" မင်းပြောသလိုသာ ဆို ငါတို့လို လိင်တူချစ်သူတွေက ကလေးမွေးစားလို့ပဲရတော့မှာပေါ့ အခြားနိုင်ငံမှာတောင် အငှားကိုယ်ဝန်ကို ခွင့်ပြုပေးနေတာပဲ ဒီနိုင်ငံကျမှ ဘာဖြစ်နေတာလဲ "
နှစ်ယောက်စလုံးက OG ကို အထူးပြုယူဖို့အစီအစဥ်မရှိပေမယ့် ဖန်ပြွန်သန္ဓေသား ယူမည်ဆိုလျှင် လက်ထပ်မှတ်ပုံတင်ပြနိုင်မှသာ ရမည်ဆိုသော အချက်ကြောင့် အငြင်းအခုံဖြစ်ခဲ့ရသည်။
" မိုးသောက် ငါတို့နိုင်ငံက အခြားနိုင်ငံတွေနဲ့ တူလို့လားကွ ပိုက်ဆံပေးပြီး အငှားကိုယ်ဝန်ဆောင်ခိုင်းတာတွေ ဖြစ်နိုင်တယ် မသမာတဲ့ နည်းလမ်းတွေနဲ့ ကလေးတစ်ယောက်မွေးဖို့ ကြိုးစားတွေ အများကြီး ဒါ့ကြောင့် လက်ထပ်စာချုပ် တင် ပြရမယ့်အချက် ထည့်ထားတာ "
အရုဏ်ဦးကတော့ လက်ထပ်စာချုပ်ပြရမည်ဆိုသည်ကို ဖြစ်သင့်သည့်အရာဟု ယူဆထားလေသည်။
" အဲ့တာဆို မင်းဖြစ်ဖြစ် ငါဖြစ်ဖြစ် အခြားမိန်းမတစ်ယောက် နဲ့ လက်ထပ်စာချုပ်မှာ လက်မှတ်ထိုးပြီးမှ ကလေးတစ်ယောက် မွေးလို့ရတော့မှာပေါ့ ဟမ် အဲ့သလိုလား "
အရုဏ်ဦးကိုသာ မေးနေပေမယ့် သူ့ခေါင်းထဲမှာတော့ အရုဏ်ဦးနှင့် အခြားမိန်းမတစ်ယောက် လက်ထပ်စာချုပ်မှာ လက်မှတ်ထိုးနေမည့်ပုံရိပ်ကို တွေးကြည့်ရုံနှင့်ပင် ဒေါသမီးက တလိပ်လိပ်တက်လာလေသည်။
" ဒါပေါ့ မင်းအဲ့သလောက်တောင် ကလေးလိုချင်နေရင် အစကတည်းက ကလေးမရနိုင်တဲ့ ငါ့ကို မချစ်ခဲ့သင့်ဘူး"
အရုဏ်ဦးရဲ့ အေးစက်မှုဟာ သူ သည်းခံနိုင်သော ဂိတ်ဆုံးအမှတ်ကို ရိုက်ချက်ပြင်းပြင်းနဲ့ ထိသွားခဲ့လေသည်။ ဘယ်လိုအကြောင်းမျိုးနဲ့မှ ချစ်ခဲ့မိခြင်းကို နောင်တရစရာ မရှိသူအား ပြောလိုက်လေသော စကားဟာ နှလုံးသားကို နင်းချေမွသွားသလိုပင်။
" ငါဘယ်တုန်းကမှ မင်းကို မချစ်သင့်ဘူးလို့ မတွေးခဲ့ဖူးဘူး ဒါကို မင်းလည်း သိတယ် ငါတို့ ငြင်းခုန်နေတဲ့ ပြဿနာက အချစ်နဲ့ ဘာမှမဆိုင်ဘူး အရုဏ်ဦး "
အလွန်အကျွံစကားတွေ ထွက်ကျမလာခင် အရုဏ်ဦးရှေ့ကနေ သူ လှည့်ထွက်ခဲ့သည်။ ဘာရယ်မဟုတ်သော ထိုကတောက်ကဆလေးကြောင့်ပင် နှစ်ဦးသား တဖြည်းဖြည်း အေးစက်လို့သွားခဲ့သည်။ AS ဖြစ်သည့်အချိန် သူဟာ မန်းမြေမှာ ကျန်နေခဲ့ပြီး အရုဏ်ဦးကတော့ တောင်ပေါ်ကို ပြန်သွားခဲ့သည်။ PG တက်သည့်အချိန် ပြန်ဆုံကြသည့်အခိုက်မှာတော့ သူစိမ်းသဖွယ် ဆက်ဆံရေးတစ်ခုသာ ရှိနေခဲ့တော့သည်။
YOU ARE READING
မောင့်ချယ်ရီ ဝေသောမြေ (Emergency Love Story)-Completed
Romanceခွဲစိတ်ဆရာဝန်နဲ့ အထွေထွေရောဂါကုဆရာဝန် ကြားက ဇာတ်လမ်းတစ်ပုဒ် ပါ မတူညီတဲ့ပြိုင်မျဥ်းတွေဟာ လားရာတစ်ခုတည်းအတူသွားကြတဲ့အချိန်မှာ မတော်တဆ ဆုံစည်းမိတတ်ကြတာပဲ မဟုတ်ပါလား အရေးပေါ်အခြေနေတွေကြားကနေ ဖြစ်ပေါ်လာမယ့် အချစ် Emergency Love Story ပါပဲ
