الصافي... طارق اللبيب

الحلقة الخامس و العشرون

اعتذر عن التاخير ...
____________________________
رقية لمن اتصلت على رقم معتصم .. رد ليها بانزعاج .. لانو عارف رقمها وهي مستحيل تضرب ليهو .. بس ختا انو واحد في اولادو حصلت ليهو حاجة ..
قال ليها الو .؟ رقية؟ نعل مافي عوجة .. الاولاد كويسين؟ ..
قالت ليهو الاولاد كويسين .. معتصم انا اسفة .. اني المرة الفاتت رجعتك بالهدية .. اعفى لي انا اسسفة شديد .. ياريت قلبك يسامحني في كل حاجة .. انا ظلمتك كتير ..
قال ليها يا رقية .. انا الاسف لانك اتأخرتي كتير .. وانا تعبت من الانتظار ..
وهسي خلاص .. خطبت وزواجي الاسبوع الجاي ..
رقية صدمت .. وسكتت سااي .. وايدها ماتت .. والتلفون وقع من يدها .. وهي لسه خاتة يدها فاضية جنب اضانها ..
وخاشة في حالة بتاعة ذهول غريب ..
وهو شغال ليها الو؟ .. الو؟ يارقية ؟؟ .. وكت لقاها مابترد .. قفل الخط .. رقية استعادت قوتها .. وبكت بكت بكت .. ومافي زول تحكي ليهو .. خالد ماعندو معاها صراحة .. واحمد بعيد منها .. وبهية سبب المصايب .. طوالي اتصلت على ايمان ..
حكت ليها .. وتبكي .. وايمان في كلام مافرزتو من شدة البكاء ..
ايمان قالت ليها اهدي شوية .. وخليني اوريك تعملي شنو؟ .. اهدي بس واضربي لي تاني ..
قالت ليها هديت يا ايمان .. قولي لي اعمل شنو؟ .. انا كنت قاعدة عادية .. براكم شربكتوني في الراجل ده تاني ..
قالت ليها انتي ح تسمعي كلامي .. ولا احسن ما اتعب نفسي بالكلام؟ ..
رقية قالت ليها قولي يا ايمان .. انا بسمع كلامك .. والله لو قلتي لي اقعي في النار اقع ..
قالت ليها ارجعي ليهو بي تلفون تاني .. قولي ليهو .. انا يا معتصم قررت ارجع لي بيتي واولادي يعشو مع ابوهم .. انا ماعندي مانع تتزوج ده حلالك ..
قالت ليها انتي يا ايمان نصيحة؟؟ .. ده كلام شنو البتقولي فيهو ده؟ ..
ايمان قالت ليها .. هسي انتي موش قلتي لي .. كان قلتي لي اقعي في النار بقع .. بس نفذي كلامي ده .. وارجعي لي سريع انا راجياك ..
سريع سريع اتصلت رقية على معتصم .. معتصم رد ليها .. قال ليها يارقية انتي كويسة؟ اجيك؟
قالت ليهو لالا .. بس دايرة اقول ليك كلام .. ورصت ليهو كلام ايمان بالنص .. وزادت عليهو كلام منها براها .. قالت ليهو انا لمن رجعتك بالهدية .. كانت بهية اختي قالت لي كلام .. قالت انت نبذتني للصافي .. ومسحت بي الواطا .. لكن انا لمن اتحققت .. عرفت انك انت ماقلت الا الخير والصافي برئ من الكلام .. بالعكس هو كان هدفو الامور ترجع لي وضعها الطبيعي ..
لكن بهية هي العكست الكلام .. وخلتني اكرهك .. واكره الصافي بدون سبب .. الله يسامحها .. المهم يا معتصم كدي خليهو الفات .. اناقررت ارجع لي بيتي .. وماعندي مانع تكون معاي ضرة ..
معتصم سكت مساااافة وقال ليها خير يا رقية .. انا برجع ليك ..
طبعا" ياجماعة .معتصم فعلا "خطب واحدة اخت صاحبو ساكنين .. الحلة الجديدة .. وكان كلموها يوم الخطوبة .. قالو ليها انا متزوج ومنفصل عن زوجتو وعندو منها ولدين .. وهي ماعايزة ترجع ليهو ..
وعلى كدا البت قبلت بيهو .. واشترطت عليهو انها مابتقدر تمسك ليهو اولادو .. تحت اي ظرف من الظروف .. وهو كان قبلان .. لانو رقيه اساسا ما بتفرط في اولادها .. ومابتديهم لي مراة تربيهم ليها ..
اها لمن سمع كلام رقية ده .. اتصل على خطيبتو ..
قال ليها انا كان كلمتك انو طليقتي رافضة ترجع لي .. وانا الوكت ده كلو منتظرها تغير رايها عشان اولادي ..
وهسي هي قررت .. انها ترجع لي .. انا ما عايز أأجل زواجي بيك .. لكن عايزك تعرفي انو انا ح ارجع ام اولادي ..
الخطيبة الحبيبة قالت ليهو .. انت راجل مراوغ وخداع .. وماعندك كلام .. يعني معقول مرتك رافضة الرجوع الزمن ده كلو؟؟ .. وماقبلت الا في الاسبوع ده؟ .. انتو موش احسن الواحد يكون صادق في كلامو ؟؟
قال ليها اسمعي انا كلمتك بالحقيقة .. انتي وريني قرارك الاخير ..
قالت ليهو قراري الاخير .. بكلم بيهو سعيد اخوي .. يلا فتك بي عافية ..
المراة قالو كلمت اخووها .. قالت ليهو صاحبك داير يرجع مرتو ..
وداير يعيشني في مع ضرة .. قال ليها طيب وانتي رايك شنو؟
قالت ليهو طبعا" ماعايزاهو ..
قال ليها والله خير مافعلتي .. وهو ذاتو خير مافعل .. قالت ليهو شنو؟ شنو؟
قال ليها معتصم يا استاذة .. من زمن طويل وهو ببكي على اولادو الفرقتو منهم المراة بي عنادها وقوة راسها .. هسي الحمد لله مادام اقتنعت .. انتي ولافي داعي تكوني في حياتو .. ربنا يقسم ليك زول غيرو .. ولو انتي قبلانة تعيشي معاهو بي مراتو واولادو انا ماعندي مانع ..
قالت ليهو يلا في ستين .. انا أساسا قبلت بيهو .. وهو اكبر مني بي 17 سنة .. عشان شنو؟ وعشان منو؟ موش عشانك انت ؟؟
الحمد لله ربنا فكاني منو .. الراجل ده اصلي ماردتو .. بس لانك انت رشحتو لي .. قال ليها يازوله انتي استخرتي؟ ولالا؟؟ .. قالت ليهو استخرتا .
قال ليها خلاص ربنا ما اختارو ليك .. ارضي بامر الله وربنا يقسم ليك اخير منو ..
طوالي اتصل على معتصم .. قال ليهو يامعتصم ياخي نحن والله اسفين شديد جدا جدا .. لكن اختنا دي الظاهر الاستخارة منعت الموضوع .. غيرت رايها تماما"
يازول معتصم ده فرح فرح التقول في جبل نزل من ضهرو ..
وطوالي اتصل على رقية .. قال ليها البت الخطبتها خليتها عشانك هه ..
عان الكضب كمان .. غايتو ؟؟ ..
وقال ليها كلمي اخوانك .. الاسبوع الجاي بجي اسوقكم .. عايز اجر لي بيت في امبدة السبيل .. اجهزه واجيكم ان شاء الله ..
ورقية فرحت .. ولمتين ينهي مكالمتو .. عشان تضرب لي ايمان ولي الصافي وتفرحهم بالحصل ..
اتصلت على ايمان .. قالت ليها يا ايمان .. والله انا كان جنبك .. كنت سلمت ليك فوق راسك .. انتي غايتو حقو يبقوك وزيرة الخارجية .
الموضوع حصل فيهو كيت كيت ..
ايمان دي فرحت فرح لامن بكت عديل .. وبقت تقول ليها هنية ليك يا رقية .. هنية ليك .. والله عجبني ليك من جوة قلبي .. ان شاء الله يارقية ربنا يسعدك .. بس خلاص سيبي طرطشتك .. وشكوكك دي .. واقعدي في بيتك .. وامسكي راجلك واولادك ..
رقية قالت ليها . لالا .. الحمد لله انا اتعلمت منك ومن ولدك .. حاجات عمري ماكنت بتعلمها .. وانا لازم احافظ على بيتي .. عشان ما اجي راجعة لي بهية .. بهية الكنت قايلاها كايسة لي مصلحتي .. تطعني في ضهري يا ايمان؟؟ والله انا ما مصدقة الحصل ..
ولا كنت قايلاها ممكن تزور الكلام .. بس ياجماعة بهية في اللحظة دي كانت واقفة وتسمع في المكالمة ..
وسمعت كلام رقية كلو .. وعرفت انها كشفتها .. وعرفت انو معتصم ح يرجع رقية ..
رقية قفلت من ايمان .. وضربت للصافي وسلمت عليهو .. وقالت ليهو يخسي عليك ياالصافي يعني ..كل الوكت ده ماتجي تشوف خالتك ولايوم ؟؟.. وكنت بتتصل علي قطعت اتصالاتك .. لكن انت معذور .. بهية اختي الله بت امي وابوي .. كانت شاحنة راسك بكلام كلو اكاذيب وتزوير .. طبعا" ابشرك انا ح ارجع لي بيتي .. وابو اولادي .. وده كلو بي سببك وسبب امك .. من بعد الله ..
لكن انا مافي زول برجعني لي بيتي غيرك انت .. لانك انت السبب في الحاصل ده كلو .. يوم الجمعة البعد الجاية .. لازم تجي تتغدا معانا .. تركب ناس حمودي في العربية انت .. لانو حمودي كل يوم يٍسأل منك .. يا امي عمو الصافي ماجانا تاني ليه ؟
الصافي دموعو نزلن بالفرحة .. بالله التقول ما دي المراة الاتهمتو بالسرقة .. وضايقتو في البيت طول فترة قعادو معاهم ..
لكن الصافي صافي .. صافي القلب والسريرة ..
المهم المكالمة انتهت .. ورقية دخلت جوة .. لقت بهية تبكي .. قالت ليها .. ابكي .. ابكي .. ان شاء الله يايمة تبكي دموع الدم ..
بهية قالت ليها ده كلو عشان دايراك تقعدي معاي ؟
انتي ماعارفة انا بعمل كدا ليه؟ .. انا فقدت امي .. وتاني ماعندي زول غيرك انتي بقى لي .. انتي لمن تمشي لبيت راجلك .. انا البقعد معاي منو؟
رقية قالت ليها بالله ؟؟ ده كلام بتقوليهو لي انا ؟ .. انا مابعرفك .. انتي ما اصلك كضابة وخاينة وغدارة ..
قالت ليها انا والله ماقاصدة حاجة ماكويسة .. لكن بس عايزاك تقعدي معاي ..
قالت ليها انتي لو جيتيني بطريقة تانية ما كان افضل؟؟ ..كنتي تخليني اصلح علاقتي مع الراجل وبعد ارجع ليهو .. اقنعو يجي يسكن معانا في البيت .. واصلا اخواني ماعندهم مانع ..
لكن بعد العملتيهو ده .. تاني محرم علي مابقعد معاك .. بطلي البكا الفاضي ده .. ووقفي دموع التماسيح دي .. انا تاني ماعندي ليك شي ؟
قالت ليها طيب سامحيني يارقية .. انتي هسي ناس ايمان والصافي موش سامحوك؟
قالت ليها مابسامحك .. وانا مازي ايمان .. انا مابعرف المسامحة الزول البغدر بي تاني مابسامحو ..
ـــــــ
اها بعد يومين كدا اتصل معتصم ابو محمد .. علي الصافي .. وبشكر فيهو .. على الشي القام بيهو هو وامو ..
قال ليهو والله يامعتصم .. انا ماعملت اي حاجة .. بالعكس انا كنت ح ابوظ المواضيع بي سبب بهية .. لكن الحمد لله امي اتداركت الموضوع وواتعاملت بي ذكاء ..
معتصم قال ليهو ياخوي الحصل كلو عارفو .. البارح الليل كلو انا بتونس مع خالتك رقية بالتلفون .. وحكت كل حاجة من طقطق للسلام عليكم .. والله انتو نعم الاهل لكن بهية .. الله يهدينا ويهديها كانت ح تسوط اي حاجة ..
انت عارف ي الصافي انا كنت على وشك اني اتزوج وخلاص؟..
لكن امك الله يديها العافية لحقت الموضوع في اخر لحظة ..
اها نحن ننتظر يوم الجمعة نشوف البحصل شنو ..
لكن في الايام دي .. كانت في قصة حاصلة في الجامعة .. بتخص لينة .. طبعا" لينة الحنينة .. مواصله علاقة ولقاءات مع الصافي ..
والود الاسمو مؤيد داك .. مستاء جدا من علاقة الصافي بي لينة .. ماعارف ليه.؟ .. مع انو هو خلاها .. وماعندو ليها اي حاجة .. لكن بس غل وحسادة ..
الصافي اساسا" البت دي متعلقة بيهو .. لكن هو متعلق بي دراستو .. وهي بتصر تلاقيهو .. عشان تحكي ليهو .. وهو بعزها جدا وبحترمها احترام فوق الحد المعقول .. لكن ماحصل يوم عبر ليها عن مشاعر خاصة ..
وهي منتظرة منو كلمة واحدة تعتمدها .. نهائي مالقت ليها منو عقاد نافع .. بس كل ماتلقاهو ماشي تناديهو .. وتشاورو في موضوع ..
مرات يكون مافي موضوع تقطع ليها موضوع من راسها ..
وكت ماتلقاهو بتدق ليهو تلفون .. ولو قالت ليهو انتظرني انا جاياك ممكن ينتظرها ساعتين .. ومع مرور الوقت وروعة شخية البت وصدق حبها .. الصافي بدا يميل ليها ميل عاطفي .. لكن ما قادر يصرح بيهو .. وماعارفو ده شنو؟
بس بحس انو عايز يشوفها .. عايز يسمع صوتها .. عايز يلاقيها .. بكون سعيد لمن تتكلم معاهو .. يومو المايلاقيها بحس باليوم ماحلو ..
اها طبعا مؤيد مطلع ليهو دعاية في الشلة .. انو الصافي بلعب بي لينة .. وبقضي معاها وكت .. وبكسر بيها الزمن .. وهو ماعايزها للمستقبل .. والكلام ده ماوصل للصافي .. كلام بتقال بين الاولاد والبنات بس ..
لكن مافي زول واجهو بيهو .. زي ماقالو في المثل (الكلام يصل الريف.. وكت يجي عند سيدو يقبف )
اها لمن الكلام في الجامعة كتر .. ومؤيد بقى يجيب كلام فاضي واتهامات للصافي غير صحيحة ..
في واحد .. من المقربين للصافي .. لاقاهو قال ليهو يا الصافي انا عايز اتكلم معاك كلام بيني وبينك ..
مشو قعدو براهم الاتنين ..
قال ليهو يا الصافي انت البت الاسمها لينة دي .. علاقتك معاها علاقة مستقبلية ولا تقضية فراغ ؟؟
قال ليهو لالا والله .. لينة زولة اختي شديد .. وبعزها لكن مابينا علاقة خاصة .. قال ليهو كيف مابينكم علاقة خاصة؟ .. والناس شايفنها طالعة ونازلة معاك؟ .. ويوميا بتقعدو مع بعض وتتونسو ..
قال ليهو هي فاهمة وانا فاهم .. انو دي علاقة زمالة وصداقة بس مافي شي خاص ..
قال ليهو طبعا" انا بصدقك .. انك خاتي العلاقة كدا .. لكن الناس التانين مابختوها كدا .. بعدين لينة بتحكي عنك لي صاحباتها ..
ومعجبة بي شخصيتك .. اعجاب شديد .. والصافي الصافي دي مابتمرق من خشمها كلو كلو .. وشكلها كدا بانية عليك امال المستقبل ..
الصافي قال ليهو والله لينة زولة ممتازة .. واي زول يتمناها .. لكن انا ماعندي طريقة اتكلم كلام زي ده .. في الظرف الراهن ..
لاني ماعارف شكل حياتي ح يكون كيف .. فانا ماداير اسبق الحوادث .. واعيش لي انسانة على امال كاذبة .. اصعب حاجة يامحمد انو الزول يبني امال طويلة وعريضة .. و بعدين يتصدم بالفشل ..
انا لو كنت اتخرجت .. واستلمت شهادتي .. تاني لو اشتغلت ولا ما اشتغلت .. ممكن اتكلم مع اي واحدة بي قلب قوي .. وبكون واثق من وضعي ومتوهط ..
محمد قال ليهو يعني معناها انت هسي لينة ماعندك ليها شي .. وده واضح من كلامك ..
طيب ياخي انا بوصيك وصية .. انت زول عزيز علي .. الزولة دي لو ماعندك ليها حياة مستقبلة .. احسن تفارقها عشان ماتخلي الناس يتكلمو فيك وفيها .. وهم اساسا" بتكلمو .. وصاحبك اب قفايس مطلع فيك دعاية انك بتلعب بي بت الناس ..
قال ليهو اب قفايس منو؟ قال ليهو مؤيد .. منو غيرو ؟......
الصافي قال ليهو عليك الله قال كدا؟ .. قال ليهو والله كل يوم بقول كدا .. ودي بقت سمعتك في الجامعة على لسان اليسوى والمايسوى .. وانت بالطريقة دي بتأثر على سمعة البت برضو يعني ..
الصافي سرح هناك .. وقال ليهو جدا" يامحمد ..انا باكر القريبة د .. ي بقطع ليك منها كل العلايق .. حفاظأ عليها هي وعلى سمعتها .. ومؤيد انا ما ح أسأله .. وح أخليهو لي رب العالمين
لكن ياترى البحصل شنو على لينة الحنينة .. بعد الصافي يقطعو معاها 6 صفر. وهو بقى بالنسبة ليها زي الاكسجين ..
النشوووووووف ..

إلى اللقاء