حب قاسي (قصة مكتملة بالدارجة المغربية 🌸💗)

🥀 حب قاسي 🥀

ناض من بلاصتو منتافض العيا كيفتك فيه وضلوعه كيضروه حاس بالارهاق ولكن خاصو ينوض باش يتمم داكشي لي عليه باش الغد ليه صباحا يبدا خدمته رسميا ... ناض كينقي فداك البيت وكيفرز فيه وراسو كيحس بيه كيضرو ...ماكمل حتى حس بتنفسو ضياق والعرق كيتصبب من جبينه والسخانة رجعات عليه بتبوريشة ...خدا وحدة من كواشه وسد الباب وتكا محاول ينعس هارب من آلامه ومن العالم الاسود لي مارحموش ومن قدرو لي ممساعدوش...

للكاتبة :hkhiba🌝

🌸حب قاسي🌸

☘️الجزء91☘️

تنهدات وناضت من بلاصتها كتمسح دموعها مرت قرابة الساعة وهي كتبكي ...وااش لهاد الدرجة اثر فيها ..كلما كتسكت من البكا كترجع تتفكر هضرتو وترجع تبكي تا تنفخو عويناتها وحمارو. بقوة البكا...طيباتهم..توجهات للطواليط كتشوف فراسها فالمراية وبدات كتغسل فوجهها تاسالات ومسحاتو ناطقة بصوت منغنغ : علاااش كانبكي

تاسمعات مها كاتنادي عليها من جديد

....نورس ..نوووراااااس

نورس ( ماسحة دموعها ): واااخاا هاانا جاية

عاودات غسلات وجهها من جديد ونزلات عند مها لي كانت شادة بلاطو ديال الاكل مداتو ليها

ريحانة : هااكيي هاادا دييه لنووح وفاش يسالي رجعيه

نورس : ولكن ....( قاطعتها)

ريحانة: نورس سيري رااه عييت ابنتي ماترضيهاليش فوجهي

نورس ( حنات راسها متذكرة انها امها حامل ): صافي اماما غير سيري ترتاحي

ريحانة ( مقبلة خدها ): يخليلي لي تحن فميمتها انا

خدات بخطواتها لداك البيت الصغير وهي كتشوف بعجرفة غير من الفوق الفوق ...بدات كدق مرات متتالية حاطة الصنية فالارض ..وبقات بدون مجيب ..دفعات الباب بكتفها وتفتح بسهولة...كتلمحو كيترعد كامل فبلاصته حوايجو لاصقين عليه بالعرق وملامحو مكشرين بالم قربات منو وملامحها كيكتاسيهم الذهول والهلع فذات الان وهي كتكرر اسمه بصوت خافة ...حطات راحة يديها على جبينه مبعدة شعرة كتحسس حرارته وبعداتها فالبلاصة ..حرارة جسمه مرتافعة ..من شدة خوفها ضربات لبلاطو برجليها ورجعات للداخل كتجري واخدة اول هاتف بان فطريقها متاصلة على سعد الدين وفور ماجاوب وبدون اي مقدمات نطقات وداتها كلها كترجف : بابا نووح كيموت

ماخلاتلوش فين يجاوبها تاكانت قطعات رامية الهاتف فوق السداري وراجعة لعندو وفيديها فوطة وسطل صغير فيه الماء والثلج ...
جابت كرسي وحطات داك السطل قدامها كتفزك فيه وكتمسح ليه على جبينو وتقاسيم وجهو وهو سنانو كيتقرقبو ..تخلطو عليه مابين تبوريشة لي شاداه وحرارة جسمه لي مرتافعة ....دقائق قليلة تالحق باها داخل لعندهم كيجري لمحو فديك الحالة المزرية وتم محاول معاه يوقفو وعاوناتو تانورس باش يخرجو موسدينو على كتافهوم تاوصلو للوطو طلعوع للخلف وطلعات هي حدا باها وزاد مع الطريق متاجهين للمستشفى ...

صونيا : اهلا اهلا فنيكيشة ديالي جيتي ..يلاه لقيتيني قطعت مع باباك

سارة : ماوصلت تاسخفت

صونيا : هههه ماعليش ماعليش راه وداد وجداتليك بيتك الفوق طلعي ورتاحي

سارة : حافضة طريق بعدا انا كيبانليا غانتوضر هدشي كبير بزاف

صونيا : ههه الناش عايشين فالخير الصلاة على النبي الله يزيدهم

سارة : دااكشيي ..ماحسدناهمش

وداد ( مبسمة بتكلف): مرحبا بيك اي حاجة احتاجيتيها قوليها لي وراه غرفتك فالجناح العلوي ...خودي راحتك وعتابري الدار دارك

سارة ( مبادلها الابتسامة بتملق): شكرا

وداد : بلا جميل اختي

ضمات الاثنتين بجوج كتربت على شعوراتهم الطوال بحنان منهدة براحة: اااه واخييرا تجمعت ببنيااتي الغزالات عقبال نفرح بوليداتكم انشاءالله

وداد : انشاء الله

سارة : الله يحفظ

تناقض لي كان واضح لا من طريقة هضرتهوم لا من طريقة لباسهم لا من اشكالهم كانو فحال الليل مع النهار..فحال الشمس والقمر ولكن لي جامعاهم كرش وحدة خرجو منها بجوج ..من غير الشبه البسيط لي فملامحهم ماكيشبهوش لبعضهم بالمرة رغم رابطة الاخوة والدم لي كتجمعهم

يتبع