دَگــة حـِـنــچ

part 2

رحت بستها من الفرحه، اي انا من افرح منو يصير گدامي ابوسه اتذكر مره من چنت صغير چنت مجمعه عيديه حتى اشتري دعابل بس ما چنت فرحانه لا طايره من الفرح واحس اعتمدت على نفسي لان مجمعه هيچ مبلغ،
أطاني ابو الأسواق الچيس مال الدعابل حطه بـ أديه وانا تقربت وبست خد الرجال وحظي الفگر خله باقر يشوفني واول ما بسته صاح بصوت..
ــ وووولچ نغغم..

التفتت عليه اول ما شفته يركض باتجاهي ركضت بسرعه ارجع للبيت حتى اوصل الـ غيث يدافعلي وما يخلي واحد يحجي عليه...

كل ليلة عيد بعد ما عماتي ينظفن البيت يعجنن الحنه
عمه خوله تحط الـ رهف ونور وعمه بدور تحط اليه و
النورهان نحطها ونروح انام اني انام يم غيث ومن اگعد
الصبح اغسل الحنه وابدل وامشط واحط عطر والفرحه ما
ساعيتني واجمع عيديات واشتري العاب ومو لعبات مال بنات لا احب مسدسات و دعابل وكل لعبات الولد..

احس بنفسي قويه دائماً و ثقتي بنفسي كلش چبيره
وهذن ثنينهن بفضل غيث بس برغم هذا كله چان حچي
عمه خوله بكل مره يأثر عليه ولان تعرف عمامي وجدي
ميقبلون تحچي عليه من يطلعون تذب كل كلمه مو بس
تجرحني احس بيها تموتني من القهر..

چانت دائماً تاخذ عيديتي مني وتگلي..

ــ لازم تطيني ياها خو ما تبقين عايشه هنا ابلاش لا اب ولا ام يصرفون عليچ وخلي اسمعچ حاچيه الـ واحد حتى احرمچ من غيث..

اكبر مخاوفي غيث يتخلى عني بكل يوم مر عليه وانا
غيث ابوي چانت تهددني تبعدني عنه الى ان بعدتني
صدگ يلا أرتاحت هي وبناتها وياريت عايفاتني بعدهن الهسه كل ما يشوفني يذبلهن كلمه لو يلگن ملابسي مشروره بالسطح على الحبل يشمرنهن بالگاع وارجع اغسلهن من جديد..

انزل اصيح واگلب الدنيا عليهن ومره حتى ضربت نور بالنعال على راسها بس ميفيد تزيد ما تنقص واني احس حتى مليت من العرك اغلس عليها هواي ..

بعد ذكرياتي التعيسه و گعدت اگلب بـ الدفاتر فرحانه بيهن وما احس الا اندفر الباب ودخلت عمه خوله صوتها يلعلع..

ــ ولچ انااا شگد شايفه بر**** بس مثلچ ماكو بالدنيا
تلعبين على الحبلين حاطه زلم البيت كلهم بجيبها الوره
تلعب على غيث وعلى جدها وعلى عمامها والله عميي
سحاااره بت سحااره..

عفت الدفتر بالگاع وگمت حچيت بصوت هادئ..
ــ تردين تحچين عليه گلنه عادي، تذبين عليه تهايم گلنا عادي، تكرهين بناتچ بيه گلنا عادي، بسسس ووواااللله العظيم يااا عمه خوووله اذا جبتي طاااري امي لا اگول مرت عمي ولا شي احرگچ انتِ وبناتچ وما يرفلي جفننن وانتِ تدرين بيه اسوويها..
تراااا انيي مو نغمم القدييمه تطبين وتطلعين ادمغين على فرگهاا لاااا هاااي بعد تنسينها ذيچ نغمم...

ــ وووولكممم يبوووو تهددني بت ساااالم تهددد
ولچ هو انتِ منو يريدچ لو ما احنه ملفينچ؟