الخازوق الأسود

الخــزق الـثـامـن

بقينة گاعدين انا وياهة وخالتي سوتلهة لفة وراحت لغرفتهة تنام لان تعبانة، وانا وخاتون على گعدتنة منتظرين الولد بس تأخرو كلش يعني تعدت ساعة 10 الليل وهمة بعدهم مجايين.

طلعت برة متحملت وگعدت على العتبة كالعادة كلما يتأخرون برجعة من مكان اگعد هنا علمود شوية يخف قلقي.
وجانت الدنيا باردة لان ليل والجو بدة يكسر، واحنة يمنة كلة مزارع وبساتين لهذا جانت باردة.

بقيت گاعدة وخاتون هم طلعت يمي گعدت وهي كامشة گلاص چاي تشرب وتحجي عليهم تكول انا عندي ثقة بيهم مخاطفين بنية بس هاي التهمة اذا العالم عرفو بيهة تجيبلنة سمعة محلوة.

بقينة بالساعة بمكانة وخالتي نايمة جوة محاسة بشي، لحد ما طبگت سيارة نعرفهة نفسهة سيارة سيد هاشم.
گمت من مكاني بسرعة ودموعي رجعت نزلت من شفتهم ثنينهم واحد عينة صايرة بنفسجية والثاني حاجبة دينگط دم.

اجة يمي الأكـبر وباس راسي والسيد صاح من بعيد.
-يلا انا رايح.

الكـابر: الله وياك بس ولي.

راح الولد وانا حضنت الأكـبر راساً وانا أبجي وهو جان يمسح على راسي ويكول.
-يلا كافي هياتنة يمج ليش هذا البجي !

مسح الكـابر على راسي وانا كلت.
-منين يجيكم كل هاي الماصيب بس فهموني !!!

الأكـبر: ولج المصايب هي تجينة احنة منركض وراهة أبد.

خاتون: اي أبد متركضون ورة المصايب.

باوعنة ثلاثتنة عليهة لان جان صوتهة يرجف وهي تحجي، بگوات حبست الضحكة الي اجتني من شفت عيونهة مليانة دموع ومتجتفة وعاضة شفتهة تخفي رجفتة.

ضحك الأكـبر وحط أيدة على راسهة وهو بعدة حاضني وكل.
-لا لا لتبجين خاتون !!!

وهي على حجيه گامت تبجي والكـابر دفع أيد الأكـبر وكل.
-دوخر ليش تبجيهة !!!

مسح بأيدة دمعتهة وكل.
-خلي يولي معليج بيه، لا تبجين خاتون ممتعود عليج هيج !!!

باوعنة انا والأكـبر واحنة فاتحين حلگنة ثنينة على التغير المفاجئ الصاير هنا.
الكـابر يحجي بلطافة ويمسح دموعهة والأغرب خاتون تبجي !

بعدت عن الأكـبر وباوعت عليهة من كلت.
-ليش تخلونة بقلق هيج، عليكم الله كافي والله تعبنة من وراكم !

اباوع الكـابر صفن عليهة ومحجة شي، وهي مدنجة راسهة وتمسح بدموعهة، ضحك الأكـبر وكل.
-زين اكلكم حمدية وين ؟

باوعت عليه وكلت.
-الصراحة مكلنالهة لان عرفنة راح تسويهة فضيحة.

الأكـبر: ايييي همزين !!!