البطل المغمور "زهور القمر"

الجزء الرابع عشر1

#البطل_المغمور2  "زهور القمر"
#جمان_فريد
#الجزء_الرابع_عشر "دقات قلب1"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐
لما شافاته طاح قدامها وطلبت النجده وهي تصرخ بأعلى صوتها ماقدرتش تقعد واقفه تراجي لين يجي من يسعفه..
جاته تجري..
قعمزت ع الأرض وقعدت تفيق فيه..
نوال بقلق شديد:دكتور..دكتور هيثم....
زبطت انه فاقد الوعي تماما..
قربت منه وقعدت تشوف في تنفسه..
لاحظت انه مايتنفسش..
حطت يدها مكان النبض..وكأنه مافيش نبض..
بسرعه حطت يدها ع قلبه وقعدت ديرله في تدليك..
ع جية موظفين ومعاهم دكتور يجروا...
الدكتور؛ترا شويه لوسمحتي.
ناضت وخرت وهي تقول بصوت داهش:غيبوبة سكر...
الدكتور:بسرعه جيبوا باريلا بسرعه..
الموظفين طلعوا يجروا...
نوال:دير مساج للقلب لافي نفس ولانبض..
والدكتور يسمع في كلامها وينفذ..
لين جوهم بالباريلا يجروا..
قاموه وحطوه عليها وتحركوا بيه يجروا..
وهي طبست خدت شنطتها ولحقتهم...
🍁🍁🍁🍁
فهالوقت في حوش خالد..
خشت نسيبه عليهم وهي في حالة غير عن حالة الصدمه والألم اللي عايشين فيها..
كانت تبكي وتضحط في نفس الوقت..
نسيبه بضحكه من بين دموعها؛خليل نجح نجح...
كلهم قعدوا يشبحولها..
نسيبه وهي فرحانه اشرت بيدها اللي فيها التليفون وقالت؛توا صاحبتي اتصلت بيا..قالت نجح وجاب نسبه دخله الطب 98 في الميه ياعمتي..خليل بيخش الطب ياعمتي بيولي دكتور..
رفيق وجهاد يشبحولها بإستغراب..
بينما عفاف وتهاني ومريم يشبحولها بألم..ع بالهم المراة مش مستوعبه خبر الحكم ع راجلها..
نسيبه عقدت حواجبها وقالت:خيركم تشبحولي هكي!؟ قصدكم مافرحتوش..!؟ عمتي..نقولك خليل نجح جاب نسبه تخليه من الأوائل ع طرابلس كان مش ليبيا كلها..
رفيق:مرت خوي حالك باهي!
عفاف بألم؛نجاح شني وطب شني يابنتي شن تقولي راجلك حكموا عليه عشرين عام مازال يقرا ولايصير منه..
نسيبه جتها وقعمزت قدامها ع روس صوابعها وقالت؛ايه يقدر يقرا ياعمتي توا المحبوس يقدر يكمل قرايته وهو في الحبس عادي ويطلع يدير امتحاناته في الكليه ولاالمعهد...
رفيق؛لارسمي وضعك مش طبيعي..
هي شبحتله بحده..
ع جية سجى وفي يدها لهاية ولدها؛حبيبتي فيقي ع روحك راهم 20سنه!
مريم شبحتلها بإزدراء..
ونسيبه تجاهلتها وشبحت لعفاف وقالت:صدقيني الدعوة اللي دعيتهاله ربي استجابها..
وعفاف تشبحلها بعيون تنهمر منهم الدموع خطرها تفرح بس مش قادرة شن اللي يفرح في اللي تسمع فيه!؟
جهاد؛باهي فرضنا كملها قرايته ع قولتك شن يدير بعدين بيخدم بيها!؟
نسيبه؛ايه علاش لا حتى في الحبس يكون دكتور داخل للسجن في مستشفى ماتنساش..
عفاف قعدت تشبحلها وتفكر في حالتها...
وتهاني تقول بحسرة؛عشرين سنه بيقعد فيهم فالحبس عمر وراح..
نسيبه مسحت دموعها وقالت؛ماحد يعرف شن يصير القدام..مرات حسن السيرة والسلوك يخففوا الحكم..مرات يصير عفو..مرات يصير شي تاني مايخطرش ع البال..
رفيق:لاحول ولاقوة الابالله..
نسيبه؛قاعده بعقلي راني ماهبلتش..لكن املي بالله كبير ماوصلناش لبعض بش يحرمنا من بعض..
عفاف بدموع؛كلامك..كلامك خاطري نحس بيه كيف ماتحسي بيه..
نسيبه بإبتسامه ودموعها ينزلوا:انتي توا افرحيله..وخليه في نظرك زي ماتعرفيه..خليل مادارش اللي داره الا لأنه مجبور يحميكم خيروه بين حاجتين من بينها ارواحكم شن تتوقعوه يختار...!
جهاد قعد يشبح لنسيبه بشك وهو ساكت..
ورفيق عنده كلامها دوة فاضيه فاتها ومشي لجناحه ومرته لحقاته طول..
مريم ابتسمت وهي تسمع في كلامها وقالت؛عندها حق هو ضحى بعمره ع خاطركم..
عفاف حطت يدها ع جبهتها وقالت بألم:ااه ياخليل آااه ياولدي..كسرتني اكثر مااني مكسورة عارفني مانتحمل غيبته وغاب...ياريت اني اللي غبت ياريت..
تهاني بنبرة باكيه:بعيد السو..
نسيبه رشفت وقالت؛يدبرها ربي ياعمتي يدبرها وكلي الأمر ليه...
عفاف بألم؛حسبي الله ونعم الوكيل...
🍁🍁🍁🍁
وهي نفس العبارة يردد فيها خليل في نفسه وهو في سيارة السجن..
ماكانش يبي يفكر في اي شي..يردد في هالعبارة بقلبه..
يبي يقوي قلبه بيها...يبي يخلي يتعلق بربه ويعتمد اعتماد كلي ويطمن..ومايخشلاش مثقال ذرة من ندم...
وصلت السيارة وسط الحراسة المشدده الى سجن بوسليم..
وانفتحت البوابه...
وخشت...
وعناصر الحراسه فوق سطوح السجن يراقبوا في الوضع..
••وفي غياهب السجن داخل...
في عنبر اسمه "ب 1"
او زي مامسمينه المساجين...
"Vip"
كان موجود السجين الأخطر والمتزعم العنبر هدا...
"اسعد الكبير"..
كان مقعمز في مستراح ع العنبر ع وحده من الطاولات متاعه ويغني..
وجماعته يمسحوا في الجوخ زي مايقولوا"لقاقه"
اللي يصفق..واللي داير روحه منطرب..واللي نايض يرقص.
وحواليهم ع الطاولات التانيات..
كانوا باقي المساجين يتفرجوا...
العجيلي:شن ياكبير عندك فرح حد قريب ولاحبيب اليوم!؟
سكت الكبير واللي حواليه سكتوا وقعدوا يشبحوا للعجيلي.
بعدين قال؛ايه فرح بنتي..
العجيلي:لاعاد هادي تبيلها عبمبر وروزاطه ماديرش كيف بعض الناس ..وشبح لخالد بطرف عينه..
خالد بتهكم؛وكان قلت خاطرك فيه جبنالك..
العجيلي:خاطري فيه هي..ماسكر سبوع فرح ولادك..
خالد بضحكه ساخره؛لا لا بايخه توا..
عجيلي:والله القوي انت اللي بايخ باهي..
قعدوا يضحكوا..
الكبير بإبتسامه مكر قال: "عاد انت بالذات ياخالد مفروض اليوم توزع في العبمبر والروزاطه.."
خالد بتهكم:وعلاش ياخفيف حكموا عليك اعدام!؟
ضحكوا الموجودين..
الكبير بشماته:ولدك اللي حكموا عليه..خليل بيقعد حداك هني عشرين عام...هدا كان ماتوكلتش قبل ليكملهم...
المساجين شبحوا كلهم لخالد..
وخالد كان يشبح للكبير وهو مصدوم وعيونه فيسع غرقوا بالدموع...
🍁نزلوا خليل من السيارة هو واللي معاه...
ودخلوهم ورا بعض داخل....
خليل كان يمرر في نظره ع السجن بعدين غمض عيونه وقال بصوت هامس:يارب..
فتح عيونه وهو يسمع في واحد من الحراس..
:القدام القدام انت وياه...
بعد ماخشوا..
خشت سيارة تانيه داخل السجن..
وفتحوا بيبانها...
زبدوا ينزلوا في اللي فيها..
واللي كان من ضمنهم..زياد وفاتح..
الزوز كانوا يمرروا في انظارهم ع السجن..
منظره كان مهيب ومخيف وكأنه قلعه محصنه بشده...
خدي زياد نفس وزفر...
وفاتح كان مبتسم وهو مضيق عيونه من الشمس ومازال يمرر في نظره ع المكان وكأنه جاي سياحه..
:تحرك انت وياه..
هما شبحوا للحارس..
وبعدين قعدوا يمشوا مع البقيه لين دخلوهم داخل بش يكملوا باقي اجرائتهم..
من تفتيش..وفحوصات طبيه....
وبعد ماتمت الإجراءات عطوهم الملابس الخاصه بالسجناء..
بعد مالبسوهم..
توجهوا ليهم للعنابر متاعهم...
كانوا يخشوا من باب يطلعوا من التاني عند نهاية كل ممر..
وكان العدد ينقص لعند ماقعدوا هما الزوز برواحهم..
كانوا رافعينهم ضباط الحراسه لين وصلوا في اخر ممر انفتح الباب..
تلاقوا الثلاته قدام الباب والعناصر يرفعوا فيهم للعنبر متاعهم..
خليل:جابوك هني حتى انت!؟
زياد ابتسم بتهكم ورفع حواجبه ونزلهم..
فاتح:تعرفه.
زياد:ولد جيرانا...
فاتح شبح لخليل وقال بآبتسامه مع غمزة:حتى اني جابوني هني...فاتح..
زياد؛وخيرك تقول فيها وانت فرحان هكي...!
فاتح بضحكه:تكذبني كان قتلك تمنيت العيشه في الحبس كلها آكشن..
خليل شبحله برفعة بحواجب ..
زياد بضحكه:لا والله مصدقك...انت جريت عليها اصلا..
خليل:شكله متلف..
زياد:وبس!
فاتح بضحكه:تو تشوف كيف ندهشهم..
واحد من العناصر:كان تبي تقعد في الإنفرادي طول المده متاعك ماعندناش مشكله..
فاتح؛تي غير وسع بالك ياحكومه نستفز فيكم بس..
ضحكوا خليل وزياد...
واحد تاني:باهي امشوا وانتم ساكتين...
شبحوا لبعض..بعدين شبحوا القدام وهما شادين ضحكتهم...
وصلوا لنقطه تفصل زوز ممرات ع بعض..
العناصر اللي رافعين زياد وفاتح واحد منهم قال..
:من هني..
واللي رافع خليل؛من هني انت..
فاتح؛غير دقيقه نبي نعرف يعني علاش تفرقوا فينا تفريق ؟!
العنصر:ع حسب الجرم ومدة الحكم..انتم ليكم عنبر خاص باللي ارتكبوا نفس الجرم ومدة حبسهم تكون متقاربه...زي ماهدا حتى هو ليه عنبر خاص ومش اي عنبر..الأشد خطورة .
فاتح فتح عيونه ع وسعهم وهو يشوف لخليل..
زياد شبح لخليل وخليل بادله نفس النظره..
والزوز ابتسموا نفس الإبتسامه..جانبيه..
العناصر باصوات متقطعه:شن بديروا ميعاد..هيا انت وياه..تحركوا .
وتفرقوا...
فاتح:خطير ولد جيرانكم لهالدرجه..
زياد بإبتسامه؛فوق ماتتصور..هدا راجل عمتي..
فاتح بصدمه؛كيف كيف!!؟
ضحك زياد..
وفاتح يشبحله وهو مصدوم..
ووصلوا للعنبر متاعهم..ودخلوهم...
🍁اما خليل..
لما وصل في باب العنبر متاعه...
لقي ضابط واقف قدام الباب يبان في العقد الرابع من عمره...
كانت ملامح جاده جدا وحاده...
وقفوا بيه قدامه...
:انت خليل!؟
خليل مرر نظره عليه وهز راسه بإيجاب..
:عمر البكوش مدير السجن..
خليل رفع حواجبه وهز راسه بدون مايعلق..
عمر بصوت عالي شويه:افتحوا الباب..
وانفتح الباب...
وخش هو وياه...
كان فيه مستراح قدامه...وقدامهم بوابه مفتوحه ع زوز...
كان جاي منها صوت دوشه..وغني وتصفيق..
الحارس لما شافهم جايين صاح بصوت عالي:خلاص انت وياه...انتباه..
وعم الصمت المكان..
خش المدير وخليل معاه...
خالد لما شافه وقف في مكانه وقعد يشوفله...
وهو مرر نظره ع العنبر لين جو عيونه ع بوه...
دقات قلبه تقوت..ومع كل دقه كان يحس بوجع...
الراجل هدا اللي هو بوه..ويحبه حب جم...كبير...
بس اللي داره فيهم بني سد منيع من الجفا والنفور...
غير عيونه عنه...وخش داخل...
الحارس:الحجره رقم 14..
خليل هز راسه..ومشي طول للغرفه  اللي اشرله عليها الحارس..
والكل معاه بعيونهم..بس اكثر من ركز عليه..الكبير..
عمر:خالد..
خالد استاقظ وشبحله..
عمر:بتطلع من العنبر هدا..
خالد بصدمه؛علاش!؟
عمر؛مش من حقك تسأل...
خالد جاه وهو يترجى:افندي عمر اني مرتاح مانبي حد يحولني بالله عليك خليني هني تعودت ع العنبر هدا خلاص..
عمر:برا خود حاجتك..
خالد؛ياافندي..
عمر للمساجين:واحد منكم يطلع حوايجه من الدار..
خالد؛مش طالع من هني..
واحد من الحراس:تبي تقعد في الإنفرادي اسبوع شكلك..
العجيلي:لا انفرادي شني..اهو ماشي نجيبله حاجاته..ومشي بسرعه وهو يقول...اسمع الكلام ياخالد..
عمر للحراس؛جيبوه..
ومشي طلع..
الحراس شدو خالد وقعدوا يطلعوا فيه غصب عنه..
خالد؛خلوني هني...مانبيش نطلع..خلوني...حولوا حولوا...
وطلع غصب عنه من العنبر...
خليل في الحجرة متاعه مقعمز ع السرير...
يسمعوا في صياح بوه..ودموعه ينزلوا..
ومن قدام باب الحجرة بمسافه كان الكبير واقف يشبح للباب وع وجهه ابتسامة مكر وهو يفكر....
🍁🍁🍁🍁
تتصل ببوها اكثر من مرة من هاتفه مايردش انتابها شعور القلق..
بوها قاللها ان اليوم اخرله يوم في المصحه وانه حيروح بكري..
هي كانت ملهوفه تعرف شن صار في خوها وراجل عمتها بس توا قعدت مشغوله عليه هو بس..
اضطرت تخش داره ودور اي شي فيه رقم المصحه .
ولحسن حظها قابلوها كروت للمصحه فيها ارقامهم..
جربت تتصل بأول رقم...
وكان هالرقم رقم مكتب المدير..
اللي كيف خشله خليفه المدير الجديد ومعاه واحد من الموظفين..
بقلق كان يقول؛كلمت الاسعاف لازم يطلع بسرعه لمستشفى مايقعدش هني..
:ايه كلمتهم استاذ..
خليفه وصل في الهاتف اللي كان يرن..
قام السماعه ورد:السلام عليكم...
"وعليكم السلام..دكتور هيثم الكاتب موجود"
:من يبيه؟
"بنته"
شبح للموظف اللي قدامه بعدين قال:والله شن بنقولك الدكتور تعبان حاليا..
جاه صوتها صارخ وهي تقول:خيره شن فيه!؟
:هو توا احسن يابنتي ماتخافيش..
🍁وسارة معاش قعد فيها عقل..
لوحت تليفونها وطلعت تجري وهي مذعورة وتقول:بابا..
ونست خواتها اللي فجعتهم..
ونست نفسها اللي مشت طلعت من الحوش كله من غير حجاب لحوش خالد..
وقفت قدامه وقعدت دق عليه بقوة وهي تبكي..
انفتح الباب وكان جهاد اللي فتحه..
سارة ببكي؛بابا..عمتي وين..
جهاد خداها من يدها ودخلها طول:خشي داخل.
وسكر الباب..
جهاد بتوتر:شن صاير شن في!؟
سارة بصوت عالي:عمتي....
ع طلعة عفاف ووراها تهاني ونسيبه وين شافتها جتها تجري.
نسيبه وهي مذعورة؛خيرك شن في!؟
سارة ببكي؛بابا ياعمتي بابا..
نسيبه قلبها قريب وقف:خيره!؟
سارة بربكه وبكاء:تعبان في المصحه..في المصحه...
نسيبه خبطت بإيديها ع صدرها وقالت؛حي عليا..
عفاف بخوف:سلم ولدي برا شوفه برا...
نسيبه:استنى نمشي معاك..
سارة:حتى اني..
نسيبه؛انتي اقعدي مع خواتك..
سارة ببكي:لالا مانقدرش نموت كان قعدت ياعمتي نبي نمشي نشوفه..
عفاف:تهاني خشي جيبيلي عبايتي وعبايه لصاحبتك..
تهاني:حاضر..وخشت تجري..
عفاف جتها وهي تقول:اهدي بنتي اهدي ان شاء الله بسيطه..
وضمتها وسارة تبكي وهي تقول؛خايفه يموت كان يموت بابا حتى هو نموت وراه..
نسيبه بعصبيه وهي تبكي؛اسكتي وسكري فمك موت شني هدا!...
ع طلعة تهاني تجري ووراها مريم...
مريم:ان شاء الله لاباس عليه..
عفاف خدت العبايات عطت وحده مهم لسارة وقالت:البسي هيا..
خدت سارة العبايه وهي ترعش لبستها ولبست الوشاح وهي تقول:حيي ريحان وجنان في الحوش!
تهاني:تو نمشيلهم..
جهاد؛مريم بري معاها..
مريم؛حاضر...
🍁وطلع جهاد بأمه ونسييه وسارة للمصحه..
ومريم وتهاني مشوا لحوش هيثم وقعدوا مع البنات اللي لقوهم يبكوا وهما خايفات في الجنان..
هدوهم ودخلوهم داخل..
هدا كله ورفيق في سبات عميق..
ومرته لاهيه بالفيس ماتجيب خبر حاجه.. وحداها ولدها راقد....
🍁🍁🍁🍁
وصلوا للمركز ..
نزلوا نسيبه وسارة يجروا ووراهم وجهاد وعفاف تراجي في السيارة..
خشوا سألوا عنه...
وقالولهم نقلوه لمستشفى خاص يبعد عن المركز بمسافه مش بعيده..
وطول توجهوا للمستشفى...
ونزلوا كلهم هالمرة وخشوا داخل..
موظفة الاستعلامات:توا توا ركبوا بيه للدور التاني...
سارة ونسيبه بدون وعي يجروا جهة الدروج وركبوا بسرعه.
وجهاد وعفاف وراهم...
وصلوا الدور التاني وقعدوا يدوروا وهما مش عارفين وين يمشوا..
جهاد؛قالت اول ممر ع اليسار..
وطول وين ماقال جهاد..
وين خشوا للممر.
سارة من بعيد شافت ثريا ومعاها نوال ومعاهم راجل ماتعرفاش..خليفه...
سارة ببكي:شن صار في بابا..
ثريا وع وجهه ملامح الفجعه:ماتخافيش حبيبتي اسعفوه توا ...
نسيبه؛شن صارله بالزبط..
خليفه بأسف؛غيبوبة سكر..
سارة بفجعه؛بابا...
ونسيبه انصدمت..
نوال؛ماتخافيش بنتي تخطى الخطر...
نسيبه معاش قدرت توقف..مشت قعمزت وحطت راسها بين ايديها..
جهاد مشي وقف بعيد شويه عليهم..
وعفاف جت لسارة وخدتها في حضنها وهي تقول:خلاص بنتي خلاص..حاله باهي قالولك...
نوال قعدت تمرر في نظرها عليها من فوق لتحت..
ع طلعة الدكتور من الحجره..
كلهم تهافتوا عليه...
الدكتور:الاسعافات اللي اندارتله حرفيا انقذت حياته..
سارة زادت انفعجت ع بوها..
ونسيبه مازالت في حالة صدمه..خوها كان حيريح من بين ايديهم زي ماراحت مرته من سنة...
نوال:شن سبب الغيبوبه دكتور؟
الدكتور:انخفاض السكر...الباين ان الدكتور نفسيته كانت تاعبه الفترة اللي فاتت..
نسيبه طول حملت روحها الذنب..
بعدت عنهم وهي تبكي..وعفاف تلحق فيها بعيونها بنظرات حزن..
سارة رشفت و قالت:وتوا شن وضعه دكتور!؟
الدكتور:مستقر..عناية الله ومن ثم الاسعافات الأوليه نجوه من موت محقق..
خليفه؛استاذة نوال هي اول من اسعفه..
شبحولها..
نوال؛نعرف ان عنده السكر ولما طاح قدامي توقعتها تكون غيبوبه وبعدين تأكدت منها ...
الدكتور:عندك خبره...
نوال:زوجي السابق كان مريض سكر...
الدكتور:كويس ربي جابك في طريقه..
نوال حست بشعور حلو لما سمعت شن قال الدكتور..
وثريا وعفاف مركزات معاها..
سارة بإمتنان:شكرا شكرا هلبه جزاك الله خيرا..
ابتسمت نوال...
الدكتور؛اليوم ممنوع يخش عليه اي حد يشوفه..يعني وجودهم مالاش اي داعي..
سارة؛مانقدرش نروح من غيره..
الدكتور؛مقدر اللي تحسي بيه بس وجودك هني ماينفع بشي ممنوع حتى الفراق ومش حيطلع لااليوم ولاغدوة...
عفاف:خلاص بنتي روحي معانا واقعدوا معانا هالايامات لين يطلع...
نسيبه مسحت دموعها وولتلهم وهي تقول؛اسمعي الكلام سارة حبيبتي..
سارة بقلة حيله؛حاضر...
الدكتور:ان شاء الله لاباس...
نسيبه وسارة بأصوات متقطعه؛لايوريك باس..
الدكتور مشي ع حاله ونسيبه شبحت لنوال وخليفه وقالت؛بارك الله فيكم..
خليفه؛هدا واجبنا اختي..
هزت نسيبه راسها وقالت لعفاف وسارة؛هيا..
عفاف وهي محاوطه سارة من كتافها؛هيا بنتي..
ومشوا مع بعض ونوال تشبح لعفاف وهي مضيقة عيونها.
وتفكرت جزء من حديث دار بينها وبين هيثم...
《 مافيش مبرر والله مافي...لأن شفت نموذج تاني عاش نفس حالتك مراة مستواها التعليمي ماتعداش الإعداديه تزوجت في عمر صغير وعانت معاناه ربي عالم بيها...راجلها تاجر مخدرات وولادها مشوا في طريقه قعدت عمر وهي تحارب بش تحافظ ع بنتها وتحاول في راجلها وولادها بش يرجعوا من الطريق اللي مشوا فيه..والله سبحانه وتعالي كفائها ع صبرها وردلها ولادها ..برغم طلاقها من بوهم بس مازالت تكافح لعند هاللحظه بش يقعدوا مع بعض تحت جناحها هي..انتي المتعلمه صاحبة المكانة الاجتماعيه الرفيعه ماتقدريش ديري ربع اللي داراته..》
رمشت عيونها بسرعه ورفعت حاجبها..
خليفه:كان الله في عونه اللي صار معاه الفترة الأخيره سببله ضغط نفسي كبير..
نوال:علاش شن صار معاه؟
خليفه؛اخته اللي توا كيف عرسلها راجلها انحبس بتهمة تجارة وتهريب المخدرات..
ثريا حطت يدها ع فمها وهي مصدومه..
ونوال عقدت حواجبها بضيق..
خليفه:مانعرفش اكثر من هكي بس واضح انه في مشاكل صايرة من ورا  هالمصيبه..اخته توا شفتوها جايه مع اهل زوجها..
ثريا:ايه نعرفها...يعني في خلافات بينها وبين خوها..
خليفه:هكي نقول لان الفترة الاخيره كانوا خلوقه في خشمه ومايتحاكاش بكل...
ثريا:حتى حبسة زياد زاداته الدكتور متعلق بصغاره هلبه يرعش عليهم رعيش..
نوال وهي تسمع فيها تفكرت كيف كان يشوف لزياد وهو يودع فيه...
تنهد خليفه وقال؛ربي يفرج ع عباده..اني لازم نمشي توا..
ثريا:اني ساعه وجايه..
هز راسه وقال؛السلام عليكم...
ومشي..
وهما ردوا عليه بعدين ثريا قالت؛هيا..
نوال شبحت لباب الحجرة بعدين شبحت القدام وقالت؛هيا..
ومشوا هما الزوز مع بعض..
نوال؛المراة اللي عيونها ملونه شكلها جارتهم..
ثريا؛كان عزوزة اخته معناها جارتهم لان راجل اخته جارهم في الأصل..
نوال هزت راسها وهي مضايقه وقعدت ساكته..
وثريا ركزت عليها وكانت تشبحلها بإبتسامه...
🍁🍁🍁🍁
"بتنتلف اليوم تلفة"
دانيه؛وبوك بيقعد يسحن في امك وخلاص..
رتاج؛مجاهد قال بيحطك في الجامع ويوليله يطلعه..
دانيه؛ياناري عليه وخيي انهد هد معاش لقي وقت لراحته..اه لو نقدر ندير باص للجامع حتى هو..
رتاج؛كان لقيتي قوليلي اني ندفعلك اشتراكك.
دانيه بإبتسامة؛تسلميلي ياربي..يييه..ذكرتيني خل نكلم سارة ونأكد عليها..
قامت تليفونها واتصلت بيها...
🍁التليفون كان يرن في يد ريحان..
اللي كانت في شقة عمتها مع خواتها..
ريحان؛سارة تليفونك..
طلعت سارة بسرعة من الحمام وجتها تجري..
خداته وشافت المتصل تنهدت وردت..
سارة:السلام عليكم..
"وعليكم السلام سرو شن جو"
سارة بحزن؛مش باهي بكل يادانيه.
"علاش ان شاء الله خير!'
سارة بنبرة باكيه؛قريب فقدت بابا ياسارة قريب فقدته زي ماما..
ع جية نسيبه شافت التوأم كيف انفجعوا لما سمعوا كلامها..
نسيببه بعصبيه؛سارة خيرك هكي!
وخدت البنات الزوز وقالت؛تعالوا معاي نديروا عصير مانجا..
سارة قعدت تشبحلهم بحزن.
ريحان؛خيره بابا!؟
نسيبه؛ماخيره شي غير سافر بيقعد ايام ويروح..
"لاحول ولاقوة الا بالله خيره ياسارة!"
سارة ودموعها ينزلوا:غيبوبة سكر...
وحكت سارة بإختصار اللي صار ونهت المكالمه مع دانيه اللي وجعتها صاحبتها وبوها..
وفي نفس الوقت خوفتها حكاية الغيبوبه وذكرتها بخطورة مرضها اللي تحاول تتعايش معاه وماتخليشي عائق ليها في حياتها..
🍁🍁🍁🍁
الساعه 8:30 مساءا..
في الطريق..
مقبوله:انت افتكيت منها احمد ربك..طلعت مريضه سكر..
خوها بصدمه:كيف!!؟
مقبوله:ايه هدا علاش البنت سكرت الموضوع...
:وباهي كيف انخطبت توا..
وحده من خواته:مرات اشبح شن دعوته هدا اللي خداها اكيد عنده عيب بش رضي بيها..
مقبوله؛وارد جدا...المهم انت توا فكر في خطيبتك اللي بعد كم شهر بتولي مرتك بنيه ماشاء الله عليها تو غدوة تجي تشكرنا ...
هو تنهد وقعد ساكت..
وهما سكتوا وكملوا طريقهم لحوش اهل خطيبته اللي رافعينلها التلبيسه...
وغادي كانوا زي الفراشات الملونه قمه في الذوق والأدب والدين واللي هدا حسد البنيه عليهم...
ولما روحوا..
في الطريق..
خوها؛جبتوا معاكم عشاي..
هما انطمسوا وقعدوا ساكتات..
هو :اووي..مالا ماعطوكمش حصتي..
مقبوله:بعتوا حصتك من الطورطه..
:الطورطه! هادي اني جايبها...
صمت تام..
هو ضحك بتهكم وقال:تمام تمام...
وحرق عجل السيارة وقعد يسوق بسرعه..
وخواته يتعايطوا في السيارة..
مقبوله:اشهد ان لاإله إلا الله..وأشهد ان محمد رسول الله..
مش هكي ياوخيي حرام عليك..
:وخيي بنموت راني هدي شويه..
وهو ولاع باله حرقاته كيف ماحسبوشي في العشي..
مقبوله:الله المستعان الله المستعان..
وتخطى مطب..
مقبوله وصلت لسقف السيارة وهي تعيط :الله المستعاااان..
وماوصلوا للحوش والا وهما شبه ميتات..
:وووك عليا خالي قريب جلطني..
:كله من هالعيله الركايك هادم كيف مايحسبوشي في صونيه الناس اللي تعرف الاصول يحسبوا جتى بوي..
مقبوله:اسكتي وفكينا حني ماصدقنا نلايموه عليها...
سكتوا وهما يحولوا في ملاياتهم..
شويه وقالت؛خويله بعدين بنهدرز عليك باهي..
مقبوله بإبتسامة؛ان شاء الله..
وام البنت قعدت تشبحلها..
شويه ودق باب الدار..
مقبوله؛مني..
"اني"
مقبوله:خشي ياإيمان..
انفتح الباب وبانت ايمان وهي تقول:مقبوله نبيك في موضوع ضروري..
مقبوله وخواتها قعدوا يشبحولها..
بعدين قالت مقبوله؛باهي هي..ومشت طلعت معاها..
بنت اختها؛مبردها مش وقتها بكل..
امها:وفي شن تبيها خالتك انتي..
:خلي البنت منها لخالتها اطلعي منها انتي..
ضحكوا خواتها وهي قلبت وجهها عنها وقعدت تبدل في حوايجها وهي تضحك..
🍁برا..
مقبوله:يا ايمان ياايمان اكثر من مرة نقولك راهو الوسواس بيخرب عليك انتي مابتيش تسمعي خلتيه ينفر منك..
ايمان؛باهي ياوخيتي شوري عليا شن ندير..
مقبوله:خليك دوري في رضاه حتى  لو ردك تحملي معليشي..راهو الرسول قال بمامعناه لو نقدر نأمر حد يسجد لحد لغير الله لأمرت المرأة تسجد لزوجها..احتسبي الاجر واصبري..
تنهدت ايمان وقالت؛ان شاء الله..
🍁والزوج اللي مفروض تبجله ايمان لدرجة السجود مقعمز ورا شاشه تليفونه ويرتكب في الفاحشه اللي تسبق كل الفواحش في القذارة وعظم الإثم🍁
🍁🍁🍁🍁
في السجن...
طلع من داره اللي كان حابس روحه فيها من اول ماجي..
وقعد بيمشي بطريقه لواحد من الحرس..
وعيون واحد من جماعة الكبير معاه..
وعيون تانيه....
خليل؛في مسؤول ع العنبر هو؟
الحارس:ايه شن تبي فيه..
خليل؛حاجه بيني وبينه..
الحارس قعد يشبحله شويه بعدين شبح لزملائه..
كلهم شبحوله وهزوا روسهم..
وهو خدي خليل ومشي طلع بيه من العنبر..
اللي كان يراقب فيه من جماعة الكبير مشي خشله للحجرة متاعه وقاله؛طلع مع واحد الحراسات..
اسعد وهو يدخن:امم...تمام خلوا عيونكم عليه اتفه شي يصير معاه نبي نعرفه..
:تم ياراس...
•••••••
خليل؛مكالمة ضروريه..
مسؤول العنبر ب1:قتلك غدوة في ساعه معينه هدا النظام هني وماشي ع الجميع مافيش محاباة لحد..
خليل هز راسه بعدين قال؛تمام..اخر سؤال..هني المصلى يقعظ مفتوح 24ساعه؟
:لا في اوقات الصلوات فقط..
خليل هز راسه والتفت للحرس ومدله ذراعه..
الحارس خداه ومشي بيرده للعنبر..
؛تو انت منك جد تصلي..
خليل؛لابصارة..
ضحك وقال؛مافيش واحد في عنبر ب1 جي جهة المصلى ماعدا خالد وخالد غيروله العنبر متاعه توا..
خليل قعد ساكت ماباش يعلق والحارس كذلك فضل السكوت..
دخله للعنبر..
ومشي طول لغرفته..
فتح الباب وخش وسكره..
مجرد ماسكره طلعله من وراه واحد سكره فمه وحطه ع الحيط..
وخليل يفنص فيه..
قاله بصوت هامس؛مبروك النجاح...
خليل اندهش..
نزل الشخص يده وقال؛معلومه وقالولي نوصلهالك..غمزله..
ومشي للباب فتحه وطلع...
وخليل مازال مندهش ع فرحان...
شويه وسمع صوت دوشه برا..
"تي واحد معقد ومتخلف ياراجل"
"انت علاش خاشله..تستاهل"..
ضحك بعدين مشي وقف ع المرايه الموجوده في حجرته...
في غياهب السجن المظلم..
كان حاس بفرحه مدايره حواليه هالة من نور...وكأنه في يد خفيه قاعده تمسح في حزنه بالفرح..وتقويه وتقوله كمل اني معاك...
وهاليد الخفيه معروفه اللي زي خليل يعرفوها كويس...
🍁وبرا هالعنبر...
في عنبر تاني...ب2..
كانوا الشباب سهرانين مع زملائهم فيه يتعارفوا..
:سراج الشكشوكي..القضيه متاعي القتل الغير العمد مدة الحبس متاعي 10سنين قضيت منهم 7..
فاتح بضحكه:تطلع معانا انت..
ضحك زياد..
؛واني مراد جمعه تعاركت اني ولد جيرانا ضربتله ودرتله عاهه في يده..مده الحبس 7سنوات..عديت منهم سنه وسته شهور..
فاتح؛نقدر نعرف علاش!؟
مراد؛لا..
فاتح بضحكه؛ok'وانت..؟
:وائل سويدان بالغلط والله بالغلط حدفت رشاده برا سور جت في احد بس الحمد لله ماقتلاتاش لكن هو سكر راسه ياخد حقه مني حبسوني 3سنين معدي منهم 5شهور لتوا..
زياد؛كيف عديتوا الايام هني قولولي..
مراد :في الاول تتعب بعدين تتعود..
زياد؛تتغير ولالا؟
سراج؛طبعا تتعلم المكان يعلمك هلبه حاجات واولهم ان حريتك مالهاش ثمن ومايعوضك عنها شي..تعرف في السجن القديم عشنا ايام مانبيش نحكيلك عنها ولانبي نذكرها...في اللي مات فالحبس من اللي يصير فيه..كان غابه بمعنى الكلمه..
بس السنتين الاخيرات تغيرت هلبه حاجات وجية وزير العدل الجديد قلبت حياتنا في الحبس قلب واخر شي دارلنا سجن يليق بالبشر وخلا مسؤوليته لناس تستاهل..عندك علم في ناس هني ارتكبت تجاوزات كبيره حاكموهم تاني وخلوا العقوبه الإعدام وعدموهم..
فاتح؛ماهو في ناس مايفرقش معاها برا الحبس ولاداخله مافي شي يردعهم هادو يستاهلوا الاعدام..
وائل:صح...
زياد مرر نظره ع العنبر وقال؛في معاكم راجل يبان من هيئته ملتزم..
سراج؛الشيخ عقيل الله يفتح عليه مهون علينا هلبه الراجل هدا..
فاتح؛الشيخ شن يجيبه للحبس!؟
مراد؛قصته قصه..هو محكوم مؤبد راهو..
تفاجئوا زياد وفاتح..
مراد؛قاتل واحد..بس يعني دفاعا عن ارضه وملكه..قالوا في المحكمة هو اللي دافع ع روحه وقال كلام خلا القاضي يغير الحكم من اعدام لمؤبد..
فاتح؛قداش ليه محبوس؟
مراد؛عشرة سنوات..
فاتح رفع حواجبه..
وزياد شبح جيهته وشافه كيف يحكي مع خالد..ابتسم..
🍁عقيل؛مايقدروا يديروله شي السجن مش فوضى..
خالد وهو حاط ايديه ع راسه قال:اني ياشيخ نبي نعرف شن دار كيف وصل هني..علاش حكموا عليه نفس المده اللي حكموا بيها عليا...اني ضحيت وحطيت كل شي ع كتافي بش  مايوصل فيهم حد ويكملوا حياتهم بشرف...ماصدقت تهنيت عليهم اللي هدا دار عيله خلاص حطوا عقولهم في رووسهم ومش حيغلطوا غلطتي..طلع اللي فكرت فيه كله زي الحلم فقت منه ع كابوس ياشيخ..علاش هكي صار علاش..وخبط راسه بإيديه..
عقيل؛لالالا تعوذ من الشيطان ياخالد واذكر الله وغدوة ان شاء الله لما نطلعوا للساحه تتلاقى انت وياه وتفهم منه..
خدي خالد نفس عميق بعدين قال؛إن شاء الله إن شاء الله..
وعقيل قعد يطبطب عليه بش يخفف عنه...
ومافي الا ساعه..
وسكروا الضي كله..
والمساجين كل واحد خش لداره بش يرقد..
واول ليله ديما صعبه..كل من يتغير عليه مكانه وفراشه اول يوم صعب عليه النوم...
يبي وقت بش يتأقلم ويتكيف مع الوضع والمكان الجديدين..
يابال لو كان هالمكان الجديد..السجن..
اللي يعتبر عالم تاني غير عن العالم اللي برا..عالم فيه الخوف اكبر..والخطر اكثر.....
هدا حال خليل وزياد وفاتح...
وحال احبابهم...اللي مابطلوش تفكير فيهم وتخميم في حالهم...
عفاف ونوال...الأمهات....
نسيبه الزوجه..
تهاني وسارة الأخوات...
جهاد ورفيق الخوت...
بس في من همه اضعاف...
زي سارة اللي ماقدرتش ترقد غمضه وهي تفكر في بوها خايفه تفيق ع خبر يفجعها...
ونسيبه حالها مازال اسوء لانها حاسه اتجاه خوها بالذنب ولو صارت فيه حاجه ماكانتش حتسامح روحها نهائي...
ااخ..ويامصعبها من ليله..
بس يامحلاها من ليله ع رفيق..
البنت اللي يحبها قريبه عليه هلبه..بتقعد ايام قريبه عليه..
بيتصبح ويتمسى فيها وممكن يحصل فرصه معاها....
🍁وطلعت شمس اليوم التالي...
نزلوا البنات مع عمتهم لوطا بش يفطروا جميع...
••عفاف بإبتسامه؛مرحبتين مرحبتين بالحلوين..تعالوا قعمزوا حداي..
جوها قعمزوا حداها عن يمينها ويسارها..
وسارة تشوفلهم بإبتسامه باهته..
مريم:هي ابدوا..هي ابدي نوسه ابدوا يابنات..
نسيبه؛ماعندي نيه حتى فالعسل..
مريم؛حتى كان مافيش نيه لازم تاكل بش تقعدي واقفه ع رجليك وتقاومي تبي حتى لاقدر الله يصير فيك شي..
عفاف:بعيد وبر..
مريم؛كولي نوسه كولي كولي بش تقاومي ع خاطرهم..
يدوب ابتسمت نسيبه وبدت تاكل..
وسارة وتهاني بدوا ياكلوا..
ع جية رفيق ووراه سجى..
لما شاف سارة قلبه طار من مكانه..
تلخبط فيه كل شي..حتى انفاسه كانت مرتبكه..
قال وابتسامة عريضه ع وجهه؛صباح الخير..
سارة دارت روحها لهت في فطورها ومابتش ترد..
والباقي ردوا عليه..وسجى تشبحله من فوق لتحت..
رفيق:بالك تبوا حاجه محتاجين حاجه..
مريم شبحت لرفيق وركزت ع حالته وشبحت لسارة وفهمت كل شي..
عفاف:سلامتك ولدي..
هو تنهد وقال؛باهي...كان احتجتوا حاجه ولاتبوني نوصلكم المستشفى اني حاضر..
نسيبه:صحيت بارك الله فيك..
ورفيق متأمل من سارة نظرة وهي ماتبيش تقيم عيونها نهائي..
تهاني وهي تشوف لسارة:فطرت..
رفيق:ايه الحمد لله..
عفاف:باهي توكل سلم ولدي ربي يفتحها عليك..
رفيق وهو يشوف لسارة؛آمين يام آمين..
ومشي  من حداهم بالسيف..
سجى حطت شنطة العيل ع المندار ومشت لحقاته..
شداته من تيشرته وقالت؛حتى لوجهك ماتبيش تشبح يامهزب.
التفت عليها جي بيضربها بقفى ايده ع طلعة جهاد من دار الدروج..
جهاد؛خير دعوتك انت وياها ع الصبح..
رفيق نزل يده ولبس في رجليه ومشي بسرعه..
وسجى مشت خشت داخل وهي معصبه..
تنهد جهاد بملل ووقف في الباب وبدي ينادي؛مريومه...مريومه...
 🍁عفاف:نوضي لراجلك نوضي..
مريم؛هي..
ومشت تجري..
عفاف ضحكت غصب عنها وقالت:ديما تجري وتنقز ماشاء الله عليها..
ضحكت تهاني..
ونسيبه وسارة يدوب ابتسموا..
وسجى تاكل من برا في الفطور ومن داخل في روحها...
🍁برا..
مريم ؛نعم جوجو..
جهاد ضيق عيونه وهو يقول:شنو!؟
مريم بضحكه:بيني وبينك مايسمع فينا حد..
جهاد:حتى بيني وبينك لا هدا اللي ناقص..
مريم برفعة حاجب:اني ندلع في راجلي انت شن دخلك!
جهاد بضحكه؛خودي ياعزوزة خودي هدا مفتاح سيارة خليل عطيه لمرت خوي..
مريم بإبتسامه؛باهي..وخدت المفتاح..
جهاد عقد حواجبه وقال بإبتسامه:قاعد في ميلكا؟
مريم:ايه بس حليب السعوديه تم..
جهاد قرص انفها وقال:نجيبولك ياعزوزة..
وغمزلها ومشي للباب...
وهي معاه بعيونها وقلبها من قوة دقاته كان يبي يلحقه..
طلع من الحوش...
وهي تتمنى لو قدرت توقفه وتبوحله بكل شي مدسوس في قلبها...
الشعور اللي بسرعه انزرع فيها وكبر اتجاهه..
كان صعب عليها تبوح بيه..صعب..بل شبه مستحيل..
حبست دموعها وخشت داخل...
🍁🍁🍁🍁
في غرفه غالب عليها اللون الأبيض..
كان راقد...غايب عن الدنيا....لساعات...
وفهاللحظه بس فاق..
فتح عيونه شويه شويه..كانت الرؤية ضبابيه في البدايه بعدين بدت تتوضح...
سقف...حيوط...سيروم معلق....وكراسي..
غمض عيونه ورجع فتحهم وقال في نفسه..
"قاعد من أهل الدنيا"...
فجأة انفتح باب الحجره..
وخشت بنيه جميله لابسه بالطو ابيض..
ملامحها يعرفهم ..وين قربت زبطها..
قالتلك بإبتسامه؛حمد لله ع سلامتك دكتور..
هيثم بصوت يدوب طالع:الله يسلمك..
رنيم؛هاه شن الأخبار توا؟
هيثم؛الحمد لله..
رنيم:الحمد لله دائما وابدا..
هيثم:مافي حد؟
رنيم:كان ع اهلك اكيد ع جية..
هيثم هز راسه وقعد ساكت..
ابتسمت رنيم وبدت دير في تشك ع حالته..
هيثم:انتي شن دايرة؟
رنيم بإبتسامه؛اني الحمد لله كويسه وكل يوم قاعده تولي احسن..
هيثم يدوب ابتسم وقال:الحمد لله..
رنيم؛الحمد لله الامور كلها تمام...طهور ان شاء الله دكتور..
ابتسملها...
ابتسمت رنيم ومشت طلعت برا الغرفه وين سكرت الباب والتفتت انفجعت..
احسان شد ضحكته وقال:صباح الخير..
هي مابتش ترد ومشت وخلاته..
ضحك وحرك راسه يمين ويسار بعدين فتح باب وخش..
احسان؛ياراجل شن الحاله هادي ديما وانت مرعشنا ..
هيثم يدوب ابتسم..
احسان قرب الكرسي وقعمز؛لاالحمد لله حالك احسن.
هيثم؛الحمد لله..بناتي..
احسان حرك عيونه وهو يفكر قال؛تقريبا في حوش جيرانكم..
وعقد حواجبه وهو يهز في راسه..
هيثم بدت عليه ملامح الاستياء..
احسان غير الموضوع وقال:ايه زياد اموره كلها تمام وصيت عليه جماعه نعرفهم داخل..
هيثم ابتسم وهز راسه بإرتياح...
🍁🍁🍁🍁
فهالوقت..
في ساحة السجن...
طلعوا السجناء وتلاقوا في ساحه وحده تحت حراسه مشدده...
زياد؛خطرت عليا ساحة المدرسه..
مراد؛كرة الطايرة..
زياد بضحكه:الله ايام..
فاتح؛ماقريناش في مدارس حكوميه مع الأسف..
سراج بضحكه:علاش انت تعليمك في الانترناشونال..
ضحكوا صحابهم..
زياد؛ايه قري في مدارس دوليه..
شبحوله وهما متفاجئين..
وائل:مش باين عليك تصدق..
قعمز فاتح فوق الماده وقال؛احسن..
قعمزوا حدا بعض..
وزياد عيونه جو ع خالد قعد يتبع فيه لين وصل في خليل اللي كان مقعمز تحت شجره..
🍁خالد؛ماتبيش تسلم ع بوك..
خليل تجاهله وماباش يشبحله..
وعيون الشيخ...والكبير...والعجيلي..وزياد عليهم..
خالد؛خليل...نكلم فيك اشبحلي..
خليل ناض وجي بيمشي..
بوه شده من ذراعه وقال؛من امتى تتعامل معاي هكي انت؟!جافيتني ونسيتني..نسيت بوك..لاعاد اتصلت ولاعاد جيت..خطبت وتزوجت واني نسمع من برا البراني..لهالدرجة معاش ولت ليا قيمه عندكم!؟
خليل شبح لذراعه شويه بعدين نفضها ومشي وخلاه..
خالد قعد يلحق فيه بعيونه المليانات دموع..
ومن يهمهم الامر قاعدين يراقبوا في المشهد..
خالد غير عيونه عنه وشبح لعقيل..
عقيل غمض عيونه وفتحهم بمعنى..معليشي..
خالد تنهد بألم..وقعمز تحت الشجره..
الكبير شبح للشيخ وقال:شيخ عقيل...
عقيل بنفاذ صبر:والعياذ بالله..
الكبير بضحكه؛تو شن حكم اللي يدير زي ولد خالد...
عقيل بتهكم؛الشيطان مايستفتيش لأنه عارف كل شي...
ورجع يقرا في الكتاب..
الكبير قعد يضحك وجماعته يضحكوا معاه..
🍁العجيلي؛يوم من الايام بتصير بيناتهم طحنه فهالساحه وقولوا ماقالها بورا..
؛ومن تتوقع يغلب..
العجيلي؛والله يامينتا شن بنقولك..الزوز دراهيب والزوز كرشاهم قدامهم تقول حامل خشت شهرها وكان جينا بنحزوا...نتوقع تكون النهايه بولينغ والله اعلم..
قعدوا يضحكوا..
خليل قعمز ع كرسي وهو يشوف للعجيبلي ويضحك..
حداه زياد قال؛جو  عليه طريقة كلامه بروحها كوميديا..
فاتح؛تقريبا عجيلي..
مراد؛لاياشيخ ماسمعتهمش ينادوا فيه!؟
فاتح؛قسما بربي ماسمعت..لكن عندي اصحاب عجيليه نزبط دوتهم..
خليل شبح لفاتح وابتسم ع جنب...
🍁🍁🍁🍁
وصلوا الزوز للحجره متاعه..
سارة؛خليك هني عمتي..
نسيبه قعدت تشبحلها بإستغراب..
سارة بضيق؛سامحيني لكن مرات لو شافك ينفعل او يتعب سامحيني عمتي..
نسيبه بحزن هزت راسها وقالت بحزن؛عندك حق..خشي.
سارة فتحت الباب وخشت وخلت عمتها وراها تذرف في الدموع..
🍁سارة لما شافت بوها مقعمز وحاله باهي ماقدرتش تتمالك نفسها وجاته طول ارتمت في حضنه وهي تبكي:بابا قريب متت من خوفي عليك..
هو ضمها وباس راسها وقال:ماتبكيش بابا حالي باهي..
سارة بعد وشبحتله وهي تقول؛علاش تكمد في نفسك علاش تعال احكيلي فضفضلي بابا راهو معاش صغيره نفهم ونعرف كل شي..
هو ابتسم وقال؛عارف بابا عارف...
رشفت وقالت؛خلاص في الجديد اي شي يصير معاك اي شي تحس بيه تعالى احكيلي..
ضحك وقال:حاضر..
هي باست يده وحطتها ع خدها وغمضت عيونها وهي تقول..الدنيا من غيرك ماينعاشش فيها بابا..
هيثم:حبيبتي..سارة..الدنيا ينعاش فيها بيا ومن غيري ماتوقفش ع حد..
سارة شدت يده وقالت بإنزعاج؛ارجوك بابا مانبيش نسمع دوة زي هادي خلاص...
ضحك وقال؛باهي شن حال خواتك..
سارة؛كويسات..
هيثم؛وين انتم بابا..
سارة هربت بعيونها عنه وماقدرتش تجاوبه..
هيثم؛تو نكلم عمك عبد الله"ولد خاله" يرفعكم لحوشه.
سارة؛لالا بابا مش حنرتاحوا غادي.. مرته ماتحبش دوشة الصغار..
هيثم؛غادي ماتقعدوش..
سارة؛باهي كيف نديروا..
هيثم تنهد وقعد ساكت..
سارة؛هما هالكم يوم يابابا لين تطلع بالسلامه ان شاء الله..
هيثم هز راسه وقال:الامر لله...لكن ردو بالكم..
سارة؛طمن بابا...احمم..بابا...عمتي برا تبي تشوفك..
هيثم؛واني مانبيش نشوقها..
سارة:ع راحتك اللي تبيه يصير..
فجأة انفتح الباب وخشت ماجده وهي تبكي:هيثم وليدي..
ومشتله تجري وخلت الباب مفتوح..
قعدت نسيبه تشبح لخوها بلهفه وشوق..
وماجده تحضن فيه وتبوس ع راسه..وهو يكلم فيها ويضحك..
شويه جت سارة للباب و قالت وهي مضايقع بحركة الشفايف:آسفه...وسكرت الباب...
نسيبه فهمت ان خوها مايبيش يشوفها..
مشت طول وهي تحاول تقاوم ملامح البكاء بس غلبتها ومجرد ماوصلت برا المستشفى قعمزت في تركينه مستخطيه وانهارت بالبكي...
وقعد تبكي  لين طاب مافي خاطرها..
بعدين اتصلت بيها ساره وقالت انها حتقعد مع بوها مرافق..
وهي بعد مكالمة بنت خوها ركبت سيارة راجلها وطلعت برا المستشفى...
🍁🍁🍁🍁
سارة:قالوا طاح مغمى عليه في المصحه..
هيثم؛مذكر الحاجه هادي بس بعدها معاش حسيت بشي..
ماجده؛ياروحي..ديما نقولك رد بالك هدا سكر مش حاجه ساهله..ايه باهي وبعدين..
سارة؛وقتها كانت استاذة نوال موجوده..
هيثم توا بس اذكر انها كانت اخر من شاف قبل ليفقد الوعي..
ماجده؛هادي ام فاتح..
سارة بشي من الإزدراء:ايه..المهم..هي اللي اسعفاته وعرفت انه داخل كومه..دراتله مساج القلب قبل ليكملوا اسعافه الدكاترة..
هيثم انصدم لما تخيل الموقف وحس بشي من الأحراج..
ماجده؛ربي يحفظها وينجيها ويعليها ياوخيتي محلاها..
سارة بضحكه؛وهدا اللي صار..
ماجده شبحتله وقالت:والله مفروض نذبحوا ونصدقوا..
هيثم ابتسم وقال؛إن شاء الله...
ماجده:باهي وين قاعدين انتم توا..
سارة بضيق؛في شقة عمتي..
ماجده شبحت لهيثم وقالت؛احسن واني قاعده في حوش عبدالله لين تطلع ان شاء الله..
هيثم؛ماتغير شي خالتي..
ماجده.بإبتسامه؛عارفه راسك كاسح..حاضر اللي تبيه يصير..
هيثم تنهد وقعد ساكت...
وبعد ماروحت ماجده انتهي وقت الزيارة..
وهيثم ولى رقد..وسارة حداه تقرا في القرآن...
ومرت الساعات لين جي وقت الزيارة التاني..
وجوه فيها خليفه وثريا وزوز اطباء يخدموا في المركز..
ماطولوش يدوب اطمنوا عليه وطلعوا...
وسارة فهالوقت...
كانت في الكافتيريا تشري في حاجه تاكلها...
🍁وعليها الحديث يدور في حوش خالد..
في الكوجينه؛سارة تقدر دير بالها عليه تعامل فيه زي ولدها مرات..
مريم ابتسمت وقالت؛تبان اكبر من عمرها سارة.
نسيبه بإبتسامه؛نسخه امها الله يرحمها الا في طبعين
العناد...وشوفة النفس..شويه عندها وهالزوز فيهم زي خوي..
مريم بإبتسامه؛ربي يحفظها..
وحديثهم هدا يسمع فيه رفيق من حدا الكوجينه...
لما عرف ان سارة قاعده بروحها في المستشفى قال لنفسه يستغل الفرصه وشغل سيارته وتوجه للمستشفى..
🍁🍁🍁
سارة كملت ماكلتها ومشت بتولي لحجرة بوها..
ركبت الدروج وخشت للممر اللي فيه الغرفه..
وقعدت تمشي لين وقفت فجأة..
قلبها كاد يفر ويطير لما شافه واقف قدامه..
ابتسم هديكا الابتسامه الخجوله وقال بدون مايشوفلها؛حمد لله ع سلامة الوالد..
سارة وعيونها لوطا:الله يسلمك..
هو شبحلها بعدين شبح للكراسي وقال:ممكن تقعمزي شويه مش واخد من وقتك اكثر من خمسه دقايق..
سارة انصدمت فيه وقعدت ترجف مع بعضها..
مجاهد؛كلام مهم وضروري..
سارة خدت نفس بعدين مشت قعمزت..
وهو قعمز جنبها بكرسيين..
وكل حد فيهم عيونه قدامه..
مجاهد خدي نفس وقال؛سارة...اني انسان جدي ماعنديش في اللف والدوران ولانحبهم...اني يابنت معجب بيك ورايدك...
سارة قريب ذوب من الخجل وخايفاته يسمع دقات قلبها من قوتهم..
مجاهد؛اني بنطلبك من الوالد..
توسعوا عيونها ع الآخر بدهشه..
مجاهد؛توا خطوبه بس..وبعد تطلعي من الثانوي الزواج ان شاء الله ونعطيك وعد مني ربي شاهد عليه نساعدك تكملي قرايتك وتتخرجي..
شبحلها..
هي شبحتله بعدين نزلت عيونها وقالت بإبتسامه خجل:الصراحه...فاجئتني هلبه..
هو ضحك وقال؛عارف...بعدين ابتسم وقال...ليس بيني وبين الهوى شأن ولاعدواة،انما حفظت قلبي لحلال يحبه الله فيحببني فيه..
سارة بإبتسامه؛الرافعي..
ابتسم وقال:سارة خودي وقتك وفكري والرد نراجي يجيني مع اختي دانيه..
سارة هزت راسها وهي ساكته..
هو ناض وقال:اسف ع الموقف اللي حطيتك فيه..مجبور...السلام عليكم..
ومشي بدون ماترد عليه سارة اللي قعدت تلحق في عيونها وحست روحها مشت معاه..
حطت يدها ع فمها وضحكت بعدين مشت غرفة بوها...
🍁وماكانتش تعرف ان عيون رفيق اللي تعشقها لحد الجنون شافت اللقاء اللي جمعها بغريمه وخلت قلبه عليه دم وداخله يتعبى عليه غل وحقد...
🍁🍁🍁🍁
"لاانت ولاهو ليا اني"..
:عليك ثقه عندك..
فاتح وهو واقف فوق طاوله في العنبر متاعهم؛انتم جربوني وشوفوني شن ندير..
زياد بضحكه؛جربوه ماتخسروا شي..
عقيل:لاياولدي نخسروا زاد الجسد فهالمكان اللي يسلب طاقى البني آدم..
زياد؛ع ضمانتي ياشيخ مش حتندموا..
:ياودي باهي نعطوه اليوم ونشوفوا شن يدير..
فاتح؛حتندموا ع الأيام اللي عشتوها من غيري..
ضحكوا...
عقيل:هي سلم ولدي انزل من فوق الطاوله وامسحها..
فاتح نقز وشبح الواحد من المساجين حدفله نشافه وتلقاها وبدي يمسح بيها..
🍁فهالوقت كان خليل طالع يتصل..
قعد يستنى في دوره..
ولما جاه الدور..بلهفه ضرب الرقم واتصل...
وقعد ينادي وينادي وينادي وفي اخر لحظه انفتح الخط..
خليل بإبتسامه وعيونه مليانات دموع...
"نواستي"

#اذكروا_الله
#دقات_قلب
#البطل_المغمور2

....يتبع...