لم يلمسني احد

البارت ١٠

((الجزء الثاني))

،،،،،،،،،،،،،

البارت_10

انتضرته بكر انتضرته..ما اجه.. طلعت روحي. عفت المطعم وطلعت.. باوعت السيارات تمشي..
فعلا ايست من الحياة بيومها وردت اشمر روحي بالشارع جوه السيارات..دخلت الشارع والسيارات سريعه دخلت بيئس..
واسم صراخ من وراي سمرررررر لاااا... درت وجهي عليه.. وما احس الا سياره كبال وجهي ودك هووورن حيييل.
بحركه سريعه..جرني بكر من السياره..بس السياره قديمه..والمقدمه مالتها مكسوره.. عدت على رجلي..وجرحتها..
صرخ شبيج تخبلتي..لج بس كليلي انتي عقل ما عندج..شلون تشمرين نفسج هيج..
- بقيت ابجي واصيح وادفع بيه.. من وراك من وراك.. ما اتحمل تعوفني بكر لاااا وكعدت علرصيف ابجي..
نزل ابو السياره..كال خويه والله اسف مو قصدي اضربج بس طلعتي بوجهي..
بكر كاله لا هاهيه خويه اتوكل.. اني ابجي.. وامسح عل جرح رجلي.. كص لحم رجلي كص.. وبس تجري دم..
كال ابو السياره كومي خويه خل اخذج للدكتور وشكد تكاليف جرحج انه ادفعها..
بكر.. توكل خويه حادث مو متعمد .. هسه اخذها للمستشفى ويداووها..
- خويه ابروني الذمه والله موقصدي..خويه متأذيه..شو تبجي..
-روح يا خويه روح.. اني اوديها مبري الذمه.. درت وجهي عليها..كومي لتبجين بالشارع .. دنكت لرجلها..
تأذيج..
-هزيت راسي اي.. واني ابجي..
-كومي خبله كومي..الا شويه جان متي.. عود هيه زينيه تموتين نفسج..
-كمت وما حجيت شي..اخذني للسياره.. كتله بكر والله ما جذبت عليك قصد..
- اسكتي لا تفتحين الموضوع..
-ليش مترد عليه..
-لانج مو معتبرتني .. فليش ارد..اصلا ما اهمج..
-لو متهمني..ما جان شمرت نفسي للموت علمودك..
-هاي مو تضحيه هاي خبال.. انتي جاي تعاقبيني باذية نفسج مو تصالحين واطلبين رضاي..
-بكر لا تعتقد غيرك يسكن كلبي..بعيوني ما اشوف احد غيرك.. لو شما يكون.. شبر ما يعلى عليك..
واني رحت ويه كمال مو علمود شي.. بس طالبه وياي متورطه ويه واحد نكس ويبتزها علمود ياخذ نزوته..
لهيج طلبت مساعدة كمال..باعتباره نقيب وضابط شرطه..يكدر يعالج الموضوع..
قسم بلله لا فد يوم اتواصلت وياه ولا ابد بس علمود هذي البنيه. ..
- وليش مكلتي من البدايه هيج الموضوع..
-انته ما خليتني احجي..
-سمر انتي جذبتي وكلتي اني جنت بالمدرسه.. واني سألت عليج الحارس.. كال ست سمر طلعت اجازه..
-ما اعرف والله مو قصدي اجذب.. بس ما ردت اكول بسالفة البنيه لا اكثر..
دنحجي وصلنه للمشتشفى.. خابرت ماما..
-سمر انتي وين اتأخرتي
-يوم صار ويايه حادث صغير..وهسه اني بالمستشفى..
-يااااا شلووون..
-ما اعرف واحد جاي طاير وانشكت رجلي..
-احمد مو هنا ويجيج.. راح اجيج اني.. بيا مستشفى..
-ماكو داعي يوم هوه بس يضمدون الجرح وارجع..ما عليه شي.. نص ساعه واجي
-ماشي بس عود طمنيني راح يضل بالي يمج.. ولو اجه احمد ادزه عليج..
-لا لدزيه والله مابيه شي كتلج نص ساعه واجي لا ينشغل بالج..
-يله متانيتج..
-سديت الخط من امي وباوعت لبكر..كال وربج ما تكبرين.. لو يصير عمرج 100 تبقين ثوله.. لج بابا ثمني تصرفاتج فكري قبل ما تتصرفين..
- كتله راح تكعد تلومني وانته السبب..
- ضحك..والله ما يعجبني بيج غير ثولج.. لو ملوته وملعبه جان ما حبيتج. بس من انتي وصغيره.. ثوله..
-تره رزلت هواي كافي
-هههههه دمشي امشي..
-كصينه باص.. ودخلت ضمدولي الجرح.. وخيطووه بس اووف متت وجع.. وبكر بره مو يمي..
كملت طلعت..كال هاا.. كتله متت والله..كال علمود اتوبين..كتله ما هامك وجعي..كل همك اتوب..
ضحك وضرب على كفي.. لج والله الالم بيه مو بيج بس غير اصبر عليج .. قابل ابجي بوجهج
-قنعني قنعني بهلسوالف.. مشيت اخذ ايدي وخلاها بأيده..باوعتله..
-حاب احس انتي مرتي.. تعبت واني اشوفج كبالي واغار وانطحن كل يوم بغيرتي عليج..
-ابتسمت.. اخذت بايده حيل.. ما تعرف شكد حابه اصير الك.. بس اشووون.. نحجي ونمشي..
وصلنه السياره صعدني.. و دار صعد.. ورجع كمش ايدي.. ويباوعلي.. تتزوجيني..
-ابتسمت.. هههه وشلووون.. بكر احسها صعب.. مجرد تفكير انته تخطبني وكذا انرعب..
منو راح يتقبل..
-الي المسويه مو حرام وزواجي منج على سنة الله ورسوله.. قابل شرايد اني..
-اعرف مو حرام.. بس بمجتمعنه وعد اهلنه حرام .. منو راح يتقبل..
-من خره بيهم ما يهموني سمر اني اريدج الج ما اريد لا اهل ولا غيرهم.. وتالي متالي كلهم يتقبلون..
-همه المشكله شلون يتقبلون..بكر فكرة انهزم وياك لتفكر بيها.. لو اموت ما اسويها واعوف اهلي وراي..
-نتزوج هسه..
-شنوووو..
- صكيت على ايدها حيل.. نتزوج هسه.. وتبقى هيج علاقتنه بس لضمنج الي.. وقت اللي اتقدملج ورفضو وما قبلو..وقتها اعلن زواجنا.. واكلهم هيه مرتي واللي يعجبه يعجبه والمايعجبه يا كثرها الحيطان..
-يمه غير يموتونه..
-منو يموتنه شبيج.. لما تصيرين مرتي اخلي واحد يمس شعره منج غير احرك الخلفه ومحمد اهجم بيوتهم..
وينجبرون بينه.. لان زواجنه راح يكون قانوني.. واثنينه بالغين.. واللي مسويه مو غلط
ومراح الزمج ولا اتقربلج يشهد الله عليه ما فد يوم فكرت بيج بنزوه حبي الج فطره. وهلزواج بس علمود اضمنج الي..
-لا بكر اخاف والله.. ما اكدر..
-سمر كافي خوف لخاطري.. لج بس اتقوي بيه ولا تخافين..
-بكر سبق وكتلي حبيني ولا تخافين وشفت شصار..
-سمر كتلج لا تخافين وانتي خفتي وما خليتيني احميج . ولج خليتيني اكره روحي بوقتها والله..
سويتي فد واحد عاجز.. لا تقبلين تحاربين وياي.. علمودي.. ولا انتي تاركتهم ورايحه وياي.. تستسلمين بساع..
-بكر ما اكدر هسه.. ما صار اشهر من اطلقت من عادل واتزوج.. لا لا اجلها وما اكدر اتزوج بدون علم اهلي..
احس نفسي رخيصه..
-يا رخيص.. لج اني مشتريج والله وبس رايد اضمنج .. اعزلج ابيت عنهم وعن اهلي خاف يضايقوج
واخذج واجيبج بيظي خاف يتعرضولج.. في حال اعلنه زواجنه.. وولله ما اخلي جنس مخلوق يتقربلج..
-بكر والحجي..تعرف الناس شراح نحجي..
-الناس مدام بحلوكهم السان ميسكتون..لو شتسوون راح يحجون ويحجون وتالي غصب عن الكل يتعودون هلوضع.. ويعترفون بيه ويسكتون..
سمر فكري بيه مو بالناس.. اليحجي كبالج افكسله عينه والله.. واليحجي وراج اعتبري كلب ينبح..
-هزيت راسي.. بكر ما اكدر ماكدر اخاف من هلفكره والله اخاف..
-اخذت نفس.. براحتج ما اكدر اجبرج ع شي..
- بقيت افكر بكلامه.. ما اعرف ابد ما تدخل عقلي اتزوج بدون علم اهلي.. لو اموووت مستحيل..
وصلني.. للشارع.. باوعتله مثل المهموم.. لزمت ايده..وعصرتها لتضوج بس والله صعب..
- لا ولا يهمج عادي الله يدبرها..
-مدام نحب بعض بنيه صافيه ثق بلله يجي يوم ننجمع بيه بالحلال..
-ابتسمتلها بيئس وكتلها انشالله..
-نزلت منه.. وتمشيت للبيت.. طبيت امي كالت هااا بالي يمج.. كتلها خيطوها..احمد جان واكف عيونه تراقب..ما حجه..
كشفت امي رجلي.. كتلها عوفيها مضمده..كالت اخذي اجازه باجر.. كتلها انشالله. بس اريد ارتاح..
عفتهم ومشيت لغرفتي .. نجوى ماكو.. صحت ماما وين نجوى كالت خطيبها عازمها على غده هوه وياه من الجامعه وطلعو.. كالت ارجع العصر..
كتلهاا هااا اوك.. اخذت موبايلي وخابرت نجوى..الووو
-هلو سموره كولي .
-انتي وين..
-بالسياره اني ومازن رايحين للمطعم..
-اكيد للمطعم..
-اي والله ليش..
-لا هيج بس ضل بالي عليج.. يله من تجين عود نحجي..
-حجيتي ويه بكر..
-اي بعدين احجيلج.. سلميلي على مازن..
- اوك .. يوصل .. باي..
-شمرت الموبايل علسرير وبدلت.. ورحت توضيت وصليت ونمت.. ما كعدت غير العصر على صوت نجوى وهيه تدخل الغرفه..
-هلو نونه اشونج.. احجي واني امط بجسمي..
-هلا يروووحي صدوك مسويه حادث .. هسه ماما كالتلي..
-ايي حادث زعنوني..
-بلله اشووو .. سوده عليه اشووون..
-هيج خبال مني.. ضريبة زعل العندليب الاسمر غير
-ههههه لا والله شنو بكر دعمج..
-وثول شنو بكر يدعمني.. لا بس كتله يجي للمطعم ولو ما اجه.. اكتل روحي.. ما اجه.. تخبلت وشمرت نفسي كظام السيارات..
-عززه بعينج انشالله لو ميته
-عساني اموت.. هيه هاي هم عيشه والله لعبت روحي من حياتي.. شسوي كالو عيب مطلكه..
لا اكدر اتزوج ولا اكدر ابقى على هلوضع بالله هاي حياة..
- وشلون صالحتي بكر..
-هوه جرني من السيارات.. وكام يرزل من خوفه عليه ونسى الزعل
-يفدوه لج والله احب حب هلبكر.. يخبل
-عوفيني من بكر.. وين طلعتي انتي و مازن..
-رحنه اتغدينه.. وطلعنه ندور شقه.. لان مازن ما حاب نعيش ويه اهله..يريد نعزل بشقه..
-والله احسنلكم.. براحتكم تعيشون حياتكم.. وثنينكم طلاب تتبهذلين ويه العيال..
-اي هوه هم هيج كال..
-بس منيلكم هوه طالب حتى ما يشتغل..
-ابو مليان.. عنده عمارات مال شقق كومه.. بس هوه ميريد بعمارات ابوه.. يريد شقه قريبه على الجامعه..لهيج دندور..
-هاااا .. اكولج نجوى.. اكو شي حابه احذرج منه كأخت من خوفي عليج
-شنو..؟؟؟
-نجوى احذري تختلون بوحدكم لمكان وياه..
-لااا شبيج ما عدنه هيج سوالف والله..
-اعرف بس الشيطان شاطر ومثل ميكولون كل اثنين ثالثهم الشيطان..
حاولي اي شي لتسوون بيناتكم حتى لو خفيف.. وخليه يتلهف الج للعرس..
تره هلشي مراح يضوجه منج صدكيني .. بلعكس راح يحترمج وراح تكبرين بعينه.. ويحسج فد شي غالي مو رخيص وياخذ براحته..
لو شكد ما يحبج..لا تأمنين اله لحد مدخلون غرفة زواجكم..
-لا والله اني هم ما احب هيج شي.. بس هوه مرات بالفون يحجي كلام-اي انتي عاد لتمللي بالموبايل احجي رومانيسات.. بس مو تتعدين الاباحيه.. لو شفتي تجرء وكام يحجي خارج عن المعقول..
كوليله حبيبي ياريت نأجل هيج مواضيع بعد الزواج لان اخجل اسمعها.. خليه يحترمج لا ترخصين نفسج ابد..
تره الرجال ما يتأمن اببد اليوم يحبج باجر الله يعلم.. يمكن يغيروه عليج.. كولشي يصير.. هيه خطبه يعني قابله للانفصال بضرف من الضروف فانتي اخذي حذرج..
-اوك..
-بستها.. وحضنتها.. وكتلها تره والله اكولج هيج من خوفي عليج..اخاف عليج من الكلمه والله..
-احبج
-اموت عليج كليباتي.. ياه متت جوع..كومي صبيلي اكل.. بعتبارني مريضه 😌
-ههههه اوك ابدل واكوم اصبلج..
-لااا جذب قابل مكرمه..هسه نكوم سوه..نزلت..لكيت ماما مسويه كبة جريش..ما احبها مركه.. طلعتها وكليتها..
كعدت علميز اكل.. جر الخبز من يمي احمد واكل .. ابتسمتله بالعافيه.. ما حجه..
مكليه 3 اكل 2 .. وبقالي وحده.. شكد ما يقسي ويايه ولا اكدر اكرها وابقى احبه..
دياكل دك موبايله..علميز.. باوعت.. كاتب.. القلب كله.. كتله ايي عيني القلب كله يابه..
ابتسم ابتسامه خفييفه وكام.. تكول الضحك عنده بفلوس..
مرت الايام.. واني التهيت بشغلي.. امتحانات ووكفه ومراقبه وتصحيح.. تعب هد حيلي..
لحد ما خلصنه امتحانات.. هم كمت اداوم بس ساعتين مجرد اروح اصحح دفاتر وارجع.. بس حاره وكهرباء ماكو..
يطلع روحي من ادقق باجوبة الطلاب الخنفشاريه.. اتعب وحاره وهمه يجاوبون اجوبه يحبر بيها انشتاين..
مرات من ادوخ بالجواب.. بودي اخلي عليه اكس وانطيه زيرو.. بس اكول خطيه.. اتذكر شلون جانو يضلموني بالتصحيح واكعد ادقق علتصحيح..
هيه يله حسيت بمعانات المدرس. انوب حتى المي حار وعز الصيف الجو كولش حار نسمطت سمط والله..
طلعت روحي لحد ما عطلت وكعدت.. وكمنه بالبيت نتحظر لزواج نجوى و مازن.. بقى اسبوع على زواجهم..
واشتغل وحدي امي ملتهيه ابابا ونجوى استخطيها تشتغل.. عروس ما اريد ادمر ايدها وتخرب اضافيرها.. ونعومة اديها بالبتنضيف..
بس هيه خطيه متبقي.. شكو طبخ هيه تطبخ.. اني لا بقيت كاونترات لا سيراميك.. لا حديد مال درج..
كله جلف. مو عطله غضب.. بس يهون لعيون نونه .. دا انضف بالدرج.. اندكت الباب.. طلعت امي..
جان تصبح هله بيكم هلا تفضلو.. صحت على نجوى خب هيووو منو.. كالت ولج بيت اركان ..
كتلها بلله شجابه.. اشررررد لفوك.. اجيت ازحلج ولزمت بالمحجر.. وكملت.. لابسه تراك ورافعه البجامه لفوك الركبه..
والكفشه مالتي تكول شمس .. وكلي تايت ومواد تنضيف... يا الله بلله وقتهم يجون.. ميعرفون عدنه حمله تنضيفيه..
دخلت لاحمام.. غسلت.. ورحت غيرت ملابسي ولبست حجاب.. ونزلت.. طلعت خالاتي اثنين خوات ماما وبيبي ام اركان ومرت اركان و اركان وياهم..
سلمت وكملت وكمت.. عصاير ومي ومددد .. يربي تعبت اهئ اهئ اهئ... كالت بيبي ام اركان..
والله اركان عده شغل بالعتبه الكاظميه.. وكناله نريد نروح وياك لام احمد زواج بتها قريب.. وخواتج رادن يساعدنج..
واركان جاي لهنا 10 ايام شغل.. كلنه بعد منو يوصلنه لبغداد نجي وياه
كالتلهم امي اي والله هلا بيكم.. بس جيتكم كافي. مو علمساعده..
كالتلها خاله لاا والله هيه شوكت واحد يوكف لاخو غير بهيج مواقف.. من نكول نكوفلك بعرسك.. هيه هاي المساعده ونجوى تستاهل..
كلت بكلبي هله هله 10 ايام طاح حظي من وره الشغل😐 بس خطيه فشلني.. بمجرد ما كام اركان..
كامن وياي علبيت.. كل وحده لزمتلها شغله.. حتى نجوى والصالون وهسوالف تكفلتها خالتي.. والاكل بيبي وهيه كاعده تسوي الاكل بس تكول حطن علنار..
صدك شالن الشغل من ضهري.. بس مرت اركان للان ما تحجي وشايله خشمها.. وتباوعلي صفح..
ندست خالتي.. اكولج خاله.. هيه مو تكرهني.. معقوله حابه تساعدني وتكابلني 10 ةيام واجت وياك..
-خب اسكتي.. هيه درت باركان عده شغل ابغداد يبوووه شيوت.. تكله اروح وياك..
يكلها ولج اني رايح شغل.. تكله ايييي ومناك تروح يم سميره وتشوفهل.. واني هنا يا غافلين الكم الله..
ما قبل ياخذها وكلبت الدنيا بالصياح والعياط.. واد يوديها لبيت اهلها زعلانه.. اخر شي.. كالتله بيبي..
عمي اخذنه وياك.. هم نوكف لرجاء بعرس بتها وهم مرتك تطمن وما تصير مشكله..
-ضحطت من كل كلبي.. ادري خاله شعندي وي اركان قابل..هاي شبيها مخبله..
-يا خاله.. هيه من يوم الدرت انتي اطلقتي من اركان غير تسودنت ويوميه عركه وياه... خبلته والله شيبت راسه..
-مشكله هاي.. خطيه.. اكول من سلمت عليه.. بس رظ السلام وطلع .. طلع خايف من مشاكلها..
-اكلج لعبة باحواله طوبه.. كناله اتزوج عليها من صدك واكسر خشمها.. واهلهت شيوخ واحدهم متوزج 3 ما يحجون وياه..
وينكسر خشمهة...-لااا خطيه خاله غير تغار عليه.. كمت اتحاشاها.. ما احجي وياها بس ويه خالتي..
واركان ابد ما اجه 4 ايام ويبات بالعتبه..اخر شي خابره بابا كاله لا والله ابو احمد البيت كله نسوان وما اريد اضايقهم
كاله ابوي صدك جذب البيت شكبره يا سيد نزعل عليك.. كاله انشالله اليوم اجيكم..
لليل الساعه 10.. كلها نامت.. بس اني كاعده اسوي عشا لاحمد ودك الباب .. صاح احمد يمكن سيد اركان اجه حجابج..
الحجاب جان علباب.. اخذته وخليته على راسي.. كعده بالاستقبال.. صاح احمد سمر جيلي العشا هنا خل ياكل وياي سيد اركان..
كلت الاكل وزيدت عليه.. لكيت احمد طلع وعلى اذنه الموبايل يخابر.. طبيت خليت الاكل وسلمت عليه اشونك اركان..
هله سمر شلونج.. هوه من عادته يباوع بوجهي يسلم وبساع يدنك.. ههههه يكول الانسان اله نضرتين الاولي اله والثانيه للشيطان..
فيستحرم يركز بوجهي.. كتله شعجب صار 4 ايام تبات بالعتبه هنا هم بيتك مو عيب احنه اهل..
كال والله ما ردت اكلفكم.. كتله شلونك شخبارك.. استحيت اعوفه كاعد وحده ابين ما يجي احمد
كعد خطيه هوه يسولفلي على شغله وبعثات من الحوزه بالنجف وهيج دنسولف واني كاعده كباله...
طبت مرته وشافتنه كاعدين سوه يبوووو هههه...يتبع