The Pearl Within The Shell

မမျှော်လင့်ထားသော ကမ်းလှမ်းချက်

နံနက်ခင်း၏ နေရောင်ခြည်သည် လိုက်ကာအထူကြီးများကြားမှ တိုးဝှေ့ဝင်ရောက်ရန် ကြိုးစားနေသော်လည်း ဤအခန်းလေးထဲတွင်မူ မှောင်ရီပျပျသာ ရှိနေဆဲဖြစ်သည်။ အခန်းထောင့်ရှိ စားပွဲပေါ်တွင် တောက်ပနေသော Graphic Tablet ၏ အလင်းရောင်ကသာ အခန်း၏ အသက်ဆက်ရာ ဖြစ်နေပုံရသည်။ အခန်းထဲတွင် ပစ္စည်းပစ္စယများ သပ်ရပ်စွာ ရှိနေသော်လည်း လူသူကင်းမဲ့နေသကဲ့သို့ တိတ်ဆိတ်လွန်းလှသည်။

​ကလစ်... ကလစ်...

​ဒစ်ဂျစ်တယ်ကလောင်တံလေး၏ လှုပ်ရှားသံက တိတ်ဆိတ်နေသော အခန်းထဲတွင် စည်းချက်ကျကျ ထွက်ပေါ်နေသည်။ အသက် ၂၃ နှစ်အရွယ် ကောင်လေးတစ်ယောက်သည် ကွန်ပျူတာရှေ့တွင် အာရုံစူးစိုက်ကာ ပန်းချီဆွဲနေသည်။ သူ၏ နဖူးပေါ်တွင် ဝဲကျနေသော ဆံပင်အုပ်အုပ်လေးများအောက်တွင် တောက်ပသော မျက်လုံးအစုံ ရှိနေသော်လည်း၊ ထိုမျက်လုံးများနောက်တွင်မူ ဖော်မပြနိုင်သော ဝေဒနာအချို့ ကိန်းအောင်းနေသယောင်။

​ထူးခြားသည်မှာ အခန်းထဲတွင် တစ်ယောက်တည်း ရှိနေသည့်တိုင် သူ၏ မျက်နှာတွင် အနက်ရောင် Mask တစ်ခုကို တင်းတင်းကျပ်ကျပ် တပ်ထားခြင်းပင်။ နှာခေါင်းလုံးလုံးလေးနှင့် နှုတ်ခမ်းထူပြည့်ပြည့်လေးများကို ထို Mask အောက်တွင် လုံခြုံစွာ ဝှက်ထားသည်။ သူသည် အသက်ရှူရသည်မှာ အနည်းငယ် မွန်းကျပ်နေသော်လည်း ဤ Mask မရှိလျှင် ခံစားရမည့် စိတ်မလုံခြုံမှုထက်စာလျှင်မူ ထိုမွန်းကျပ်မှုကို သူ ပိုနှစ်သက်သည်။

​"ပြီးပြီ..."

​ဂယောင်ဆူး သည် သူ၏ Webtoon အခန်းသစ်ကို Upload တင်လိုက်ပြီးနောက် ခုံအမှီတွင် ခန္ဓာကိုယ်ကို ပစ်ချလိုက်သည်။ ၅ ပေ ၈ လက်မ အရပ်ရှိသော်လည်း အမြဲတမ်း ကိုယ်ကိုကိုင်းထားတတ်သည့် သူ၏အလေ့အကျင့်ကြောင့် သူသည် ပို၍ပင် သေးငယ်နေသယောင် ထင်ရသည်။ သူ၏ ဖြူလွှလွှ လက်ချောင်းလေးများက Mask ကို အသာအယာ ထိတွေ့မိသွားသည်။ ဤ Mask သည် သူ၏ ဒုတိယမြောက် အရေပြားကဲ့သို့ ဖြစ်နေခဲ့သည်မှာ ကြာပြီဖြစ်သည်။

သူ့ကိုယ်သူ ကွယ်ဝှက်ထားချင်သောကြောင့် Black Pearl ဆိုသော ကလောင်နမည်သုံးကာ webtoonဆွဲဖြစ်သည်။ သူ့ရဲ့တည်ရှိမှုကို ဖြစ်နိုင်လျှင် ပျောက်ကွယ်နေစေချင်သောဂယောင်ဆူးက ပင်လယ်ရေဟိုးအနက်ပိုင်း အောက်ခြေရှိ ကမာခွံထဲက ပုလဲလေးလို အခွံမာထဲမှာ ပုန်းနေခြင်းပင်။