Snowless Winter Dream [Completed]

Chapter 18

လေတချွန်ချွန်ဖြင့် ကားမောင်းနေသော သျှိုင်းစက်မာန်တစ်ယောက် နံပါတ်စိမ်းဖုန်းကို ကိုင်လိုက်တာနဲ့ ရိုင်းလ်၏ အသံကို ကြားလိုက်ရတာကြောင့် ကားကိုပင် လမ်းဘေး အမြန်ထိုးရပ်မိသွားခဲ့သည်။

"ဟေ့ကောင် မင်း ငါ့ကို ဒီလိုဆေးခတ်ဖို့ကြံတော့ ဘာရလို့လဲ။ ငါ့ကို မကျေနပ်ရင် လက်သီးသုံးလေ၊ ယောက်ျားဖြစ်ပြီး အခုလို ချုံခိုတိုက်နေတာ မင်း မရှက်ဘူးလား"

သျှိုင်းစက်မာန် မပိရိသော သူ့လူအား စိတ်ပျက်သွားမိ၏။

"ခင်ဗျားကို မျက်စိနောက်လို့လေ။ ခွန်းသာ ခင်ဗျား ဒီလိုတွေ လုပ်နေတာသိရင် ကြိုက်နိုင်ပါဦးမလား။ ခွန်းက သဝန်အရမ်းတိုတတ်တယ်"

"ဒီလင်တရူးကောင်နဲ့တော့! ငါ မင်းကို အခုလို ဖုန်းဆက်ပြောရတာတောင် တော်တော်စိတ်ကုန်နေပြီကွ။ ခွန်းက သဝန်တိုတော့ရော ဘာလုပ်ရမှာလဲ။ သူနဲ့ငါက ဘာမှမှ မဆိုင်တာ၊ ငါ့ကို ဘယ်သူကမှလည်း လာထိန်းချုပ်လို့မရဘူး"

"ဟက်၊ ခင်ဗျားက အလာကြီးပါလား"

"ငါ မင်းကို ပြောပြီးသား၊ ငါ့ညီကို လိုချင်ရင် မျှမျှတတ လာပြိုင်လှည့်။ အခု မင်းလုပ်ရပ်ကြောင့် ခေတ္တရာ တစ်ခုခုဖြစ်သွားခဲ့ရင် မင်း ငါ့ကို ဘာပြန်လုပ်ပေးနိုင်လို့လဲ။ အေး. . .ငါတို့နှစ်ယောက်ကြားက ပြဿနာမှာ နောက်တစ်ကြိမ် သူက အခုလို မဆီမဆိုင် ကြားထဲက ထပ်ထိခိုက်မိသွားရင် အဲ့ကျရင် မင်း သေဖို့သာ ပြင်ထားတော့"

မရပ်မနား ပြောသွားပြီး ဖုန်းပိတ်ချသွားသော ဘဲကြီးကြောင့် မာန် ကြောင်အသွားမိသည်။

"ဟ. . .ဒီဘဲက အခု ဘယ်သူ့ကို ချိန်နေတာလဲ"

ကွက်ကျော်မြင်တတ်သော သျှိုင်းစက်မာန်ပင် ဘဲကြီး၏ စိတ်အ‌ခြေအနေကို ခေါင်းခဲသွားရတဲ့အပြင် အခုကိစ္စကို မအောင်မြင်လိုက်တာကြောင့်လည်း ရေးသာ သူ လုပ်မှန်း သိသွားရင် သူ့ကို လာကျိန်ဆဲတော့မလားဆိုတာအား တွေးကြောက်မိသွားသည်။

ရိုင်းလ်စေတန် သူ့လူတွေကို ပြန်လွှတ်လိုက်ရတော့ပြီး ရေး၏ နားနေခန်းရှိရာဆီသို့ ပြန်တက်လာခဲ့ရသည်။