الخازوق الأسود

الخــزق الـثـالـث

عقدت حاجبي وكلت: وشبيه بيتنة ؟؟؟

الأكـبر: ويانة بنات جموح وخاتون مدا ياخذون راحتهم، شايفهم شلون متقيدين بوجودنة وخاتون خصوصاً من الصبح لليل الحجاب على راسهة، وثانياً هذن بنات عدهن مدرسة شنو مكضياتهة من الظهر لليل بالمزرعة يشتغلن !!

باوعت عليه بدون كلام وهو كمل: فكر بيهة كابر، انا سويت هيج علمود تبقة انتَ بالمزرعة وانا اكون برة اشتغل غير شغل وهيج نگدر نجمع اكثر.

الكـابر: زين ليش مكلتلي ؟؟

الأكـبر: لان جنت اعرف مراح تقبل اشتغل وحدي.

الكـابر: وظهرك شبيه وليش هيج مترب ؟ شنو دتشتغل أكبر احجي كامل ليش تحجي مگطع ؟؟؟

الأكـبر: اشتغل بمخزن مال طحين وهاي السوالف.

عقدت حاجبي وانا مستغرب: وشنو تسوي بالمخزن ؟؟

ضحك وكل: اغسل الطحين بشامبو ومكيف.

ضربتة على وجهة وصحت: احجي عدل مدا اشاقة وياك انا !!!

الأكـبر: والله تعبان كابر عوفني بعدين نحجي.

الكـابر: تحتاج مستشفى ؟؟؟

نفة براسة وكل: لا بس شوية ضغطت على ظهري وتأذة شوية بس ارتاح وهاهية.

گمت من مكاني بدون ما أرد عليه ورحت فتحت باب الغرفة وطلعت منهة.
باوعت على جموح الي جانت واگفة يم الباب ودموعهة تنزل وتباوع علية.

اشرت الهة وكلت: روحي دخلي يمة شوفي شنو يحتاج وشنو يريد، بس ممنوع تسألينة شنو صار.

هزت راسهة بسرعة وكأنو منتظرتني اكوللهة دخلي وراحت بسرعة دخلت للغرفة وانا طلعت برة واخذت نفس.

بعدهة الضيگة بصدري واحس شي گاعد عليه ومدا يخليني اتنفس عدل وانوب سالفة الأكـبر الي ماعرف منين طلعهة الي، رغم حالتنة المادية زينة بس انا اعرفة بالة يم البنات ميريدهن يتقيدن واحنة موجودين وحتى جموح رغم هي أختي بس اشوفهة تستحي حتى تحاجينة.

طلعت باكيت جگاير من جيبي وحطيت وحدة بحلگي وشغلتهة وباوعت على خاتون الي وگفت يمي وكلت.
-الصفنة للطليان الحاطيهن بالحضيرة.

باوعت عليهة حاطة حجاب ووجهة صاير أحمر وشايلة سلة بأيدة وبيهة خضرة ودتاخذ نفس، رفعت حاجبي وكلت.
-يا حصان راكض وراج ؟

خاتون: عوفك من الحصان هسة وكلي بلا، عشگان ؟

اشرت الهة وكلت: تسكتين لو شلون ؟