းသော ချစ်ခရီးလမ်း / Complete)

Part 7 (U+Z)

▪▪▪▪▪▪▪▪▪
အထပ်မြင့်အဆောက်အဦးကြီးတစ်ခုရှေ့ ကျွန်တော့် ကားကိုထိုးရပ်လိုက်သည်။ကားရပ်သင့် မရပ်သင့် မစဉ်းစားနိုင်။ကားပေါ်မှ ခုန်ချသလိုကို ပြေးဆင်းလိုက်သည်။ ဓာတ်လှေကားသည် နှေးတယ်ဟုပင်ထင်မှတ်တဲ့အထိ စိတ်လောနေသည်။ ငါးလွှာက ဒီလောက်အချိန်ကြာကြာစီးစရာလိုလို့လား။
"ဒုန်း!"
တံခါးကို အတင်းဖွင့်လိုက်တာကြောင့် ကျယ်လောင်သည့်အသံ ပေါ်ထွက်လာသည်။ထိုအသံကြောင့်ပဲ အားလုံးအကြည့်မှာ ကျွန်တော့်ထံရောက်နေသည်။
"အမေရော.."
ကျွန်တော့်အမေးကို ချက်ချင်းမဖြေနိုင်ကြ ။ ခဏကြာသောအခါမှ..
"ရှိတယ်..အထဲမှာ.."ဟုပြန်ဖြေရှာသော်လည်း ကျွန်တော်သူတို့ပြောသည်ကိုနားထောင်မနေနိုင်။အမေရှိရာအခန်းထဲသို့သာ အပြေးဝင်လိုက်သည်။
ရုတ်တရက်ကြီး ဝရုန်းသုန်းကားရောက်လာသော သားကြောင့် ဒေါ်ချယ်ရီထူး မန်နေဂျာကို အလုပ်အကြောင်းပြောနေခြင်းမှ ရပ်တန့်လိုက်ရသည်။
"ဘာဖြစ်လို့လဲ ထူးခြား။"
မန်နေဂျာကိုအပြင်ထွက်ခိုင်းပြီး အခန်းဝတွင်မတ်တပ်ရပ်နေသော ထူးခြားပိုင်ဆီသို့လာရင်း ပြောလိုက်ခြင်းဖြစ်သည်။
"ဘာလို့လဲ..ကျွန်တော့်ကို ဘာလို့လိမ်ထားတာလဲ..."
မျက်လုံးများရဲရဲနီနေသောသားဖြစ်သူကို ကြည့်၍ ဒေါ်ချယ်ရီထူးရဲ့စိတ်သည် မတည်ငြိမ်တော့သဖြင့် ကျောခိုင်းရပ်လိုက်ရသည်။
"ဘာပြောချင်တာလဲ..မင်းက.."
အခုအချိန်ထိ အမှားမလုပ်ထားသလိုပုံစံနှင့် အေးဆေးတည်ငြိမ်နေသော အမေ့ကိုကြည့်ပြီး ကျွန်တော့်နှုတ်ခမ်းတို့ တွန့်ချိုးမိသည်။သည်လိုပုံစံလုပ်မိလျှင် တစ်ယောက်ယောက်က ပြောဖြစ်အောင် ပြောပါလိမ့်မည်။
"အဲမျိုးပုံစံရီးနနေန ကေ့ဝို့လည်းကွန်းဝ ကျော့အန်လည်းတက်ဇ ပီးဆိုဟာ..လူဆိုးဆိုရိ လူလေပြောဆိုဝါ ကျနော်စိဆိုးဝယ်..."
(အဲ့ဒီလိုပုံစံကြီးနဲ့ မနေပါနဲ့လား ကြည့်လို့လည်းမကောင်း ကြောက်ဖို့လည်းကောင်းတယ် ပြီးတော့..လူဆိုးဆိုပြီး လူတွေပြောကြရင် ကျွန်တော်စိတ်ဆိုးတယ်)
တစ်ချိန်က ကျွန်တော်နားလည်ရခက်သည့် အသံဝဲဝဲလေးကို ပြန်ကြားယောင်တော့ ရင်ခွင်တစ်ခုလုံး စုတ်ဖြဲခံလိုက်ရသလိုပင်။
လက်သီးကိုတင်းတင်းဆုပ်ရင်း အားယူရသည်။ ခံစားရလွန်းလို့။ ကြေကွဲရလွန်းလို့။ များစွာနာကျင်ရပါသဖြင့်...
"ကျွန်တော် အတိတ်မေ့ခဲ့တာပါ အမေ။ တစ်သက်လုံး ပြန်သတိမရတော့ဘူးလို့ ထင်နေတာလား။ ဒါမှမဟုတ် ကျွန်တော်ကို့ အမေ့စိတ်တိုင်းကျပြောင်းလဲဖို့ စဉ်းစားနေတာလား..ဘယ်လိုလုပ်ပြီး၊ ဘယ်လိုခံစားပြီး..ဟား..ကျွန်တော်လည်း အမေ့သားပါ။..ထူးခြားပိုင်မှအမေ့သားမဟုတ်ဘဲ နေထိပိုင်လည်းအမေ့သားပါလို့.."
အသံကုန်ဟစ်ခဲ့သမျှ အဆုံးသတ်အသံသည် တုန်ယင်လှုပ်ခတ်နေသည်။နှမြောတသဖြစ်မိသည်။အတိတ်မေ့တော့ ချစ်သောသူကိုမေ့သည်။ အတိတ်ကိုပြန်သတိရတော့ အချစ်ဆုံးသူကိုကျောခိုင်းရလိမ့်မည်ထင်သည်။
ပျော်ရွှင်ခြင်းဆိုသည်ကျွန်တော်မဟုတ်သော ကမ္ဘာပေါ်ရှိ တခြားသူများ၏
သီးသန့်ခံစားမှုလား။
ကျေးဇူးပြု၍ ကျွန်တော်သည်လည်း...အများနည်းတူ ပျော်ရွှင်ဖူးချင်ပါသည်။
ပျော်ရွှင်ခြင်းများ ပေးသနားပါတော့...