عشق مصاص الدماء

1

★عشق مصاص الدماء★
٭بارت 1٭

كانت قاعده في مكتبها بتشتغل بكل ملل و فجاه دخلت صاحبتها عليها وهي بتصرخ بسعاده
"زغرتي يا بت شرشبيل خلاص هيغور من الشركه دي"

تاليا
"هيغور ازاي"

ملك.
"اصل بيقولوا شرشبيل زمانه باع الشركه لرجل اعمال كبير قوي ورجل الاعمال ده هيجي النهارده الشركه وهو اللي هيبقى المدير"

تاليا بسعادة
"ايوه بقى هو ده الكلام اول مره تجيبي لي خبر عدل في حياتي"

ملك
"مش هرد عليك عشان مش عاوزه اضيع على نفسي اللحظه اللي هيدخل فيها المدير الجديد"

تاليا بصدمه
"المدير الجديد!!؟ يا لهوي هو جاي دلوقتي"

ملك
"ايوه يا بنتي بيقولوا كلها ربع ساعه وجاي"

تاليا
"يا لهوي يا لهوي يا لهوي يعني هو جاي كمان ربع ساعه وانت قاعده ترغي معايا اقعدي ومثلي كانك بتشتغلي عشان ما يطردناش انا اصلا سمعت قبل كده ان لما حد بيشتري شركه من حد بيطرد منها كل الموظفين اللي ملهمش لازمة فلازم نبان قدامه ان احنا مجتهدين وما حدش بيشتغل قدنا وان احنا الاساس والباقي كله شنط واكياس "

ملك
"عندك حق والله طب اعملي نفسك بتشتغلي بسرعه احسن انا سامعه صوت عربيه شكله كده وصل"

عملوا الاثنين نفسهم بيشتغلوا وبعد مرور خمس دقائق دخل بكل هيبه وعينه بتمر في المكان بنظره سريعه... وقفت تاليا وملك بسرعه مع باقي الموظفين اللي بيرحبوا بيه بصيت له تاليا باستغراب من شكله اللي كان غريب رغم وسامته فهمست تاليا لملك
"بقول لك ايه يا بت مش حاسه ان شكله غريب"

ملك باستغراب
"شكله غريب ازاي"

تاليا بهمس
"ركزي كده على لون بشرته تحسيه كده باهت اوي وكمان عينيه سوداء قوي انا اول مره اشوف عيون سوداء قوي كده"

ركزت ملك في ملامحه وفعلا كان شكله غريب وفي حاجه مريبه عيونه باللون الاسود القاتم وبشرته شحبه جدا بس قالت بتذمر
"هو انت مش عاتقه حد ما فيش حد بيقع تحت ايدك الا لما تطلعي في القطط الفطسانه ارحمي نفسك شوية مش كده يا ولية "

مشي كل الموظفين وراحوا لمكاتبهم الا هي وملك كانوا لسه واقفين يتكلموا ويتهامسوا مع بعض بصوت واطي وهم مش واخدين بالهم ان كل الموظفين مشيوا....  بص لهم غيث بغضب شديد وقال بحده
"انتوا لسه واقفين تتكلموا لحد دلوقتي وما رحتوش على مكاتبكم ليه ولا انتم بقى فاكريني فاتحها صدقه وهديكوا فلوس من غير ما تعملوا حاجة "

شاورت تاليا على نفسها ببلاها وقالت
"احمم سؤال بس هو انت بتكلمني انا "

غيث بغضب
"لا بكلم امي..."

تاليا بابتسامة عريضة
"اه كنت بحسب بس هي فين امك دي"

مسكتها ملك من ايديها وقالت بهمس
"اسكتي يخرب بيتك هتودينا في داهيه هنترفد انا وانت بسببك وهندور نشحت على الرصيف والمرور وياريت حد هيعبرنا اصلا بربع جنية "