المأبون

البارت 6

عفاف ::- تره جاسم يحبج ودائما يحاجيني عليج انت موافقه ؟

دنكت راسها بخجل وتفرك باديها ترفع عينها وتنزلها بعدين حجت بصوت ناصي ::- موافقه

هلهلت امي انصدمت حليمه والدمعه صارت بعينها كبل ركضت للغرفه وبقت امي تضحك عليها ..

رحت كعدت يم جدو جان يحجي ويه غانم حجه ::-

سعيد ::- خويه احنا جاين نطلب ايد بنتك لابني جاسم علئ سنه الله ورسوله

جاسم ::- اي صحيح عمي احنا شارين بنتك شرايه ..

كفخه جدو علئ راسه وصاح بيه ::- اسكتتت

سكت جاسم متفشل جان غانم يسمع حجي جدو ويبتسم واخيرا نطق وكال ::-

غانم ::- والله انتم ناس كلها تحمد بيكم وباخلاقكم وحتئ عفاف ما يوم اشتكت منكم بس لازم اشوف ام البنيه وانشالله كم يوم ونرجع الخبر

سعيد ::- علئ راحتكم اصلا احنا ما مستعجلين "

رجعنه للبيت نضحك علئ جاسم وصلنا لكيت لقمان بالباب واكف اول ما نزلنا صاح ::-

- ليش ما اخذتوني وياكم ؟!

سعيد ::- ولك السياره متكفي وين نخليك فوك روسنا ..

جان يباوع عليه ويضحك دنكت راسي ودخلت جوه ويه امي
نزعت الحجاب تهفي لان الدنيا حاره بوقتها والكهرباء طافيه

جانت الكهرباء تجي ساعتين وتطفئ ونضل نشغل فانوس

حتئ جنت اكتب دراستي الصبح لان ماكدر بليل باوعتلي امي بابتسامه وحجت ::-

عفاف ::- باجر تلبسين حجاب جدج راح يجيبلج هديه لان بلغتي وصرتي جبيره وفاهمه ..

- ماما ماحب الحجاب اصلا ما متعوده وبعدني انه صغيره ما كبرت

عفاف ::- اعرف رافضه هالشيء بس الحجاب واجب علينه وراح بمرور الايام تحبيه لان هو الوحيد الي يحميج

- من شنو يحميني ؟

عفاف ::- يحميج من عيون الناس القذره وشهوه بعض الجلاب

جانت امي تحجي والدموع متجمعه بعيونها كتلها ::-

- شنو يعني شهوه

عفاف ::- عوفج من هالسوالف واريدج تصيرين حبابه.

هزيت راسي مبتسمه فتحت شعري وبقيت امشط بي واتمعن بطوله حجيت بكلبي ::- انا ما كبرت بس وصلت لسن البلوغ وبعد لقمان ما يشوف شعري لان حرام

درت وجهي علئ امي وكتلها ::-

- يمه

عفاف ::- ها

- بعد حرام لقمان يشوفني بلا حجاب موو ؟

عفاف ::- اي يمه حرام ودائما ابتعدي عنهم لا تلعبين وياهم لان كبرتوا