عشقت المتمرده
الحلقة (٤)
الحلقه الرابعه
ادم دخل لندي والشرر بيتطاير من عنيه ولقاها قاعده والبنات بيتفرجوا عليها وهيا ولا هاممها وفعلا بلوزتها كانت فاضحه اوفر .....،
ادم : جومي اطلعي فوج عايزك
ندي : ماليش مزاج بعدين
ادم كان بيحاول يتكلم كويس علشان البنات اللي مراقباه وبتتعجب من رب عملهم اللي فجأه واحده بتمشي كلامها عليه
ادم : قلت جومي
ندي :وانا قلت ماليش مزاج
ادم وصل للقمه فراحلها شد المجله اللي في ايدها ورماها علي اخر دراعه ويدوب هتنطق لقته ماسكها من شعرها وبيجرجرها علي فوق وهيا بتصوت وتصرخ وامه طلعت علي صويتها وقفته
كريمه : ادم سيبها
بص لامه : ارجوكي ما تدخليش في دي بعد اذنك
كريمه فاهمه ابنها وعرفت انه طالما ما سمعلهاش يبقي في حاجه فسكتت بس ندي بتستنجد بيها
دخلها اوضتهم ورزع الباب وزقها من ايده وقعت علي السرير
ندي : انا مش هقعدلك في البيت انت همجي
ادم : همجي جاهل مجنون متخلف .. قسما بالله لو لبستي حاجه معجبتنيش وخرجتي بيها لاجطعك فاهمه ولا له
ندي : انا مخرجتش وبعدين انا لابسه ايه؟؟ ماهي بلوزه عاديه اهي
ادم :بلوزه عاديه ؟؟؟ ولابسه ايه تحتها ؟؟ هاه
ندي : مش فاهمه
ادم : وانتي تفهمي ليه ؟؟؟ انتي مش لابسه حاجه تحتها صح ؟؟ مش واخده بالك انها مجسمه صدرك وباين قوي ،. مش ملاحظه ده ؟؟
ندي : المفروض اعمل ايه فيه ؟؟ كل واحده عندها صدر وبيبان ما بيتخباش ده
ادم : بس مش كده ... مش بالمنظر ده ... مش انا اللي كل اللي يسوي واللي ما يسواش يبص لمرتي ... مش انا اللي رجالته كل واحد بيتخيل انه نايم معاكي لان سيادتك بتغريهم
ندي : انا ما بغريش حد .. وبعدين شغل ناس محترمه عندك
ادم : خليكي انتي محترمه
ندي : انا محترمه غصب عنك
ادم قرب منها ولمس صدرها بطريقه مستفزه خلتها رجعت لوري غطت صدرها بايدها
ادم : اللي تلبس ده بره اوضه نومها ما تبجاش محترمه وبتجدم دعوه لكل راجل يتفرج ولا ده قصدك؟؟
ندي : انت مش محترم واللي يفكر كده يبقي مش محترم
ادم : ده تفكير اي راجل بلبس زي ده
ندي : انت همجي ومتخلف ورجعي وعلشان كده بتفكر كده
ادم : رجعي متخلف همجي اي مسمي بس قسما بالله ان لبستي حاجه بالشكل ده تاني ما هيحصلك كويس ابدا
ندي : انا مش هقعدلك هنا انا رايحه عند بابي
ادم : وريني عتخرجي كيف ووريني لبس تاني اكده وانا هتكون اول مره امد يدي علي حرمه وأدبها
سابها وخرج وهيا فضلت تعيط .. امه وقفته حاولت تكلمه بس اعتذر منها ورفض وخرج وهيا طلعتلها فوق تشوفها
كريمه : في ايه لكل ده ؟؟ عملتي ايه ؟؟
ندي : انا معملتوش حاجه هو جاي من بره مجنون .. انا يجرجرني من شعري كده ؟؟ انا مش هقعدله هنا انا همشي
كريمه: عطي اوامره بره ما تخرجيش ولا تطلعي حتي الجنينه ؟؟
ندي : ليه هيحبسني ولا ايه ؟؟ طيب انا ماشيه
كريمه بتحاول توقفها بس مقدرتش عليها . فتحت باب الفيلا واتفاجئت بفتحي علي الباب بصلها من فوق لتحت
فتحي : اسف يا هانم اتفضلي جوه
ندي : ابعد من وشي
فتحي : اوامر البيه حضرتك ما تخرجيش حتي الجنينه فلو سمحتي اتفضلي
ندي : ماشي ماشي
سابت الباب وده وفتحت الباب اللي بيودي للبيسين بس اتفاجئت بإتنين رجاله قالولها نفس الكلام
معرفتش تخرج ابدا ففضلت تعيط
كريمه اخدتها في حضنها : علي فكره الاسهل تغيري هدومك وتعتزري لجوزك وهو هيرجع في كلامه
ندي : لا هو بيذلني وانا عمر ما حد عاملني كده
كريمه : هو متضايق ليه ؟؟ ايه اللي حصل ؟؟
ندي : معرفش جاي متضايق من لبسي وجه يتجنن عليا مش فاهمه .. انا مخرجتش بره باللبس ده وجوه البيت جاي يقولي انتي مش لابسه حاجه تحت البلوزه وصدرك معرفش ماله ... انا في البيت
كريمه : صدرك متجسم جوي فيها واكيد حاجه ضايقته معلش .. ادم ما بيعملش حاجه اعتباطا اكده فاعذريه حبيبتي
كريمه نادت علي فتحي ودخلها
كريمه : ادم متضايج ليه ايه اللي حوصل ؟؟
فتحي : اللي فهمته يا هانم ان حد اتحددت علي الهانم الصغيره بطريجه مش ولابد وطرد اتنين عمال دلوقتي وحضرتك عرفاه ما بيحبش يجطع رزج حد
كريمه : طيب طردهم ليه ماعتعرفش ؟؟
فتحي : لاه معرفش بس كل اللي جاله انهم عيبصوا لاهل بيته بطريجه عفشه
كريمه : طيب روح انت خلاص .... هاه شوفتي غيران عليكي يا ستي .. عيحبك
ندي : بيحبني ؟؟ ادم ما بيحبنيش وانا ما بحبوش بعد اذنك
طلعت جري لاوضتها لانها مش عايزه تفكر كده ابدا
شويه وكريمه طلعتلها تاني علشان تغديها وشدتها واخدتها تقعد معاهم وسط البنات وخلت البنات يحاولوا يفرفشوها
وهيا قاعده نامت علي رجلين كريمه وكريمه بتلعب في شعرها
ندي كان احساس جواها انها عايزه تعمل ده وتشوف رد فعل كريمه ايه ؟؟ فرقدت علي رجليها ولقتها بتلعب في شعرها بحب وبحنان !!
اول مره حد يحتضن ندي كده واول مره تحس بحضن حنين كده وان في حد مهتم بزعلها !!
احساسيس كتيره ملخبطه جواها؟؟ كريمه مهتمه بيها وبزعلها ليه !! ليه بتحاول تعلمها امور دينها وليه مثلا مش بتجبرها تلبس زي بنتها ايتن ؟
ليه ادم اتجنن من لبسها ده هل هو خوف علي اسمه ولا غيره نابعه من حب ؟؟؟
رجع ادم اخر النهار وامه فهمت منه ايه اللي حصل
كريمه : بس برضه براحه عليها واحده واحده يا ادم
ادم : عايزاني اسمع رجاله بيتكلموا عن مراتي وبيوصفوا في جسمها وكل واحد بيتخيلها في سريره وتقوليلي اهدي وواحده واحده ؟؟ طيب ازاي ؟
كريمه : ايوه اقولك اهدي لسببين مهمين
ادم : ايه هما ؟؟
كريمه : الاول انها مش مراتك اصلا ...
ادم كأنه اتفاجئ بالحقيقه دي او تناساها
كريمه : والتاني ان كل العالم ده جديد عليها دي امريكيه اتربت من غير حرام او عيب او قيود مستني منها ايه ؟؟ تكون محجبه زي اختك !!! ولا زيي انا ؟؟ فوق يا ادم وفكر بعقلك شويه .. اطلعلها يا ابني وطبطب عليها بدال العنف ده من امتي انت كده ؟؟ فين حنيتك وطيبتك ؟؟ ليه دي علي طول متعصب معاها ؟؟ ما انت امجد بيعمل مصايب وبرضه بتاخده بالعقل اهدي عليها شويه
ادم طلع ولقاها بتعيط وكمشانه في مكانها وحس قد ايه هيا ضعيفه ومنكسره وهو بيقسي عليها كتير فضل واقف كتير مش عارف ينطق او يتكلم وهيا ما رفعتش دماغها تبصله حتي
وكان هينزل يقعد مع امه بس حس انه فعلا جه عليها قوي فراح وقعد جنبها علي السرير وهيا بتعيط وهو متكتف وواخد الموضوع علي كرامته قوي
واخيرا قلبه رق فمسك ايدها وشدها وهيا رافضه تقوم معاه او تتعدل بس هو شدها جامد لحد ما قعدها قصاده واول ما شاف وشها كل تردد جواه اختفي واتبدد مسح وشها بايديه
ادم : بطلي عياط خلاص اهدي ... اهدي حقك عليا
بصتله وكأنها شايفه حد غريب عنها .. ادم بجبروته بيعتذر معقوله ؟؟
ادم : انا اتنرفزت عليكي جامد بس غصب عني ما استحملتش رجاله يبصولك بصه مش ولابد وجيت وطلعت كله عليكي انتي
ندي : انا ما طلعتش بالهدوم بره انا بس قعدت انا وماما في التراس شويه شربنا قهوه لكن ما طلعتش بره
ادم : برضه ما استحملتش حد يبصلك كده
مسح ادم دمعه نزلت منها غصب
ادم : خلاص ما تعيطيش بقي
شدها في حضنه وهيا كأنها كانت مستنيه ده لانها دفنت نفسها جواه وكأنها اخيرا وصلت لغايتها وامنياتها وما اخدتش بالها نهائي ان لهجه ادم كانت عاديه مش صعيديه لما بيتكلم بهمس وحنيه ما بتركزش هو بيتكلم ازاي اصلا .. اخدت نفس طويل شمت ريحته اللي عشقتها مش عارفه ليه كانت متخيله انها مش هتحب ريحته وانه كصعيدي مش هيعجبها وان هتبقي ريحته مش حلوه بس عشقت ريحته وريحه برفانه المميز واستغربت شياكته في حاجات بسيطه
ادم ضمها جامد ودفن وشه في شعرها وداب بين احضانها بس فجأه افتكر انها شرعا مش مراته .. فجأه افتكر قيم ومبادئ اتربي عليها .. فجأه افتكر سالم اللي امنه علي بنته
بعد عنها وسابلها الاوضه وخرج من غير ولا حرف وهيا فسرت ده انه خاف من ضعفه او انه ندم علي اعتذاره بس استغربت من قلبها اللي بيعاندها في وجوده وبيتمني قربه ...
بالليل متأخر رجع وحس ان في حاجه اتغيرت بينهم
مش عارف ينام جنبها ويفضل بعيد .. في شحنات بقت في الجو مش عارفلها مصدر ...
بقي بيبعد عنها تماما وبيحاول ديما يتجاهل وجودها وده حسسها بوحده رهيبه ...
بتعدي الايام وكل يوم يخترع خناقه جديده معاها ولسه حابسها
ندي : بقولك ايه استني قبل ما تنزل
ادم : افندم نعم
ندي : انا عايزه اخرج انا زهقت
ادم : اخرجي
ندي : والحراسه اللي انت حاططها تحت دي ؟؟
ادم : هشيلها بس تلبسي عدل
ندي : هخرج بالفرس
ادم : ما تبعديش وما تركبيش غير الفرسه بتاعتك مفهوم ؟
ندي : علي فكره انا بعرف اركب خيل من سنين
ادم : ما تركبيش غير الفرسه بتاعتك وما تطلعيش علي الطريق بس في حدود الجناين اعتجد كلامي واضح والا مفيش خروج
ندي ما ردتش وهو سكت ونزل وهيا بتقضي ايامها شبه بعض الايام بقت ممله وهو بيتجنبها كده وحتي ايتن سافرت لكليتها ...
