طفلة أحيت فؤادى «عشق الآسر»_{كاملة}

الفصل 29

آسر اخدها لمكان هادى جداً بيطل على البحر، كان الجو لطيف جداً ومخصص بس للعشاق، نزل من على الموستكل وقلع الخوذة، ومد ايده ليها عشان تنزل.

آسر: إنزلى يا همسة.

همسة ابتسمت ومسكت فى ايده ونزلت، قلعت الخوذة وشعرها إبتدى يرفرف مع نسمات الهواء القوية..

آسر بصلها بعيون عاشقة، وساكت تماماً مش فاهم ازاي مقدرش يكرهها برغم كل اللى حصل.

همسة بصتله لقته بيتاملها ابتسمت وغمزلته: القمر سرحان فيا!! دانا أعمل فرح بقي يا ولاد..

آسر تنهد وبعد نظره عنها: عملتى إيه مع مهدى!!

همسة لفت وشه ناحيتها بابتسامة حزينة: متعملش فيها عم التقيل، ممكن ننسي ونصفى ونبدا من جديد بما إنى خلاص نهيت اللى كنت قلقانة منه.. ممكن تدينى فرصة تانية اثبتلك إنى فعلاً بحبك.

آسر تنهد بمشاعر مضطربة: معرفش..

همسة مسكت إيده الاتنين: مش هضغط عليك، بس أتمنى، تصفالى، نعمل هدنة فترة لو كدبت عليك فى حاجة، ساعتها اعمل فيا ما بدالك..

آسر بيضعف مع كل نظرة وهمسة: هفكر يا همسة.

همسة بابتسامة صغيرة: أحلى همسة سمعتها فى حياتى.

آسر ابتسم جواه على مداعبتها وسكت..

همسة بصت للنجوم والقمر: الدنيا النهاردة ليها طعم جديد، حاسة إنى فى عيد يا عمر عمرى... لأنك جمبك.

آسر بص مكان ما بتبص: فعلاً أنا حاسس ان الدنيا النهاردة ليها طعم جديد، زمان لِيلى كان كله جراح وقسية، معرفش اتغيـر ليه، حتى سواده ليه ضي محبب لقلبي، يمكن عشان جمبك!! ولا عشان حاجة تانية، تعرفى السبب يا همسة!!!

همسة ابتسمت براحة: أنت عارف ليه!!!

آسر بابتسامة صغيرة: لا معرفش، قولى أنتى!!

همسة ضحكت بخفوت وغنت بمرح: علشان إحنا مع بعضينا ولأول مرة لوحدينا، ولا حدش بيبص علينا، غير فرحة قلبنا وعينيا..

آسر ابتسم بحب وكمل: حاجة غريبة.. حاجة غريبة.

همسة بصت لعيونه: بحبك..

آسر تنهد باستسلام وقال: وانا كمان بحبك يا ضي القمر..

همسة بحب: أنت بقي ضي الشمس..

آسر هز راسه بهدوء: لا أوعى تقولى كده، أنا مش ضي الشمس، لانك ضي قمرى، والاتنين مش بيجتمعوا مع بعض، لازم واحد يغيب عشان التاني يبقي موجود..

همسة بابتسامة هادية: بس فى لحظة الاتنين بيجتمعوا فيها، لحظة الغروب يا حبيبي، يعنى مش مستحيل..

آسر تنهد: وانا مش عايز لحظة يا همسة، أنا عايز عمر، عمرين على عمرى عشان أشبع منك، وأعرف أبقي معاكى..