اسكريبتات مكتملة بقلمي سارة خليل

يوم طالب ثانويه عامه

خلصت الحكاية وخلاص احنا في اخرها ووصلنا للنهاية وبالخير افتكرها"
دا بتخلص بجد! تعالوا معايا اخدكم رحله في حياة طالب ثانويه عامه
بطل رحلتنا هيكون اسمه مجهول، مجهول دخل ثانوي عنده حلم عايز يحققه دخل بعزيمه قويه واراده وسمع اغنية "طبعاً طبعاً قادرين نعملها.. طبعاً نقدر ع الدنيا بحالها ".
خلص مجهول أولي ثانوي السنه اللي كانت جديده عليه وكان سعيد جداً حلمه بيقرب ودخل تانيه ثانوي، حياته من هنا اتغيرت تماماً كل حاجه حصلت في أولي بتحصل في تانيه بس بالعكس ووقع ولا حد سمي عليه وبقي يسمع "قوم قوم وعدي الصعب قوم قوم هتضحكلك في يوم " ولما قام بالعافيه لقي نفسه في تالته ثانوي دي بقي حاجه مختلفه تماماً عن اي سنه فيها عجايب بشكل.

ابتدت رحلت مجهول في تالته ثانوي الدنيا من أول السنه كانت جايه عليه جامد حجز سناتر بقي وكتب وكشاكيل وتنظيم من أول السنه وجداول وهنهد جبال وهنجري ورا حلمنا، بس تالته كانت غير م هو متوقع طلعت غير تانيه واولي مفيش وقت هتزعل مفيش وقت كتبك وعلي درسك خلي الزعل بعدين، عايز تعيط؟ مفيش وقت روح كمل وبعدين يبقي عيط متضيعش حصة لو حصة فاتتك انسي.
خلاص مجهول جاب اخره في اول شهرين عدوا بسرعه ومش لاحق يفهم تالته دي عايزه شخص ازاي واتخنق لدرجة انه انهار فعليا مبقاش طاقه ل اي حاجه ولا بقي بيروح دروس ولا فارق معاه م خلاص بقي اللي يحصل يحصل فضل أيام يعيد ترتيب نفسه ولما جمع شتاته وقرر يكمل وسمع "عافر حلمك يستاهل" لقي فاته كتير ومش فاهم حاجه ومفيش وقت يفهم لازم يلحق فضل كام شهر مش فاهم لعند م خلاص الوقت بيخلص والايام بقت اسابيع والاسابيع بقت شهور وهو واقف مكانه وبقي يسمع "انا نجم بس مفيش سما.. يمكن دا مش مكاني او الزمان دا مش زماني او انا موهوم"
بعد م الوقت فات فاق وحاول يكمل يلم الجديد ولا القديم يبدأ منين فات كام شهر وهو بيفكر فدا.

باقي شهر مجهول مش عارف يعمل مكمل عادي مكمل بجسمه، روحه وقلبه وعقله مش موجودين سايب نفسه للدنيا توديه يمين يمين شمال شمال وبدا يفكر في حياته

- حلم اهله اللي عايز يحققه علشانهم وخلاه حلمه
- صحابه ومشاكل الصحاب كدب عيني عينك كدا مفيش اسوء من الكدب، خلوه يفكر انه سيء مع ان هو مفيش اطيب واهبل منه وعمره م فكر يعمل حاجه وحشه او يكدب ع حد يمكن عفويته بتبين غير كدا بس المعدن الاصلي بيبان
- مصاريف مجمهول شايل هم المصاريف رغم اهله مش حارمينه من حاجه بس هو بيفكر في تعب باباه ومامته
- المدرسين دول بقا عاام لوحدهم الدروس دي اصلا عالم قاعده في سناتر بالساعات وجع ضهر وبهدله وقلت قيمه بيعاملوك كانك انسكت (حشره)
بعد م مجهول خلص تفكير قعد يصلي ويعيط ويقول انا فين من كل دا فين اللي انا عايزه محدش بيسمعني لي لي دايما شايفيني من برا وبس شايفيني مقصر بس مش شايفين الحروب اللي جوايا انا هبقي مريض نفسي بسببهم بييضغطوا عليا جامد بتهان جامد حياتي زي المدعكه بتمرمط واتبهدل حد يشوف دا حد يسمع دا انا تعبت ارحموني
قام مجهول يكمل مفيش وقت الامتحانات علي ابواب لازم يكمل مفيش اوبشن تاني راح السنتر وفضل باصص قدامه وضحك بسخريه ودخل مفيش وقت لحاجه

لقي المستر بعد م خلص شرح كتب ع السبورة "خلصت الحكاية " من كتر الصدمات اللي فحياة مجهول بقي متعود خلاص ابتسم بوجع وكمل يومه عادي

اسفه يجماعه مش عايزه اثبت ان الثانويه العامه بالصعوبه اللي هي بس برضو مش سهله الاصعب من المذاكره حروب النفس ياريت تسمعوهم وتسمعوا احلامهم وطموحاتهم وتشجعوهم القصة دي مش بتمثل الكل دي لخبطه جوا عقل مجهول وبتمثل اغلبنا.
تمت
بقلمي ساره خليل