فاتنة الآسر 🔞🔥 [مـكـتـمـلـة]

part : 32

⚜️  فـاتنـةُ الآســـر  ⚜️

بقلمي: 𝘔𝘢𝘫𝘥𝘢 𝘔𝘦𝘳𝘭𝘺
•الفصل الرابع: في طريق العشق سنلتقي أيتها العاشقة الولهانة فحتى ان نسي العقل يوما فكيف للقلب أن تأتيه صفة النسيان •

    

ايوب نزل تحت ..

وفيروز بقات مع دعاء .. اللي دوك البنات بداو كيوجدوها للعرس.. غسلو ليها شعرها واخا كانت دوشات .. ودارو ليها لاسيغ للحمها وهي كتغوت بصوت عالي وفيروز كتضحك عليها..

داز الوقت طلعو ليها الغدا للبيت تغدات.. وكان بدا كيطيح الظلام وهما كيقادو ليها شعرها .. مشاو هزو تكشيطة فالابيض.. لبسوها ليها هي اللولة .. وبداو كيقادو ليها مشيطة لشعرها.. فيروز كانت حداها ولادها حداها كتوكلهم وشادة الخاطر معهم..

داز الوقت والناس كانو بداو كيجيو باش يحضرو للعرس الأسطوري ديال أيوب المالكي والصحافة كانت فكل مكان ..

دعاء بعد مدة كانو سلاو ليها .. جا طايح عليها السر بداك التكشيطة .. والمشيطة اللي دارو ليها.. وبالنسبة للميكاب داروه خفيف كيف طلب منهم أيوب .. ودارو ليها اكسسوارات راقية من اللي جاب ليها أيوب فالصداق..جات فنة ماقدروش يحيدو عليها عينيهم.. وفيروز كانت لبسات لولادها..

ونزلت قفطان بالاسود والاحمر لبساتو جات كتحمق.. طلبات من دوك البنات يقادو ليها مشيطة تجيها معاه .. وقادو ليها مشيطة طالعة الفوق مخليين خصلات نازلين من شعرها.. ودارت ميكابها لراسها...

لتحت ..
حدا البحر كان المكان مزين بطريقة فخمة .. طاولات محطوط عليها أغطية ممزوجة بين اللون والاحمر واواني فاخرة..
الصحافة كانت حاضرة بكثرة  بالإضافة إلى العائلات بجوج وكبار الشخصيات فالمجمتع.. أيوب وقف على كل كبيرة وصغيرة باش يفرح دعاء ..الأضواء الحمراء كانت ساطعة فكل مكان وصوت الأغاني المسموعة بصوت عالي.. كانو حاضرين أشهر المغنيين .. كلشي كان مهيأ باتقان كيتسناو فقط يشوفو العروسة ..

عند دعاء كانت واقفة كتسنى الوقت اللي غتنزل فيه جنات وفيروز كانو معها .. شوية  دخل أيوب لابس كوستيم فالأسود وشوميز فالابيض... مقاد شعرو الفوق وريحة پارفانو سابقاه.. جا مهيب .. طلع عينيه لدعاء وبتاسم بحب نسا هادوك اللي كاينين فالبيت كتبان ليه غي دعاء .. قرب عندها كيرمقها بنظراتو اللي كانو كلهم إعجاب .. وقف معها وهز ليها يديها باسها ونطق وهو كيشوف ليها فعينيها: جيتي زوينة بزاف..

دعاء بتاسمات ليه وحتى هي حمقها بحالا اول مرة غتشوفو  : حتى انت جيتي زوين بزاف..

جنات بقات مراقباهم وبتاسمات : ولادي خاصكم تنزلو..

أيوب شاف فيها وبتاسم : دبا أخالتي ..
أيوب قرب لدعاء وشدها من يديها مشبك صبعانو مع صبعانها .. ودعاء قلبها كيضرب بالجهد...
خرجو بشوية وصوت طالونها مسموع.. والنݣافات غاديين معها هازين ليها القفطان .. نزلو فالدروج وفيروز خرجات من باب آخر هي وماماها هازة معها ولادها ومشاو ݣلسو فواحد الطبيلة..