Aab-e-Hayat

Chapter-63

☘️

Eric ko Salaar ne khud darwaze par receive kiya tha woh weekend tha aur is waqt un ke bacche cycling ke liye nikle hue the. ghar par sirf Imama aur Salaar the.

"yeh aap ke liye!" Eric ne apne ek haath mein pakde chand phool jo guldaste ki shakal mein bandhe hue the iski taraf badha diye. Salaar ne ek nazar un phoolo par daali, usay yaqeen tha is mein se kuch phool is ke lawn se liye gaye the lekin is ne usay nazar andaaz kiya tha.

"is ki zaroorat nahi thi." is ne andar laate hue shukriya ke baad kaha. Eric formal meeting ke liye aaya tha aur aaj pehli baar Salaar ne usay formal andaaz mein dekha tha.

"baitho!" Salaar ne usay wahi lounge mein hi baithne ke liye kaha. Eric baith gaya.

Salaar is ke bil-muqabil baitha aur is ke baad is ne table par pada ek lifafa khola. Eric ne pehli baar ghhor kiya, woh isi ka khat tha aur Salaar ab is khat ko dobara khol ke dekh raha tha. Eric be ikhtiyar nervous hua tha. khat likh bhejna aur baat thi aur isi khat ko is bande ke haath mein dekhna jis ke naam woh likha gaya tha, dusri. Salaar ne ek daidh minute liya phir is khat ko khatam karte hue Eric ko dekha. Eric ne nazrain hata li.

"kya Anaya ko pata hai tumhari is khwahish ke baare mein?" Salaar ne be had badah e raast sawal kiya tha.

"mein ne Mrs Salaar se wada kiya tha ke mein Anaya se kabhi aisi koi baat nahi karunga, is liye mein ne aap ko khat likha." Eric ne jawaban kaha, Salaar ne sir hilaya aur phir kaha.

"aur yeh wahid wajah hai jis ki wajah se mein ne tumhe yaha bulaya hai. tumhara khat phaad kar nahi pheka. tum wada kar ke nibha sakte ho, yeh bohat achi quality hai." Salaar sanjeeda tha aur is ne be dharak andaaz mein Eric ki tareef ki thi, lekin is ke lehje aur chehre ki sanjeedgi ne Eric ko khaif kiya tha.

"to tum Anaya se shadi karna chahte ho?" Salaar ne is khat ko ab wapas maiz par rakh diya tha aur is ki nazrain Eric par jami hui thi. Eric ne sir hilaya.

"tum ne yeh bhi likha hai ke tum mazhab badalne par taiyyar ho, kyuke tum jante ho ke kisi ghair muslim ladke se kisi muslim ladki ki shadi nahi ho sakti." Salaar ne mazeed kaha. Eric ne phir sir hilaya.

"pehli baat yeh hai Eric ke sirf shadi ki niyat se mazhab badal lena bohat choti baat hai. hamara deen is ki ijazat deta hai, usay bohat pasand nahi karta." Salaar ne kaha. "tumhare paas musalman hone ke liye meri beti se shadi ke ilawa koi aur wajah hai?" Salaar ne isi andaaz mein is se agla sawal kiya tha. Eric khamosh baitha is ka chehra dekhta raha.

"Mazhab ki tabdeeli ek bohat bada faisla hai aur yeh nafs ki kisi khwahish ki wajah se nahi hona chahiye, aqal ka faisla hona chahiye. kya tumhari aqal tum se yeh kehti hai ke tumhe musalman ban kar apni zindagi Allah ke ehkamaat ke mutabiq guzaarni chahiye?" is ne Eric se pucha, woh gadbadaya.

"maine is par socha nahi."

"mera bhi yahi andaza hai ke tum ne is par socha nahi. is liye behtar hai, pehle tum is par achi terhan socho." Salaar ne jawaba is se kaha.

"mein kal phir aau?" Eric ne is se kaha.

"nahi, tum abhi kuch saal is par socho ke tumhe musalman kyu banna hai, aur is ki wajah Anaya nahi honi chahiye." Salaar ne is se kaha. "mein waise bhi Anaya ki shadi sirf musalman se nahi karunga. musalman hone ke saath usay ek acha insaan bhi hona chahiye." is ne kaha. Eric ke chehre par yak dam mayoosi ubhri.

"yani aap mera proposal qubool nahi kar rahe?" is ne Salaar se kaha.

"fori tor par nahi, lekin taqreeban das saal baad jab mujhe Anaya ki shadi ke hawale se koi faisla karna hoga to mein tumhe zaroor consider karunga. lekin is ke liye zaroori hai un das saalo mein tum ek acche musalman ke saath saath ek acche insaan ban kar bhi raho." Salaar ne dotok andaaz mein kaha.