حي المغربلين

الفصل التاسع عشر

الفصل التاسع عشر.
#بداية_الرياح_نسمة
#حي_المغربلين
#الفراشة_شيماء_سعيد

رغم معرفته بخطورة تلك الخطوة إلا أنه سيقوم بها، هي دواء جروحه... قلبه محترق و هاجر علوان علاجه الأبدي، دلف إلى قصر الخولي بعدما طلب مقابلة فوزي، حرب لا يعلم نهايتها إلا أنه لم يرى من رب عمله شيء سيء.

سيطلب يد شقيقته الوحيدة و يعلم أن الرفض أول جواب و ربما الغضب أيضا، دق على باب غرفة المكتب و دلف بعدما أذن له الآخر بالدخول...

وجده يجلس على مكتبه بإبتسامة غامضة مرحباً به بحفاوة :

_ تعالى يا كارم المكتب نور أقعد يا راجل أقعد، قالوا إنك عايز تقابلني.. خير...

جلس على المقعد الذي أشار إليه الآخر محاولا إيجاد صوته حمحم بتوتر قائلاً :

_ بصراحة يا فوزي بيه أنا كنت عايز حضرتك في موضوع حياة أو موت بالنسبة ليا بس مش عارف ابدأ الموضوع مع حضرتك إزاي؟!

أجابه فوزي بمرح :

_ ابدأ من أي اتجاه أو طريقة حابب تتكلم بيها أنت في مقام أخويا الصغير مش مجرد راجل من رجالتي قول أنا سامعك...

نبرته و كلماته أعطت الآخر أكبر قدر من الشجاعة ليأخذ نفسا عميقا و بدأ بالحديث مردفا بهدوء :

_ أنا من أول يوم جيت فيه هنا و شوفت اهتمامك بأخت حضرتك عامل إزاي و عارف إنها غالية على قلبك، طلبي ده ممكن يكون مستحيل عشان الفرق الطبقي بنا طبعاً بس أنا واثق في ربنا و في نظرتك ليا، أنا طالب القرب منك في أخت حضرتك الآنسة هاجر..

قطع باقي جملته مع ضحكات فوزي التي ملأت المكان، يضحك و يضحك كأنه لم يضحك بحياته من قبل تخرج من أعماق قلبه، ارتبك كارم من رد الفعل هذا ليضغط على أسنانه بغضب منذ متى و كارم الريس محط للسخرية؟!

قام من مكانه غاضبا قائلاً :

_ مفيش داعي يكون رد حضرتك كدة كارم الريس كبير في مكانه مش قليل القيمة عشان تعمل كدة، عن إذنك يا باشا...

توقف فوزي عن الضحك و هو يشير إليه بعدم التحرك مردفا :

_ استنى بس يا كارم بلاش تبقى قفل كدة يعني غبي و مضحكوك عليك و كمان غضبان، مين قالك تطلب ايد هاجر مني هاجر نفسها؟!

نفى الآخر برأسه ثم أردف :

_ لا يا باشا أنا عملتها مفاجأة قولت أتكلم مع ولي أمرها و أخوها الكبير الأول...

اختفت إبتسامة فوزي و هو يضع ساق على الآخر بكبرياء مردفا :

_ طلبك مرفوض و ده مش عشان الفرق الطبقي و لا الهبل اللي أنت بتقوله ده لا عشان هاجر علوان حرم فوزي الخولي مش أخته من الأم زي ما قولتلك في الأول، مجرد زوجة متعة بالنسبة ليا مش أكتر، الخاينة اللي أنت عايز تتجوزها جات ليا من سنة تقولي أنا حامل كانت فاكرة أنها ممكن تضحك عليا متعرفش إني مش بخلف أصلا..