بَعد دهَر وجيِل

part 7

كضم مرتضى غيضه يضگ على المقود بقبضته يعگد حواجبه ويكشر رايد بس يوصل للبيت ما عاجبه يتعارك وية زينب وهية راح تثبت وجهة نظرها وتفرضها عليه وبل نهاية يطلع هو الغلطان!
بقه ساكت كل الطريق ما يحچي رغم ان زينب رجعت تسأله شبيه بس ما راد انه يرد عليها ويتكاونون سوة

_

نزل من السيارة بخطوات بطيئة مستصعب المشي مو گادر يخطي بسبب المه يغمض عيونه ويرص عليها حاس انه حوضه منهار تمامًا وظهره يوجعه بشدة!
يتكئ على ايد جلال الگاضه من ايده يساعده يمشي
رغم انه العمارة قريبة هواي وما تحتاج مشي بس اخذ جلال وكت طويل يحاول بيه يمشّي فجر علمود ما يأذيه

"فجر خل اشيلك باوع مدتگدر تمشي.. "
تكلم جلال يريد يشيل فجر الچان رافض هذي الفكرة خايف لا احد يشوفهم ويشك بأمرهم مخصوص ان الوكت متأخر والساعة فوگ الثنعش بالليل

" لا لا ماريد! يجوز احد يشوفنه "

يگلب جلال عدساته ما مهتم لهل كلام تالي وعلى حين غره يحط ايده اسفل فخوذ الاصغر وايده الثانية يركد بيها ظهره شايله بدون مشقة ينز فجر الماچان منتبه عليه چان حاير بخطواته متوجع بكل خطوة گاز على سنونه وهم رجلينه بدت توجعه يصدح صوته عالي نسبيًا متذمر يدردم

"ااااا!، جلال نزلني اگدر امشي شبيك..نزلني عليك الله هنا الجيران كلهم يعرفوني هسة اذا يشوفوك شايلني بهل شكل شيگولون؟! "

گرصه جلال من فخذه يسكته
" افتهمنا فجر شو ما تلصمه انته! زين ما فكرت اذا يشوفوني گايدك وانته تعرج شيگولون هم؟ "

سكت فجر يعني الفكرة  بيهة وجهة نظر لان راح يكون مشكوك بأمرهم اكثر اذا شافوا فجر يعرج ومتألم و واحد گايده بهل شكل وبهل وكت المتأخر من الليل!!
مشى بيه جلال لحد ما وصلو لعند المصعد ضغط جلال الزر ينتظر يفتح باب المصعد  وفجر بيديه هايم يتأمل تقاسيم وجهه وملامحه الرجولية يبتسم فجر بوهن تالي يرفع اصابعه ويتلمس طرف لحية جلال ويداعبها بخفه يحس جلال بدغدغه بوجهه ويقهقه كامش اصابع فجر حتى يبطل يدغدغه

"هههه.. ولك شداسوي " 

يرفع فجر ايده لراس جلال محاوطه يضمه وجلال الما حاول يخفي ابتسامته يستنشق عطر فجر التارس شعره بريحته المريحة والمغريه الچانت نفاذة..

فُتِح المصعد وبس لاحظه جلال رفع راسه من بين ايدين فجر، وتقدم يدخل يضغط الزر لحتى يرجع يرتفع ماخذهم للطابق العاشر الي بيه شقة فجر.
تگل جسد فجر اكثر بحضن جلال الماحس بعتب أصلاً.. وبس انتهى العداد انفتح باب المصعد يتنهد جلال يطلع وهو شايل فجر يمشي بل ممر باستقامة وخطوات متزنة ما يتذمر من حمل فجر لان بنية جسد جلال بعد اطول واضخم من بنية جسد فجر بعد
فـ ماچان فجر شيء بالنسبة له.