شنو اطلقك مستحيل يابانه مابقدر اطلقك مابقدر افهمي الحاجه دي اي شي بقبل بيهو عقاب بس الا انو انا اطلقك شوفي خيار تاني يابانه ماتكسريني كدا عليك الله اي بستاهل اي حاجه بس دي لا
بانه: لا يعني انت ماكسرتني يامالك، انا كان ممكن امشي ليك الخيانه، وكان ممكن امشي ليك كذبك وكان ممكن امشي ليك ذاكرتك الخبيتا علي، بس شرفي مابمشي ليك ولابقبل انو اعيش معاك ولابقدر اعاين في وشك ولابقدر اتشارك معاك حياتي زي زمااااان مستحيل الاتكسر مابتصلح، مابقدر آمن نفسي وانا معاك ولابقدر اثق فيك ولابقدر احترمك ولابقدر اخت راسي علي مخده واحده جنبك، الحاجات دي كلها انا تاني مابقدر اعمله، عشان الحصل ماحاجه ساهله ولا حاجه فيها مغفره، انا دايره الطلاق وبسسس يامالك
عاين لي في عيوني وكان ببكي شديد وبعدها طلع طوالي من البيت ابوي كان بنادي فيهو بس ماكان برد لي زول، ختيت يدي علي راسي وبديت ابكي ابكي علي اي حاجه حصلت، الحاجات دي في حلمي ماكنت متخيله انها تحصل يعني مالك لحمي ودمي عمل فيني كدا، بقيت قاعده بعد ساعه جاء ابوي وراشد وامي داخلين مسحتا دموعي وحاولتا اكون عاديه بس عمري تاني مابقدر اكون عاديه
ابوي: بانه يابتي مالك اتكلم معاي وقلتا ليهو الحياه دي البعيشا انتي والرآي رايك انتي، شوفي الدايراهو وانا بعملو قدام امك وقدام راشد
رفعتا راسي وعاينتا لي ابوي
بانه: دايره الطلاق بس وتاني مادايره اي حاجه
راشد: انا كنت متاكد يابانه انو انتي حاتقولي كدا مالك غلط غلطه كبيره شديد ولو رضيتي تعيشي معاهو معناها بجد انتي ماعندك شرف ولا كرامه، انا معرس وعارف الحياه فيها شنو في حاجات كتيره الزول بمشيها عشان التاني وبتنازل عن شريكو بس الموضوع من يصل الشك خلاص معناها الحياه فاتت لي طريق مسدود واسمعي كلامي كويس عمرك ماحاتندمي علي القرار دا وانا واقف معاك في اي حاجه في حياتك ولدك من اليله مسؤليتي انا واي شي دايره تعملي تعملي عيشي حياتك زي ماعايزاها ارجعي شغلك واتخذي قرار حياتك براك واختاري شريك حياتك بي نفسك فيهو كل الصفات الدايراها انتي واهم شي في الاختيار انك تختاري راجل اي اسي حاتقولي انو مادايره زول في حياتي ودايره اربي ولدي وماعندي نفس وغيرو، بس الحياه مابتقيف ومالك ما الزول البستاهل توقفي عشانو او تحدي عشانو لا والله تشوفي حياتك وتعيشي بي الطريقه البتعجبك انتي وانا معاك
كلامي راشد كان زي المسكن بالنسبه لي اي حاجات كتيره اتقالت دا ماوقتها بس كلامو ريحني شديد وحسيت انو اي كلمه هو قالا لي طالعه من قلبو ومن التجربه حقتو حسيت بي راحه كبيره شديد💙💙
امي: يابتي الله يسهل عليك ويحلك بي السلامه كلو بتعوض انتي ارتاحي اسي وانا ماشه اعمل ليك عصير
ابوي: اي يابانه ارتاحي وكلو بهون تاني
ما كل زول رافق خُطاك
