نيران ابو ذيبة " الاصلية "

الحلـقــة الــ ٢٣

كركان : تعالن بوية نضل واكفين خل نطب للمطعم
خالدة : يااا يمة جا لو شافنه ريلي
كركان : لا تخافين تعالن وراي مشيت كدامهن صعدت المسواك بالسيارة
خالدة : خالة انته روح
كركان : لا ما عليج يلا اصعدن
هدى : شاورت امي. يمةةة وينن يريد بينه هذا
خالدة : انجبي ولج.
هدى : صعدنه بالسيارة واخذنا يسوق ويسولف ويا امي
كركان : هدى صايرة جبيرة وتخبل. وصلنا للمطعم ونزلنا
كعدنا على طاوله معزولة حتى لا احد يشوفنا او حتى لا يجي الفحل زوج خالتي ويضل يمسلت
خالدة : شلونهم اخيوانك
كركان : الحمدلله زينين
خالدة : شلونك بدراستك يمة خلصت بعدك
كركان : الحمدلله زين اي خلصت
اخذتنا السوالف جنت حيل فرحان بخالتي
خالدة : يلا يمة نروح
كركان : انه اوصلكم
خالدة : لا يمة روح احنا منا نروح وناخذ سيارة ويانا
كركان : لا والله اني اوصلكم وهو بطريقي
خالدة : خوش
كركان : وصلتهم مسافة عن بيت خالتي ورحت للبيت
عايد : هاا وين جنت
كركان : بالسوك
عايد : وكل هذا بالسوك
كركان : شبيك جنك لازم علية لزمة اي بالسوك وين يعني
عايد : لا بسس شفتك تمشي و وراك اثنين نسوان
كركان : انجب لك خالتي وبتها هاي
عايد : عاد صاكة بتها
كركان : والله تمسلت انته تدري يلا عيني نزل المسواگ وياي
عايد : ومن شلت المسواگ هذا كله ومسواگ خالتك شو ما اهتميت
كركان : ههههههه ابن الركعة شيل يمعود
عايد: خوش خوش عاونته ودخلنا المسواگ للبيت
قسمة : اسفرت وانورت
كركان : باوعت لعايد ورفعت حاجبي
خووب ما طولت عليج
قسمة : لا شوية طولت وين جنت
كركان : صار عندي شغل وتاخرت
قسمة : نسيت البخور مو
كركان : افا عليج حجية انه انسى وصاياج
قسمة : اي جا مشهودتلك من جنت صغير وديتك على هيل جبت بخور
كركان : نسييت اخذلج شويب ينسيج هاي السالفة
قسمة : دفوت فوت
قمر : اشوف مناكر حبوبتي وكركان اموت من الضحك. رحت لحبوبتي كعدت يمها
قسمة : ها ام لسان شبيج
قمر : شنو هاي القوطية
قسمة : بخور تبخرين غرفة غضب بي
قمر : بالله اشمه اخذته منها وشميته
ريحتهه تخبلللل وملت المكان. حبوبة هذا مبين غالي
كركان : اشتريته بـ 25 الف
قمر : انته اشتريته
قسمة : يااا كلش خواردة هوه انه اطيته فلوس واشتره بيهن
قمر : يبختك يغضب كل هذا الترتيب الك
قسمة : غير وليداتي انتم واحبنكم حيل
حياة : اباوع شلون الحجية لامتهم بكلامها وتتشاقة وياهم
صحت لقمر ينضفن البيت ويغسلن هدوم غضب
حسن : مشتاق لغضب هواي ما كاعدين سوية من مدة وامي وحبوبتي دخلن البيت انذار
اليوم التالي

نزلت للبيت بس اريد الزم المخدة وانام.
وصلت ودكيت الباب
كركان : ياهووو
غضب : مو كبرت ما تبطل عادتك
كركان : هههههه لك هلا حضنت غضب حيل مشتاقله كلش

معصومة : اليوم غضب ينزل واكيد الكل منتضره وامي من الصبح كعدتنا وتسوي دولمة
اندك الباب وراح كركان يفتحه شوية وسمعنا صوتهم ما شاء الله كلش ناصي
غضب : شلونك يول شخبارك
كركان : بخير دامك بخير ابو ذيبة
اخذت الجنطه من ايدة وطلعوا اخواني سلموا علي
غضب : تلگوني كلهم سلموا علية احب لمتهم من يتلگوني
حضنت حبوبتي وبستها براسها
قسمة : هلا يبعد امك شلونك وليدي
غضب : بخير دامج بخير حبيبتي.
حياة : يلا يمة كوم غير ملابسك حتى نصب الغدا.
غضب : اي هسة تعالي ولج قميرة
بستها وكعدتها بحضني
معصومة :  جا وانه
غضب : هههههههه انتي بنيتي الحلوة تعالي بوية
عباس : شني عمي جا بس الجن احنا هم النا حصة
قسمة : يا يا شني يمة انطونا فنتك كوم يلا حلل (غير ملابسك)
غضب : كمت دخلت لغرفتي سبحت وبدلت ملابسي وطلعت لكيتهم فارشين السفرة وملتمين كلهم
اليوم سبت والجو حلو
كعدت وياهم وبدينا ناكل وكالعادة مناكر حبوبتي وكركان ما يخلص
كركان : ما حصلتلك شويب لحبوبتي
غضب : بس خلي تختار اجره الج من ياخته
قسمة : يا سودة بويهك حبوبة خايب انه وين بعد صرت خربانه
حسن : عمرج طويل حجية نسويلج تاتو مدري شسمة هذا ابو كرون الشيطان
غضب : اي عفية
قسمة : شيطنك الله ولك بيش طالبني
غضب : هههههههه
خلصنا اكل وشالوا المواعين والسفرة
حسن : تقربت يمه وكتله شخبارك ابو عبد الله
غضب : خزرته انجب لك اسكت
حسن : ههههههه اشتاقيت لشكلك وانت لحيتك عالية ولابس لبس افغاني
غضب : جا ابشرك راح ارجع هم البسة
حسن : انته صدك تحجي
غضب : اي والله
حسن : استغفر الله يمعود دير بالك استر علينه
غضب : ما يصح الا الصحيح
عايد : احمم احمم تتهامسون
غضب : مو شغلك عيني اسرار دولة
كركان : اي عمي ايي ما تنلامون اثنينكم ضباط وتحجون بالعالي بس ان شاء الله الحگكم
غضب : جا شور الله وشورك تعال
عباس : مسيكين يا عايد
عايد : انجب ولك وعلي اكوملك
حسن : شخبار الروسية
غضب : تحت ايادي التنظيم الصعوبة طريقة اخراجها من هذا الوكر
حسن : لا تگلي ايدك بهالسالفة
غضب : اكيد جا شلون ثاني شي اجت من الله على الله بعد هم اكو اشياء او بشكل عام حصيلة مهمات
حسن : اهااا جيد بس لا تنسى وتحلف بسيد خضير
غضب : ههههههه افا عليك شنو جديدة علية
حسن : ادري بيك ذيب
غضب : ما اغشك اني
كركان : جلطوتنني رحت كعدت يمهم
يلا احجوا صارلكم ساعة تحجون على كيفكم
غضب : والله ما احجي اريد اخليها حسرة بگلبك حتى تبطل فضول
كركان : اخوي الجبير وتمون ومع احتراماتي الك ولكلامك هذا اكتبه بورقة وحطة بطيبة گلبك يا طيب
غضب : يول انجب واكل تين
قمر : اسمع صوتهم اني ومعصومة ونضحك على مناكرهم صاحتني امي ورحت الها
حياة : يمة روحي طلعي ملابس اخوج واغسليهن واكويهن
قمر : خوش رحت لغرفة غضب فتحت الجنطة بديت ادور المجرات فتحت المجر وانصدمت بالشفته
مواد تعذيب واثنين سجاجين ويمهن موبايل صرصور
فتحته ودخلت لقائمة الاسماء هواي بس استغربت من الأسماء كلها جانت ابو فلان وابو فلانه لفت نضري اسم ابو جريرة؟ منو هذوله وليش هيج اسمائهم
باوعت لتليفون غضب شفته على الشحن رحت فتحته لكيته بدون رمز
دخلت على الأسماء ما بي شي عادي اووفف صابني الفضول هسة يجي غضب ويلزمني

دخلت للأستوديو بي فيديوهات وصور هواي واغلبها فيديوهات ادعية وقرآن وفتاوي نزلت للأخير شفت صور بديت اشوفهن وجان اشوف الصدمة.
غضب : شفت قمر دخلت لغرفتي ضلت عيني على الغرفة طولت شوية كمت اشوفها
قمر : شفت صورة لغضب بس هوه بيها لحيته عالية ومزين الشوارب ولابس لبس افغاني لا لا هذا مو اخوي يعني معقوولة الي ابالي قربت الصورة حيل ايي والله هوه هذا يعني شلون صار هيج غضب داعشي لا ما اصدك حولت على غير صورة وجانت الصدمة اكبر صورة بيها هوه ووياه هم جماعة مثلة لابسين هيج لبس ولازمين اسلاحهم احس عقلي وگف يعنني غضب يكتل بالأبرياء وواهمنة يربي والله ما جاي استوعب الصاير
غضب : فتحت باب الغرفة ودخلت لكيت قمر بوجهي
بسرعة قفلت الموبايل واندارت الي
غضب : شجاي تسوين؟ 
قمر : ما اسوي شي بس ااا امي كالت جيبي ملابس اخوج اغسليهن
غضب : وشبيج هيج مخبوصة ووجهج اصفر وشجاي تسوين بتليفوني
قمر : هااا لا ما بية شي بس شلته من الشحن لان مقبط شحن
غضب : بعدم تصديق. اهااا
اخذت الموبايل لكيت بي 80. سحلتها من ايدها وكعدتها على الجرباية
صكيت اسنوني وحجيت مااا احب الجذب

قمر : يربي هسة بيش اركعها هالجذبة
و واني شمدريني مو يكولون الجهااز لازم ما يعبر الثمانين لان بطاريته تخرب
غضب : ههههه حلو معلومة جديدة
فتحت الموبايل ولكيتها داخلة الأستوديو
خزرتها
قمر : صخام بوجهي هذا كام يخوزر اهخخ غبية
غضب : ليش داخلة الاستوديو
قمر : انه لا صدكني ما دخلت صدكنني وداعتك
غضب : جا منو امي داخلة
قمر : يجوزز بس مو انه
غضب : ولج قميررة لا تجذبين والعباس ابو فاضل اعلكج بالمروحة احججي انتي داخلة
قمر : اي اي انه بسس
غضب : اكلي تبن وبعد ما تمدين ايدج على شي مو الج
قمر : انفتك علية متعوود اي متعوود اخوي داعشيي
غضب : كومي يلا ولا تسولفين لاحد
قمر : غضبب انته مثلهم
غضب : منو همه
قمر : هذولة الدواعش
غضب : تعالي اكعدي بسس الحجي الاكولة ما يطلع مفهووم
قمر : لا ما اكعد والله اخاف
غضب : ههههه تخافين مني ولج
قمر : احجي وعيوني كامن يصبن. اايي اخاف منك
غضب : سحبتها وكعدتها بحضني بست ايديها
اسمعيني بنيتي. انتي ما تعرفين هاي الامور الجاي تشوفينه هو صحيح اني بس مو مثل ما تفهمين
قمر : ف فهمني
غضب : حبيبتي اني اساعد الناس الي عند داعش
قمر : هووو شنو تساعدهم وانت مثلهم

غضب : اي مثلهم اني ووياي هواي مثلي داخلين وياهم نتعاون حتى نقضي على عمليات هذولة ومفخخاتهم وفنك قيد المخوطفين والسبايا
قمر : همم ما فهمت انت تجذب علية
غضب : لا حبيبي مو جذب انتي بعدج صغيرة على هيج شي وهذا الشي حيل حيل سري لا تحجين لاحد
قمر : يعني انته مو وياهم
غضب : اي مو وياهم والله
قمر : لا احلف بروح ابوي
غضب : ههههههههه جا منو خلق ابوي يلا بوية وروح ابوي مو وياهم
قمر : انطيني فلوس
غضب : هااااا بدينا نهدد. ماكو فلوس يلا اطلعي
قمر : لا لا حبيبي بابا فلووسس صارلك هواي ما منطيني
غضب : امري لله طلعت محفظتي انطيتها 10 الاف هاج هاي عشرة خمسة الج وخمسة لمعصومة
قمر : اممم صح ما راضية بس يلا انعم الله
غضب : ههههههه امشي لج اخذج الواهس وبعد لا تعيدينها
قمر : طلعت من يم غضب واني وجهي ينطي الوان
معصومة : شبيج ولج

قمر : اسكتي يمعوودة اسكتي خليني اخذ نفس

معصومة : شسويييتي يمعزاية

قمر : يوووو ما سويت شي بس انجبي

يتـبع......
نبــأ الســلطــان 🙂♥️