جُمان الايهم
البارت الثاني
الكاتبه: رباب حسين
«»«»«»«» «»«»«««»«»«»«»
المفروض بأول خطوة اعوفك
كاطعلي ديره وجاي اشوفك
وتكلي الضروف معاندة وياي؟
فدوه تروحلي انت وضروفك.
«»«»«»«»«»«»«»«»«»«»«»
جنت متمدده بغرفتي واندك الباب كعدت فتحته جانوا ام سجاد وابوه دخلوا وسدوا الباب ،
عرفتهم ليش جايين خلص يردوني اروح لبيت ابوي بعد العده كم يوم وتخلص وشلون ابو هو ..
انقبض كلبي من شفتهم
شتسوي بيج الدنيا بعد ياجمان ؟.
ابو سجاد:-ها بنيتي نايمه؟
جمان:- لاعمو كاعده منين يجيني نوم
ام سجاد: ليش حبوبه متنامين؟ شناقصج ؟ مرتاحه تاکلین وتمسحين ايدج بالحايط.
كالمعتاد ام سجاد دائما بدور الهجوم منتظره مني اي كلمة او تصرف حتى لو عادي حتى تهجم ...
ابو سجاد:- مو وكته هالحجي ام سجاد هسه، خلينه نعرف نحجي بموضوعنه.
السكوت،
ماعندي غيره ما ادري هو صبر لو هو من رحمة الله بیه اکدر اسکت دائماً واتحمل واسوي
نفسي مسمعت شي
متعوده منو يجي يسمعني ويهيني لو يضربني عادي صرت حتى ما ابجي بس انقهر كلش انقهر بيني وبين نفسي.
ام سجاد:-احجي عيني منو لازمك بلغها خو مجایین ناخذ رأيها احنه هم، عوزها تتعافى وتتبطر علينه
ابو سجاد:- عمي انت راح تخلص العده فد يوم ومن تخلص ميجوز تبقين عدنه بالبيت،
زحمه البيت بي ولد شباب ونسوانهم مراح يقبلن تبقين هنا،وانت بنيتي صغيره وحلوه ماشاءالله عليج،
ام سجاد: اوووه دفضها عاد بدون مقدمات انتِ راح تتزوجين ايهم حماج انت حامل بحفيدنه خو مانخلیج ايهم زوجته اتوفت من زماان ومايريد يتزوج بعد بس احنه راح نقنعه خو منخلي الولد يربى عد ابوج هو انت ومايريدج وحسره عليج اللكمه عدهم مو بعد ابنه تاخذينه وترحين .
بقيت ساكته لثواني مصدومه واباوع بوجوهم والدمعة بطرف عيني كلت:-بس اني ما اعرفه.
وماشايفته !!
ابو سجاد:-هذا احسن حل ياعمي انت يتيمه حتى بوجود ابوج احنه شفنه هذا احسن حل لان اذا مقبلتي معناها احنه الطفل ناخذه وانتِ لازم ترجعين لبيت ابوج او احد من كرايبج براحتج بعد .
بالبداية ضجت وانقهرت وخلصت الليل بجي بس بعدين فكرت يمكن هالشي احسن الي
احسن الي مما ارجع لابوي ومرته ويذلوني وميريدون الطفل وارجع للضرب والغلط والذلة ...
يمكن فعلاً ماكو غير هذا الحل،
ظليت كاعده للصبح افكر ماعندي حل ثاني اصلاً.
بس ايهم اني ما اعرفه شفته بالفاتحه
مال سجاد لان مجان يحجي ويه اهله ...
ما اعرف شنو سبب الخلاف بينهم بس مره سألت سجاد کال:-المابي خير لاخوه شتترجين منه ؟
جمان:يعني شلون مابي خير لاخوه ؟
سجاد:- اخو مريته الا اكول هيج.
بوقتها كلشي مفهمت بس محبیت
اتدخل واسأل اكثر من هيج.
بالنهاية همه خوان واول وتالي يتصالحون.
واني مو من طبعي ما اتدخل.
فكرت بيني وبين نفسي شلون الوحده تتزوج
حماها ؟؟
جنت اشمئز من هالموضوع هذا بالذات واتعجب من اسمع وحده متزوجه حماها اكول حماها يعني اخوها شلون کدرت توافق،
هسه اني بنفس الموقف والظاهر كلهن مجبورات اما اهلها مایریدون اولادها او ماعدها تعيشهم ،
او ماعدها مكان تروحله بس شلون اذا مقبل هو بيها شلون تكدر تتقبله ؟؟
كافي تفكير جمان حاولي تتعايشين ويه الفكره وتقتنعين بيها
وین اروح ؟؟
وين انطي وجهي ؟؟
ياربي لاتذلني اكثر متت من هالعيشه كلها ذل ومهانه رجعت كلت الله كريم ربي مايقصر حاشاه مفوضه امري لله ثاني يوم اتصل ابو سجاد بـ ايهم وكله يجي جانوا الولد موجودين واني بغرفتي وسمعت صياح ما اكدر اطلع لان الولد هنا واني بعدني بالعده.
اسمع صوت ام سجاد تكله:- اعتبرها خدامه وعندك بالبيت تخدمك بلكمتها والطفل هو ابن اخوك يعني ابنك.
معناها هو مقابل مقبل يتزوجني .
خفت بس الاكثر من الخوف جان القهر من حجيهم الي سمعته ليش هيج يعني اني مو بشر الله اكبر
ربي شنو الذنب الاذنبته حتى هيج تكون حياتي ليش هالوصف؟
ليش لازم اكون خدامة حتى اكل اللكمه؟
اسمع حماي يحاول يقنعه ويكله:-حلوه وخوش بنيه لو شايفها ماتكدر ترفض ..
ما ادري شنو النتيجه بس شكله ايهم ماقبل
وين انطي وجهي اذا طلع مايقبل
وراها بكم يوم طلعت من غرفتي اساعد زوجة حماي بالتنظيف والطبخ طلعت اغسل الحوش قبل ليجون الولد ما اريدهم يشوفوني ولا اشوفهم ما اريد مشاكل ويه نسوانهم ....
غسلت الحوش وكملت وصلت للباب وانفتح الباب دخل رجال معرفته بالبداية
بعدين فجأة اتذكرت هذا ايهم حماي ..
يتبع...
