البطل المغمور "زهور القمر"

الجزء الحادي عشر1

#البطل_المغمور2 "زهور القمر"
#جمان_فريد
#الجزء_الحادي_عشر "علاش ياخليل1"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
الكلام اللي قراه يمس رجولته..يهينها..
حتى لو ماكانش يحس تجاه مرته بأي نوع من مشاعر الحب..تقعد مرته ع ذمته...
رجع يحس بشعور الندم..
ماكانش يحساب الحكايه صعبه لهالدرجه...
وهو يشوف لشاشة التليفون بغضب شديد ويفكر...
تذكر...
نصيحه مهمه خداها قبل يخش للحوش وياخد مرته لشقتهم..
🔺️في وقت سابق..
قدام الحوش..
كانوا واقفين مع صحابهم والجيران..
وصوت شتاوات النساوين مسموعه برا..
"مبارك مبارك"
خليل رفع يده وقال:الله يبارك فيكم جميعا..
شبح لخوه وقال...هيا..
جهاد هز راسه..
خليل مرر نظره ع الموجودين :تصبحوا ع خير..
ولف ومشي بيخش ورفيق معاه وجهاد وراهم..
فهالوقت هيثم طلع من الحوش ومعاه زياد بيوصله للمركز..
شاف جهاد كيف يبان مهموم ومش ع بعضه..
ولاحظ انه بيخش..
اشر لزياد اللي ركب السيارة يستناه بعدين مشي..
زياد معاه بعيونه لين وصل في جهاد..
جهاد وهو خش وقف لما انشدت ذراعه..
هيثم:نبيك شويه..
ووخر بيه بعيد عن التجمع..ووقفوا مع بعض..
هيثم:قاعد مذكر كلامي اللي قلته قبل تخطبها..
جهاد ابتسم وهز راسه بإيجاب..
هيثم:نجاحك في الامتحان مرهون بحاجه وحده بس معاملتك ليها ياجهاد لو جي وزدت كسرتها ولو بكلمه اعتبر نفسك فاشل فيه..وهني ينعرف صدق توبتك من عدمها..
🍁هيثم راجل وفاهم كويس اللي يحس بيه جهاد توا حتى وان كان لهالزواج غايه محدده يقعد صعب ع جهاد يتقبله بسرعه🍁
هيثم:وزي ماقتلك ماتعشمهاش فيك خليها ديما حاطه في بالها ان قعادها معاك مش حيطول.
جهاد هز راسه وقال:كله في بالي ماتخافش..
طبطب هيثم ع ذراع جهاد وقال:ربي يتقبل منك..
الكلمه حركت قلب جهاد..يعني اللي توا بيديره عمل صالح يدعيله ربي يقبله..
جهاد بإبتسامه:إن شاء الله..
هيثم:تصبح ع خير..
جهاد:وانت من أهله..
لف هيثم ومشي للسيارة..
وجهاد خدي نفس..بعدين مشي خش للحوش..
🔺️الوقت الحاضر
خدي نفس..
وهي بعيونها الخايفه عليه..
قلب التليفون وفتحه وطلع الشفره وحطها ع الطاوله وخدي موس وضربها بيه وطبعا الطاوله انضرت..
هي قعدت تشبح للموس وقلبها يرجف من الخوف..
رجع حط الموس ع الطاوله..وركب التليفون ومدهولها بدون مايشوفلها وقال:غدوة ان شاء الله نجيبلك شفرة جديده..
هي خافت ماقدرتش تاخد التليفون..
هو شبحلها ...
شافها كيف مبعده عنه ومقعمزة في اخر الكنبه وترعش مع بعضها..والدموع في عيونها..
هو ضحك نص ضحكه وقال:خفتي ياختشه..
هي قعدت تشبحله وخلاص..
جهاد ابتسم وقال:خودي..
هي غيرت عيونها للموس..
هو شبحله..ضحك ودفه بيده وطيحه من الطاوله..
بعدين حط التليفون ع الطاوله وبدي ياكل وهو يقول:كان ماقعدلك شي ذنبك ع جنبك..
هي قعدت تشبحله..شعور الخوف..تبدل بالأسف مع ندم شديد..
تمنت لو حافظت ع نفسها وصانتها لين جاها صاحب النصيب وعاشت معاه ليله حلوة زي اي عرسان..
تشوف في جهاد كيف يحاول يتجاوز اللي صار بصعوبه..
في النهايه راجل يقعد واعر عليه الوضع هدا واعر هلبه والكلام اللي قراه مايخلي في حد عقل..
مريم بنبرة باكيه:آسفه..آسفه اللي حطيتك فهالموقف الحقير..
هو وقف ماكله وقعد يمضغ في لقمته بعدين بلعها وتنهد وشبحلها وقال؛تعرفي من اللي حط روحه في موقف حقير حق..الخنزير اللي بعت الرساله..لاأني ولاأنتي..
وتوا بالله عليك انسي اللي صار وماتخليشي يوصل للي يبيه..واقربي وارجعي تعشي..
مريم مسحت دموعها قبل ينزلوا وهزت راسها وقربت منه بس قعدت بيناتهم مسافه بسيطه..
هو خدي عصبانه وقال:هي افتحي فمك افتحي ووريني ياحمشه..
هي ضحكت وفتحت فمها وهو حط فيه العصبانه..
مريم فنصت وشدت بيدها ونتشت منها وهي تضحك..
وهو يضحك عليها ..
هي ركزت ع يده..كان في صبعه الغنصر خاتم فضه شكله حلو وعجبها كيف طالع ع يده قمحية اللون الحرشه..
يده خدامه وملامح خدمته باينه عليها..
ابتسمت وقعدت تاكل وهو ياكل بعدين قال:ايه احكيلي شن درتوا في حفلتك طلعتي احلى وحده ولافي من غطا عليك..
مريم بغرور مصطنع؛فشر..مافيش وحده تقدر تغطي ع السلطانه يامريم..
خبط كتفها بكتفه وقال:ايوه ياجامد انت اللي مافيش منك زوز..
وهي قعدت تضحك...
ونست كل شي صار قبل شويه...
🍁🍁🍁🍁
"ماشاء الله ماشاء الله"
زياد بضحكه:خالتي قالت مايقعدش في خاطر وخيينك..
واحد منهم قال:اقسم بالله عيله عسل كلكم انتم..
زياد ضحك .
وفاتح شبح للي قال الكلمه بحده..
هو قالها بحسن نيه..بس فاتح تلقائيا حس بشعور الغيرة..
خميس:قداش ليا ع الأفراح..
زياد:ان شاء الله بعد تطلع يفرحوا بيك..
خميس:تي وين ناسي 6شهور متاع التأهيل!؟
زياد:شن هي 6شهور اهي فاتت زي لمح البصر..
فاتح:6شهور بس..خير من 3سنين و6شهور..
زياد؛ماه كان درت عقل في راسك راك خديتها سته شهور بس..
فاتح:لا مانبيش...ابتسم ابتسامه عريضه
وقال..نبي نقعد معاك..
زياد ضحك..
واحد منهم قال:ايه احكينا شن درتوا احكي بالتفصيل..
زياد ضحك وقعمز ع كرسي وقال:يوم الإربعاء كانت فاتحه ولد جيرانا اللي يكون خو راجل عمتي...
وكمل زياد يحكيلهم وهما منسجمين ومتشوقين..وياكلوا من ماكله العرس بشهية مفتوحه..
🍁ومديرهم..
كيف خش للحوش..
هديكا الليله الاقارب كلهم روحوا لحياشهم من الصاله طول..
والحوش ولى فاضي الا من اهله..
واهله شكلهم غطوا في نوم عميق..هدوء تام والحوش شبه مظلم ماعدا من الاضويه المخفيه وضي الجنان اللي كان عاكس ع لوحه زياد..
هيثم وقف قدامها وشبحلها..
ابتسم...والدموع عبوا عيونه...
تفكر قداش كانت اسيمه تتمنى يجي هاليوم..وقداش حاولت تقنع نسيبه بالزواج..
كانت تقوله..
" ماعنديش خوات نفرح بيهم وهي عندي زي اختي ونتمنى نفرح بيها"...
بس لله تقدير اخر...وله الحكمه فيما قدر وأراد..
تنهد من قلبه...وحول جاكيته وقعمز ع الكنبه..
شبك صوابع ايديه في بعض وشبح للفراغ وسرح بتفكيره فيما لايعلمه الا الله....
🍁🍁🍁🍁🍁
"هي خشي"..
خشت وهي تساوي في وشاحها فوق راسها وتمرر في نظرها ع السطوح شافت مخزن...وفي جنبه مكان فيه جلسة بسيطه نظام النجع وفوقها سقف لوح مغطيها المنظر حلو بالمرة.
جهاد؛نحب نرقد فوق السطح في الصيف ونقعمز بالساعات مرات...
شد يدها ورفعها معاه وهو يقول:زمان كنا نديروا في تلفزيون فوق اني وخوتي وامي وبوي...
خش هو وياها للمكان وقعمزها وقعمز جنبها ومازال يحكي..
جهاد؛تبدا امي دايرة هديكا الشرموله الحارة..وحداها جلوف دلاع.....وحني ناكلوا ونهدرزوا ونتفرجوا ع الكورة...حتى امي تتفرج معانا وتشجع وهي مش فاهمه شي..وشن اسمه هدا اللي يجري..وعلاش هدا طلعوه..وعلاش ماحسبوش قول تسلل شني هدا شن معناها..وكان طاح واحد من اللاعبين..ياحليلي ياناري ع ميمته اللي تتفرج..
مريم بضحكه:امك عسل معسل وجميله هلبه وصغيرة عليكم..
جهاد تنهد بإبتسامه وقال:تزوجت صغيره هلبه وهي تقرا في المدرسه..
مريم ابتسمت وقعدت ساكته..
شبحلها شويه بعدين قال:نقولك..
شبحتله..
جهاد:شن رايك تخليها تقعميزة مصارحه يعني نحكوا اني اللي عندنا كله بش كل حد يعرف عن الثاني كل شي...
هي فهمت قصده يبي يطمن اكثر من ناحيتها..
تنهدت وقالت؛اسأل واني نجاوبك بكل صراحه..
جهاد شبحلها شويه بعدين قال:انتي...غير عيونه وقال..كنتي تحبي ولد عمك...؟
ضحكت نص ضحكة الم بعدين قالت:ايه وهلبه حب اعمى...اني تربيت في حوش عمي اللي هو بوه..امه كانت تحبني هلبه...وكنت نبات عندهم واني صغيرة هلبه لعند مابديت نكبر امي وخوتي معاش خلوني نبات بس نمشي شبه كل يوم بش نعاونها وفي الحقيقه اني كنت نمشيله هو..
خوته كلهم كانوا يدللوا فيا بس هو بزايد معاملته كلام المعسول حركاته..حركلي مشاعري وخلاني ننشد ليه هلبه...
بس في نفس الوقت كنت نخاف منه...ونتهرب من نظراته..
كنت نحس في روحي صغيرة هلبه ع العلاقات..
لين جي اليوم قالي فيها الكلمه اللي توا مانكرهش كلمه قدها...نحبك..وقتها كيف خشيت الجامعه...وكنت متحمسه هلبه للطب..بس كلمته هادي شتتتني ضيعتني...
قعدت مش عارفه شن ندير نلهى بقرايتي ولا بيه هو...
زدت هربت منه...وهو يلحق فيا...ومن كثر ملاحقته ليا استسلمت..
نزلوا دموعها وهو يشوفلها ويذكر في البنات اللي مروا عليه ودار معاهم نفس الشي..
رشفت وقالت:في الأول كان كل شي عادي كلام حلو..ولما نتلاقوا في حوشهم نهدرزوا عادي..
وبعدين بدي جو المكالمات وهو فيهم يكون جريء بزياده كذا مرة نصكله في الأزرق وبعدين نرجع مرة تانيه غصب عني..
ووللأسف تنازلت واستسلمت..وبدينا لما نتلاقوا...سكتت ونزلت راسها ودموعها سيل...
وهو غير عيونه عنها وقال:فاهم هي هكي ديما تبدا نظرات بعدين كلام بعدين لقاءات ..مرة نشد يد والمرة اللي بعدها..
مريم بنبرة مخنوقه:اسكت بالله عليك..
هو سكت وتنهد بحرقه..
قعدوا ساكتين شويه بعدين هي قالت:ياريت..مسحت دموعها وهي تقول...ياريت ماليا كانوا ناس صعبين ومسكرين عليا ياريت خوتي كانوا واعرين معاي زي خوت صاحباتي..حني كل شي عندنا عادي..كل شي..تلقى مرت الخو تهدرز مع سلفها وتضحك هي وياه وطق في يده عادي..
بنت العم مع ولاد عمامها خوالها خالاتها عماتها مافيش حدود نهائي..وفي قولة حني خوت حني خوت..
جهاد؛غلط الشي هدا غلط كبير..ريتي اختي تهاني لاعمرها وقفت ع ولد عم ولاعمه ولاخال ولاخاله امي كانت شديده معاها في الامور هادي..وهي توا تلقيها بروحها تتجنب فيهم الوحيده اللي معندهاش خلطه بيهم والتعامل معاها رسمي عكس الباقي..
امي مانعتها تطلع تبات برا الحوش الا اذا هي معاها..ومش خليتها تخالط بنات العيله..
مريم رشفت وقالت:صح لاحظت الفرق بينها وبينهم لبسها محترم هلبه..
جهاد؛كلها رباية امي وحني معاها واعرين رغم انها حتى هي مش هوينه لسانها اطول منها..
ضحكت وهي تمسح في دموعها بعدين قالت بتنهيده:ايه..هدا كل اللي عندي ياجهاد..واقسملك بالله لاعمري عرفت ولاكلمت غيره والله العظيم..
جهاد؛علاش تحلفي اني مصدقك..بس نبي نعرف كان مازال قاطعاته وقالت:رد بالك تقولي مازال تحبيه..اني توا لونشوفه نقتله الخنزير هدا...مسحت انفها بقفى يدها وهي تشبح القدام وقالت...نار تحرقه...
هو هز راسه وقعد ساكت..
شبحتله وقالت؛ايه وانت كنت صايع افندي..
ضحك وقال؛هلبه..تصدقي حتى الخيال مافكرتش يجي يوم ونتوب لتوا مش مصدق روحي وانتي السبب..شفتي كيف كان وجهك خير عليا..
ابتسمت بإمتنان ودموعها مغرقات عيونها..
وهو ابتسملها..
مريم:باهي..والحب...ماحبيتش قبل بكل...
جت بين عيونه رتاج وتفكر اول لقاء جمعها بيه...
يوم اللي طاحت فيه برايتها وقعدت تدرجح لين وقفت عند رجليه...
ابتسم وعيونه تعبوا بالدموع..
مريم لما شافت نظرته هادي حست بضيق وقالت:يااه شكلك متليع..
تنهد وقال:قصتي معاها قصه..ماعرفتش روحي عاجبتني ولاحبيت نملكها ولامش عاارف...
وحكالها قصته مع رتاج من الأول للأخير...
وهي كانت مركزة عليه وهو يحكي عنها عيونه يلمعوا..نبرة صوته فيها حسرة...وملامحه كلها ألم...
جهاد؛عرفت شن نحس ناحيتها اخر مرة ريتها فيها في الجردينه...قلبي..قلبي لما شفتها مش عارف شن صارله وعمره قلبي ماتحرك لبنت غيرها هي
مريم ساوت وشاحها بعدين حطت ايديها ع رجليها وشدت ع قبضتهم بقوة..وع وجهها ارتسمت ابتسامة..
جهاد:اييه هدا اللي عندي كله...
مريم؛باهي يعني بعد سنه لو تلاقيت اني وياها تتزوجها..
جهاد قعد ساكت وهو يفكر..
مريم؛هي توا ارمله...يعني بعد ماكل حد فينا يمشي ع حاله ترجعلها؟
تنهد وقال؛الكلام في الموضوع هدا سابق لأوانه..هو اني مرات بعد نتفارقوا تقعد سنتين تلاته عزابي..نبي نخدم ونكون روحي وفي بالي مشاريع الزواج مش منهم..
مريم قعدت ساكته ومن داخل صدرها ضايق لأبعد حد...
جهاد:وانتي بعد عام لشن مخططه..
مريم شبحلته وقالت؛قرايه وبس وتني ركاب حنكون طالعه من تجربه اليمه وكارهه الزواج ونبي نتفرغ لقرايتي بس..وضحكت..
جهاد؛تجربه أليمه صار!؟
مريم قعدت تضحك..
هو ابتسم بعدين قال؛لكن والله احسن حاجه ديريها..
مريم:ايه تعالي هني..مفروض من توا نتفقوا ع سبب الطلاق ماتفهمناش مش سبب مقنع راهو..
جهاد؛فكرت فيها...اني مانجبيش في صغار..
ضحكت مريم وقالت؛مبردك..
جهاد:نحكي جد.. اني مانجيبش في صغار وانتي صبرتي عليا وتحملتي ولماتأكدتي ان مافيش امل طلبتي الطلاق وهدا حقك مايقدر حد يلومك..
مريم بصدمه؛بتحطها في راسك انت!!؟ تحسابها ساهله انت معاش حد يعطيك ياجهاد بعدين!
جهاد بضحكه:احسن..مش مهم..المهم انتي تعيشي حياتك ويجيك راجل يستاهلك تكملي معاه عمرك...
مريم نزلوا دموعها وهي تقول؛كل مرة تفاجئ فيا اكثر من المرة اللي قبلها..
جهاد ضحك وقال؛حتى اني متفاجئ في روحي تصدقي..
ابتسمت بألم وهي تشوفله..
وهو يشبح لخاتمه في صبعه الغنصر ويلعب بيه بالإبهام ويضحك..
وقلب مريم يدق بقوة...بقوة...واحساس في داخلها قاعد يكبر اتجاهه مش قادره تمنعه..
شبحلها وقال:هي تنزلي بنرقد خلاص..
مريم ضحكت ومسحت دموعها وقالت:هيا..
وناضوا الزوز..ومشوا نزلوا لشقتهم..
هي طول مشت لدار النوم..
وهو فتح الكنبه متاع الصاله ورقد عليها..
جاه النوم طول...
اما هي قعدت سهرانه تبكي بصمت...
الندم بيقتلها...وشعورها تجاه جهاد بادي يعذبها....
🍁🍁🍁🍁
فجر اليوم التالي...الجمعه...
بعد ماصلت الفجر قعمزت..وتت الفطور..
وقعمزت لشناطي حوايجها بش تحطهم في الدولاب..
هو روح من الجامع..وتوجه طول لدار النوم..
خش عليها لقاها مقعمزة قدام الدولاب المفتوحه ع روس صباعها وعاطيه بالظهر وحداه شنطه كبيرة مفتوحه...
هو ابتسم وقرب منها وطبس ع راسها وطبع قبله..
هي رفعت راسها وقالت بضحكه؛خليلو..
خليل بأبتسامه؛شن ديري..
هي وقفت ع حيلها وقالت:نحط في حوايجي في الدولاب اللي لقيت فيه مفاجأة لما فتحته..
خليل:حاجه بسيطه الخاتم مش هداكا الشي لكن ان شاء الله ربي يقدرني ونجيبلك خير منه..
نسيبه وضرباته بقبضة يدها ع كتفه وقالت:فكني من جوك ترا..يهبل يهبل الخاتم..واها لبسته شوف..ووراته يدها...
هو ابتسم بحب...
نسيبه؛ بعدين مانقصداش هو اني..قصدي ع هادو اللي معلقات في الدولاب...
كانت تقصد مجموعة عبايات شرعيه وشاربات كبار..
هو تنهد وخدي ايديها الزوز وشدهم وشبح لعيونها وبدي يقول:شوفي في شرعه سبحانه وتعالى واجبك طيعني طالما اني مانأمرش فيك بمنكر...وفي الموضوع هدا لو قتلك البيسهم لازم طيعي لأن هدا امر مني...لكن هدا قبل ليكون امري اني هو امر ربي..واوامر ربي العبد ينفذهم ع خاطره هو وبس..واني هكي نبي....نبي نقولك البسيهم لكن لله مش طاعة فيا اني..مايكونش مربوط بيا ولا بغيري بالخلق اللي يجوا ويمشوا نبيه يكون مربوط بالدايم سبحانه...انتي لبسك يعتبر مقبوله عبايات بالطوات طوال..بس اني نبيك تاخدي ترقيه...
هي ضحكت وعيونها مليانات دموع..
اشر بعيونه ع جهة فيها كتب وقال:هادم مخليهم ليك اقريهم ان شاء الله صفحة اليوم..وتو تفهمي عليا مزبوط..
هي بإبتسامه؛تمام..اني بنلبسهم طاعة ليك لأن طاعتك من طاعة ربي تمام...وبعد نقرا ونفهم زي ماقتلي اكيد حتبدا الغايه الوحيده طاعة ربي..
هو ابتسم بحب وقرب باسها ع جبينها بعدين بعد وقال:ويقولوا علاش يحبها..
رفعت حاجبها وقالت:من اللي قال!..
رفع حاجبه وقال بخوف مصطنع:يالطيف حتى نبرة الصوت تغيرت..
نسيبه؛ع العموم خل اللي بيقول يقول..طز فيهم كلهم..وانت تعالى جاي..
هو رفع حواجبه وحرك راسه بمعنى شني..
نسيبه وهي تتكلم بيدها؛البوكسينج وين!؟؟...ومدت فيها...
خليل بضحكه؛يامراة راك وليتي متزوجه وبديري عيله خليك انثى ياهمي..
نسيبه رفعت حاجبها وقالت:معناها مادرتاش...شمرت كمام البيجامه..وكورت قبضات يدها ورفعت قدام وجهها وقالت..انت موجود حبيبي..
خليل فنص وقال؛موجود شني!..كيف !؟
نسيبه: تو تعرف كيف..
وكيف جت بتعطيه بوكس خواه..ولف وطلع يجري..
نسيبه:ماعندك وين تهرب..
وطلعت تجري وراه...
🍁لوطا...
صالحه:يالطيف هدا شنو!؟
عفاف بضحكه؛يلعبوا في شدني ونشد معاك..
الموجودين قعدوا يضحكوا...
وكملوا فطورهم وهما يهدرزوا ع اجواء العرس..
ومرت الساعات..
وعفاف وخواتها وبناتهم يجروا ويضموا في حوسة العرس..
طلعوا غسلوا حتى البساطات..كانوا يبوا يروحوا والحوسه تامه...
ام سجى:الناس تاخد وتنشد ع سماح في العرس..
عفاف تسيق وماتبيش ترد..
:كيف نعرف شن صاير بيناتكم..
وعفاف ع وضعها ساكته وخلاص..
ام سجى:باهي ماتتكلميش لكن حني بنقولولك اختك جاها موضوع وشكلها هالمرة بتوافق..
عفاف ولاكلمه...
شبحوا الخوات لبعض بيأس..بعدين اللي هادي ولت للي دير فيه وخلوا عفاف غارقه في شعور الإشمئزاز اللي تحسه وين تجي سيرة سماح..اختها..
🍁🍁🍁🍁
واقفه ع رخامة البار متاع المطبخ..
وبوها مقعمز قدامها وهي تهدرز معاه..
سارة؛هو اني جربت مرة نخش جامع ونقرا وانت تعرف شن صار..هدرزة وقرمة وتصرفات ماتليقش باللي جاي يحفظ قرآن وفوق من هدا اللي يحفظوا لاهيات بالهدرزة..لا وتلقى فيدها المصحف تهدرز بيه ولاتحط فيه ع فمها كان قالت حاجه ماتبي حد يسمعها...الله يرحمها ماما قالتلي احفظيه في الحوش خير...
هيثم؛وتوا تغير رايك..
سارة؛ايه لأن القرآن يبي حفظه تجويد واتقان..
هيثم:باهي انتي مش كنتي ناوية تخش كورس انجليزي الدرجة الثالثه..
سارة؛الانجليزي نقدر نتعلمه في الحوش..بس القرآن لا..
ابتسم وقال:تمام..اني تو نشوف الشيخ عبدالجليل كان يعرف مكان ثقة تو نحطك فيه.
سارة ابتسمت وقعدت ساكته..
ع خشة ماجده وهي تقول:بعدين العشية بنمشوا لنوسه..
هيثم؛علاش..
ماجده:شن علاش المحضر..بيديروه بسيط قالت عفاف..
هيثم؛والله ماليها داعي هالمصاريف الزايده..
هما اللي عندهم حطوا في الشقق وع العرس...
ماجده؛وباك من امهم مش منهم..
هيثم؛كله زي بعضه مالاش داعي من اساسه..ناض وقال..خل نمشي نوتي روحي للصلاة..
ومشي من حداهم..
ماجده؛بتمشي ولا..
سارة:اكيد من غير سؤال...
ماجده ابتسمت وبدت تقرض في البصل للغدي..
🍁🍁🍁🍁
"اهو يام اتصلتلك بيها"
خدت سدينه التليفون وحطاته ع وذنها كان الخط ينادي وتراجي في اللي متصله بيها ترد..
🍁وهي كانت مقعمزة تشرب في فنجان قهوتها وتسمع في برنامج صباحي ع الراديو..
"مصاريف الافراح توا ولا شي مبالغ فيه الناس تبي تفخفخ ع بعضها وخلاص"
عواطف:طيح سعدكم..ربي يقول فأما بنعمة ربك فحدث..لكن شن بنقول حني الليبين وجوه فقر..زي ولدي اللي جاي من بعيد توا..
شويه ووصل فيها راجح وقعمز وقال بضحكه:فاصله ع البرنامج شكلك..
عواطف:اللي يتصلوا يكسروا في الرقبة مثالية زايده..
شويه رن تليفونها..قاماته وشافت الرقم مطت شواربها بملل..
وفتحت الخط وردت..
عواطف:ايوه..
"السلام عليكم كيف حالك ياعواطف"
عواطف:وعليكم السلام..مني معاي.
هي كانت عارفه الرقم بس تقصدت دير هكي..
"كيف ماعرفتنيش اني سدينه وهدا رقم بنتي دانيه مش مسجل عندك!؟"
عواطف قلبت عيونها بضجر وقالت؛لالا نسيت نسجله معليشي..
"معليشي عادي...مبروك ع بنيتك وان شاء الله بهناها"
عواطف:الله يبارك فيك..
"سامحيني لولا هالظروف راهو جيت"
عواطف:مشكورة..
سدينه حستها تكلم فيها فوق من نفسها فقالت تنهي المكالمه
"باهي..مبروك ع بنتك مرة تانيه والعقبه للباقي"
عواطف:شكرا..بالسلامه..
وسكرت عليها من غير ماتسمع ردها..
راجح:مني؟
عواطف:وحده معرفه ماقدرتش تجي للعرس اتصلت تبارك..
وحطت تليفونها ع الطاوله وولت تشرب في قهوتها وتسمع في الراديو...
🍁سدينه وهي تحاول تبان عاديه:هاك بنتي تليفونك..
دانيه خدت تليفونها وقعدت بعيونها مع امها اللي نضت للكوجينه..
دانيه؛وجهها ماعجبنيش.
رتاج؛لاعادي مافيه شي زي قبل..
دانيه بقلق:زعمة! يعني مثلا ماكلمتهاش عمتي بأسلوب مش حلو..اني حاستهم رافعين خشومهم علينا ومايبونيش..
رتاج؛لوحي عليك الكلام الفاضي وكان مايبوكش راهم عفسوا في الموضوع ولاخلوه يتمم خطبته عليك..
دانيه:تقولي هكي؟!
رتاج؛ومانقولش في غيره...
كانت تحاول تقول عكس ماحاسه ع خاطر اختها..
ع جية مقبوله:وين رشيد..
دانيه؛علاش..
مقبوله؛بنبعته..
دانيه:رشيد..يارشيد
شويه وجي رشيد من المربوعه.قال:نعم..
مقبوله؛انزل للمحل متاع حسام جيبلي منه شكارة شكلاطه متاع مناسبات
هو قدم وخدي منها الفلوس..
ومشي بيطلع..
جية مجاهد من داره:رشيد وين ماشي..
رتاج شبحت لمقبوله برفعة حاجب..
مقبوله؛اني بعته يجيبلي حاجه..
مجاهد؛ماتعطلش..
رشيد:حاضر..
ومشي طول للباب..
مقبوله؛ ايه حقه مجاهد بوك يبيك..
هو هز راسه ومشي للدار ومقبوله وراه...
رتاج؛واضحه تبيه يرفعها لحوش ماليها..
دانيه تنهدت وقالت؛وهي في شقتها وحاكمه فينا وتوا معانا وسيطرت علينا..
رتاج بهمس:لو امك مراة قد حالها راهو ماصارش فيها هدا كله..
دانيه سكتت وهي تفكر في امها بحزن...
🍁في الدار
مجيد؛نبيك ترفع مقبوله لحوش اهلها عندهم مناسبه..
مجاهد بعدم رضا؛وخيره مايجوش خوتك يرفعوك يامرت بوي..
مقبوله:قتلك يامجيد بلاش تو نقول لخوتي..
مجيد؛معقوله يامجاهد انت يطلع منك كلام زي هدا!؟ وبعدين قبل كنت ترفع في ماجده وتجيب..
مجاهد؛هيا كلها مرة ولااتنين بس..اني الموضوع هدا مانبيكمش تاخدوا عليه من الاخير اني نخدم ونتعب ومن حقي نرتاح نهار عطلتي..
مقبوله؛خلاص خلاص اني اسفه..
مجيد شبحلها بعدين شبح لمجاهد وقال؛شكلك قلقت..
مجاهد بضيق؛يابوي ربي يهديك معاش تتحسس ودخل روحك في الموضوع والله مانقصدك..باهي خلاص..قرب منه وباس راسه وقال..نرفعها للمشوار هدا واي مشوار تبيه..راضي هكي..
مجيد تنهد وهز راسه بإيجاب..
ومقبوله تشبحله برفعة حاجب..
بعدين وخر وقال:ماتبي شي تاني..
مجيد:سلامتك ياولدي..
هو هز راسه ومشي طلع من الدار وهو معصب..
مقبوله:سامحني يامجيد حطيتك في موقف بايخ..
مجيد ابتسم وقال؛ماصار شي حلقومتي..
ضحكت مقبوله...
🍁🍁🍁🍁
طلعوا الرجاله ومشوا لصلاة الجمعه..
والعرايس اللي هادي لبست وتأنقت بش تنزل لحوش العيله..
نسيبه لبست فوق لبسها عبايه شرعيه وشاربه كبيرة..
اما مريم لبست بلوزة طويله وسروال ووشاح...
طلعوا الزوز من شقاقهم مع بعض..
نسيبه بإبتسامه؛اهلا..
ابتسمت مريم..
سكروا البيبان وجو لبعض وقعدوا يسلموا بالخد..
نسيبه:مبارك عليك.
مريم؛الله يبارك فيك..مبارك عليك حتى انتي..
نسيبه:الله يبارك فيك..
بعدوا عن بعض وقالت نسيبه:شن جو..
مريم:تمام...بس متوترة شويه..
نسيبه:من شني!؟
مريم:من جو العيله مش عارفه كيف نخش فيهم انتي تعرفيهم اكثر مني .
نسيبه:خشي بالطول والعرض ومادوريش عمتي وبنتها الزوز اعسل من بعض..ومعاهم الحاجه صالحه سكر زياده..
ضحكت مريم وقالت:شكلك انتي حلوة معجونه..
نسيبه بضحكه؛وانتي بكلاوة معسله..غمزت بعينها..شكلناحننسجموا مع بعض..
مريم بضحكه:إن شاء الله يانسيبه والله تريحتلك..
نسيبه؛لا استني حبيبتي كان تبينا ننسجموا ماتقوليش نسيبه مانحباش ..قولي نوسه..نوسه وبس..
ضحكت مريم ؛ باهي يانوسه...واني ناديني مريومه..
نسيبه بإبتسامه:اتفقنا...هي انزل..
خدت مريم نفس ومشت للدروج ونزلت ونسيبه وراها..
مريم؛شن جوها السلفه..
نسيبه:ماخلطتهاش قبل نحس فيها ع حالها..
مريم هزت راسها وهي ساكته..
وصلوا لوطا..فتحوا الباب الفاصل وخشوا للحوش..
قابلتهم عفاف فيدها شبب بترفعه للمدخل لما شافتهم وقفت وقعدت تزغرد..
هما الزوز ابتسموا..
شويه جت تهاني شافتهم وزغردت حتى هي..
عفاف:مرحبتين بكنيناتي مرحبتين...الدكتورة والمدرسه..
ضحكوا الزوز...
جتها نسيبه سلمت عليها وباست راسها..
بعدين جتها مريم وسلمت عليها بنفس الطريقه..
وبعدين سلموا ع تهاني...
عفاف:بروا للصاله بنياتي بروا ارفعيهم ياتهاني..
تهاني بإبتسامه؛هي تعالوا..
ومشوا مع بعض وصلوا للصاله..
وخشوا..
زغردوا كلهم ماعدا ام سجى اللي حست ان اختها مداير الفرق من توا بين بنتها وبينهم..
وسجى تشبحلهم وهي تسحن وتشوف في تهاني كيف فرحانه بيهم...
سلموا ع الكل ولما وصلوا فيها سلمت بالسيف..
هما حسوا عليها بس طنشوا..
بعدين مشوا قعمزوا..
:كيف حالكم ياعرايس..
الزوز بأصوات متقطعه:الحمد لله..
:مريم منين انتي بالزبط..
:من ******..
:اها..باين عليك...
ابتسمت مريم مجامله..
شويه خشت عفاف وهي تقول:المزينه بعد الغدي بتجي...
نسيبه:العربي والفجرة لما يروح خليل تو ينزلهم..
عفاف:وجهاد ينزل حاجة مريم..بتقعدوا في داري..
هما هزوا روسهم مبتسمات...
وقعدوا يهدرزوا لين روحوا الرجاله من صلاة الجمعه وحطوا الغدي..
وبعد الغدي بشويه جت المزينات...
ونسيبه ومريم خشوا معاهم لدار عفاف..وبعد مارجالتهم جابوا حاجاتهم دخلوها معاهم...
🍁🍁🍁🍁
بعد العصر..
طلع مجاهد بمرت بوه...
وطول الطريق صمت تام لين وصل بيها لحوش اهلها..
وين جت نازله..كانت واصله معاها وحده من خواتها عندها بنت عمرها 18سنه..ومن ورا خمارها جو عيونها ع مجاهد وعجبها هلبه...
وهو بعد ماحطها توكل ع حاله..
وبعد عشرة دقايق..كانوا كلهم بربطة المعلم طالعين مع خوتهم لحوش البنت اللي بيخطبوها لخوهم...
🍁🍁🍁🍁
في الخيمه..
كانوا نسيبه ومريم مقعمزات ع الكوشه متاع ليلة الفرح..
والزوز لابسات البدله الكبيره وكل وحده طلعت احلى من التانيه..بالذات نسيبه اللي كانت تفاجئ في اللي يعرفوها في كل طله
ريحان؛محلاها عميمه امس وتوا طالعه تهبل هلبات..
جنان؛تتفكري لما لبسنا هكي حتى حني..
ريحان؛مش هكي
جنان؛يشبهلهريحان:صح..
سارة:حلوة هلبه مرت جهاد طالعه زي اللعبه..
تهاني :شبهوها بالروسيات..
سارة:صح فيها منهم..الله يبارك...ايه بنحكيلك بنخش جامع نحفظ قرآن تخشي معاي..
تهاني:اكيد..فالجامع هدا بتخشي..
سارة:لالا بعد هديكا المرة حرمت بابا قالي تو نشوفلك..
تهاني؛خلاص اني معاك..
سارة بإبتسامه؛خل نشوف حتى دنون..
تهاني بمزح:ييي هديكا انخطبت تو بتزهق كبدنا بخطيبها..
ضحكت سارة..
🍁🍁🍁🍁
وعند دانيه...
كانت مقعمزة حاطه السماعات في ودانها وتسمع في درس لغة انجليزيه..وحداها رتاج راقده وحمها جاي بالنوم..
وسدينه في الحمام مشغله الغساله...
ومجيد ينادي من المربوعه؛جيبوا ميه...انتي...سدينه ياطرشه..
وياريت لوكانوا الولاد قاعدين بس للاسف مجاهد خدي خوه وطلعوا..
ومازال مجيد ينادي هما لما ماردوش يحسابهم يلعاني فيه...
قدم بالكرسي للباب وقعد يخبط عليه بقوة..
سمعت سدينه التخبيط انخلعت وطلعت بسرعه..
ووصلت فيه وقالت؛خيرك..
مجيد بعصبيه شديده؛وينك ياحمارة وينك وينك انتي وبناويتك يابهايم..
سدينه بخوف؛والله ماسمعتك والعه الغساله وصوتها عالي والبنات شكلهم راقدات..
مجيد:ايه ايه صدقتك مالا شنو..وحدفها بالريموت.
بس ماجاش فيها وطاح ع الأرض..
وهي ترعش مع بعضها..
مجيد؛بري جيبي ميه تحركي..
سدينه؛حاضر...
ومشت تجري للكوجينه عبتله طاسه وجاته تجري بيها
سدينه؛هاك تفضل..
خدي الطاسه شرب شويه بعدين قال:سخونه ماتنداق..وبزعها ع وجهها..
سدينه صدمتها الحركه بقوة..
هو حدف طاسه اللي كانت ستيل وقال:جيبي ريموت انتلفي جيبي..
هي وهي ترعش ومبلوله طبست جابت الريموت ومدتهوله وهو خداه بقوة وقال:ربي يصبرني لين تروح مقبوله..
ووخر بكرسيه للخلف وولى داخل..
وهي رفعت الطاسه..وخشت الكوجينه وسكرت ع روحها..
وبدت تبكي بقهر..من قهرتها قعدت تعض في يدها..
اكثر شي قاهرها هو ضعفها وخوفها اللي حتى وهو مقعد مش قادره توقف في وجهه ولاديرله حد...
🍁🍁🍁🍁
الساعه الحادية عشر ليلا..
خليل:وحق ربي غزاله ماريتش زيها تنين..
ابتسمت بخجل..
خليل بإبتسامه؛توا ياحلو بعد تغير وتي شنيطه صغيره غدوة من الفجر مستقدين للخمس نقعدوا يومين في غنيمه والاثنين الصبح نروحوا..
نسيبه بفرح؛الله ع مفاجآتك يابو المفاجآت ويقولوا علاش تحبيه..
خليل بضحكه؛صار حتى هما يقولوا..
نسيبه؛مالا شنو يقولوا غيرك عندك انت..
خليل بضحكه؛مشفشفه ختشه..
نسيبه وهي شاده ضحكتها:حول من قدامي خل نفوت..
وخر..
وهي قعدت تمشي بصعوبه بقفطانها الكبير وهو يشوفلها كيف تمشي ويضحك عليها..
وبعدين مادرقت من قدام عيونه خففت ضحكته وحلت محلها ابتسامة حزن....

اسفه قسمته لزوز مالحقتش نكتب بكري اليوم...
اذكروا الله..
#علاش_ياخليل
#البطل_المغمور2

....يتبع...