VAWKPU ziaktu - Amami Ralte

Zual zelin bung-1na ziaktu - amami ralte

"Test kit chu I rawn hawn ta em?" Inchhung ka luh rual rual chuan ka ṭhiannu Hlimtei chuan rilru hah hmel zet hian minlo zawt nghal thuai a, "Aw hawn e" tih paha ka bag aṭanga ka lak chhuah chuan a rawn ban nghal rawk rawk a, hmanhmawh zetin bathroom-ah chuan a tlan lut nghal zat bawk. Ka tihngaihna hrelo chu bathroom kawngkhar bulah chuan ka va ding ta ringawt a. Bathroom chhungah chuan a che ri deuh sat sat a , a rei zek lehnghal, ka ngaih ṭhalo chuan kawngkhar chu va kik dat datin , " Hlim, tinge Iva rei ve ? Lo chhuak teh" hlauthawng rilru deuh taka ka han tih chuan bathroom kawngkhar chu a rawn hawng ve mai bawk . Ka lo en reng a, a hmelah chuan beidawnna hlir ka hmu. "Mate..." tia ka han biak chuan min rawn en in , beidawn hmel fe hian ,"Ka rai..."a ti sap a. A kut ka vawnna chu ka tinghet zual sauh a, hetianga a awm ka hmuh hian ka lo na ve ngawih ngawih thei. Ni e, Ṭhian ṭha berte an nat a, an hrehawma, kal zel ngaihna pawh hrelo khawpa an beidawn te hian, kan thisenzam zawng zawng thleng hian an na tih hriatna ringawt pawh chuan min fan chhuak a, Kan lo na ve em em ṭhin. Kan hmangaihte na lai hmuh hi khawvela thil hrehawm ber a ni ngei ang. Hnem tuma ka ṭawng chhuah leh hma chuan " Engtin nge ka tih ang? Ka ti tla mai dawn " a ti zawi sap a, a aw te chu a khur thei hial . Ka khawngaih takzeta mahse nau tihtlak chu rem ka ti lo bur thung." Teuhlo ! Chutiang te chuan engtin nge I ngaihtuah theih zawk? Nunna hlut zia kan hria a , I pek theihloh chu tinge lak I tum a? Pathian khi a zahawm lutuk. Tunah chuan I rilru ala fim lo a, ngaihtuahna ṭhalo pui pui I pu anih kha, I damchhunga I inchhirna tur thil I tih hi ka phal hleinem. Chubakah I naute te chu ka fa ve tho alawm, tunah hian ka tan chuan ka naute min laksak I tum tihna anih chu . Engmah hlau suh, Ka awm reng dawn. Naute leh nangmah chauh ngaihtuah la, a bak chu keiman ka ngaihtuah vek ang ,tunah chuan a êng zawnga thil kan thlir hram hram hi a ngai ania, hmalam hun kan hrelo a, a awlsam dawnlo tih ka hria, mahse naute tihtlak chuan engmah a siamṭhat phah dawnlo.Siamṭhat ahnekin i damchhunga i nun tihrehawmtu leh kumkhuaa i inchhirna tur a ni thei ania, Chuvangin intipachang hram hram rawh aw " ka ti ve ta duah a. Ani pawhin ngun takin alo ngaithla ve kar bawk. Engemaw chen kan han ngawih ren rawn hnuah chuan rawn thaw chhuak halhin, "Engtin nge kan awm zel ang le? Ka chhungte lahin ina ka haw pawh an phal tawh bawk silo , awmdan tur pawh hi ka hrethiam thiam tawhlo. Keimah chauh pawh tih tawh laia naute nen phei chuan I tan phurrit kan ni mai mai zawk ang. " rilru hrehawm tih hriat tak chuan a ti charh charh a. A inthlahrung leh tawh hle tih pawh ka hria , a dinhmun hi ka dinhmunah ka chan a, a rilru hrehawm dan tur chu ka hrethiam em em a , chutih rualin a tan hi chuan ka engmah hi ka ui lova, ka neih chhun pawh phal takin ka pe mai ang,' a tan hian I nunna I hlan ngai dawn se, I hlan thei angem?' tih zawhna min zawt tase vawikhat tê pawh inngaihtuah hmasa miah lovin 'aw' tiin ka chhang ang. Hetiang chiah hian ani pawhin ka tan engmah ui leh tih hreh a nei biklo tih ka hrechiang . "Ka sawi ziah kha Ka bulah chuan inthlahrun tihvel kha chu ching fo suh . Min ring tawp la chu chu a tawk. Naute I pai bawk si, I rilru te kha ti hah duh reng reng suh. Kan pahnih chauh kan ni tawhloa, naute nen pathum kan ni tawh. Tunah chuan chhungkua kan ni tawh a, inthlahrung tawhlo la naute chauh kha ngaihtuah tawh rawh. A bak chu ka ngaihtuah vek ang ka tih kha"
Ka ti leh dap dap a, min rawn kuah a ,a insum zo lo chu a ṭap ta zawih zawih a. Lo kuah let vatin ka thiam ang tawk chuan ka hnem pah mawlh mawlh bawk. A thil tawn te ka ngaihtuah let a, a chhungten a bialpa ṭhen tura an nawr dan te, ani lahin a duh em avanga a ṭhen theihloh dan te, A chhungte hial kalsana a bialpa a zui dan te ,a chhungten a haw leh an phalsak tawhloh hnuah a rilru natna belhchhah turin a bialpa a rin leh a duh em em in ,a nu in mo atana alo duhloh avanga a kalsan dan te, a tawpa mal leh rilru na taka a awm dan te ka ngaihtuah let a,Ka mittui chu ka dang zo tawh biklo,ka rilru natna leh ka thinrimna chu a inchen hial ang. Hetiang khawpa hmeichhe rilru no leh thianghlim hi mipa nep tak a tawn fuh palh avangin heng thil zozai hi a tuar chu a ni si a, tun aṭang chuan a nat leh hi ka awm chhung chuan ka remti tawh lo . Amah leh naute tan ka theih ang apiang chu ka ti vek dawn a ni.