تباريح السدم

الحَلقة السابعة

سمر:- باعي ماما انا ماگدر اگول لزوجي داتواصل وياچ بَس اگدر التقي بيچ بالسر وشنو تحتاجينة ادزة الچ بَس گولي مااقصر وياچ بَعَد

نزلت راسي بقهر مو هَيچ ردتها والله مو هيچ
سُبحان:- كم بنية وولد عندچ؟

سمر:- عندچ اخت وحدة تبارك

سُبحان:- لالا اني عندي خوات مريم وترتيل ماعندي غيرهن تبارك مااعرفها ولا اريد اعرفها

سمر:- ليش ماما هاي اختچ لچ والله دوم تگلي اريد اتعرف عليها دوم احچيلها عنچ لتسوين هيچ وياي

سُبحان:- ميهمني بَعد انا بعد مااريد شخص توقعتچ تحاربين علمودي بَس انا غلطانة واسفة لان رجعتلچ وعد ماراح تشوفين شكلي مرة الثانية وهم اني مو انانية حتىٰ اخرب حياتچ وزواجچ علمود نفسي.

سمر:- انا رايدتچ كلشي اسويلچ واحميچ

سُبحان:- واني ماردت هَيچ ماتوقع راح تفهمين شنو اريد ،عذريني ماضيفتچ

لزمت ايدي
سمر:- ماريد شي بس باعي ماراح اضغط عليچ ودوم راح اجي اشوفچ وادزلچ مصرف من عيوني

سحبت ايدي بعصبية ووگفت
سُبحان:- تراا من رجعت مارجعت علمود فلوس وعيشة اشتغل وعايشة الحمدالله ورجاءً وفري فلوسچ لبنتچ اني مااريدها ولاتجين بعد ماريد اخرب حياتچ ويَ عائلتچ السعيدة

سمر:- لعد شنو تردين؟؟

سُبحان:- مارايدة شي غلطت من اجيت وتعلمت من غلطي

سمر:- لا جاوبيني شنو تردين من اجيتي؟ اجيتي علمود اعيشچ وياي؟ تبقين بنتي واني مسؤولة عنچ وگلت راح اتكفل بمصرفچ بَس عذريني مااگدر اعيشچ ببيتي ووي زوجي

سُبحان:- لييش منو گال اني اريد اعيش وياچ؟؟ كافي لاتأذيني اكثر ماريد لاتتكفلين بية ولاتعيشيني وياچ ولا تعيشيني بحنانچ

سمر:- براحتچ الي علية سويتة
گامت وطلعت ورقة من جنطتها وخلتها بأيدي
..هذا رقمي يمتىٰ ماتحتاجيني اني موجودة ومصرفچ كل شهر يمچ

شگيت الورقة وشمرتها
سُبحان:- ماريد رقمچ ولا شي منچ بس تركيني اكون ممنونة لو اعرف انزل من نفسي واطلي المُساعدة من الذيب ولا اطلبها منچ؟

سمر:- منو الذيب؟ تلتقين ويامن سُبحان

سُبحان:- ها هسة صرتي حريصة علية؟؟

سمر:- تبقين بنتي وماكو احرص مني عليچ گولي منو الذيب؟

سُبحان:- محد ماكو احد اسمة ذيب

سمر:- مااضغط عليچ بعد اني رايحة مااگدر اتأخر ولاتنسين بالنهاية انا امچ تعاي الي لاترحين للغريب

ضحكت وهزيت راسي اي غمضت ماريد ابچي گدامها بعد وبنفس الوقت حلفت انسىٰ عندي ام
طلعت وسديت الباب وراها غسلت وجهي خنگة مو طبيعية بصدري ماگدر اتنفس منها
انتچيت على الكاونتر كافي سُبحان كافي بچي وراچ هواي مواقف راح تعيشينها لتبچين هسة