.................................
عند شيرين
فتخت شيرين باب شقتها ودخلت بعد ما رجعت من عند دكتوره النسا وهي تايهه
بصت قدامها لاقت امجد قاعد علي الكنبة وماسك تليفونه وواضح كان بيحاول يكلمها
امجد اول ماشافها .. كنتي فين ياشيرين
قعدت شيرين وهي مش قادرة تتكلم او بمعني اصح مش عارفه تتكلم تقولو ايه
قلق امجد من منظرها وقرب عليها .. مالك ياشيرين في ايه .كنتي فين وبكلمك مش بتردي ليه
بصتله شيرين ودموعها نزلت بوجع
مسك امجد وشها باديه وقالها بقلق .. مالك ياحبيبتي . ايه اللي حصل
مسح دموعها وقالها .. اتكلمي ياشيرين
شيرين هزت راسها واترمت في حضنه
امجد ضمها ليه جامد وهو مش فاهم حاجه بس كان بيحاول يهديها
امجد .. اتكلمي ياحبيبتي وقوليلي ايه اللي مزعلك
بعدت شيرين واتنهدت بحزن
وقالت بصعوبة وهي بتمسح دموعها .. هقولك . هقولك ياأمجد لأني مش هخدعك تاني
كملت بشهقات وقالت .. انا مش هقدر . اخلف دلوقتي . ياأمجد
امجد بدون فهم .. ازاي
شيرين .. لسه راجعه من عند الدكتورة . و. وقالتلي اني محتاجه وقت علشان اقدر اخلف
دموعها نزلت بندم وقالت وهي باصه في الارض .. علشان موضوع الحبوب اللي كنت باخدها أثرت عليا ونسبة الحمل بقت قليلة
شيرين .. انا اسفه . اسفه اووي
امجد كان ساكت
شيرين بدموع قالت بصعوبة
.. ل. لو عاوز تتجوز . اتجوز يا امجد . صدقني مش هعترض . ومش هزعل منك
امجد بهدوء غريب .. اتجوز ليه ياشيرين
شيرين بدموع .. علشان تخلف الولد اللي نفسك فيه
امجد .. بس انا عاوز اخلفه منك انتي
شيرين لسه هتتكلم
قال امجد .. الدكتورة قالتلك في امل ولا مستحيل
شيرين .. قالت في امل . بس هاخد وقت مع العلاج
امجد بهدوء .. هنستني مع بعض
بصتله شيرين وهي مش مصدقه رد فعله الغير متوقعة
وفضلت تعيط اكتر وهي حاسه بالندم والذنب
امجد .. خلاص اهدي ياشيرين . احنا الاتنين غلطنا . ولازم نتحمل نتيجة الغلط ده
هزت راسها برفض وقالت .. بس انا غلطي اكبر ومعترفه بيه . انا اسفه ياأمجد . اسفه بجد
شدها امجد لحضنه وقال .. متتأسفيش ياشيرين
شيرين .. انا بحبك بحبك اوي بجد يا امجد . بحبك اوي
امجد .. وانا بحبك ياشيرين ومعنديش استعداد اني اخسرك ابد لأنك اغلي حاجة في حياتي .
بعدين قال بشرود .. انا متأكد إن ربنا هيراضينا
....................................
بعد يومين
عند تامر في شركته
تامر قاعد في المكتب بص لقي بوسي داخلة
تامر بغضب .. انتي ايه اللي جابك هنا . والزاي تتدخلي كده . فيين السكرتيرة اللي بره
بوسي .. مفيش بره سكرتيرة . علشان كده دخلت
قام تامر من مكانو وفتح باب المكتب ملقاش تقي فعلاً
رجع بصلها وقالها بجمود .. ايه اللي جابك
قربت بوسي منو بدلع وقالت .. جيت علشان انتا وحشتني . ايه موحشتكش
وبتحاول تقرب اكتر
بعد عنها تامر وقالها بغضب .. اتفضلي اخرجي بره ومشوفش وشك هنا تاني
برا
في الوقت ده تقي رجعت علي مكتبها واتفجأت بصوت تامر العالي وهو بيزعق
فضلت تقي قاعدة متوترة لكن متحركتش من مكانها بس فضلت خايفه
جوا في المكتب
بوسي .. هو في ايه انتا ليه بتعمل معايا كده . انا بحبك ... ليه مبقتش بتيجيلي زي الاول ومبقتش ترد عليا لما بكلمك .
بوسي .. ليه مش عاوز تقابلني ومش عاوز تشوفني
يصلها تامر بشمئزاز .. لأنك ماضي و.سخ وانا حرقته بجاز . مش عاوز اعرفك تاني
وكمل بغضب .. امشي وياريت مشوفكيش تاني مش عاوز اشوف وشك في اي مكان . فاهمه
بوسي .. ليه ايه اللي حصل لكل ده
تامر خد نفس وهو بيمسح علي وشه وبعدين اتكلم
وقال بهدوء .. عاوزة تعرفي ايه اللي حصل . اللي حصل اني فوقت وعرفت اني اللي كنت بعمله ده غلط . غلط كبير . بس الحمدلله فهمت ورجعت ومش عايز اكمل
بصلها وقالها .. وانتي كمان ياريت تفوقي لنفسك وترجعي الدنيا مش دايمه لحد . روحي توبي لربنا محدش عارف آخرته امتا
سكتت بوسي ثواني وبعدين قالت .. لو عاوزني اتوب هتوب . وهتحجب كمان علشانك
تامر .. اسمها علشان ربنا وعلشان نفسك مش علشاني
بوسي هزت راسها .. حاضر . بس اتجوزني ياتامر . انا بحبك اوي ومقدرش اعيش من غيرك . صدقني هعملك اللي انت عاوزه . هبقي تحت طوعك وتحت رجليك وههنيك . ههنيك وهسعدك . بس اتجوزني عشان خاطري انا بحبك بجد
تامر بهدوء .. مينفعش اتجوزك
بوسي .. ليه . ليه ماينفعش ماانت خلاص طلقت مراتك . ايه المشكلة اننا نتجوز
تامر .. روحي شوفي حياتك بعيد عني . وزي ماقولتلك مش عاوز اشوفك تاني .
بوسي .. تامر حرام عليك . انا بحبك . بعشقك ياتامر
وحاولت تقرب منو تاني
تامر بعدها عنو بغضب وقالها .. سمعتي انا قولت ايه . يلا اطلعي برا
كمل بغضب .. يلااا
بوسي فضلت تعيط .. ارجوك خليني جمبك ومعاك . والله هتوب وهعمل كل اللي يرضيك .بس متسبنيش . انا بحبك اوي والله بحبك اوي . ارجوك متعملش فيا كدة . انا مقدرش اعيش من غيرك صدقني
تامر وهو بيحاول يتكلم بهدوء .. من فضلك امشي . مش هينفع صدقيني . روحي ابدأي حياتك من جديد
اتحرك تامر ناحية الخزنه وفتحها وخرج منها مبلغ كبير وقرب من بوسي وقالها. .. خدي دول ابدأي حياتك بيهم
ومتمشيش في طريق الغلط تاني يابوسي
بوسي بدموع .. انا مغلطتش مع حد وانت عارف
تامر .. غلطي معايا انا
بوسي .. عشان حبيتك . لكن صدقني والله ماحد لمسني غيرك
تامر .. بردو اللي عملتيه كان غلط ولازم تتوبي عنو . يلا خدي الفلوس وامشي
بوسي .. انا مش عاوزه فلوس . انا عاوزاك إن..
تامر بعصبية .. قولتلك مينفعش . افهمي بقا . واتفضلي لو سمحتي
وشاوراها علي الباب
بوسي بصتله بقهر وفتحت الباب وخرجت علطول وهي منهارة
خرج تامر هو كمان يشوف تقي سايبه شغلها وفين لاقها قاعدة علي مكتبها
تامر بغضب .. والهانم كانت سايبه شغلها وراحت فين
قامت تقي وقفت وهي باصه في الارض . وقالت . اسفه يافندم مش هتتكرر تاني
تامر بغضب .. كنتي فين وسايبه شغلك
تقي .. انا اسفة بس انا دخلت جوه اصلي العصر . اسفه يافندم
تامر بعد ماكان متعصب لقي نفسه سكت ومكانش عارف يقول ايه
لكنه رد بهدوء وقالها .. اتفضلي شوفي شغلك
وراح دخل مكتبه
.......................................................
تاني يوم عند حازم في القسم
حازم قاعد في مكتبه وبيكلم وائل اللي اول ماحازم كلمه مكانش مصدق نفسه
وعلطول قاله .. حازم اقسم لك بالله اني ماخونتك
رد حازم بهدوء وقالو .. عارف . عارف ان صحابي مش خاينين وانك استحالة تخون ياوائل
وائل وهو مش مصدق .. بجد يعني انت مصدقني ومش شاكك فيا
حازم .. مصدقك ومشكتش فيك لحظه . هو الموقف كله كان غلط انا فاهم . والعيب مش عليك . العيب علي اللي دخلت بيتك وقعدت فيه . انا مش شايل منك في حاجة .
انا دلوقتي بنيت حياتي واتجوزت
وائل بفرحة .. طول عمرك صاحبي واخويا وعشرة عمري
حازم .. وانا عاوز منك خدمه ياوائل
وائل .. انت تؤمر ياصاحبي
حازم .. اميرة
وائل باستغراب .. خطبتي . مالها
حكاله حازم علي اللي حصل منها وانها كانت عاوزه تأذي مراته
وائل بجنون وهو مش مصدق .. انت بتقول ايه يا حازم
حازم بهدوء .. بقول الحقيقة ياوائل . عارف انك مصدوم بس فعلا هي عملت كده
كمل حازم وقاله .. انا كان ممكن اخلص الموضوع ده من غير مااقولك . بس ماحبيتش اعمل كده من قبل ما اعرفك الاول
وائل بهدوء .. اؤمر عاوز ايه
حازم .. فضيحه تسمع وتجيلي هنا علي القسم
وائل .. قولي اعمل ايه وانا هنفذهولك
حازم .. هقولك تعمل ايه
بعدين خد نفس وقال ..
يتبع .....
YOU ARE READING
الم البداية
Mystery / Thrillerكانت نايمة في اوضة نومها لكنها اتحركت على السرير بانزعاج لما حست بحركة علي وشها فاقت على صوت حد بيقولها _ اصحي ياروحي .كل ده نوم فتحت عينها واول مابصت جمبها قامت مرة واحدة وفضلت تصرخ برعب وقبل ما تقوم من علي السرير مسكها بسرعة وهو بيقول...
