سكريبت
-مش هتجوزة...مش عايزة اتجوزه يا ماما ...
قولتها وانا بعيط لأمي اللي بصتلي من غير رضا وقالت :
-يا بنتي اسمعيني بس ...انتي ليه مصممة تقفلي الموضوع بالشكل ده ....اديني فرصة اشرحلك ....
-تشرحيلي ايه يا ماما ...ده جواز ..عارفة يعني ايه جواز ...يعني مينفعش اتجوز واحد أنا مش متقبلاه ...وده أنا مش متقبلاه ...هي مش عافية يا ماما!!
غمضت ماما عينيها بتعب وبعدين قالت :
-يا بنتي ...موسى انسان كويس ...مرتاح ماديا ومؤدب ومتدين ...يعني مفيش زيه اديني سبب بس انك ترفضيه ....
قومت وقولت بعصبية :
-فيه كتير يا ماما ...أهم حاجة أنا مش متقبلاه.... قوليلي ازاي هتجوز واحد انا مش طايقاه ...ما هو بالعقل ...صفاته الحلوة كلها على راسي بس برضه القبول مهم ....
اتعصبت ماما عليا وقالت:
-طبعا اصحابك اللي بتمشي معاهم هما اللي مالين.دماغك بالكلام ده ....هما اللي حطوا في دماغك انك مش متقبلاه صح ؟!هما السبب ...
نفخت بضيق وقولت:
-لا يا امي ...مش اصحابي ...أنا اللي مش متقبلاه....شكله مش حلو...لو اتجوزته هفضل ندمانة طول حياتي وهعقده في حياته .
.هفضل دايما اقارن بينه وبين غيره ...هو مش مالي عيني يا ماما ....
-بس يا بنت أخرسي يا قليلة الأدب .
.الراجل مش بجماله الراجل بأدبه وأخلاقه وجيبه يا غالية ...وانتي مفروض تبصي للحاجات دي مش للشكل والكلام الفاضي ده ...الرجالة هما اللي يبصوا على الشكل انتي لا ....
اعترضت وقولت:
-ايه اللي بتقوليه.ده يا ماما ...ازاي مبصش على الشكل ...المهم اتقبله...وانا مش متقبلاه ...ازاي هتجوزه وابص في شكله وانا مش متقبلاه !!!
ابتسمت وقربت مني وقالت:
-يا حبيبتي اديله فرصة وهتتقبليه بعد الخطوبة لما تشوفي أخلاقه وأدبه وكرمه عليكي ...اعذريني يا غالية يا بنتي ...انتي اتخطبتي للوسيم ...اتخطبتي لعادل وقوليلي ايه اللي حصل ....طلع رمة وبخيل وكان بيخونك مع أي واحدة وجالك انهيار عصبي بسببه ...يا غالية محدش بياخد كل حاجة يا بنتي ...يعني لو هتاخديه حلو هتلاقيه كحيان وبخيل وهيخونك ...لكن واحد زي موسى ...معاه فلوسه ومحترم وهيدلعك وغير كده دكتور صيدلاني ومعاه صيدليتين يعني هتعيشي معاه عيشه فل ...ومش هيبص لغيرك أنا بأكدلك كده ...فكري يا حبيبتي في الموضوع ...
بعدين طبطبت عليا ومشيت ...
قعدت على السرير تاني ودموعي بتنزل ....كنت بفتكر عادل الإنسان اللي حبيته واديتله كل ثقتي ...الإنسان اللي كنت مستعد اعيش معاه في كل أحواله ...أنا حتى اتخطبت ليه بدبلة بس وكنت مسهلة ليه كل حاجة ...بس هو افتكر بالطريقة دي اني رخيصة وكان بيهنني علطول وبخيل عليا...وبعدين اكتشفت خيانته وده خلاني انهار ...واخيرا انفصلت عنه ...ومفيش اسبوع لقيت موسى بيتقدم لي تاني ...موسى يبقي قريبنا من بعيد .....عايش مع مامته في نفس العمارة اللي احنا فيها ...وهو دكتور صيدلة ...كان بيحبني من ثانوي بس انا عمري ما تقبلته ابدا...لانه شكليا مكانش حلو وغير أنه مش مهتم بنفسه أبداً ...غيري انا ..أنا اللي بحب اللبس والخروج ...بحب الحياة لكن هو هادي ومع نفسه من الصيدلية للجامع للبيت ....حياته متنسبنيش أبداً. ...ورغم أنه اتقدم مرة قبل كده بس انا كنت برفض والمرة دي امي بدأت تضغط عليا ...غمضت عيني بتعب وانا بفتكر كلام امي عن عادل ....
.....
فضلت أمي يومين تقنع فيا عشان اتجوزه...لحد ما فاض بيا وفي يوم روحت لأمي بهدوء وقولت:
-ماما أنا موافقة اتجوز موسى ....
يتبع
الجزء الثاني ♥️
في قاعة كبيرة وشيك
كتمت دموعي بالعافية وموسى بيبصلي بحب وبيلبسني الدبلة ...من أول ما وافقت عليه وهو بيعمل المستحيل عشان يرضيني ....جابلي شبكة محصلتش ...كانت جميلة اووي ...اصحابي أول ما شافوها انبهروا ...بس رغم كده سموا.بدني بكلامهم اللي مبيخلصش على شكله ....
-مبروك يا عروسة ...
قالها موسى بإبتسامة ...كانت عينيه بتضحك بسعادة كان فرحان بيا وبيحبني ...محدش حبني بالشكل ده ...بشكل اني اكون بالنسباله حلم ولما حققه عمل المستحيل عشان ابقى سعيدة ....بس أنا مكنتش سعيدة ...مكنتش متقبلاه ...شكله كان عائق كبير بالنسبالي ....كنت بشوف التريقة في عيون أصحابي وقرايبي ....امي الوحيدة اللي كانت مشجعة الجوازة دي ...اتنهدت بتعب وانا شايفة الكل بيبارك ...اصحابي وفي عيونهم التريقة ....قرايبي اللي في عيونهم الشماتة فيا واحيانا الحسد بسبب مركزه وفلوسه
....
-افردي وشك شوية هيقولوا الخطوبة تمت غصب عنك ...
بصيت لأمي بقهر وقولتها :
-ما هي فعلا غصب عني فعلا....أنتي عندك شك في كده ...انا مخنوقة يا ماما نفسي اصرخ ...مش طايقاه ولا طايقة نفسي ...قوليلي أعمل ايه ...أعمل ايه يا أمي ...
بصتلي أمي من غير رضا وقالت وهي بتحاول تقنعني وتقنع نفسها :
-هتتقبليه يا بنتي ...بعد الخطوبة هتحبيه وحتى لو مقدرتيش تحبيه بعد الخطوبة هتحبيه بعد الجواز مع العشرة ولازم تعرفي ان الحب مش أهم حاجة ...اهم حاجة جيبه وأخلاقه ...فهمتيني يا بنتي ...واديكي شوفتي هو ازاي بيعاملك زي الملكة يا غالية ...بيحبك اووي وجابلك شبكة محدش جابها من أصحابك او قرايبك حتى ....يا بنتي محدش هيحبلك الخير قدي اعرفي ان كل اللي بيتريق النهاردة بس عشان غيران منك...عايزين يشوفوكي تعيسة مع واحد زي عادل ...أنتي هتسمحيلهم يضحكوا عليكي يا غالية !!
بصيت لماما والدموع في عينيا وقولت:
-أنا دلوقتي تعيسة يا أمي ....
طبطبت عليا وقالت :
-بكرة هتفرحي يا بنتي متقلقيش ....
وبعدها نادت عليها واحدة من الضيوف فسابتني لوحدي ...اتنهدت وانا ببص لموسى اللي كان بيبصلي بحب واضح ...كان باين عليه التوتر ...كان خايف اني اتراجع في أي وقت ....حاولت ابتسم ليه واطمنه بس مقدرتش حتى ....عشان كده وديت وشي الناحية التانية وانا بحاول معيطش ...كنت حاسة اني مخنوقة وكأني في عزا مش في حفلة خطوبتي ...
قربوا مني فجأة اصحابي وبدؤا يباركولي ....بصتلي واحدة فيهم واسمها ميار وقالت :
-يا عيني عليكي يا غالية معقول واحدة بالجمال ده تتجوز واحد شكله كده !!!انتي اللي كان شباب الكلية كلهم هيموتوا عليكي تتجوزي واحد كده ...انا بجد مصدومة منك ازاي توافقي عليه ...ازاي هتبصيلوا كل يوم ....عادل رغم العبر اللي فيه بس كان وسيم أووي والبنات كانت بتحسدك عليه ...
-ده نصيب يا ميار....
قولتها بصوت مكتوم وانا حاسة نفسي هنهار في أي وقت ....
ضحكت ميار بتريقة وقالت ؛
-يالا معلش اهو واحد غني واهو طلعتي بأي مصلحة ....بس خليه يغير من ستايل لبسه ويخس شوية ده ممكن يعرك لو مشي جمبك .....
كنت وصلت لأخري وقولت:
-ميار لو سمحتي خلاص كفاية ...روحي اللي يصلح حالك وابعدي.عني أنا مش ناقصة ....
مشيت ميار وهي وباقي اصحابي وانا روحت ركن بعيد وفضلت أعيط ....الميكب بتاعي باظ فروحت الحمام بسرعة وأنا بحاول اضبطه وحمدت ربنا ان محدش شافني وأنا ببكي...
وقفت في الحمام وانا بمسح دموعي وبخفف الميكاج شوية ...رسمت ابتسامة على وشي وانا بطلع من الحمام بس فجأة وقفت وانا.بشوفه قدامي....ساعتها قلبي دق بقوة ....حسيت كل الاصوات من حوليا سكتت خالص ....قلبي اللي كان ساكن فضل يصرخ في صدري وأنا ببص عليه
..عيوني دمعت مرة تانية وانا ببصله بشوق....رغم كل اللي عمله بس أنا لسه كنت بحبه...مش قادرة أحب غيره ....
ابتسم عادل وقرب مني وقال:
-مبروك يا حبيبتي !!!
يتبع
