الخازوق الأسود

الخــزق الـحـاديـة عـشـر

ضحكت على حجية وبستة هو هم على راسة ورجع تغطى وانا امسح على راسهم ثنينهم، والأكـبر نام بس الكـابر بقة مفتح عيونة ويباوع على توأمة..
الشبه بينهم يخوف..

باوعت على خالتي هي هم جانت متمددة ونايمة وخاتون گاعدة يمي وكامشة سبحة بأيدهة وتباوع على العالم، تصنف وتسبح بنفس الوقت، الحسنات گامت متعرف طريقهة..

طلعت انا هم سبحة من جنطتي وگعدت اسبح وامسح على راس أخواني.
لحد ما صار العصر وگمنة بعد من مكانة وطلعنة للقبور وهناك زرنة أبوية وأمي وزوج خالتي وقرينة الفاتحة عليهم ورحنة للسوگ اخذنة كم شغلة نحتاجهة والتوأم اشترولنة عبايات جديدة من النوعية الغالية كلش وحجابات جديدة لون أسود لان محرم كلش قرب.

صعدنة بالتكسي ورجعنة للبيت بعد ما كملنة وخالتي ضايجة لان رجعنة ومبقينة لليل بس التوأم جان عدهم توصيل الزرع للمحلات لهذا انجبرنة بعد نرجع.

وصلنة للبيت ولمينة اغراضنة ورحنة ساعدناهم وحطينة الخضروات المستوية كامل بالسيارة وهمة اخذوهة وراحو للسوگ وانا جنت تعبانة كلش لهذا رحت تمددت بالغرفة ونمت..

ومگعدت الا الليل وراساً رحت صليت المغرب الي فاتني ووراهة گعدت بالصالة اقرة الواجبات والامتحان الي عندياه يوم الاحد..
وخاتون هم اجتي وجايبة كتبهة يمي وخالتي جانت تعجن تريد تسوي لحمة بعجين لباجر.

بقينة على هاي الگعدة لحد ما انفتح الباب ودخلو التوأم ثنينهم والأكـبر راح يسبح والكـابر راح للمطبخ يم خالتي..

يوم الثاني جنت گاعدة اكمل قرايتي والكـابر والأكـبر ثنينهم نايمين يمي بالصالة راجعين من الشغل وهلكانين من التعب..

دگ تلفون الأكـبر والكـابر فز وراساً اخذة وباوع على اسم المتصل وانا جنت گاعدة يم راسة لهذا راساً باوعت على الاسم وجان مكتوب أبو نوح.

فتح الاتصال وحط التلفون على أذنة.
-الو..هلا أبو نوح هلا..اي باجر گاعدين بالبيت ليش ؟..اهلا وسهلاً بيكم نحطكم بعيونة..على راسي احطكم والله كل الهلا بيكم.

عقدت حاجبي مستغربة وهو من كمل اتصالة باوع علية.
-باجر بيت أبو نوح يجون يمنة.

جموح: شعجب ؟

رفع جتفة ورجع تمدد وغمض عيونة وانا نبضات گلبي ازدادت من سمعت راح يجون !
رحت لخالتي برة وبلغتهة ورجعت اكمل قرايتي بس بالي بعد راح من الدراسة وكلة صار عليهم..

تذكرت نظراتة الي بآخر مرة شفتة بيهة، جنت خايفة كلش وصارت عيني بعينة لثانيتين وراساً وخرت وختلت ورة خالتي من التوتر.