ما أشتغلتا بيهو كتتتير وجيت خاشة السوبر ماركت ولا كأني بعرفو ولا كأنو هو هسي شافني مع ولد .. ونهائي ما خفتا من حتة أنو يكلم زول وقلت لو كلم خلي يكلم سااي أصلا ماف زول ح يقدر يهبشني .. خشيت السوبر ماركت ولقيت عماد ولد عمتي أميمة بيشتري وكان شايل أكياس في يدو هو برضو .. وقتها عرفتا أنهم هما الاتنين جو هنا مع بعض عشان يشترو الحاجات الناقصة لي باقي العزومة .. عماد من شافني قال لي إنتي الجابك هنا شنو؟ .. قلت ليهو يعني حيكون لي شنو مثلا! ما جيت أشتري .. قال لي أسلوبك الزفت دا حسنيهو ووطي صوتك لانو نحنا ما في البيت .. لويت ليهو خشمي ومشيت شلتا شبس وشوكولاتة وجيت دايرة أحاسب .. عماد قال لي إنتي مجنونة لمي قروشك ديل عليك .. ودفع هو .. أديتو القروش وقلت ليهو هاك دا حقك أنا ما بحب أشيل قروش من زول .. حمر لي شدديد وقال لي وهو بيتحرك: شفتي بلال برة؟ .. قلت ليهو ايي .. قال لي طيب تعالي العربية لاحقاني عشان نمشي وبطلي البتعملي فيهو دا .. قصدو على إني مادة ليهو القروش .. لميتهم علي وفي قلبي قلت بسم الله مالو قال فجأة! غااايتو الجاتو تختاهو لكن ائه وفر .. وقلت برااي فترانة ماف داعي أكابر وأنا لاقية حاجة توصلني لحدي البيت ف شلتا حاجاتي ومشيت ركبتا معاهم ورجعنا البيت.....اليوم مرا عادي ومع الشغل والجوطة مشى بي سرعة وما حسينا بيهو .. بعد صلاة المغرب عمي مأمون جمعنا كلنا في الصالة عشان الموضوع القال عايزنا فيهو .. قعدنا وهو بدأ يتكلم وقال لينا: الموضوع الح أقولو ليكم دا عايزكم تفكرو فيهو كويس قبل ما تردو لي عشان بهمني شددديد وما عايز أضيع الفرصة دي نهائياً .. عمي مرتضى قال ليهو في شنو يا مأمون؟ أحكي لينا .. عمي مأمون قال ليهو والله يا مرتضى أبراهيم أمبارح كلمني وقال لي أنو عايز بت من بناتنا لي بلال ولدو وفاتحني في الموضوع، وأنا بصراحة ما قدرتا أرفض لانو لو ضيعنا ولد زي ولد أبراهيم من يدنا تاني ما ح نلقى زيو وحنكون ضيعنا فرصة العمر الما بتجي غير مرة واحدة، ولد خلقة وأخلاق وما شاء الله عليهو هدي ورضي، أنا لو ما ميسون بتي عماد مكلمني في موضوعها وأنو هو عايزها ليهو فترة كان عقدتا ليها على بلال طوالي وبدون ما أسالها لانو متأكد ماف زيو وزي أخلاقو وأنا شاهد عليهم، ف قلت بما أنو بتي ما ح تقدر تعرسو وفي بنات غيرها كبار في البيت واللي هما بلقيس وميامن بنات أحمد أخوي أحسن ما نضيع الولد من يدنا ونشوف ليهو واحدة منهم .. اللحظة ديك عاينت لي بلقيس أختي ومسكتها من يدها قوووي وكأني بطمئن فيها أنو كل حاجة حتكون كويسة لاني حسيت بيها فقدت المنطق لمن عمي قال كلامو بخصوص عماد وميسون بتو لدرجة يدها بقت باردة بطريقة ما طبيعية وعيونها غصب عنها رقرقو .. قلبي وجعني عليها شددديد يعني الانسان الوحيد اللي هي حبتو طلع فعليا بحب غيرها ولا كمان عايز يعرسها...... عمي مأمون تابع باقي كلامو وقال لي أبوي: اها قلتا شنو يا أحمد؟ لانو ما فضل غير بناتك أنت بس البقية كلهم صغار وعمرهم ما عمر عرس .. أبوي عاين لينا وقال ليهو والله أنا ما عارف كدي أشوف رأي البنات أول طالما أنت مصر كدا أنو نحنا ما نضيعو من يدنا لأنو زول كويس، اها يا بنات قولتو شنو؟ .. أنا عاينت لي بلقيس وهي عاينت لي والاتنين كنا ساكتين .. الا هي بعد مدة أتكلمت وقالت لي أبوي وهي بتجاهد عشان تتكلم وتفتح خشمها: بابا أنت عارف أنو أنا لسه عايزة أحضر الماجستير والدكتوراة وعندي حاجات كتتيرة عايزه أعملها قبل ما أعرس وحاليا ما جاهزة لي العرس ولا بفكر فيهو وأظن كلمتك قبل فترة لمن أتقدم لي العريس الفات .. أبوي قال ليها أنا ما بغصبك على شي يا بتي وأهم شي عندي راحتك وطالما إنتي ما عايزة تعرسي هسي يبقى ماف زول ح يغصبك على العرس .. قالت ليهو ربنا يخليك لينا يا أبوي، وعن أذنكم يا جماعه .. قالت كدا وفاتت من جنبنا .. بعد هي فاتت أبوي عاين لي وقال لي اها وإنتي يا ميامن؟ .. قلت ليهو بتوتر: أأ.. أنا ش..شنو؟؟ .. قال لي رأيك شنو في كلام عمك! إنتي مواقفة تعرسي بلال ولد صاحب عمك مامون؟ .. كلامو دا خلأ قلبي يقول شححح وضرباتو تزيد ومجرد التفكير في إني ممكن أعرس الغنامي الغياظ داك بطني طمت وقلبي وجعني .. عاينت ليهو وأنا متوترة والزاد توتري أكتر لمن مررت عيوني عليهم ولقيتهم كلهم بعاينو لي ومنتظرين جوابي...من التوتر بقيت بطقطق في أصابعيني وما قدرتا أتكلم .. أبوي قال لي أها يا بتي نحنا منتظرنك موافقة ولا لا؟ .. قلت ليهو بب.. بابا أنا ما ح أقدر أوفق .. قال لي: لي يا ميامن السبب شنو؟ بلقيس ورتنا سببها ورينا إنتي مالك؟ .. سكتا ونزلتا رأسي لي تحت لاني ما عرفتا أقولها ليهو كيف .. بس فجاة أبوي قال لي عندك زول في بالك؟ .. رفعت رأسي بخلعة لانو عرفني وتوتري زاد وبعد مسافة حتى هزيت ليهو رأسي بخجل .. عمي مأمون قال لي خلاص يا بتي إنتي جيبي زولك دا ونحنا بعد نشوفو ونقعد معاهو بنقرر نوافق ولا لا وإذا لقيناهو ما مناسب ليك إنتي ح توافقي على ولد أبراهيم طيب؟ .. قلت ليهو طط..طيب .. قال لي وأنا حاليا ما ح أرد ليهم لحدي ما نقابل زولك القولتيهو دا ونأخد قرارنا النهائي بخصوصو ونشوف إذا ح نوافق ولا لا لاني ما حابب أضيع ولد أبراهيم من يدنا، يا بختنا لو ناسبناهم .. أبوي قال ليهو هما جنسهم شنو؟ .. عمي قال ليهو جعليين من سكان شندي الاصليين، والله يا أحمد الكرم والأخلاق يخلوها ليهم ناس مؤدبيين ونضيفين وكريمين بشكل ما تتخيلو وكمان القروش عندهم زي التراب، وعندهم الغنم والمواشي و....، أبوي أبتسم وقال ليهو الله يزيد من فضلهم .. عمي قال ليهو عشان كدا ما داير أضيع الولد من يدنا إن شاء الله واحدة من بناتك ترضى وتوافق بس .. أبوي قال ليهو أن شاء الله ...أستاذنتا منهم ومشيت لحقتا بلقيس أختي لقيتها قاعدة في غرفة حبوبة وبتبكي .. جيت حضنتها وهي مسكت فيني قوي وبقت بتبكي بي حرقة .. قالت لي ميامن .. وزادت في البكى .. قلت ليها معليش يا بلقيس معليش .. قالت لي ح يعرس غيري يا ميامن، طلع بحبها هي وما بحبني أنا، رغم إني كنت عارفة أنو ح يحصل كدا بس كنت دايما بتجاهل أحساسي دا وبقول لا أنا أملي في ربنا كريم وهو حيكون لي، أنا حبيبتو من جوا قلبي وعمري ما أتمنيت غيرو، ااخخ يا ميامن ااخخ من وجع القلب الحاسه بيهو....طريقة بكاها وكلامها خلوني أنا زاتي أبكي معاها .. وما قدرتا أشوفها وهي موجوعة بالطريقة دي وبعد مسافة ختيت يديني في خدها وقلت ليها ما تبكي يا حبييبتي، البكى ما شبهك وبعدين هو الخسران وصدقيني ح يندم شدديد لمن يعرف أنو ضيع واحدة زيك من يدو، إنتي منو الما بتمناك يا بلقيس؟ كدي وريني؟ وما تزعلي يا ستي بكرة يجيك سيد سيدو الح ينسيكي ليهو .. قالت لي الكلام ساهل يا ميامن لكن الفعل لا .. قلت ليها فعلاً الكلام ساهل بس دا الح يحصل وبكرة تقولي ميامن قالت وهسي قومي غسلي وشك وخليك قووويه زي ما عرفتك وعشان هما برضو ما ينتبهو لي أننا طولنا هنا ويشكو ولمن نرجع البيت نكمل كلامنا .. سكتت وما ردت علي .. مسكتها من أكتافينها لانها ما كانت قادرة تقيف على حيليها زي الناس ومشينا الحمام غسلتا ليها وشها ونشفتو ليها بي طرحتي وقلت ليها أخدي نفس طويل .. عملت زي ما قلت ليها .. قلت ليها يلا عايزاك تكوني قوووية زي ما عرفتك سمح! .. هزت لي رأسها وهي على وشك أنها تبكي .. قلت ليها لاااا مش قلنا ماف بكى؟ .. مسحتا ليها دموعها النزلت غصب عنها وقلت ليها ما تبكي يا قلبي .. هزت لي رأسها تاني ونزلت نقابها .. وبعد ما هي هدت شوتين طلعنا برة ونحنا الاتنين بنحاول نعمل نفسنا طبيعين .. قعدنا مسافة بسيطة وتاني أنا قلتا لي أبوي نحنا ح نمشي متين لاني نعستا؟ " وأنا في الحقيقة ما نعستا وعايزة نمشي من هنا بسرعة عشان بلقيس وعشان حالتها ما تسوء زيادة، لانها كانت بتعاين لي عماد بنظرة مكسورة ونهائي ما شالت عينها منو ولو في زول أنتبه ليها ح نتفضح " ..أبوي قال لي ما عندنا شي قومو يلا .. ودعناهم وودعنا ضيوف عمي وبعدها رجعنا البيت .. ومن وصلنا بلقيس طوالي دخلت غرفتها وأنا غيرتا ملابسي ولحقتها في غرفتها....لقيتها متكرفسه في السرير وبتبكي .. قلت ليها بلقيسس ياااااخ أنا ما متعودة أشوفك ضعيفة .. ما ردت علي .. جيت قعدتا جنبها وحضنتها علي وقلت ليها طيب أبكي وطلعي الجواك .. بكت في حضنتي لحدي ما نامت .. صلحتها ورقدتها في المخدة وبقيت بعاين ليها وأنا قلبي بيتقطع من الألم عليها .. بلقيس أختي دي أطيب منها ماف وما تستاهل الحصل ليها دا .. ولو كان بي يدي ما كنت خليت دموعها تنزل نهائيا حتى ولو أضطريت إني أكلم عماد بي مشاعرها بس ما حبيت أنها تتفضح قدامو وهو أساساً ما ح يعرسها حتى ولو عرف بمشاعرها لانو عايز غيرها.....وأنا بتمعن في ملامحها المرهقة والباهتة وبمرر يدي على شعرها مروان ضرب لي .. رديت ليهو وقلت ليهو بصوت تعبان: ايوا يا مروان .. قال لي أها قبيل رجعتي كيف وأنتو لسه عند ناس جدك ولا رجعتو بيتكم؟ .. قلت ليهو لالا رجعنا البيت .. قال لي صوتك دا مالو؟ .. قلت ليهو وأنا بضغط بي أصابعي على جفوني بتعب: شوية ضغوطات ومشاكل عائليه بس ... قال لي ربنا يهون عليكم .. قلت ليهو أن شاء الله الفترة دي تعدي على خير .. وفي قلبي قلت ما ظريفة أفتح معاهو موضوع العرس هسي وأفرح أنا لانو الزول البحبو ح يصل بيتنا لمن أكلمو وبلقيس أختي نفسياتها متدمرة بسبب موضوع زي دا الاحسن أخليها تبقى كويسة وبعدها أكلمو وأقول بيهو تعال لي أبوي .. وعشان كدا بقيت بتونس معاهو في مواضيع تانية وما جبتا ليهو سيرة الحصل في بيت ناس جدي وأنو أعمامي طلبو يشوفوهو نهائي........________________________________________"زليخة "" اليوم التاني "المحاضرة كانت متأخرة ف زي الساعة 9 مشيت الاستراحة صليت الضحى .. وبعد خلصتا لقيت آمنة ضاربة لي .. رديت عليها وقبل ما أتكلم قالت لي إنتي ويين؟ .. قلت ليها في الاستراحة .. قالت لي طيب جاياك .. وفي خلال خمسة دقائق بس هي جاتني .. ومن جات خاشة كانت بتكورك لي زليخة .. زليخة لمن البنات المعانا أنتبهو ليها .. عدلتا نظارتي عشان أقدر أشوفها زي الناس وقلت ليها بسم الله مالك يا بت جاية جارية وبتتنهدي كدي؟ .. حضنتي وقالت لي أتخيلي .. قلت ليها في شنو؟ .. قالت لي التعليق حقك جاب لايكات كتتيرة وبس في ولد واحد هو الفايتك وبي لايكات بسيطة كمان .. قلت ليها جد؟ .. قلت لي إيوه .. أبتسمتا ليها بهدو وقلت ليها كويس .. قالت لي مالا ردة فعلك باردة كدا؟ .. قلت ليها عشان إحتمال ما أفوز ما عايزة أتحمس ساااي .. قالت لي أنا غااايتو بقى عندي شوية أمل إنك ممكن تفوزي وإنو المسابقة دي بالجد حقيقية .. قلت ليها يا ريت، اها المحاضرة لسه؟ .. قالت لي أيي أجلوها لي الساعة 12 .. قلت ليها أوووف ياااخ كان يدونا ليها عشان نتخارج .. قالت لي المهم خلينا نمشي نفطر .. قلت ليها طيب أرح... مشينا الكافتيريا ولقيناها زحمة مبالغة محل تخت فيهو رجلك حرفيا ماغ .. وفي الحقيقة أنا بكره الزحمة شديد ونهائي ما بحب أقيف في مكان فيهو ناس كتار ف أمنة لمن لاحظت لي تعابير وشي ولي الضيق الظهر علي .. قالت لي عايني إنتي أمشي وإنتظريني برة أنا بجيب الأكل وبجي طيب؟ .. قلت ليها خلاص أنا بنتظرك مع خالتو أبتسام برة عشان بعد نفطر نشرب عندها الجبنة .. قالت لي تمام يا زوله .. مرقتا برة الجامعة وقعدتا مع خالتو أبتسام تحت الشجرة في محل الجبنة بتاعها .. المحل كان بعيد شوية من الجامعة .. ما عديت كتتير من قعدتا في عربية جات ووقفت قصادنا ونزل منها ولد .. أول ما عاينت ليهو وشفتا وشو عرفتو دا الولد القبل كم يوم مسكني من يدي وقال لي الكلام داك .. مجرد ما شفتو قلبي قال شححح .. وعاينت ليهو بتفحص .. المرة دي شكلو بيوحي أنو واعي وما شارب شي .. كان بيهبش في جيبو وشكلو بيتأكد أنو تلفونو معاهو ولا لا .. وبعد ما أتأكد قفل باب العربية وجا قال لي خالتو: خالتو أبتسام كيفك يااااخ؟ مشتاقين والله .. قالت ليهو كتتتير يا ولدي وين أنت بقيت مختفي؟؟ .. قعد في واحد من الكراسي وقال ليها عارفة آخر سنة الزول بيكون مضغوط فيها كييف ... قالت ليهو ربنا يعينك ويوفقك يا ولدي .. قال ليها أمين ما تنسينا من دعواتك السمحة دي .. قالت ليهو معقولة بس؟ .. أبتسم ليها وطلع سيجارتو وبقى بيشرب فيها .. ما عارفة لي بس كنت مركزة معاهو شدديد وكل شوية بعاين ليهو .. أما هو ف لمن إنتبه لي أداني نظرة من فوق لي تحت ورجع يشتغل في تلفونو وتاني نهائي ما عاين لي .. شكلو ما عرفني .. أساسا ح يعرفني كيف وهو وقت قال لي كلامو داك ما كان في وعيهو؟ .. أمنة اتأخرت شدديد لحدي ما جابت الأكل وجات .. قلت ليها دا كلوو تأخيرر؟ ياااااخي أنا لمن شبعتا من الانتظار .. مع كلامي القتلو هو بقى بعاين لينا بي طرف عينو وركز معانا .. أمنة قعدت وقالت لي يا بت أسكتي ساااي الزحمة كانت مبالغة والاكل جبتو بعد سلة روح وتعب مفروض تشكريني .. قلت ليها شكراً وبركة الجيتي لاني كنت ح أموت من الجوع .. قالت لي تاني تووووبة من إني أقيف في زحمة زي ديك عشان الاكل، خالتو أبتسام كيفك؟ .. خالتو قالت ليها أنا كويسة نحمد الله يا بتي .. طبعا هي ولا إتلفتت وطوالي بدت تأكل .. وأنا لمن مديت لي خالتو أبتسام شالت أول حتى بديت أكل .. بعد خلصنا أكل وبدينا نشرب في الجبنة .. الولد القبيل جاهو ولد تاني .. والجا طلع نفسو الولد الفكاهو مني وأعتذر لي بدلو .. في الأول ما كان شايفني لكن أول ما شافني طوالي أستاذن من صحبو وجاني .. قال لي السلام عليكم .. قلت ليهو وعليكم السلام .. قال لي أنا جاي أعتذر ليك على الحصل المرة الفاتت وعلى البدر من صحبي ولاني ما أعتذرتا منك زي الناس عشان كنت مستعجل وعايز كمان أشكرك لانك ما كلمتي أدارة شئوان الطلاب وأشتكيتي صحبي .. قلت ليهو العفواا يااااخ صدقني ما مستاهلة .. قالت لي تسلمي .. قلت ليهو الله يسلمك .. قال لي إنتي برلومة صاح؟ .. قلت ليهو ايواا .. مدا لي يدو وقال لي أنا معاذ خريج مختبرات السنة دي بإذن الله لو أحتجتي لي حاجة وريني لو سمحتي .. أبتسمتا ومديت ليهو يدي وقلت ليهو أن شاء الله .. سلم علي أمنة الما كانت فاهمة شي برضو ورجع لي مكانو .. وشكلو صحبو سألو وقال ليهو دي منو ومعاذ وراهو لانو هو عاين لي تاني وحرك لي معاذ رأسو شمال يمين .. أمنة رفعت لي حاجبها وقالت لي في شنو؟ ودا منو؟ وبعتذرك منك ليه؟ .. حكيت ليها الحصل يوم وقلت ليها عشان كدا أعتذر مني .. قالت لي اهااا بس الولد ما ظاهر عليهو أنو بتاع الشغلانيات دي عايني ليهو شكلو كيف .. قلت ليها المظاهر خداعة ما يغرك شكلو أحتمال عامل السبعة وذمتها المهم ما علينا قومي عشان نلحق المحاضرة .. قالت لي قومي .. دفعنا لي خالتو حقها ومشينا المحاضرة......___________________________________________من جانبي:-مرو كم يوم وبلقيس أختي حالها أتبدل توتلي وبقت طبيعي حابسة نفسها في غرفتها وما بتتكلم كتتير وأربعة وعشرين ساعة تبكي وعايشة في حالة أكتئاب عجيب .. حتى ماما لاحظت ليها وكم مرة سألتها في شنو لكن هي كانت بترد بي أنو ماف شي .. لحدي ما فاجأتنا بي أنها ماشة مركز تحفيظ وح تقعد هناك شهر لانو عاملين معسكر مقفول .. أبوي برضو كان ملاحظ لي حالتها ف لمن شاف أنها ممكن تكون مرتاحة لمن تمشي المعسكر وافق ليها .. وهي تاني يوم طوالي جهزت شنطتها ومشت .. بعد عدو تلاتة أسابيع من هي مشت ..البيت بدونها كان مسيخ شددديد خصوصي أنها كانت بتعمل لينا جوا .. وأنا بالذات متعودة عليها لانها أقرب أنسانة لي وما بدس منها شي خالص ومتعودة دايما أحكي ليها البحصل معاي وأشاركها مواقفي الصغيرة قبل الكبيرة .. وهي نفسي الحاجة .. بس الحصل الفترة الأخيرة خلاها منزوية وبعيدة مني ومن ناس البيت .. والحاجة الوحيدة الكانت مالية علي الفراغ الخلتو فيني بلقيس هو مروان .. حرفيا وقف معاي وقفة رجال وما قصر خالص وكان مستحملني بطريقة ما طبيعية...في يوم بالمغرب أبوي جاني في غرفتي وقال لي أها يا بتي ما كلمتي الزول الدايرك أنو مفروض يجي عشان يقابلنا؟ لانو عمك هسي ضرب لي وقال لي أنو عايز يرد على ناس أبراهيم وما بيقدر ياخد قرار مالم يشوف زولك أول .. قلت ليهو نسيت والله يا بابا لاني كنت مشغولة الفترة الفاتت مع بلقيس والموضوع طلع من بالي لكن بكلمو وبقول ليهو يجي يقابلك يوم الجمعة .. قال لي خلاص تمام منتظرو .. وفات مني .. مشيت قفلتا الباب وراهو وأنا قلبي بدق دق دق دق .. والبسمة ما كانت راضية تفارق وشي لاني أتخيلت إني ممكن أعرس مروان وأنو أبوي ممكن يوافق عليهو .. بسرعة شلتا التلفون وفتحتو عشان أرسل ليهو أنتبهتا لي أنو في مكالمات فائتة من أمل صحبتي ومن أريج قلت برجع ليهم بعد ما أتكلم مع مروان .. ما قدرتا أتكلم من الفرحة ف فتحتا الواتسب ورسلت ليهو رسالة محتواها:-"مروان...أبوي قال عاوز يشوفك ويقعد معاك يوم الجمعة هو وأعمامي عشان موضوعنا .. أتخيييل بس يا مروان أنو أهلي يوافقو عليك وأننا نعرس .. وااااي ما قادرة أصدق والله إنك ح تجي بيتنا عشان تطلبني "...أداني خطين صح وإنو الرسالة وصلتو كالعادة يعني .. لكن هو ما كان خاشي .. في قلبي قلت طالما فاتح الشبكة وما داخل واتس معناتو بكون متصل في الفيس .. خشيت الفيس وكنت عاوزة أفتح الماسنجر من فوق وأرسل ليهو لكن وقفني أول بوست لقيتو في وشي .. البوست الكان فيهو صورتو هو ومعاهو بت وشها مغطى وهما الاتنين مادين يدينهم الموجودة فيها دبل لي الكاميرا .. لمن شفتا البوست والكلام المكتوب فيهو قمتا على حيلي وأنا برجف من فوق لي تحت .. وبفتح في عيوني وبغمض فيهم وكنت مخلوعة ومصدومة من البقرا فيهو .. شنوو؟؟ دا شنو كيف يعني مروان خطب؟ لالا أنا أكيد بحلم .. أي أي دا مجرد حلم ما أكتر وهسي ح أصحى منو .. لانو أستحالة .. أستحاااالة مروان يعمل فيني كدا ...بسرعة جبتا رقمو من جهة الاتصال وأتصلتا ليهو وأنا برجف وبأكل في ضفوري من التوتر والخوف الكان متملكني .. رنيت عليهو قريب الخمسة مكالمات لكن هو ما كان برد وهنا خوفي زاد .. طوالي ضربتا لي عامر صاحبنا .. ومع كل جرس كنت بمشي وبجي في الغرفة بي توتر .. عامر ردا وأنا بسرعة قلت ليهو يا عامر .. قال لي ميامن ويين إنتي يا زولة نحنا من قبيل منتظرنك يعني معقولة تفوتي عليك يوم مهم بالنسبة لي صحبك زي دا وما تقيفي معاهو فيهو؟؟ بتجي منك؟ حتى ولو كنتو متزاعلين في النهاية أنتو أصحاب وفي بيناتكم عشرة عمر .. ما فهمت قصدو شنو وقلت ليهو وأنا بعافر عشان الحروف تطلع من خشمي: أأ..أجي وو.. وين؟ وو صحبي مم..منو؟ .. قالت لي تجي خطبة مروان ... كلامو وقع علي زي الصاعقة وقلت ليهو شش..شنو؟؟ مروان خطب؟ لا دقيقة كك..كيف يخطب أساسا؟ يعني البوست الشفتو حقيقي؟ عامر أنت بتهظر معاي مش؟ عليك الله قول لي إنك بتهظر .. قال لي وأهظر لي؟ إنتي ما كنتي عارفة ولا شنو؟ .. قلت ليهو مم..ما عارفة .. قال لي معقولة لسه متشاكلين؟ .. قلت ليهو شكل شنو أنا ما فاهمة شي؟ رأسي ح يضرب يا عامر .. قال لي قبل أسبوع مروان ورانا أنو ح يخطب بت عمو ونبه علينا أننا ما نجيب ليك سيرة عشان أنتو مختلفين وهو عاوز يراضيك أول حتى بعدها يوريك بي نفسو والاسبوع الفاتت كنا كلنا جاريين معاهو وبنحضر في التجهيزات ولمن أمل وأريج يكونو عايزين يضربو ليك عشان يوروك هو بقول ليهم لا ما تكلموها نحنا لسه ما أتصالحنا لاني ما لقيت وقت أصالحها فيهو ولحدي أمبارح كنا قايليين أنكم خلاص أتصالحتو وهو وراك وإنك ح تجي الخطوبة لكن الليلة وقت شفناك أتاخرتي وهما لبسو دبل وإنتي لسه ما جيتي أريج وأمل بقو بضربو ليك عشان تجي وتحصلي باقي الخطوبة بس ما رديتي .. طبعا لمن هو خلص كلامو أنا كنت في حالة تانية تماماً ومن الصدمة قعدتا في السرير وأنا فاتحة خشمي وما قادرة أصدق حرف من اللي عامر قالو .. سمعتا صوتو وهو بقول لي الووو .. الووو .. ميامن إنتي معاي؟ .. قفلتا الخط بدون ما أرد ليهو ورميت التلفون جنبي وأنا مصدومة لمن كلي برجف .. وجع القلب والصدمة والزهول الكنت حاسة بيهو اللحظة ديك ما أظن في حاجة بتقدر توصفو ... ضميت رجولي علي وختيت رأسي فيهم ودموعي تلقائيا وبدون ما أشعر جات جارية .. أنا ما قادرة أصدق .. حاسة نفسي في حلم .. متين نحنا أتشاكلنا أصلا؟ مش لحدي أمبارح دي نحنا كنا بنتكلم طبيعي مع بعض؟ كيف يعني خطب أنا دايرة أفهم؟؟ معقولة مروان يكون ما بحبني؟ .. حركتا رأسي بمعنى النفي وقلنا لالا هو بحبني أنا عارفة أكيد في غلط، أنا بحلم .. ودا مجرد حلم ح أصحى منو بعد شوية، مروان أستحالة يعمل فيني كدا أنا بحبو وح أموت لو هو خلاني وهو عارف الحاجة دي، أستحالة يخطب غيري .. أستحالة.....مسكتا تلفوني وبقيت بضرب في رقمو تاني وأنا منتظراهو يرد ويثبت لي أنو كل الحصل مجرد وهم مني .. بس هو ما كان برد .. فجأة وأنا ماسكة التلفون في يدي جاتني رسالة من عامر .. فتحتها لقيتو مرسل لي " ما عارف لي لكن حاسي إنك ما مصادقاني بس يااهو شوفي بي عينك " وتحت الرسالة مرسل لي صور الخطوبة .. كانو قريب العشرة صور وأنا مع كل صورة كنت بفتحها قلبي كان بكذبني وبدقق في ملامح مروان عشان أعرف إذا دا هو فعلاً ولا لا .. رغم إني كنت بتاكد أنو دا هو فعليا بس قلبي ما كان بصدق .. طيب هو لي فرحان ولي مبسوط وبضحك بي الطريقة دي؟ يعني هو داير الخطوبة دي؟ .. لالا مروان ما بيعمل فيني كدا .. مروان بحبني .. أنا عارفة أنو هو بيحبني وفي شي غلط .. أكيد في شي غلط وهو ح يفهمني ليهو...من الصدمة عيني نهائي ما غمضت ولا شافت النوم طول الليل .. والوقت كلو كنت بقنع في نفسي أنو الحصل مجرد حلم وإني ح أصحى وما ح القى شي من الفكرت فيهو وكل الح القاهو رسالة من مروان وهو بصبح علي .. ما نمتا إلا قريب لي صلاة الصبح وزاااتها كانت عبارة غفية خفيفة وبعدها صحيت وأنا مخلوعة وبتلفت حوليني .. وبسرعة شلتا تلفوني وفتحتا دردشة عامر عشان أتأكد إني كنت بحلم ولا لا .. بس أول ما دخلتا ولقيت الصور في وشي .. أتاكدتا أنو مروان فعلاً خطب وأنو الحصل أمبارح كان حقيقة وأنا ما كنت بحلم......أنتظرتا لحدي ما الواطة فتحت بي فارق الصبر وزي الساعة 7 ضربتا لي مروان .. وقبل ما أسلم عليهو قلت ليهو مروان أنا عايزة أقابلك وفوراً في الكافي الاتلاقينا فيهو قبل المرة الفاتت .. قال لي وهو بضحك: مشتاقة لي الدرجة دي؟ حاضر يا ست البنات شوية وأكون هناك .. قفلتا منو وأنا مزهولة هو بيتكلم معاي عادي بالطريقة دي كييف؟ يا ربي الحاصل شنو؟ أنا بقيت مخلبطة شددديد وما عارفة أعمل شنو، بس يلا كلها نص ساعة وبعدها يتوضح كل شي .. لبستا بسرعة بسرعة وحتى ما ضربتا لي عمو مختار عشان يجيني ومشيت بي المواصلات....وصلتا الكافي ولقتيو هو قاعد ومنتظرني ... سلم علي عادي ولا كأنو في شي حاصل ودا الزاد حيرتي أكتر .. ومن قعدتا أول حاجة عملتها هي إني عاينت في يدو اليمين ما لقيت فيها دبلة أو حاجة تدل على أنو هو خطب، اللحظة ديك لمن حسيت نفسي جايطة .. لدرجة فتحتا التلفون تاني عشان أتأكد من الصور بس لقيتها زي ما هي .. أنتظرتو يتكلم ويوريني ويوضح لي الحصل .. لكن هو كان بتنونس وبضحك بس .. من جواي كنت بردد وبقول " يلا يا مروان يلا أثبت لي أنو البفكر فيهو غلط .. وأنو الحصل ما حقيقة .. وريني يا مروان ولو دليل بسيط على إنك كنت مغصوب أمبارح .. برر لي موقفك يا مروان وما تخليني أفكر فيك بي الطريقة دي " .. بس للأسف هو كان مستمر في البعمل فيهو ونهائي ما جاب لي سيرة .. والحاجة دي وجعتني شدديد لدرجة ما قدرتا أسيطر على نفسي .. وقمتا على حيلي وأنا بضرب في الطربيزة القاعدين بكل قوتي وبقول ليهو ودموعي نازلين على خدي بهبل: خلاص .. خلاص كفاية لحدي هنا....هو أتخلع من ردة فعلي وقال لي ميامن بسم الله مالك في شنو؟ .. عاينت ليهو وأنا بحرك في رأسي وفاتحة خشمي ومتحيرة فيهو .. وقلت ليهو أستحالة تكون بي البرود وعدم الاحساس دا كلو .. قال لي ميامن مالك أنا ما فاهم شي؟؟؟ .. فتحتا الصور الرسلهم لي عامر .. ومديت ليهو التلفون وقلت ليهو أنت الممكن تفهمني ديل شنو؟ .. شال مني التلفون وهو يدو بترجف .. ومجرد ما شاف الصور ملامحو أتغيرت توتلي .. وقال لي بصعوبة: مم...ميامن إنتي فاهمة غلط دقيقه أفهمك .. ربعتا ليهو يديني بي أستهتار وقلت ليهو: أتكلم يلا أنا منتظراك تفهمني وتوضح لي الصور دي شنو؟ فهمني يلا .. قام على حيلو وبقى بعاين لي وكان ساكت شكلو ما عارف يكذب ويقول شنو .. قلت ليهو اهاااا أتكلم يلا كذب علي ، يلااا .. برضو كان ساكت وما قدر يتكلم .. قلت ليهو هئه طبيعي ح تسكت لانو ماف شي يتقال ولانو دي الحقيقة وأنت بالفعل خطبت أمبارح، لا وكمان مكذب على الشلة ومفهمهم أننا متشاكلين وكلو عشان ما يوروني وأجي أفضحك وأخرب عليك مش؟ بس شكلك نسيت أنو عندي فيس وممكن عادي أشوف البوست النزلتو، وبدل ما تعترف بي غلطك وتصلحو جاي بتضحك علي لسه زيادة؟ لي عملتا فيني كدا يا مروان؟ أنا حبيتك بالجد، حبيتك وعمري ما حبييبت زول زيكك، أنت الوحيد الأنا وافقتا أرتبط بيهو والوحيد الأديتو قلبي تجي تجازيني بالطريقة دي؟ أنا أستاهل منك الوجعة دي يا مروان؟ أستاهل منك كل دا؟ .. كنت بتكلم وأنا حاسة بي وخزة قووية في نص قلبي وببكي .. قال لي مم..ميامن والله إنتي فاهمة غلط .. قلت ليهو طيب فهميني وريني الحقيقية شنو؟ رغم إني شايفاها بي عيوني .. قال لي صدقيني أنا ما كنت عايز أخطبها بس أمي جبرتني .. لمن قال لي كدا ضحكتا ضحكة بصوت عالي لدرجة الناس اللي في الكافي أنتبهو لي .. وقلت ليهو يااااخ ما قادرة أمسك بطني من الضحك، دا ضحك كتتتير والله .. قال لي ميامن .. وقفتا ضحك وقلت ليهو بصوت عالي وعصبية: هسسس! أسمي أوعي تاني مرة تجيبو على خشمك فاهم؟ قلتا لي إنك مغصوب صاح؟ طيييب .. كبرت الصور حقت الخطوبة وجبتا وشو هو وقلت ليهو الله بيسألك في زول مغصوب على حاجة بضحك قدر فيها دا؟ هسي شكلك هنا شكل زول مغصوب؟؟ دقيقة بتكذب علي منو أنت؟ ااا؟ مروان فتح عيونك ديل كويس وشوف منو الواقفه قدامك؟ أنا مياااامن يا مروان، ميامن وأنت عارفني كويسس وعارف إنو الحركات دي ما بتمشي علي وإني بفهمها كويسس .. قال لي طالما بقينا فاهمين بعض وأنا عارف أنو الحركات دي ما بتمشي عليك ف الاحسن أنو نكون واضحيين .. ودخل يدو في جيبو وطلع منو دبلة فضية .. لبسها في يدو اليمين وختا يدو قدام وشي وقال لي ايواا يا ستي أنا خطبت أمبارح وكمان بي راضاي وكنت فرحان ومبسوط، أصلا طبيعي أفرح لاني خطبت البت البحبها .. اللحظة ديك قلبي كان بينزف من الالم وحسيت زي الزول الطعني فيهو بي سكينة .. قلت ليهو طيب ولو بتحبها هي أنا شنو؟ وريني يا مروان أنا شنو إذا هي حبيبتك؟؟ .. قال لي إنتي مجرد رهان بيني وبين صحبي .. غمضتا عيوني وفتحتها وأنا مصدومة .. قال لي ايواا يا ستي أنا لا حبيبتك ولا ح أحبك، تتذكري صحبي القابلنا في شارع النيل لمن كنا مع بعض؟ .. إتذكرتا أننا في مرة وقبل ما نرتبط مشينا شارع النيل يوم ولقينا صحبو هناك لكن ما ركزتا مع الموضوع كتتير لانو كان عادي .. مروان تابع باقي كلامو وقال لي بس هو سألني منك عشان عجبيتهو ولمن عرف إنك ما مرتبطة قال لي نفسي أرتبط معاها عجبتني زولتك دي لكن المشكلة أنو الزيها رأسهم ما بتجاب بسهولة وأكبر دليل أنت، على حسب كلامك إنك مصاحبها ليك سنين طويلة بس ما أرتبطا بيها أو حنكتها يمكن لانك ما بتقدر ... قلت ليهو على فكرة هي ميتة بي دربي وأنا لو داير عادي بخليها ترتبط بي .. قال لي أعملها وجيب رأسها وأثبت لي إنك بتقدر تجيبها .. وقتها قلت ليهو أنت بس أديني شهر وشوف كان ما بقيتها حبيببتي، وبالفعل بعد شهر بالظبط أنا جبتا رأسك زي الما حصل شي .. قلت ليهو يعني كل شي بيناتنا كان مجرد رهان وتحدي؟ طيب والحب الاديتني ليهو والمشاعر الكنت بتقول لي إنك بتحسها تجاهي كلو كذب؟ حتى أهتمامك بي وبي تفاصيلي الصغيرة والكبيرة كذب؟ معقول؟ لا أنا ما قادرة تصدق، مروان لالا قول لي إنك بتكذب، عليييك الله قول لي أنو كلو حلم، مروان أنت بتحبني مش؟ بتحبني أنا عارفة .. وبقيت ببكي بحرقة .. قلت ليهو أنت مش قلت لي إنك ما ح تخليني وإنك بتحبني شددديد وح تعرسني وقريب ح تجي تطلبني من أبوي؟ مروان الحصل شنو؟ إنت بتحبني مش؟ .. لمن قلت ليهو كدا ضحك وقال لي أنا وأعرسك إنتي؟؟ يا بت إنتي ما عاينتي لي نفسك مرتين في المرايا؟ كدي بالعقل حصل مرة شفتي ليك واحد بعرس ليهو واحدة بتلبس زي لبسك دا؟؟ حصل مرة شفتي ليك واحد بعرس ليهو واحدة مستعدة تمرق وتطلع معاهو في إي وقت وما عندها مانع، حصل مرة شفتي ليك واحد بعرس ليهو واحدة مستعدة تكذب على أهلها عشانو وعشان تقابلو في أي وقت؟ عاملة لي فيها الشريف الرضي وما بتحبي زول يلمس يدك ولو لمسها بتقومي الدنيا وبتقعديها وإنتي بي هناك خاربة الدنيا كلها وما مخليه شي وأي غلط قدامك بتعملي فيهو .. قرب مني شوية وقال لي وأهم من دا كلو حصل مرة شفتي ليك واحد بيعرس ليهو واحدة بتشررب سجاير جنبو؟.....______________________________________إنما المواقف تُقنع وتشكك... تثبت وتنفي..تبني وتهدم..إنما المواقف براهين....❤️!أشوفكم....
