الصافي... طارق اللبيب

الحلقة الثالثة والعشرون

رواية الصافي ..
الحلقة 23 ..
بقلم طارق اللبيب ..
الصافي انزعج جدا من تلفون خالد .. ووقفل التلفون سريع .. وقال لابوهو يا ابوي نحن لازم نرجع بحري سريع ..
قال ليهو الحاصل شنو يا الصافي ؟ حكى ليهو الحصل .. الامين ده قام اتنفض كدا نفضة عجيبة .. وبقى يتكلم زي الما مركز .. لاحول ولاقوة الا بالله .. بالله شوف المراة دي عليك الله .. هسي نحن فاضين لي جرجرة زي دي.. حسبي الله ونعم الوكيل .. كمان شروع في انتحار يا رقية؟
امشي نادي امك .. وكلمها بي طريقة ذكية كدا .. ما تخلعا
قال ليهو حاضر يا ابوي ..
بكري سيد البيت قال ياجماعة ان شاء الله سلامة .. انتحار شنو؟ كمان كفى الله الشر .. الصافي مشى ينادى امو .. جنب الباب والامين هنا بحكي لي بكري سيد البيت .. قال ليهو دي واحدة بت خالة المدام .. شوية كدا عندها مشكلة نفسية ؟
الصافي كورك لي امو جاتو جنب الباب .. قال ليها اسمعي رقية دي قالو تعبانة من حكاية نحن مشينا زعلانين دي .. واحتمال اخوانها شاكلوها قالو دخلت في حالة .. لازم نمشي نحل المشكلة دي ونجي .. قالت ليهو ياجماعة والله انا تعبانة ماقادرة اتحرك .. لو المشكلة بتتحلا ليكم انت وابوك امشو سيبوني ..
قال ليها لالا يا امي عيب علينا .. انتي بت خالتها وزي اختها الكبيرة .. شدي حيلك كلو بي اجرو .. انا طول عمري قاعد اقول ايمان بت الحاج .. عزيمتها اقوى من الرجال .. ارح ورينا ابداعاتك
.. بعدين الزولة تعبانة يعني تعبانة .. احتمال هسي نلقاها في المستشفى .. قالت ليهو مستشفى شنو يا الصافي دي دلعانة ساي .. وبتحب تلعب بي اعصاب الناس ..
بس الله يستر مايكون احمد ضربها .. وا حاجة .. طيب كويس اغير توبي واجي ..
باختصااار خلو الاطفال مع ناس بكري في بانت .. ومشو اتصلو في الشارع قالو ليهم نحن في مستشفى ال..... وفي العناية
وصلو ليهم هناك .. ولغاية الان ايمان ماعندها خبر بالحبوب وبي الشروع في الانتحار ..
قابلهم خالد برة .. وقال ليهم عملو ليها غسيل للمعدة .. لكن لسه في غيبوبة وعندها هبوط حاد ..
ايمان قالت ليهو يغسلو ليها المعدة ليه؟ هي اصلا ماكلة شنو؟
قال ليها الصافي ماكلمك؟ رقية بلعت حبوب عشان تنتحر .. ايمان اتخلعت لمن المطبقة والموبايل وقعن من يدها ..
قالت ليهو ليه يا الصافي ماكلمتني ..؟ قال ليها قلت لمن تصلي .. احتمال مايكون بلعت .. المهم ايمان جرت لاجوه قالت ليهو دخلني عليها ياخالد .. قال ليها معاهم احمد جوة ابو يدخلونا .. اصبرو ننتظر احمد يجي نشوفو بقول شنو.
بعد شوية احمد جا من جوة قال الاوضاع هادية والامن مستتب .. سلم على الجماعة واتأسف على الازعاج ..
وقال ليهم انا غلطت خالد .. ماكان يضرب ليكم .. لكن خفنا من اللوم..
تم غسيل المعدة من اثار العقاقير .. لكن بس في مشكلة في الدم عاملة هبوط في الضغط شديد .. ومشغلين ليها اجهزة الانعاش والحيويه ..
المهم انتو ادعو ربنا يستر ..
اها هسي المهم الناس ديل حارسين باب المستشفى .. من الساعة 9 مساء لغاية الساعة 2 صباح .
قدر ما احمد حنسهم يرجعو يمشو .. قالو مامكن نمشي ونخلي رقية في العناية ..
وايمان دي تدقس لامن تقرب تقع من التعب والارهاق .. المهم غايتو زي الساعة 2 صباح كدا قالو الزولة دي استعادت وعيها
والصباح ح يحولوها الغرفة .. عادي ويكملو ليها العلاجات ..
واحمد اصر انو الامين يسوق ايمان وبهية والصافي ويمشو البيت في شمبات .. ويخلي خالد معاهو .. الصافي قال لالا يمشي خالد عشان بحتاجو ليهو في البيت انا بكون معاك ياعم احمد ..
المهم في النهاية اتغلب عليهم الصافي .. وقعد مع احمد .. وديل مشو البيت .. واحمد والصافي رقدو ليهم في مفرشة قدام المستشفى ..
الصباح بدري الصافي قام صلى .. وقعد مهموم .. الليلة الاحد المفروض يمشي الجامعة .. عندو محاضرات مهمة وضرورية وماعايز يفوت خالتو يخليها في الحالة دي ..
المهم زي الساعة 8 دخل احمد .. قالو ليهو حولناها الغرفة الفلانية .. والزولة كويسة .. ممكن تمشو ليها هناك ..
ضرب للصافي .. قال ليهو تعال في الغرفة الفلانية .. احمد دخل عليها ..
ولقاها مفتحة وتعاين بعيونها ..
قال كيف يا رقية ؟ انتي هسي حاسة بشنو؟
قالت ليهو كويسة ماحاسة بحاجة .. انتو وكت ماعايزني اختكم .. وخلاص استغنيتو مني .. جايبني المسشتفى ليه؟
سمعو دقة في باب الغرفة .. دق حفيف كدا .. احمد قال ليهو اتفضل يا الصافي .. هي طوالي قبلت على الحيطة ..
احمد قال ليها ماتبقى واحدة متخلفة .. الود جاييك بي كل شفقة وصفاء نية .. عشان يشوفك تقبلو منو على الحيطة ؟
هسي المفرو البيقبل من التاني منو؟
الصافي قال ليها خالتي رقية الف سلامة عليك ..
براحة كدا .. قالت ليهو الله يسلمك ..
قال ليها مامشكلة يارقية ده شي بحصل عادي في البيوت .. في بيت في الدنيا دي مافيهو مشكلة ؟ .. لو المشاكل بحلوها كدا .. كانت الدنيا انتهت .. دي سنة الله في الحياة .. سوء التفاهم بين الاحبة حصل بين الرسول صلي الله عليه وسلم وبين عائشة الصديقة ..
نحن مع شنو كمان .. انسي الموضوع يارقية دي محنة وعدت ..
واتاكدي نحن مازعلانين منك .. ولو زعلانين ماكنا جينا جارين وخايفين عليك .. ماتبقى زولة متعقدة وحساسة خلاص .. المهم انتي هسي كويسة .. ..
بهية ضربت من البيت في تلفون الصافي .. قالت ليهو رقية بقت كيف ؟ قال ليها كويسة .. والله ياخالتي بهية هدي هاك اتكلمي معاها..
بعد اتكلمت مع اختها .. الصافي قال ليها اديني ليها في التلفون ..
قال ليها يابهية .. امي نامت كويس؟ .. لانها مشت من هنا تعبانة شديد ..
قالت ليهو نمنا والله الحمد لله .. يادوب صحينا زي الكنا واقعين في بير ..
قال ليها الحمد لله محنة وعدت ..
خلي ناس ابوي يجو يشوفوها .. عشان انا ماشي الجامعة ضروري ..
اها ناس ايمان جو راجعين المستشفى و .. حمدو السلامة .. ومن هناك مشو الشقة ..والصافي لبس وشال حاجاتو ومشى الجامعة .. وناس الامين مشو بانت .. والعصر اتلاقو الامين والصافي ومشو اشترو مسلزمات السكن..
وجوهو امو وابوهو واخوانو الاتنين كلهم واخدو .. معاهو يوم في الشقة وسافرو .. كويس ..
ومرت الايام ..
رقية الحمد لله ملكت الصحة ورجعت لاولادها .. بس جواها حسرة وندامة ومحتقرة نفسها احتقار غريب .. وكل مرة تقول انا اسوء انسانة على وجه الارض ..
بهيه يوم قالت ليها .. انتي زمان بتقولي معتصم اسوء انسان على وجه الارض .. هسي خلاص حولتي الصفة لروحك؟ .. قالت ليها معتصم والله احسن مني بمراحل .. انا بعد مشكلتي مع الصافي راجعت نفسي .. ولقيت نفسي كلي غلط في غلط .. وعرفت انو الزول بالطيبة والاخلاق .. ممكن يتغلب على كل مصيبة .. ويهزم اي شرير ..
ودي حاجة جربتها في روحي .. الناس ديل انا كنت متمنية يشاكلوني .. كان الصافي كان امو .. ويشتموني ويهينوني .. بس ده كلو ماحصل عاملوني احسن معاملة راقية اذتني .. والصافي الاتهمتو بتصل علي الصباح والمساء .. عشان يطمئن على صحتي .. يتصل علي اكتر من احمد اخوي ود امي وابوي ..
حقيقة يابهية الصافي هزمني وكسر نفسي من جوة .. وخلاني عندي عقدة من نفسي ليوم الدين.. تاني بشوف نفسي انا الغلط الوحيد في الدنيا ..
اها بي مناسبة معتصم .. يوم الصافي كان ماشي لي موضوع على بي كرعيوهو ساي .. فجأة كدا لاقى معتصم النور قابلو قريب لي طلمبة الغالي ..
سلم عليهو وقال ليهو كيف الاولاد يا الصافي؟ .. قال ليهو والله طولت منهم .. انا سكنت هنا قريب ..
قال ليهو ليه؟ .. تكون رقية كرهتك شمبات والقرى المجاورة لها صح؟ .. قال ليها لالا انا اجرت هنا عشان اكون قريب للجامعة .. لانو المشوار لي بحري بعيد .. لكن بالجد انت رقية دي ظالمها تصدق ..
ياخي دي خالتي وانا بعرفها .. بس محتاجة منك لي حنان ومعاملة طيبة . والله تكون في امن وامان .. لكن رقية طبعا زيها وزي باقي الحريم .. مابتجي بالقوة والقهر .. ياخي انا ابالغ ليك ..انا اكتر زول مشتاق ليهو في بيتنا ولدك حمودي البطل ورقية امو .. واخدت ليهو بسمة وعاين هناك وقال ياسلااام ياخي ..
عليك الله انت هسي ما اشتقت لاطفالك ؟ ياخي عليك الله حمودي وامجد بتفاتو ؟
قال ليهو انت قايلني انا ماعايزهم .. انت قايلني انا مابحب اطفالي .. بس المشكلة هي ماعايزاني .. مفتكراني بخونها .. سبحان الله .. انا بعد مافاتت مني .. ماحصل عيني اترفعت على بت ناس ..
في الاول كانت بتشك في اخواتي .. تاني شوية شوية بقت تشك في امي .. لمن استحالت الحياة بينهم .. انا رحلت من بيتنا عشان هي ترتاح .. وامي واخواتي يرتاحو .. بس تاني الشكوك بقت موجه لي انا .. انت القروش دي بتجيبها من وين ؟
انت قاعد تدين .. انت قاعد تلعب قمار انت انت ..
تاني تعدي ليها ايام تمسك لي اسطوانة انت عندك علاقات مع البنات ..
انت بتحب فلانة .. الريحة الفي قميصك دي شنو ؟
يعني والله عقدتني في روحي .. وبعد دا انا صابر عليها عشان اولادي .. في النهاية قالت لي طلقني .. انا ما مطمئنة معاك .. انت ممكن تبيعني .. انت ماراجل ..
طوالي وديتها اهلها .. ولمن اجي اسلم على اولادي .. ما بتقابلني نهائي .. يعني المفروض الزول الزيك ده يا الصافي يكون عارف انو انا عايز اولادي .. وحتى رقية ماقنعت منها وقادر اتعامل مع اي مراة غيرها ..
قام الصافي قال ليهو طيب .. بس انت اصبر لي .. عليك الله .. وطول بالك .. انا والله داير خالتي تكون مستقرة في بيتها .. وداير حمودي وامجد يتربو بين كنف ابوهم وامهم ..
تلفونك معاي .. سجل رقمي ده وخليك متواصل معاي ..
وفات منو على كدي .. والصافي اصر في نفسو انو يرجع رقية لي زوجها .. ودي فرصة جاتو على قدح من ذهب ..
لكن هل رقية حتتقبل تدخلو في الموضوع ده؟؟ .. لانو الصافي حاسي بي كراهية رقية ليهو.. وعدم قبولها ليهو في اي شي ..
وبقى يقول حتى بس عشان حمودي انا لازم اسعى .. لكن ياربي كيف الطريق .. مافي غير بهية ..
انا اتواصل مع بهية ..
قام اتصل علي بهية قال ليها ..
انا يوم الجمعة جاييكم يابهية .. رقية زعلانة مني ولا رضت ؟
قالت ليهو والله هي طبعا" مازعلانة منك .. زعلانة من روحها .. وانا في راي ماتجي هسي .. عدي ليك فترة كدا وتعال ..
قال ليها طيب في موضوع .. مهم جدا .. انا عندي عايزك تسمعيني كويس..
انا طبعا" قابلت معتصم .. واتكلم معاي ومتأثر شديد بي فراق اولادو وزوجتو ..
انا عايزك بي طريقتك الخاصة .. توصلي ليها معلومة انو معتصم ماعندو مانع يرجع ليك .. وانتي يابهية لو عندك اي خطة بغير طريقي انا اعمليها .. واتصرفي معاها ..
قالت ليها خلاص كويس .. ماتشيل هم .. انا بوصل ليها الكلام .. وان شاء الله ربنا يسوي الفيها خير ..
قفلت بهية منو التلفون .. وضربت الكلام في راسها .. ومشت كلمت رقية .. لكن قالت ليها شنو؟؟
قالت ليها عارفة الاتصل علي منو؟ قالت ليها اها منو قولي ..
قالت ليها اتصل علي الصافي .. وقال لاقاهو معتصم .. وكلامك طلع صاح يارقية .. معتصم طلع راجل حقير .. قال للصافي خالتك رقية زولة خسيسة وقلبها اسود .. وهي ح تضيع لي اولادي .
رقية قالت ليها شفتي يابهية ؟؟ انا موش قلت ليك الراجل ده لو بقى قبلة انا مابصلي عليهو .. الله ينتقم منو .. كمان بتكلم عني كدا لي ناس الصافي .؟؟
ورقية بعد ماكانت شوية بتفكر ترجع لي بيتها .. الكلام ده قفل نفسها نهائي من الموضوع ..
الى اللقاء ..