قصص رومانسيه

بعد الحب

.
.

كانت السعادة والضحكة متفارگ حلكي لان واخيرا راح اكون وية الانسان اللي حبيته سنوات .. مجنت اعرف انه سعادتي ممكن تنتهي .. كنت صغيرة والبراءة العندي تفكر الناس كلها مثلي گلبها طيب .. مچنت افكر اكو حقد او كراهية .. چنت متوقعة الناس كلها فرحانة اليه مچنت اعرف اكو ناس اذا تضحك وراها رأسا تتنكد ضحكتها .. الظاهر اني من هذا النوع من البشر اترككم وية بيت خالتي اللي همة نفسهم بيت عيالي ...
.
.

بيت عيالي يتكون من خالتي سناء اللي هية انسانه حنونه بشكل موطبيعي ربة بيت وعدها 3 بنات(استبرق وسارة ورشا) واثنين ولد الجبير حازم متزوج ومرته اسمها ابتسام وعنده 3 اطفال منها والثاني الكبد ضرغام ...

مر الأسبوعين وتزوجنا بسنة ال2004 وضرغام انسان حنون وكلش حباب وياية (ماأدري يمكن اني حسدت روحي مدري الناس حسدتني مدري اني ماعندي حظ بحياتي مااكول غير الحمد لله والشكر على كل حال ) .
ضرغام :
سعادتي متنوصف واني اخذت الانسانه اللي حبيتها لسنين جنت دائما أكول ميفرقنا بس الموت ومستحيل اعوفج بيوم لكن .....

ضرغام
.
بعد شهرين من زواجنا اتصل بيه ابو شذی

عامر : السلام عليكم
ضرغام : عليكم السلام .. هلة عمي شلونك شخبارك
عامر : بخير والحمد لله .. اريد اگولك شي بس اذا يمك شذی لتبين الها اني حجيت وياك ..
ضرغام:إي عمي تفضل

عامر:ابني قبل اسبوع خالتك تخربطت علينه وتكول مختنگة وديناها للعيادة وفحصها الطبيب وشك بيهة مرض خبيث وسوالها فحوصات وطلعت الفحوصات بيهة خبيث بالرئة ..

ضرعام : عمي مامعقولة خاف الطبيب ميفتهم
عامر : لاابني هذا خوش طبيب واني وديتها لطبيب ثاني وهم تأكد الخبر ..
ضرغام:لاحول ولاقوة الا بالله العلي العظيم عمي شنو الحل نسفرها للأردن؟؟؟
عامر:ابني ميفيد اي شي بعد لان الخبيث منتشر بالرئة ومغلفها حتی ماكو امل بالكيمياوي الدكتور يكول ايامها معدودة وخالتك رافضة الكيمياوي وتريدنه كلنه يمها فإنت جيب شذی وتعالوا كلكم يمها ..

كانت شذی في الصالة مع خالتها وابتسام .. دخل عليهم ضرغام طلب من امه تجي يمه عنده موضوع مهم وياها وخبر امه بالموضوع بدت تبجي وتلطم بصوت عالي .. وشذی من عرفت بالموضوع اغمی عليها خذاها ضرغام للغرفة وغسل وجهها بالمي بعدها بدقائق افاقت شذی وضلت تبجي ..

ضرغام : حبيبتب انتي لازم تكونين قوية هذي امج وتحتاج احد يرفع معنوياتها لتعذبيها بشي وروحي گعدي يمها اهتمي بيهة لتضلين بس تبجين
شذی(دموعها تنزل عشرة عشرة):موبيدي هذي امي تعرف شنو امي .. مااگدر اكون قوية گدامها واني اعرف هي ورة ايام راح تتركنا ..

ضرغام حضن شذی وبدة يمسح علی ظهرها : ادري حبيبتي والله ادري ، بس لازم تكونين قوية اذا مو لخاطر امج لخاطر روحج .. لازم تزرعين ذكری جميلة وانتي بآخر ايام وياها .. هي تريدكم كلكم يمها .. روحي حبيبتي بدلي هدومج واخذي ملابس وياج لان راح تبقين فترة يمها ..