ضحك ضحكه خفيفه كدا واتكلم بتريقه على كلامي(حالك ايه اللي تروحيله في وقت زي دا، انتي ممسوكه في ايه بالظبط؟ )
هو يقصد ايه بممسوكه دي هو فاكرني ايه، دا لازم يعرف هو بيكلم مين كويس، خدت نفسي كدا براحه وقولتله(لا بقولك ايه انا مش بتاعت الكلام دا انا واحده سلاحي في الحياه هو شرفي وبعدين انت متعرفش انت بتكلم مين )
ضحك تاني واتكلم بتريقه(بكلم مين يعني؟)
بصتله بغيظ وقولتله بلا فخر(انت بتكلم احسن كوافيره في مصر)
ضحك تاني وحرك راسه كدا من غير ما يقول ولا كلمة، قرب مننا عسكري وحيَّاه باحترام وقاله (دخلنا المتهمين كلهم الحبس يا سيادة الرائد)
ينهار مش فايت رائد😮 دا انا شكلي هتعلق في القسم للصبح.
بصلي من فوق لتحت وفجأة ضحك وكأنه افتكر حاجه، اتكلم مع العسكري وهو بيبصلي وقاله(متأكد ان انتوا دخلتوا كل المتهمين الحبس)
رد العسكري باحترام (ايوا يا فندم)
ضحك اكتر وهو بيبصلي وقال للعسكري(بس في واحده من المتهمين لسه مدخلتش الحبس)
هو يقصد ايه بقى، معقول يقصدني انا.. بلعت ريقي بخوف ورفعت ايدي احيَّه باحترام زي ما العسكري عمل وقولتله( باشا مصر والله واللي مايعرفك يجهلك) ضحك اكتر وانا استغليت انه بيضحك وحاولت اهرب من قدامه، اتكلم بصوت قوي خلاني اتجمد مكاني(استني عندك) وقفت وغمضت عيني، معقول هيحطني في الحبس مع المجرمين؟.
قرب مني بخطوات هاديه ووقف قدامي ولقاني مغمضه عيني، اتكلم معايا بصوته القوي (فتحي عينك) حركت راسي بـ لا وانا مغمضه بخوف وقولتله (لا مش هفتح عيني، انت عايز تحبسني وتحطني مع المجرمين واول ما ادخل الحبس يلفو حواليا وهما بيغنو ياحلوه يا بلحه يا مئمعه وانا اعيط وبعدين يعوروني في وشي ويعلموا عليا) صوت ضحكته ملا القسم، كل العساكر والناس اللي موجودين بصو علينا وهما مستغربين، فتحت عيني بسرعه على صوت ضحكته، مش هقدر انكر ان ضحكته دي خطفت قلبي، بس طبعا مينفعش، دا ظابط شرطة وانا حتة بنت بشتغل في كوافير، فوقي لنفسك يا سارة وبلاش تحملي حلمي انتي مش اده.
وقف ضحك واتكلم معايا بابتسامه وقالي(انتي كنتي هنا في القسم لحد دلوقتي بتعملي ايه؟) اتكلمت بخوف وقولتله (والله انا معملتش حاجه، انا كنت مروحه من شغلي جعانه وامي عامله النهاردة مسقعة وانا بصراحه مش بحبها، قولت اشتري علبة جبنه وانا مروحه) بصلي بصدمة، فتح عنيه بزهول وهو بيسمعني وكأني بحكيله قصة تاريخيه، حرك راسه وقالي(وبعدين) كملت كلامي وقولتله(بس والحكايه بدأت من هنا، في حرامي ابن حرام ملقاش وقت يسرق فيه المحل غير وانا بشتري علبة الجبنه وصاحب المحل جبني معاه هنا عشان اشهد على المحضر وبقالي هنا اكتر من ٣ ساعات) استغليت الفرصه بقى واديته حته دراميه من عندي عشان اصعب عليه ويسبني اروح (هو دا كل اللي حصل وانا لازم اروح دلوقتي عشان اطمن على امي العيانه واديها الدوا) ضحك مره تانيه وصوت ضحكته كان مسمع القسم كله، خد نفسه من كتر الضحك وقالي(حكايه عبره بصحيح) حركت راسي بطريقه دراميه عشان اصعب عليه، اتكلم معايا بهدوء(طب انتي مش هينفع تروحي لوحدك في الوقت المتأخر دا، تعالي معايا انا هوصلك) وقفت متجمده مكاني، شاور بإيده قدام عيني وقال(ايه انتي روحتي فين) بصتله وقولتله(انا هنا اهو، بس ملوش لازمه تتعب حضرتك وتيجي توصلني، انا هعرف اروح لوحدي) اتكلم بصوت قوي خوفني منه تاني (مهو بصي بقى، يا اما تيجي معايا اوصلك لبيتك دلوقتي، يا اما هتشرفينا هنا في الحبس للصبح وترقصي على اغنية يا حلوه يا بلحه يا مئمعه لحد ما النهار يطلع) اتكلمت بسرعه(لا والنبي حبس ايه انا معاك يا باشا وصلني برحتك) ضحك وقالي(طب اتفضلي قدامي).
