المأبون

البارت 28

- وين ابو لهب ؟

عافت الموبايل غمتني وحجت بضحكه ::-

حمصه ::- يا عزه العزاج بعدج تكولين عليه ابو لهب والله خوش .

دنكت راسي ابتسم كرصتني قوي كمزت وكفختها حجيت بعصبيه ::-

- شبيج توجعني .

حمصه ::- عيوني ابو لهب راح لكربلاء من الفجر واجيت هنا يمج .

انصدمت ركضت طلعت باوع من فتحه الباب ما لكيت سيارته معناها صدك راح معقوله زعلان .

غميت كصتي وبقيت اسب بروحي حجيت بكلبي ::-

- هسه شمالني البارحه صرت عفريت وياه كون مراضيته ومريحه ضميري نوب خاف يدعيلي بالموت .

اجت حمصه تدلع بمشيتها وطك بالعلج حجت بأبتسامه ::-

- ها ولج ضايجه لان راح ابو لهب .؟

هزيت راسي بّـ اي كعدت بالكاع وحجيت بغصه ::-

- زعلان مني .

حمصه ::- ميخالف هو يوم واحد ويرجع لحضنج .

كعدت بصفي باوعتلها جانت عيونها مدمعه وتباوع عالباب حجيت ::-

- بعدج تحبيه ؟

هزت راسها بّـ اي وكعت دمعتها علئ خدها وحجت بغصه ::-

حمصه ::- مرت سنه وأخاف لايروح العمر وأنا انتظر .

حضنتها وبقيت ابجي وياها لزمت ايدها وحجيت بحزن ::-

- هنياله عليج هلكد تحبيه وبعدج صابره علئ فراكه .

مسحت دموعها ودفرتني قوي كامت وكفت علئ حيلها وحجت بضحكه ::-

حمصه ::- ولج راح اسوي صحن فواكه مشكل عود ادخلي جوه لا تبقين كاعده الشمس مو زينه عليج .

ضحكت علئ ضحكتها وكمت دخلت وراها لكيتها تكطع بالبرتقال اخذت موبايلي رمشت عليه لان ما عندي رصيد .

بقيت افتر بالغرفه شويه وشفت رقمه يتصل عليه كمزت من الفرحه وفتحته حجيت بفرحه ::-

- وصلت لو بعدك ؟

جان صوت عالي ما ينسمع صوته شويه وصار هدوء كال بأستهزأ ::-

- مو زعلانه .

- لا

- متاكده ؟

- لا تدوخني تره ما ميته عليك وهسه خلصني وصلت لو بعدك .؟

- بعدني كم ساعه ونوصل للنجف وبعدين نطلع لكربلاء .

بقيت اطكطك بأصابعي ابتسمت حجيت بصوت ناصي ::-

- ديربالك علئ نفسك .

- تخافين عليه .؟

ابتسمت وسديت الخط بوجها طلعت من الغرفه لكيت حمصه تاكل الفواكه بشوكه هزيت ايدي اضحك عليها .