Eternal Bliss

Dard-e-Judai

This is just a little different take of the whole Moez taking Farah scene. It states Wali's thoughts in detail. This was a request by my beautiful friend, Maryam. I hope you like it, Mary <3

Subha k 5 bje woh uske kamre me mehaz isliye aya tha k uski puri raat ki becheni uski bardasht se bahr hogai thi. Usey tanhe bethe rota dekh kr uska dil tou bohat tarpa tha pr na jane kyun woh us lamhe me usey hausla na de paya tha. Woh janta tha k jahan uske ansuon ki kai or wajohaat ho sakti thi, wahin aik wajah woh khud bhi tha. Aik pal ko use sharmindagi zarur hui thi, pr use is khayal ne uske paas jane na diya tha k itne saal woh bila shumar bar uske liye roya tha. Khudgharzi thi ya aik mamoli sa badla lene ki chah, pr kisi khayal ne tou uske qadam mur liye the. Pr woh so na saka tha. Raat bhar uska tarpna, use tarpata raha tha...koi aik karwat na thi jisme use araam ajata. Yeh ehsas bohat shidat se use chuhbta raha k woh uski in siskiyon ka sabab tha.

Agha Jan ki khatir jub us raat Farah ne unke rishte ko qaim rakhne ki us se guzarish ki thi, woh smjh gya tha k baat mehaz Agha Jan ki marzi ki nhi thi. Woh khud apni khatir is rishte ko qaim rakhna chahti thi. Uske badalte rawaiye, uski musalsal uske qareeb ane ki koshishen, uska khud ko uski marzi k mutabiq badal lena, yeh sub hi baatain usey is aik haqeeqat se agah kr chuki thi k Farah ko us se mohabat hogai thi. Pr kya uska iqrar krna itna mushqil tha? Apni nafrat pure dil se izhaar krne vali Farah Behroz Khan se use uski mohabat ka bhi izhar chahye tha. Pr us raat usey phoot phoot kr rota dekh kr bhi jub usne use dhilasey ka aik lafz na kaha, use rone k liye apna khanda na de saka tou usey bohat shidat se yeh ehsas hua k uski mohabat k iqrar ki chahat ne use sangdil bana diya tha.

Zarminey ne use bataya tha k uski ami Farah k sath theek nhi thi, or unki karwi baaton ko woh bohat dil pr lene lagi thi. Woh janta tha k uske rone ki waja uski ami bhi thin. Pr kya woh tub bhi ese hi tarapti agr use uski mohabat ka ilm hota? Yeh jante hue k uska shauhor uske sath khara hai, kya woh uski ami ki baaton pr yun hi dil haarti? Woh janta tha k agr woh uske ehsasaat or jazbaat se waqif hoti, tou shayed is shidat se na tarapti.

Raat jub sharmindagi or nadamat bardasht se bahr hogai thi, tou mehaz uski khabar pochne ko woh uske kamre ki taraf gya tha. Yeh na jante hue k kaunsa tufaan uska muntazir tha. Aik arsa hua tha use apni Tai ami se baat kiye, woh shayed kbhi unse baat krna bhi nhi chahta tha, woh yeh baat achi trhan janta tha k jo kuch Farah ne kiya tha uski sub se bari waja tai ami hi thin. Pr uske khoon me maujood woh Khandani tehzeeb uski ragon me hr pal dorti thi or isliye woh sir jhukaye bohat tameez se unki baat sunta gya tha. Woh mauqa bhi esa na tha k woh purani koi baat dhaurata or na woh esa krne ki khwaish rakhta tha. Tai ami ki pareshani se bahri awaz, unki baat or Farah ki ghair maujoodgi, is sub ne yak dum hi uske qadom tale se zameen khench li thi. Woh sakit hue khara sunta gya k kese Moez ne daulat ki khatir itne saal Farah ka peecha kiya tha, or ab na jane use kahan le gya tha.

Aik pal yeh khayal zehan me aya tha k Farah ko woh uski marzi k khilaf le kr ja nhi sakta tha tou woh akhir apni marzi se uske sath kyun gai? Uske liye usne apni pareshani ko ghusse me tabdeel hote paya. Pr jald hi uska ghussa Farah se hatt kr Moez pr aa thera. Woh use jaan se maar de ga agr Farah ko kuch bhi hua. Uski ghairat pure josh se parwan charh rhi thi, ghussa tha k thamne ka naam na leta. Us neech insan ne himmat kese ki thi uski biwi ko le jane ki? Khud se qasam khata k uski mout ko bhi uske liye takleef de bunaye ga, woh haweli se Farah ko dhundne nikla tha.

Sarkon pr dewanawaar ghoomte use kai ghante beet chuke the. Manzil ka kuch pata na lagta tha. Woh musalsal tai ami se rabte me tha, unke behad israr pr bhi woh unhe hamra na laya tha. Bohat araam se unhe smjhane ki koshish krta ja raha tha k agr use waqai yeh lagta k unke hone se koi faida hota tou woh zarur unhe sath le jata. Unhe yaqeen dilata k woh Farah ko khairiat se dhoond le ga, pr guzrte lamhe k sath uska apna yaqeen tootta ja raha tha. Becheni or istraab ka yeh alaam tha k saans lena bhi mahaal hue jata. Woh sarkon pr is tarapti or umeed ki nazron se dekhta k kahin use Farah dikh jati.