اسكربتات مُتنوعة"بقلم رُقية محمد عبداللاه"

الحلقة الرابعة

شديت علي ودنها لحد سمعت كلامي بعد ساعة او اكتر لقيتها كتبت أسكربتين ونص أو تلاتة أخدت منها التليفون وهي خرجت تعمل حاجه تاكلها وقࢪأت الأسكربتات وكان في قمة الجمال والأبداع وأكتر أسكربت عجبني بتاع
" سأكون ما أريد " وأنا بقراه كنت بتلذذ النجاح والشغف والطموح اللي جوه الأسكربت لحد ما عيني دمعت.

خرجت بره ورحت الصالون لقيتها معبية طبق كبير إندومي بالخضار وأنا أقول الريحة ضربت في المكان ليه؟ ماشي يا رُقية مشغلة التليفيزيون جيبالي قناة سينما بتاعت روتانا مااشي يا دكتورة خلصت أكل ولقيتني قاعدة جنبها إبتسمت وبعدين عنيها لمعت وهي بتابع الفيلم لحد آخر حته لحمادة هلال وهو بيفوز بأسم مصر.

- تعرفي يا مروة إني أنا بحب الفيلم ده جداً جداً عارفة ليه علشان بيتكلم علي الطموح والأصرار وإنك إزاي بتتأثر باللي حوليك والطبقة الغنية والفقيرة بجد كاتب الفيلم ده أنا عاوزة أشكره طول العُمر.
- ‏وانا كمان بحب الفيلم ده علشانك أسمه كدا جميل وبسيط "حلم العُمر" بتاع حمادة هلال بطل ملاكمة.
- ‏أيوه يا مروة بالظبط كدا تعرفي انه سلم نفسه لشلة مش كويسة وكان بيسكر ويرجع تعبان بالليل لما سابته و اتجوزت حبيبته معقول يا مروة يكون الأب سبب في تعاست بنته.
- ‏لا حول ولا قوة إلا بالله متزعليش يا حبيبتي!
- ‏مش زعلانه كله قسمة ونصيب لكن اكتر جُملة بتوجع قلبي.. لما كان بيقول لِــ المُدرب بتاعه ولا مين حس بيا؟
- ‏بس يا رُقية أنا قلبي واجعني لوحدي.!
- ‏خلاص يا ستي فين تليفوني أكلم ماما!
- ‏جوا علي مكتبك يا ست الكل!

دخلت أوضتنا ورنيت علي ماما وحشتني جداً بس أعمل ايه هي مصممة أنها تفضل في كفر الشيخ عرضت عليها أكتر من مرة لكنها بترفض وكُل مرة تقولي"أنا أتولدت هنا وعشت هنا وكبرت هنا وأتجوزت من هنا ويستحيل أسيب مكاني" انا كان مفروض عليا أقعد هنا في أسكندرية علشان جامعتي وبعدين أنا حسيت إني جزء من المكان ده مش برتاح غير في شقتي دي اللي بتطل علي البحر.

لقيت مروة بتحضني من ضهري وتضحك
- الكتكوت بتاعي بيفكر في حبيب القلب ولا إيه؟
- ‏يا شيخة إتنيلي!
- ‏تيبب يلا إنشري كتاباتك كدا أبتدي بدار الكتابة.
- ‏فُكك يا أسطي.

لقيتها بتبحلق فيا نشرت جزء من كتاباتي وبعدين أذن العشا صلينا مع بعض وكل واحدة فينا كانت بتفكر في بكرة مشغلتش بالي بالفيس فقومت نمت بدري جسمي مُرهق جامد النهاردة.

٪٪٪٪٪٪•••٪٪٪٪٪٪•••٪٪٪٪٪٪٪•••٪٪٪٪٪
في الصبح.

صحينا كــ المُعتاد قبل صلاة الفجر كل واحدة فينا أدت ركعتين قيام الليل إحنا بنعتبره ركن سادس لازم نصليه شوية وكان الفجر أذن صلينا وقعدنا نقول اذكار الصباح جات الساعة خمسة ونص قمت دخلت بلكونتي.

كنت خارجة بشعري محدش موجود في السعادي
بدأت أسقي الورد البنفسجيّ بتاعي ورد اللافندر أنا بحب ريحته جدا ولازم أخطف نظرة عليه كل صبح عجبني منظر الشروق قعدت أستمتع بيه ومحستش بالوقت.