الدم المُعتق

part1

بِسْمِ اللَّـهِ الرَّحْمَـٰنِ الرَّحِيمِ
.
اية سلام
.
الدم المُعتق
.
............................
هو الماينام الليل لازم سالفة بباله

لو مبيوع من اعزاز

لو متمرمرة احواله ...
......................   .....................

طفلة تركض و تلعب بمكان هادئ تطفر و تصفك بيديها تفتر ببدلتها و تضحك صوت ضحكتها يدوي بالمكان راحت ل شخص كاعد على ركباته و فاتح ايدي الها و يردد بكلمة ((هلا ياتعب السنين ))

ممبين شكله بس هيأة جسمة و الطفلة الي تضحك علت ضحكاتهة هي تركضلة بس قبل متوصل لحظنه وكعت على وجها بمجرد ما وكعت الطفلة فزيتتت من نومي بشهكة صافنه و ايدي على صدري احاول استوعب اني منو اني وين اخذ دقايق يلة استوعب و صوت هاي البنية بعدة يرن بأذني ضحك على بجي احس راح اتخبل غمضت عيوني بقوة و سديت اذاناتي اريد الصوت يختفي بس ما كاعد يختفي ضربت على راسي بقبضة ايدي مرات عديدة بس حتى اتخلص من هالصوت خليت المخدة فوك راسي خامدته و كذلك بقة هذا الصوت يتردد بمسامعي تنهدت بقوة لمن خلصت و اخيراً من هذا الصوت المرافقني بكل مرة اكعد بيها من النوم و هذاك الحلم الي مرافقني بكل مرة تغمض عيني بيها تعبت و بعد ما عندي قابلية بس ما اكدر امنع هالشي من وحدة براسي احاول الكه تفسير اله بس ما اكووو هزيت راسي بأسى و تلفتت بالغرفة النايمة بيها شفت الجهال مطشرين كل و احد بمكان ذاب نفسة من التعب و كلهم يشخرون لان حيلهم مهدود
كمت امشي على كيفي واعبر من فوكاهم توجهت للباب فتحته و طلعت باوعت من الشباك الدنيا ليل بعدها ما ادري ساعة شكد توجهت للمطبخ مجرد ما فتت كفختني ريحة الجيفة مال الماعين و الزبل البايته بالبيت او بالاصح بالمستنقع القذر العايشة بي
طلعت دولكة ماي ادور كلاص نضيف اشرب بي ماكو تنهدت و شربت بالدولكة طلعت من المطبخ متوجهة للطارمة اشتم هوى الله النضيف تعديت من يم وحدة من الغرف و كالعادة اسمع صوت ونينها غمضت عيوني بأسى ونفسي لعبت ركضت لبرا كمت اتقيأ راح تطلع روحي واني مجرد جاي اسمع صوتها لو اتخيلها هي شلون كاعد تتقبل هذا الشي كملت و كمت للحنفية اغسل وجهي و حلكي

كعدت على طابوكة تجيت ضهري للحايط و اباوع للسما واتنهد هم يجي يوم اخلص من هذا المكان و اعيش حالي حال العالم المرتاحة تشتت افكاري من لمحته طلع للطارمة واكف على جهة لابس بس بجامة و جكارته بحلكة بقة يدخن الى ان كملت رجع شغل الثانية من التفت شافني كاعدة على جهة تقدم الي بخطوات بطيئة و اني عيني ما نزلتها من عندة صار يصفي و اردف

- ليش طالعة بهاي الساعة

_ فزيت و طلعت اريد هوا مختنكة

- شبيج
رفعت اكتافي بمعنى ما ادري شبيه خربط شعري و مدلي الجكارة اليشرب بيها اخذتها من ايدة و قبل ما اخليها بحلكي رفعت راسي اله و سألته