اسكربتات مُتنوعة"بقلم رُقية محمد عبداللاه"

الحلقة الثانية عشر

ضحكت بس كانت ضحكتي استهزاء ، مَكنتش عاوزه أرضيّ غروره كراجل في اللحظه دي وإنه الشخص الواو اللي رَفضت الكل علشانه حتى لو هو بالفعل كان كده !

- وتفتكر كل اللي جربوا الحُب كان الشخص اللي معاهم مُناسب ؟ لو كان زيّ ما بتقول مكانش هيبقى فيه فُراق وانفصال عن اللي بيحبوهم ، كل الحكاية حكاية وَقت وبيكتشفوا فيها إنهم ضيعوا وَقتهم واستنذفوا مَشاعرهم مع شخص غير مناسب والأهم إنهم عرفوا إن لا طاعة لمخلوق في مَعصية الخالق.

عيونه لَمعوا ونظرة الانبهار كانت ظاهرة في عينيه - حَبيت إجابتك ، طيب برضو مَقولتيش ليه مرتبطتيش؟

- لأني مَملكش في الدنيا إلا قلبي وقلبي عزيز لا يأخذُه إلا عزيز يا وَليد .

مَقدرش يخفي نظرة إعجابه ولا إني عِليت إزاي في نظره بعد إجابتي وفهمه لتفكيري ، ولأني دارسه ال Body Language قَريته والأهم فهمت بيدور أي في دماغه وسابقاه بخَطّوة.

- تسمحيلي أكون العزيز اللي نال شرف الحصول على قَلبك ؟

ابتسمت وأنا بجاوبه - فُرصتك أقوى من غيرك ، هما حاولوا ياخدوا قلبي بس مَكنتش بفتحلهم بابه لأنه كان حرام.

- طيب وأنا ؟

غمزتله وأنا بجاوبه - وهل حُب الزوجه لزوجها حرام يا وَليد ؟

ضحك زيّ العيل الصغير مش في سذاجته على قد ما فرحته طَبطَبت على قلبي ورَاضته وإني أميرة وقلبي مياخدوش إلا مَلك عَفي وحُر والأهم إن قَلبه يكون عَفيف عن حُب كل النساء إلايّا.

- رحمة ممكن آخد رأيك في حاجه ؟

- طبعًا .

- بُصي يا ستي ، دلوقتي أنا بشتغل في شركة أدوية ، هي مُرتبها حلو .. لأ حلو جداً بس أنا مش مرتاح لفكرة إن فيه مدير متحكم فيا ومَقدرش حتى أبدع لأن عندي حدود مَينفعش أتخطاها ده غير إني دايمًا شاغلني هَمّ بُكره وإني أها هعيش بالمرتب ده وهعيشك مش ناقصه حاجه بس لما يبقى عندنا ولاد وربنا يفتكرني هسيبلهم أي يتسندوا عليه ؟

- راحتي من راحتك وهعمل أي بالفلوس طالما أنتَ بتصحى كل يوم وبتروح شُغل مش حابُّه لأجلي؟ لو عندك فكرة غيرها وحابب تطبقها وتفتح مَشروع فأنا معاك ونفكّر فيه مع بعض ، أما حكاية ربنا يفتكرك وكده فاتقِ شرّي يابن فاطمه ومتجبش سيرة الموت قُدامي وإلا ..

ضحك - وإلا أي يا ست رَحمه ؟

قرّبت منه وأنا بضيّق عيوني - وإلا سأعلن الحرب عليك أيها الملك وهتبقى دم يا سيد .

مَثّل الخوف - وأي كمان ؟

وَقفت ورَبعت أيدي - على المطبخ .. عاوزاك في مَجين قهوة .

- طب والحته البعيده؟

- البلكونه قَصرت في حاجه؟ هل البلكونه قصرت في حاجه؟