قصص رومانسيه

بعد الحب

سناء : يمة شذی اللي جاي تسوي خطأ ، تری متجوز عالميت بس الرحمة ؛ وبدل متبجين گومي اقري قرآن ادعيلها بالرحمة ولتنسين انتي عندج زوج وعليچ واجبات لازم تأديها تجاهة ، وعندج بيت لازم تشتغلين موبس حابسة روحج بالغرفة وگاعدة

شذی:بس خالتي اني نفسيتي تعبانه مااگدر

سناء:خالة هسة اني شگلتلج اهتمي شوية بزوجج .. هم خطية يتعذب من يشوفج هيچ علی الاقل من يجي ضحكي بوجهه مو يروح ويرجع وانتي بس تبجين كومي غسلي وجهج بدلي هدومج و....

مرت سنة وشهرين علی وفاة الوالدة مصار شي مهم بيهة , لكن لحد هاي اللحظة مصار حمل عندي ..

اليوم رحت للدكتورة اني وضرغام وطلبت من عدنا فحوصات وبعد اسبوع طلعت الفحوصات سليمة من الطرفين ..

شذی:بس دكتورة لعد ليش مصار حمل لهسة؟؟
الدكتورة:انتي علاقتكم الزوجية شلونها؟
شذی:الحمد لله وسويت مثل مگلتي نمت علی ظهري وكل اللي طلبيتيه منه سويناه بس لهسة ماكو حمل ..

الدكتورة : خير ان شاء الله .. هو رزق ربج علی ساعة يجي ، بس كأسباب اثنينكم مبيكم شي .. نسبة زوجج ممتازة وانتي حجم البويضة هم ممتاز ولاعندج هرمونات ودورتج تجيج بموعدها ..

شذی:لعد ليش هيج؟؟؟
الدكتورة : حبيبتي نفس مگتلج رزق من رب العالمين .. انتو ادعوا وصلوا وان شاء الله يستجاب الكم ..
شذی : امين يارب ..
.
.

رجعنا للبيت اول مدخلت استقبلتنا خالتي وابتسام زوجة حماية ..
.
.

خالتها : ها بشروا؟؟؟
شذی : والله خالة هاي ثالث دكتورة تكول اثنينكم مبيكم شي هو رزق رب العالمين ..
ابتسام:ندري بيه رزق رب العالمين ، بس انتو صارلكم فوك السنة وماكو .. واذا فعلا اثنينكم مبيكم شي ليش لهسة مصار حمل؟؟؟ خاف بيج شي ومتقبلين تحجين؟؟

تدخل ضرغام : ان كان بينه شي او مابينه ، صار حمل او مصار .. انتي شدخلج بالموضوع وبصياح هااااااا

ابتسام : هاي شبيك هو اني بس هيج ردت اسأل كفرت خو مكفرت ؟؟

ضرغام:انتي مسألتي انتي جاي تحققين .. يلة شذی امشينه للغرفة يلة ...
.
.
.

مرت ثلاثة اشهر واني وضرغام ندعي ربنا يرزقنا بطفل لكن قدر الله وماشاء فعل ، وبهاي الاثناء اني وضرغام بالغرفة صاحتلنه خالتي نزلنا جوة بالصالة ..
.
.
سناء:تعالوا باركو لاخوكم .. ابتسام حامل وراح يجينا الخامس ..
شذی(ماادري بس الصدك حسيت بالغيرة يعني موبيدي والله هو صح رزق من الله بس هيج تمنيت لو اني هم حامل) : الف مبروك يارب تمام الخلقة وگومتج بالسلامة ..

ابتسام(بصوت ناصي وگدام الكل اللهم صل علی محمد وال محمد وبدت تنفخ بوجهي) : تسلمين وإن شاء الله يوم الالج ولو اني اشوفهة بعيدة ..
.
شذی(صدك انقهرت) : ماكو شي مستحيل علی ارادة رب العالمين ، اني أملي بالله كلش چبير .. طبعا بهاي الفترة كلها ضرغام ساكت وبعدين صعد للغرفة .. اني هم صعدت وراها دخلت للحمام بحجة اسبح واني فتحت المي وضليت ابجي .. اكوله ياربي ليش خليتهم يتشمتون بيه وضليت ابچي لحد ماارتاحيت طلعت لگيت ضرغام ضايج كلش ..