كسرة كلب

البدايه

#كسرة_كلب
بارت 1
بقلمي روسكان
لبيج قصص روسكان
خلي اعرفكم اول شي ع نفسي اني اسمي حنين عمري 20سنه هالوحده لاهلي اجيتهم ع كبر بعد 10سنوات زواج ياله صرت اني مواصفاتي لابيضه ولاسمره خمريه بس ع لون احمر وعيوني جوزي وشعري همين جوزي بني يعني وموطويا كولش لحد نص ظهري وسرح قصيره يعني يطلع طولي 157-سم ووزني 53كغم شويه ربروبه من جان عمري 17سنه توفى والدي صارت بي جلطه وهو نايم ومالحكنه عليه كعدنه الصبح لكيناه ميت وجانت هاي اول صدمه بحياتي بس بقينه اني وماما وحده تقوي روحهه بالثانيه ووحده معتمده ع الثانيه وعلاقتنه كانت مو بس علاقه ام ببنتهه لا جنه مثل الصديقات. ونتساعد ع الحياة ومسؤوليات البيت واحنه الحمدلله جان عدنه بيت ملك بمنطقه حلوة ببغداد وسيارتنه حلالنه واني الحمدلله بتشجيع من ماما تعلمت سياقه لان حرامات تظل السياره مركونه بالكراج كاتلهه التراب واحنه بعازة السياره موبعازه فلوسهه لو فكرنه نبيعهه لان راتب بابا التقاعدي مكفينه بابا كان موظف بالكهرباء وماما معلمه رياض اطفال واني هم ورة وفاه بابا بسنه تخرجت من السادس اعدادي بمعدل 73%ودخلت كليه وصار قبولي تربية انكليزي وكولش جنت احب هاي اللغه وشاطره بيهه وبالكليه السياره هواي وفرتلي مصاريف خط وكراوي وهم كشخه ههههههه ع ابو بنيه وتسوق سياره وكذا .
هاونسيت اكللكم بحياة بابا من جان عمري 15سنه خطبني ابن عمي هو اسمه همام وجان عمره بوكتهه22سنه واني رفضته ومو بس هيج تخوصرت ووكفتله كتله مهتلف دلوع الماما شكبرك بعد تصير وانت لافالح بدراسه ولافالح بالشغل و هو صدوك جانت عمتي مرة عمي امه مدللته ومن ورة دلالهه الزايد فشل وهو هم هالواحد للاهله مادري شبيهم عمامي ويه الخلفه ماعدهم خلفه لو طفل واحد والثاني بالكوة يجي  وهمام ان مخلص ثالث متوسط بالدفرات واشتغل ويه ابوه عمي فتره لان ابوه جان تاجر اخشاب  والمنيوم وهم مادبرهه للشغله  هاي الى ان ابوه بعد ماستحمله طرده وخطبوني واني ماسكتت من يوم يومي جنت لسان وشخصيتي قويه بس جانت حاليتلي الدنيا بزود ابويه وامي  الي جانو خيمه فوك راسي وبعدهه سمعت همام ممتحن سادس خارجي وناجح ومقدم ع كليه عسكريه وبعدها ابتعد كمت ماشوفه ابد ولا اعرف عنه شي بالاحرى ماسالت عنه ولاهمني اعرف اخباره وجانو كاطعين ويانه صار توتر شويه بالعلاقه ومن توفى بابا وكفلنه عمي وجان يجينه بين فتره وفتره او كل راس شهر ها عمي شمحتاجين هيج حجايه التنكال يعني همزين لسه ذاكرنه وعنده شويه حنيه علينه .
كبرت ودخلت كليه ونجحت من المرحله الاولى بتفوق واجتني الصدمه الثانيه شكل ويه ماما اسم الله ع سمعكم المرض الخبيث وظليت اعالج بيهه من طبيب لطبيب وصدوك هالمره عمي وكفلنه خوش وكفه لان هو العلاج غالي ويرادله كوومه فلوس والجرع الكيميائيه تكلف وعمي متمكن ماديا وماعافنه ابد لحد ما اخر مره سوينه تحاليل والنتيجه ماما تعافت من المرض والف الحمدلله وذبحنالهه ذبيحه ع سلامتهه وماكو بس تعدت شهر تقريبا  رجعت تعبت نفس وضعيتهه واتعس خطيه والتحاليل تكول رجعلهه المرض الخبيث اسم الله وهالمره منتشر بجسمهه وماكو امل للشفاء وخطيه امي ماقاومت هواي من رجعلهه 3اسابيع وسلمت انطتكم عمرهه وهاي الصدمه الثالثه وكعت ع راسي وهدتني 3ايام الفاتحه اني بس مصدومه وساكته والدموع متقبل تطلع وكل شويه افز بالليل اروح ادور عليهه بالليل اتخيل هي دتصيحني علمود انطيهه دواهه واروح لغرفتهه وماالكاهه وانام ع فراشهه واحضن مخدتهه واشبع بجي لحد ماانام من التعب.
صارلي شهر ع هذا وضعي واني جنت مرحله ثانيه كليه بس بدايه الكورس الثاني يعني باقيلنه شهر ع امتحانات الكورس الثاني وبعدين امتحانات الفاينال المهم غصبن ماعليه رجعت اداوم وراتب بابا التقاعدي مساعدني ماديا وامي الله يرحمهه لسه ماسويت راتبهه التقاعدي والحياة تمشي بيه مدري وين ومدري شنو مضموملي صفيت وحدي واحس مكسورة كلب وخاطر ووحيده ومال سند ولا ظهر شعور مااتمناه لعدوي بس الحمدلله ع كل حال اهم شي فوك راسي سكف يسترني و راتب اكل واشرب منه واعيش ودراستي لازم اكملهه هاي وصيه امي ووعدتهه اكمل مهما كانت ظروفي والباقي،سهل ان شاء الله
الى ان اجه اليوم الي....